انا حواجبي معكده والضيم ضامي حالي وكوة واكفة اعلى رجلية وبيه صرخة من ادويها اشك مساميع الوادم اعلى قهري ، جيلت للزلمة حصته واطتهياه ، جان يكلي :
- وشلون اشيلنها جا عربانة ماكو
- عمي جاي ظهرية ياهو اليطلع بهالوكت ويزتلك للباب
- جا ما عدنا يا بوية نريد نسويلنا إغدي
- خل اشوفن واحد من الولد اذا موجود يطلع العربانة ويزتك .
- اي والله الله يطيج ان شالله .
- مطيني ابوي مطين عيشتي وعيشة الخلفني ، ساعة السودة كون بيوم الجبتة ، انا ما بيه خير لو بس افكس كلبي واخلص منه جا ارتاحيت ، مرتاحة ابيت امي اكل واشرب وانام جبته و جيت شماااااالني ، شحصلت ، هالبعاني ومدري شتفق ويا شيخ الحواوين وعمى علية
امشي وادرم من ضيمي ، عرض بوجهي خالي مؤيد : ها خير خالو شو ادرمين .
- هاذ اكو زلمة خطية اهله بلايا غده واجا على حصته وماكو احد يوصلها اله ما تكدر تزته بعربانة عبيس ؟
- وهو عباس وينه ؟
- سرحانة بيه انا شمدريني
عفته و طبيت للبيت ومؤيد طلع للزلمه و ظل يصيح على عباس، كام عباس لمؤيد وطلع العربانة ، مشيت لغرفة حبوبتي فكيت الباب ، حبوبتي امددة كرار يمها جدام المبردة ، حجيت : يلا يمه كوملنا خل اروحن لبيت امي
- شماله ابيج وياج حبوبة تعاي جاي
- اشافت امي من ابيي خاطر انا اشوفن ، من ساعة السودة كووون
وكفت عمتي ايمان : شبيج حبيبتي صاير شي ؟
طب مؤيد وكف يريد يعرف شمالني من شفتهم التموا ينشدون شمالي ما تحملت عيون انفكن جن بواري ، كامت حبوبتي من فراش : مت عيني حبوبة يااااع عوينة ابيه لابو ثجيل ، شو تعاي جاي شماله وياج ؟
- خليني حبوبة لريد اروحن لامي
- جا غير اعرف شمالج يظل كلبي محتار اعليج ، احجي
- امس الشيخ ال منعم لكيته عد ابوي وهو وياه مدري عليش متفقين .. اصبح اليوم يجين اثنين زلم وابوي يتفق وياهم ويقرا فاتحتي اعلى واحد مهتلف .
- يااااااع شلون ولج
ايمان : عزا العزاه كون هالاثرم هذا بالله شلون وياه ؟
حاكم : كعدي هنا جدي وهدي خله يولي عوينة ابو اصله
- لا جدي خلي اروحن لامي
- شتسوين عد امج ، بوية سرحان ما يحب يدخل بمشاكل فليح لا تحرجونه
- لا جدي اروحن لامي
احس بدموعي واحجي ، كلش انقلقوا علي وحبوبتي ظلت تحب براسي وتجرني تريد تكعدني واني امسح واكللها لا : لا هل اروح لامي .
البارت الثاني
Start from the beginning
