كاتم ضمير

الحلقة ١٦

#كاتم_ضمير

((( بقلم زينب ماجد )))

الحلقة_١٦

في كل يومٍ استفيق لأبتسم
واراك منكسراً فيخفت عيدي
إيهاب المالكي

أيناس :تلمست نفسي ، حسيت اني لابسه ثوب خفيف بس بلا ملابس داخلية ، للحظة استوعبت اخر موقف جان واحد يحط شي على وجهي ... اني مخطوفة !!

انخبصت بمكاني اتلمس الحايط واصيح : اني ويييين ، شسويتو بيييييييه ، طلعوووووني ، داااااااية وين اني طلعوووووني

كام كلبي يدك سريع
واباوع بالغرفة بخوف واتلمس وراي واردد اية امي ترددها كلما وكعت بشدة وخوف ( سلام قولا من رب رحيم) كمت اردد بالأية اكثر من مرة والخوف تملكني من كل مكان بنص هالغرفة

وكعت ايدي على نقطة ضوا .. دستها بسرعة
اشتغلت شمعة بالغرفة باوعت غرفة فارغ ما بيها غير زولية ومخدة و بطانية ..

ملابسي القمصلة والبدي والبنطرون والداخلية والحذاء بزاوية الغرفة، ركضت الهم شلتهم : اني شصار وياية واني وين .. عزا شوولي ربي دخيلك .

كمت ابجي وشلت القمصلة لبستها فوك الثوب
تقربت للشباك مرة لخ .. صورتي تطلع بالشباك ، رجعت طفيت الضوا ولزكت بالشباك وارفع بطولي حتى اشوف بلكي اعرف .. لاحظت اكو قطعة اعلانات كدامي .. بس القطعة بالكردي مو عربي !

وين اني ؟
ماكو مكان ببغداد يحط اعلان بالكردي بدون ترجمة عربي ، المكان الأني بيه وين .

بقيت اباوع ومتمعنه ورافعة دولي وادية ع الشباك ، انفتح الباب ، فزيت وانداريت لجهة الباب .

طول شاب واكف كدامي
بلعت ريكي واحس بطني مغصتني من الخوف .. حجيت : منو انت ؟

شغل الضوا وطب
شكل الشاب يخوف ومشايفته من كبل ، صرخت : شرايد مني

تقرب من عندي و هو مخزر عيونه ، جريت قمصلتي وطبكتها على جسمي ، وضميت نفسي وكمت اباوعله .

تقرب من عندي ، صحت : منو انت شرايييييد
رفع ايده فوكاي وجر البردة و سد الشبااك ، وخرت من عنده على جهة .

حجه : ابقي خوش بنية لحد ما يشوفون وضعج .

- اني وين

- انت بمكان احسن من غيرج ، مدللة هواي ، اذا رايدة نزيح الدلال اني حاضر

حجاها ورفع حاجبه ، حجيت بتوسل : اخوية فدوة والله عندي ام مريضة وعائلة بركبتي ولازم ارجع فدوة بس كلي اني وين .

- اكلي خ*** واكعدي بمكانج

دفعته : انتم خاطفيني بكيفكممممم طلعنيييي منا

دفعني للحايط ورفع اديه واتقرب مني كلش : لا تخليني اجبرج على شي ما يسرج ، اعقلي واكعدي بمكانج