- هلو الاء ، شجابج
- رجلي وصلني ، شني عدك امتحانات ؟
- لا كتاب لعلي الوردي جاي اقرأ ليش ؟
- مو اكول ماكو مدرسة هسه ، بيا كلية انت هسه
- مستنصرية قانون ، رحت مرحلة ثانية .. بس ما عدي شي فكعدت بمكان حبوبتي وكضيتلي كتاب اخلص وكتي بيه .
ابتسمتله ومن المخزن طبيت للبيت ، امي واكفة تجلف بالمغسلة البرة ، حجيت : هلوووووو
فزت : يا هلا ماما ، شجابج ، فززتيني والله
فتحتلي اديه ورحت حضنتها : زعلانة اجيتكم
- لا اسم الله يمه شصاير
- سوالف هواي
طلعت نانة : لج هلوووووووو
فتحتلها اديه وسلمت عليها ، وطبيت سلمت على البيت كله و كعدوا مشتاقيلي ويسولفون وياي ، وحجيتلهم عركة ام حمزة ، وشلون طلعت زعلانة وحمزة ما رضى اجي زعلانة واني بعدني كم شهر على عرسي .
حجت يمه كواغد : خايبات برابيج انت وابطيطة شو تتمضيكن بروس زلمتج واهلي يا اهلي ومن عوينة ابو اهلجن .. زلمجن تعاين لحلوكجن و انتن تصيحن اهلي .. يا فكر اهلج .. اركدي حدر طوع رجلج واستجني
- يمه اني ما كايلة شي بس ما ينحملون والله ولا وحدة بيهن تحبني
- وعساهن لا حبنج ، اكضي العلي والبس و ادهن روحي بالزواكات واكعد بعنادهن هيج اتمزهد وافرك كلوبهن فرك وخليهن يطكن
- هسه ما حاجية بس يتغالبن وياي بالشغل ويذبن شغلهن عليه ويروحن يحفرن يم عمتي .
- عمتج بربوك لا ادكين وياها تكض الحجاية وتروح تخرب رجلج عليج
- لا حمزة يحبني ميصدكها
- الزلمه لو شما حب ما يحب ازود من امه هالتشوفينه طردج وصيح عليج حتى لا يكدر خاطر امه وهو يعرف كل الزين ما بيج صوج و الصوج بامه ، الزلمه حايط رمل .. اعدلي روحج وجلمتج وياهن فرزنيها لا اظلين غمه وتذربنين حجي و تركبين الحك عليج.
ايمان : احملي ماما مدام زوجج زين ، احمليهن لخاطره بلكت الله يكدر يطلعج عنهن .
نانة : والله وذبانة صارت متزوجة وصارت سوالفها عيال ورجال ، جان حجيها شكال الرسم وشحجت الالوان
الاء: هههههه غير من ضيمهن بس لا بعدني بنفسي ارسم بس ما جاي الحك والله ما اعون اخلص حمزة حتى انزل اكضي شغلي و انظف نفسي وغرفتي ، اركض وما الحك والله .
انداريت لنهاد : وانت شني عيالج ما ودو خبر ، ما طلكوا
نهاد : ما يرضى يطلك ويكول لو ترد لو تطيني الجاهل .
- وشلون هسه
- راح ارجع شسوي
- ليا وجه ترجعين كوة خلصتي روحج من اديه وترديله
البارت الرابع و العشرين
ابدأ من البداية
