كاتم ضمير

الحلقة ٤٦

#كاتم_ضمير

((( بقلم زينب ماجد )))

الحلقة_ ٤٦

رجعنا منين ما جابتنا الأيام
المطر من ينزل من الغيم مرغم
كسرنه الحجي البعيونا بماي
حتى اليقرا يلكى المعنى مبهم .
( للكبير إيهاب المالكي )

صعد كدام الستيرن ..
وابويه يلوح إلنا بيده ، تحركت السيارة اني كلبت خلقتي ، سويت نفسي متضايقة وما عاجبني شي..

بدا يسألني عن حياتي عن شغلي
اجاوبه اجوبة مختصرة ، مو مال دردشة وسوالف واكعد اسولفله ..

بادر هو وسولف عن حياته بداياته
حسسته ما مهتمه وما متفاعلة ويا اللي يكوله ، حجه : بيج شي ؟

- لا شوية اليوم صحيت مريضة

- الله يبعد المرض اخذك مشفى ؟

- لا لا ميحتاج ، مرض نسائي يعني .

كتله هيج كال : ها ها
وضربله دالغة انلصم بعد ما حجي
جن واحد لطه على حلكه .. بس اكول يا حيف اكعد هالكعدة واحجي هالحجي لو ما ابويه وعمايله ..

مشينا ما يقارب ثلث ساعة ..
طلعت حبوب مقويات عندي اخذهم .. وبلعتهم كدامه بلا مي .. ظل صافن ، حجه : تتعاطين

- ليش بابا مكلك ؟

- ابدا

- من لما ماما وبابا تطلكوا حياتنا انكلبت جحيم .. فكمت اتعاطى حتى انسى

- طيب جايبة حبوب المخدرات وياج

- اذا ما اخذهم اتمرض اكثر

- بس اذا كمشونا راح نروح بيها سجن واني انسان صاحب عائلة و شغل وشركتي تهمني سمعتها

- لا لا اطمن ما راح احد يعرف ، عادي

-، شلون لا وانت دا تتعاطين بالسيارة ما خفتي احد يشوفنا

- منو يشوفنا وانت دا تسوق

- لا ارجوج اتركي هالامور عنك ، انا رجل بعيد كل البعد عن الممنوعات وما اتعامل بيهم ، فيا حبذا لو ترميهم بأقرب حاوية مهملات .

-ما اكدر دا تفهمني .. اتأذى حيل اذا ما اخذهم تروح تبتلي بيه ومن تنقلني مستشفى نتورط اثنيا ونطلع نتعاطى ممنوعات .

- لا لا لا مستحيل ما اكدر

- يعني شنو مفهمت ؟

- لازم تبعديهم والا ما نكدر نكمل سفرتنا سوية

- يعني تريد تعوفني وتروح ؟

- لا مو هذا القصد بس....

قاطعته : لا واضح هذا قصدك لا تنكر .. انت تضايقت مني .

سويت نفسي ابجي ودايرة وجهي
واني بداخلي ميته ضحك على يا ساعة انفجر واني اشوفه انخطف لونه وكام ينطي الوان من الخوف
زوعته العافيه .