كاتم ضمير

الحلقة ٣٧

#كاتم_ضمير

((( بقلم زينب ماجد )))

الحلقة_٣٧

صلفة أمنياتي الرادتك
سألتني عنك بس صمت؟؟
كلش ولا حاجيتها
كالتلي وينه؟؟  وجاوبت
ما ادري ما دليتها
(إيهاب المالكي )

جانت اكو كاميرا مراقبة بالممر الوكعت بيه ..
وكعت وخمس دقايق اني واكعة ومحد يدري .. بس التليفون ما بطل رن .. اجت نسرين على صوت التليفون وهي تصيح : ايناااس تليفونج يرن ، وينج

من شافتني واكعة بالممر فزت وكامت تصيح  .

دنكت حاولت تشيلني .. التليفون يرن عافتني وركضت على تليفوني ردت عليه .. طلع ليث
بلغته وهو جان حاس بيه شي
على ما سدته منه وخابرت ع الولد جوا اجو شالوني بالسيارة خابر ليث لحكهم للمستشفى ..

اللي بالقاعة خابروا على عابد بلغوه ...
وصلوني للمستشفى فتحت عيوني بس كمت اتقيئ وارجع ليورا .. بسرعة الدكاترة سووا غسل لمعدتي .. طلعت روحي لحد ما كملوا ...

حطيت راسي ع السديا والدكتور يحجي ويا ليث ويكوله بحالتي وليث يستفسر ويناقشه .. سألني : ماكلة شي ..

حجه ليث:  اعتقد كالت دولمة اكلت وصارت عدها حموضة

هزيت راسي واني اون  : ايييي 

الدكتور : حالة تسمم والحمد لله اداركنا الامر ربما الاكل غير صالح .. انتبهي لصحتج .

ليث : تسمم اكل لو تسمم متعمد

الدكتور دون الحالة وما علق وليث اندار عليه يستفسر .. وصل عابد : ها ، خير انو

اجا لزم ايدي : شبيج ابويه شبيج عمري شصارلج

ليث: حالة تسمم

- بسبب شنو

- اكل .. اكلت دولمة وتسممت

- ومنين هاي الدولمة

ليث : بعد هاي مسؤليتك .. مو مسؤليتي .. اذا جنت مو خيال وما تكدر تحميها تكتر

عابد : انت رايد ابتلي بيك بنص المستشفى

- لا تغطي فشلك بالصياح الصاير بيها بسببك

ايناس : ليث عابد والله تعبانة

عابد : اطلع منا

- واني ما عاجبني اكابل وجهك .. اذا تحتاجين شي خابري .. عندج العافية

طلع من المكان اندار عابد : شكو تخابرينه وتستنجدين بيه .. شكو تبلغينا واني اخر من يعلم

- ليث تعبانة كافي

- لا تكفريني تغلطين بأسمي شبيج

سكتت ودرت راسي منه ابجي .. راح شوية ورجع
كال : خل نطلع يكولون ما عليها ضرر

شال ايدي واساعدني متضايق .. حجيت : الدولمة منين ؟

- ما ادري قابل اني جنت هناك غير انتو الطالبيها يولي