Mr.Silent (Completed)

Part-44

ယခုလည်း ထရစ်စတန်ကိုသတိရသောစိတ်နှင့် မကျေလည်နိုင်သေးသော ခံစားချက်များ စုပေါင်းပြီး တစ်ဖန်ပေါက်ကွဲပြန်သည်။ တစ်လလုံးလုံးလည်း ကာရန်ရှင်းကို မျက်နှာချင်းပင်မဆိုင်သည့်အကြောင်းများပြောပြပြီး ဒေါသ​ကိုထုတ်ပြပြန်သည်။

"မင်းပြောတာမမှားဘူး။ မမှားလို့ပဲ မပြောခိုင်းတာ လင်းထက်။ ငါလည်း ငါ့သူငယ်ချင်းကို ဒီလိုဖြစ်အောင်လုပ်တဲ့လူကို မကျေနပ်ဘူး။ ဒါပေမဲ့ အဲ့လိုဆိုတိုင်းလည်း လူနှစ်ယောက်ကြားကကိစ္စကို ငါတို့ဝင်စွက်ဖက်ပြီး မပြောသင့်ဘူး။ မလုပ်သင့်ဘူး။ ရင့်ကျက်စမ်းပါ လင်းထက်ရာ"

လင်းထက်ပိုင်မှာ သူ့အမြွှာဖြစ်သူကို မျက်ထောင့်နီဖြင့်စိုက်ကြည့်ရင်း မကျေလည်မှုများကို ပြသသည်။ သို့သော် ဘာမှတော့ဆက်မပြော။ ပြီးနောက် နှစ်ယောက်သား ညီသုတကိုအတူတကွတွဲခေါ်ပြီး အိမ်ပြန်ခဲ့ကြသည်။ ညီသုတအား သူ့အိမ်ကိုပြန်ပို့ရန် မဖြစ်နိုင်သောကြောင့် သူ့အိမ်ကိုဖုန်းဆက်ပေးပြီး ညာလိုက်ရသေးသည်။ အားလုံးအဆင်ပြေသည်နှင့် သူတို့အိမ်ကိုသာ ညီသုတအား ခေါ်သွားလိုက်တော့သည်။

နောက်တစ်ရက်မနက်၌ ညီသုတသည် စိတ်မကြည်မလင်နှင့် နိုးထလာရပြီး သူ၏ခေါင်းမှာလည်း အဆက်မပြတ်ထိုးကိုက်နေသောကြောင့် ဘယ်လိုမှမနေသာ။ လဲလျောင်းနေရာမှ ထလိုက်ပြီး ရေယူရန် ကုတင်ပေါ်မှဆင်းလိုက်ခါမှ သူရောက်နေသောနေရာသည် အမြွှာနှစ်ယောက်၏အိမ်ဖြစ်ကြောင်း သတိပြုမိသွားသည်။

ထိုအချိန်မှာပင် အိပ်ခန်းတံခါးပွင့်လာပြီး ပျားရည်ထည့်ထားသောဖန်ခွက်ကို ကိုင်ကာ စွမ်းထက်ပိုင်ဝင်လာလေသည်။ သူသည် ညီသုတနိုးနေသည်ကိုမြင်သည်နှင့် ပျားရည်ခွက်ကို ကမ်းပေးသည်။ စွမ်းထက်ပိုင်ပေးသော ပျားရည်ခွက်ကို သောက်နေစဥ် ညကဖြစ်ပျက်ခဲ့သမျှကိစ္စများသည် ညီသုတခေါင်းထဲ အစီအရီဝင်လာသဖြင့် အနည်းငယ်ရှက်ရွံ့သွားရသည်။

"ဆောရီးပါကွာ။ ညက ငါတော်တော်မှသောင်းကျန်းလိုက်ရဲ့လား"

"ကိုယ့်အကြောင်းကိုယ်သိရင် ပြီးတာပဲ။ ဒါနဲ့ အလုပ်ကသွားဦးမှာလား"