كاتم ضمير

الحلقة ٥٢

#كاتم_ضمير

(((بقلم زينب ماجد )))

الحلقة_٥٢

انه من الجرح ياصاحبي اتعافيت
عبرتني المنيه ويومها اتبدل
لملمت السنين ولحگت ع الضال
وحييت المصوفر قبل لا يذبل
(للشاعر ايهاب المالكي )

ايناس : رجعنا عابد من الدكتور ، امي كالتله ( رجعنا ع البيت يمه )

تحجي ودموعها بعينها ، عابد ما جاوب الدنيا طالعة من عينه ، اني تعبانة كلش امددة ورا ع الكشن .. جسمي كلش صابه الضعف

خابرت امي على عمي ..
وكامت تبجي وتكله : هاي تاليتها اخوك هيج يسوي بيها ، ايناس صار بيها سكر ليش شنو ذنبها بهالعمر يصير بيها هالمرض من اخوك ما كتلها بطلقة يكتلها بمرض .

تحجي بحركة دم وعمي يجاوبها
سدت التليفون ، كالتله : يمه وديني على بيت حسن

- وشيسوي حسن

- البنيات هناك و هو يكول جيبوها وتعالوا

هز راسه وطلع بينا لبيت عمي ..
لما وصلنا عابد كالي : وشلون تنزلين عدهم

- شسوي لعد

- راح يضل بالي عليج

- اخابرك

- ديري بالج على نفسج هواي وعلاجج اخذي لا تشغلين بالي عليج واني اخابرج كل شوية

- ماشي

نزلت من السيارة ..
ساعدتني امي وهو نزل غراضي ..
طلع عمي استقبلنا : ها الحمد لله ع السلامة

حجت امي :، منين تجيها السلامة واخوك يشتم الهوى

- واني بيدي وما سويت

طلع ليث وهو يباوعلي وصدمته بعينه : صدك عود سكر

امي : كلشي بيديكم والله لو ماذيكم ساعة وحدة ما تخلونا بس شنكول حسبنا الله ونعم الوكيل

تقرب ليث لزم ايدي ويا امي وهو يكلي : شكالج الدكتور بالضبط

ايناس: زينة

انفعلت امي : يا زينة تيفو وسكر وهذا حالها الزين وينه من عساها بحظك وابختك وبصحتك وعافيتك فاضل

من كون سرطان بكلبك يموتك بمكانك بجاه هو العباس ابو فاضل، ناخية الحسين كون جلطة ما تكوم منها .. عساك بشلة الحاااال

فقدت امي كامت تدعي وتدك على صدرها وكلبها محترك ، كعدني ليث و ميس .. كلهم سكتوا محد رد على امي كعدت بالكاع مددت رجليها وتدعي من كل كلبها وتصرخ

عمي : الله ياخذه بجاه الحسين ، خلي يولي لا تحركين كلبج ام ايناس

- شلون ما احرك كلبي شلون ما اموت بنية بعمر الورد يصير بيها سكر لييييش ولك شسوت وياك يالنذل .. خذتك التركيا وسوت براسك خير وياما كتلها ولج يم ابوج ما يصيرله جارة تكلي ( ميخالف ماما احاول اصلحه يمكن ابويه عاش بالعراق والداير ما دايره مخربينا خلي اخذه واداري واصرف عليه بلكت يتغير ) تالي سوا ما سوا بيها بتركيا ومن شردت منا اجا وراها يكتلها .. وهالمرضها ووكعها ، اخ فاضل لو اشوفك مكطع وصل والله ما يحن كلبي عليك مااااااايحن