ကောင်းကင်စစ်ဝိညာဉ်(ချူးယွန်)အတွဲ-၃ Uni & Zawgyi ေကာင္းကင္စစ္ဝိညာဥ္ အတြဲ-၃

အပိုင်း ( 867 ) ဒါကြောင့်ပဲ ငါလာခဲ့တာ

"ဒီတော့ ဒီလိုရှိ‌တယ်ပေါ့"
ချူးယွန် ခေါင်းညိတ်လိုက်ပါတယ်။

လူတိုင်းမှာ သန်မာတဲ့သိုင်းဝိညာဉ်ရှိပြီး နေ့တိုင်း သိုင်းဝိညာဉ်နဲ့ပဲ လေ့ကျင့်နေမှတော့ ဘယ်သူက အခြေခံကို ဂရုစိုက်နေဦးတော့မှာလဲ။

တိုင်ဂန်တိုက်ကြီးမှာတော့ မတူပါဘူး။

တိုင်ဂန်တိုက်ကြီးမှာက ကောင်းကင်အဆင့်တစ် သိုင်းဝိညာဉ်ကို ပိုင်ဆိုင်ထားပြီဆိုရင်တောင် ပါရမီရှင်အဖြစ် သတ်မှတ်ခံရပါတယ်။

စစ်သည်တော်အများစုဆိုရင် အဝါရောင်နဲ့ အနက်ရောင်အဆင့်သိုင်းဝိညာဉ်ကိုပဲ ပိုင်ဆိုင်ထားကြတာပါ။

အချို့ဆိုရင် သိုင်းဝိညာဉ်နဲ့လေ့ကျင့်နိုင်ဖို့ မျှော်လင့်ချက်မရှိတဲ့အတွက် ခန္ဓာကိုယ်သန့်စင်နည်းတွေကို ရှာဖွေလေ့ကျင့်ခဲ့ရပါတယ်။ ဒါကြောင့် သူတို့ရဲ့ သိုင်းဝိညာဉ်ကို အားမကိုးရရင်တောင် ခန္ဓာကိုယ်သန့်စင်ခြင်းလမ်းစဉ်နဲ့ လျှောက်လှမ်းနိုင်ပါသေးတယ်။

ဒါက တိုင်ဂန်တိုက်ကြီးနဲ့ ကောင်းကင်ဘုံခုံရုံးရဲ့ ကွာဟမှုပါ။

ဟော်ရွှင်းရဲ့ စိတ်မရှည်တော့တဲ့ မျက်လုံးတွေကို မြင်ပြီးနောက် ချူးယွန်က ခါးသီးစွာ ရယ်မောလိုက်ပါတယ်။
"ငါ့ကို သုံးရက်လောက်တော့စောင့်ဦး… သုံးရက်ကြာပြီးရင် ငါမင်းနဲ့ ဟော်အိမ်တော်ကိုလိုက်ခဲ့မယ်… ဘယ်လိုလဲ"

"ကိစ္စမရှိဘူး"
ဟော်ရွှင်း ခေါင်းညိတ်လိုက်ပြီး မျက်ရည်တွေပါ ကျဆင်းလာခဲ့ပါတယ်။

သူ့အကိုကြီး ဟော်ကျားက သူငယ်ငယ်ကတည်းက အလွန်ဂရုစိုက်ခဲ့သူပါ။

နောက်တော့ ဟွာဖေးလုံက ဟော်ကျားရဲ့ သိုင်းဝိညာဉ်ကို ဖျက်ဆီးခဲ့ပြီး အိမ်တော်နှစ်ခုကြားမှာ  မပြေလည်နိုင်တဲ့ ရန်ငြိုးတွေကို ဖြစ်ပေါ်စေခဲ့ပါတယ်။ ဒါပေမယ့် ဒါက ပေါ်တင်မဟုတ်ဘဲ အမှောင်ရိပ်ထဲမှာ ဖြစ်ပေါ်နေခဲ့တာပါ။

သူ့အကိုကြီးက ဒီအရှက်တရားကို နှစ်ပေါင်းများစွာ ခံစားနေခဲ့ရပါတယ်။

ချူးယွန်ကသာ သူ့ရဲ့ကျင့်ကြံခြင်းလမ်းစဉ်ကို ပြန်ဖော်ဆောင်ပေးနိုင်ရင် အလွန်ကျေးဇူးတင်ကြမှာပါ။