Unicode Version
ထူးမခြားနားသည့်နေ့များအထဲမှ သာမန်နေ့တစ်နေ့တွင် ညီသုတသည် တိုက်ဆိုင်မှုပေါင်းများစွာကြောင့် နေရခက်နေရလေသည်။
ယနေ့မှာ ဆယ်တန်းကျောင်းသားများနှင့်ကိုးတန်းကျောင်းသားများ၏ Assemblyစီရမည့်နေ့ဖြစ်လေရာ နံနက်ခင်းကျောင်းတက်ရန်ဆယ်ငါးမိနစ်အလိုကတည်းက သူတို့၏အတန်းပိုင်သည် သူတို့ကိုလူစစ်ကာ နှစ်ယောက်တစ်တွဲတန်းစီစေ၏။
ထို့နောက်တွင် ကွင်းထဲသို့လူစုံတက်စုံချီတက်ကာ ကိုယ့်နေရာနှင့်ကိုယ် နေရာယူကြရသည်။ ညီသုတကသူတို့အခန်း၏လိုင်းတွင် တတိယမြောက်နေရာတွင်နေ၏။ သူ၏အရှေ့တွင် အမြွှာနှစ်ယောက်ကတစ်တွဲဖြစ်ပြီး သူကတော့အခန်းထဲရှိအခြားသူငယ်ချင်းတစ်ယောက်နှင့် အတူတန်းစီ၏။
သူတို့၏အတန်းပိုင်ဆရာမသည် သူတို့အားလုံးနေရာတကျရှိမရှိသေသေချာချာစစ်ဆေးကြည့်ရှုနေသဖြင့် သူတို့အရှေ့ပိုင်းရှိလူအားလုံးစကားပင်မပြောဘဲ ငြိမ်နေကြသည်။ ဆရာမက အခြားလိုင်းဘက်ရှိလူများကိုစစ်ဆေးရန်ထွက်သွားသောအခါ သူတို့အားလုံးမှာတိုင်ပင်မထားပါဘဲ တစ်ပြိုင်တည်းစကားသံထွက်လာသည်။
"သုတ နောက်တစ်ခါကျရင် ဒီကောင်တွေကိုအနောက်ကိုပို့ထား"
အရှေ့မှအမြွှာနှစ်ယောက်ကို အမြင်မကြည်သလိုကြည့်ရင်း ပြောလာသူက ညီသုတ၏ဘေးရှိ သန့်စင်သာဖြစ်၏။
"မင်းကလည်းကွာ..။ အချင်းချင်းကို အခုထိစိတ်တိုနေတုန်းလား။ မိန်းမကြီးကျနေတာပဲ"
သန့်စင်ကမကြာခင်ကချောက်တွန်းခံခဲ့ရသည့်ကိစ္စနှင့်ပတ်သက်၍ အမြွှာနှစ်ယောက်ကို ယခုထိအမြင်မကြည်နိုင်သေးပေ။ ထို့ကြောင့် လင်းထက်ပိုင်က ပြုံးဖြဲဖြဲနှင့် တုံ့ပြန်လေသောအခါမှ သန့်စင်ကပို၍စိတ်ဆိုးသွားလေသည်။
"ငါတကယ်ဆွဲထိုးမှာနော်။ မယုံမရှိနဲ့"
"မင်းတို့ကိုကျောင်းအုပ်ကြီးကလှမ်းကြည့်နေတယ်နော် အေးဆေးနေကြ"
ညီသုတသတိပေးလိုက်သောအချိန်မှသာ ထိုသုံးယောက်ကစကားတွတ်ထိုးနေကြခြင်းကို ရပ်တန့်လိုက်၏။ ကျောင်းသားခေါင်းဆောင်တစ်ယောက် စင်မြင့်ပေါ်သို့တက်သွားပြီးနောက် သူတို့အားလုံးနိုင်ငံတော်သီချင်းစဆိုကြရသည်။
YOU ARE READING
Mr.Silent (Completed)
Romanceသူ့တစ်ယောက်တည်းကို ကွက်ပြီး သစ်စိမ်းချိုး ချိုးနေတဲ့အချေကိုယ်တော်လေးကိုမှ ချစ်မိသွားတဲ့ညီသုတနဲ့.. ရှောင်ပြေးချင်ခဲ့တဲ့အချစ်မှာပဲ ကိုယ်တိုင်စိတ်လိုလက်ရဝင်တိုးမိခဲ့တဲ့ ကာရန်ရှင်းတို့နှစ်ယောက်ရဲ့ ကံကြမ္မာအပြောင်းအလဲတွေ ဆက်တိုက်ကြုံလာရတဲ့အခါ......... St...