Mr.Silent (Completed)

Part-44

Unicode Version

One month Later....

စွမ်းထက်ပိုင်နှင့်လင်းထက်ပိုင်တို့ အမြွှာနှစ်ယောက်သည် စားပွဲပေါ်တွင် မှောက်ကာ ပါးစပ်ထဲရှိသမျှအော်ဟစ်ရင်း မူးရူးနေသော ညီသုတကိုကြည့်ပြီး သက်ပြင်းအခါခါချမိသည်။ ကာရန်ရှင်းကြောင့် တစ်ခါမှမသောက်ဖူးသောအရက်ကိုပင် အသိစိတ်လွတ်သည်အထိ ဒုတိယအကြိမ်သောက်နေလေပြန်သော ညီသုတကို ဘယ်လိုစကားများနှင့် နှစ်သိမ့်ရမည်လဲလေ။

"တော်ပြီကွာ။ အိမ်ပြန်ရအောင်"

စွမ်းထက်ပိုင်က ညီသုတ၏လက်မောင်းတစ်ဖက်ကို ဆွဲထူကာ မတ်တပ်ရပ်စေသော်လည်း မူးနေလေပြီဖြစ်သော ညီသုတမှာ သူ့အား တွန်းထုတ်ကာ မပီမသစကားများကို တရစပ်ပြောနေပေသည်။

"ဒီကောင်... ဘယ်လောက်ထိများ.."

ပြတ်တောင်းပြတ်တောင်းစကားသံများဖြစ်သော်ငြား ရည်ရွယ်သူကိုတော့ အမြွှာနှစ်ယောက်ရိပ်မိပါသည်။ ထို့ကြောင့် လင်းထက်ပိုင်က သူ့ဝသီအတိုင်း အံတကြိတ်ကြိတ်နှင့် ပြစ်တင်ပြောဆိုတော့သည်။

"ကာရန်ရှင်းနဲ့စတွေ့ကတည်းက သူ့မှာကောင်းတာဆိုလို့ ဘာမှဖြစ်မလာဘူး။ အမြဲတမ်းခံစားနေရတာချည်းပဲ။ အဲ့ဒီကောင်က သူ့အတွက် အကျိုးကိုမပေးတာပါကွာ။ ဒီလောက်ထိရက်စက်ခဲ့ပြီးရင်လည်း သူ့ဘာသာသူနေပါတော့လား။ အနည်ထိုင်နေတဲ့ သုတရဲ့စိတ်ကို ပြန်ဆွတော့ ချီးတွေကိုဖြစ်လို့ဟေး"

လင်းထက်ပိုင်၏စကားများသည် နဂိုကတည်းကဒေါသူပုန်ထနေသော ညီသုတ၏စိတ်ကို ပိုဆွပေးလိုက်သည့်နှယ် အခြေအနေဆိုးသွားလေတော့သည်။ ညီသုတသည် ထိုစကားများကြောင့် စားပွဲကို လက်သီးနှင့်ထုကာ တောက်တခေါက်ခေါက်လုပ်ရင်း အော်ဟစ်နေပြန်သည်။

"တော်ပါတော့ လင်းထက်ရာ။ မင်းက ပြဿနာကို မီးစနဲ့ထိုးပြန်ပြီ"

"ငါပြောတာမှားလို့လား။ အဲ့ကောင်သာ ငါနဲ့တည့်တိုးကြည့်။ ငါ သူ့ကိုအလွတ်ပေးမှာမဟုတ်ဘူးဆိုတာ ကတိပေးတယ်"

သူတို့နှစ်ယောက်သည် ကာရန်ရှင်းနှင့် ညီသုတတို့အကြားဖြစ်ပျက်ခဲ့သော ကိစ္စအလုံးစုံကို လွန်ခဲ့သည့်တစ်လက သိခွင့်ရခဲ့သည်။ ထိုနေ့က အလွန်အမင်းပေါက်ကွဲနေလေဟန်တူသော ညီသုတသည် ကာရန်ရှင်း သူ့ကိုဘယ်လိုဘယ်ပုံလှည့်စားခဲ့သလဲဆိုသည့်အကြောင်းများကို အိတ်သွန်ဖာမှောက်ပြောပြပြီး ရင်ဖွင့်ခဲ့သည်။