كاتم ضمير

الحلقة ٢٦

#كاتم_ضمير

((( بقلم زينب ماجد )))

الحلقة_٢٦

ليث يكول :
المهم ... عاذرهم وكلّ البقن سهلات
انا الجرف اليسامح روج شاطيّه
حتى مننجرح مادام همه بخير
أنا بخير يعني وكلشي مابيه
(للشاعر إيهاب المالكي)

محبيت احرجه أكثر
مشيت من كدام البيت ومكسورة على موده ..
من موقفه حتى نسيت ، دا احاول احط نفسي بمكانه واللي احبه يرفضني ويوافق بغيري .. صعب
بس الأصعب مشاعري ..
مو بيدي ابد .

من اني وزغيرة واشوف مواقف عمامي ويا امي
وعركهم ويا ابوي .. كلش اكره فكرة اصير عدهم
لو اتزوج ابن عم او اقارب ..
احلم اتزوج احد يناسب المواصفات اللي ابالي
عابد بيه من كل الاشيء الاتمناها بالشخص الأحبه .

اخلاقه وشخصيته
مواقفه اللي اعتبرها بطولية .. وياية
شكلة .. وليش الكذب حتى امكانيته المادية
اللي عاشته ماما ويا ابويه ما اريد اعيشه ويا اطفالي اني اكد واني اربي وهو فقير وكاعد ومعتمد عليه .

دخلت البيت
روحي طالعة ، صاحت امي : ها

حجيت : ماكو شي عوفوني
وطبيت للغرفة شمرت الجنطة والتليفون وكعدت بحيرة ، اتصل عابد باوعت ع الأتصال .. رديت

- الو

- ها حبي ، شسوي

- خابرهم والغي كلشي

- صدك تحجين انت يولي ؟

- شسوي عابد ، لا اهلك ولا عمامي راضين ولا حتى ابوي .

- اثنينا واعين ومستقلين بشغلنا و بوضعنا لا بحاجة اب ولا عم .

- الامور متمشي هيج امي مراح تقبل اتزوج بدون كعدت زلم تخطبني ..

دا احجي اتصل ليث ... حجيت : ليث دا يتصل  ع الخط ، هل ارد اشوفه

حجيت ومنتظرت جواب من عابد ، رديت ع الخط : الو

- هذا شوكت يجي هو واهله

- منو تقصد عابد ؟

- اييي هو ، راح الزم ابوي منا للمغرب اذا ما اجوا اطلع من السالفة

- يعني عمو رضا يجون يخطبون منه

- يرضى يرضى معليج .. بلغي امج خلي تشوف الجماعة شوكت يجون .

- ليث

- روحي ايناس مالي خلك حجي .

قفل الخط بوجهي .. رجع الاتصال ويا عابد : ها

- ليث ديكول خل يجون ابويه منتظرهم منا للمغرب

- يعني اطلع للجماعة

- اي اطلع خل اكول لأمي ..

كمت فتحت باب الغرفة ميس كاعد جوا رجلين امي مدري شتسويلها وامي كاعدة ع السرير : يوم ليث خابر ديكول عمو رضى ومنتظرهم .