كاتم ضمير

الحلقة ٤٢

#كاتم_ضمير

((( بقلم زينب ماجد )))

الحلقة_٤٢

انه الطير النزل للطعم من حطيت
روحك للضحية ومن نزل صدته
ترك لجلك سما وراويته المجازات
من كصيت جنحه وللقفص جبته
عفتني ويا الجكارة اثنينا مورثين
محد طفى الأخر وانطفيت انته
(للشاعر الكبير إيهاب المالكي)

عابد : بيوم اللي راحت ظليت بالمكتب ما طلعت ولا جالي خلك اطلع لو ارجع للبيت واشوف وجوه .. كعدت ما بيني وبين روحي ويا الجكارة اتسلى ..

خابروني الأهل
ابوي
امي
زوجتي
ما رديت على واحد منهم
مالي خلك اسمع واحد بيهم ..

ضغط الشغل من دوامي للعمارة واركض ما بين هذا وذاك اتفق وانسق ما الي ذرة مجال اصفن ويا نفسي .. بس من يجي الليل استاحش .. واسأل
المن الم واكد واتعب
اذا انا كل الجاي اسوي ما مرتاح بيه
راحتي يم الحبيتها وعافتني وخلتني مثل المحترك ما يدري بيش يطفى روحه بس يريد يطفى .. ومن طفى ما شاف طعم الراحة على كثر الألم الأكل روحه .

اليوم وبعد ما اجتني
تركت شغلي .. عندي مواعيد ضربتها ..
كلشي عفته وكعدت .. رجعتني بجيتها لاول ساعة تركتني بيها .. نفس الخيبة والحسرة .

راحتي يمها وادري براحة بالها يمي
بس لا ارضى ارجعها ولا ادري شلون اصلح النكسر وارجع ..

بيومها نمت بالمكتب ما رجعت
ثاني يوم جان جمعة ما طلعت من المكتب
للظهر اجاني ابوي .. يستفقدني ليش ما اجي للبيت ، كتله : تعبان مالي خلك عوفني هنا

- ابني عروستك جديدة ما يصير تعوفها وتبات بره

- تحسبني بواجب مسافر اي شي وادبر نفسها ، صدك يابه ردت اسألك

- شنو

- امي صح الها اتفاق ويا ابو ايناس على خرابنا

- بيوم اللي هدو عمامها ابوها كال هيج بس جذاب نكس رايد يشوه سمعة امك .

دحكت لابوي يحجيها وهو يحاول يسد السالفة ..
اني لا كاعد بالبيت ولا ادري شصاير ..
اصلا العروس الخذتها ب٢ بالليل ارجع واغلب الايام الكاها نايمة واجر فراش وانام وما ادري بأهلي شبيهم وشصاير بالبيت .

رجعت بيومها واني ابالي كلمة ايناس من تكلي اذا الي حوبة طلع حوبتي .. ايناس لو ما متأكدة ما تتأذى ولا تصر على موقفها وتريدني اعرف  بس شيجيب امي على ابوها ؟

رجعت للبيت ويا ابوي الظهر
اجتني ولاء زوجتي : متغدي

- ما رايد شي

- احضرلك ملابس تسبح ؟

دنكت وظليت ادحك بالكاع .. عرفت ملحتها ضايقتني طلعت من الغرفة .. شوية واجت امي  ، ابوي جان كاعد حجت وياي وكامت توصيني وما يصير هيج ولازم تغير حياتك وصارت بركبتك زوجة وعيب تعاملها هيج .