كُحل عرب

البارت الثاني و الثلاثون

- اشكرك اشكرك ... تمون يا طايح الحظ تمون ...
نزل من السيارة و هو يكمل ركصته : فرحنا واليودنا احوي احوي هلا هلا هلا .

- ردلي شحاطتي بساع خل اروح

- ترا حلوه هاي اطكني بيها واطيكياها بعلي ما صايرة .

- ناوشني لا اشك حلكهه يلااااا .

شمرهن علي .. تفلت عليه ذبيتهن كدامي و طلعت بالسيارة .. شغلت السيارة اغاني و امشي مرتاح كلش الفرحة ما واسعة كلبي .. ظليت اسوقن .. طلعت سعاد العبدلله (اهواك و اتمنى اعيش وياك اهواك )

رديت للبيت بعد ساعتين
دخلت جان ابوي متضايق .. انا الأبتسامة مرسومة على وجهي طكيت علاوي : ها ولك مصيول .

سرحان : وين جنت ؟

- طلعت شوي افتر ليش هكو شي ؟

-انت قانع بالجاي يصير

- بشنو اقنع ما فهمت

- راضي تاخذها وانت تعرف هي تود غيرك

- جازت منه

- ويا كلب هاذ اليجوز بيومين .. مأمون بويه انت مو جاهل

- التريده مني شنو يابه

- انا جنت اظنن البت ترفضك وهي وافقت زين موافقتها هاي شنهو ؟

- وافقت وبس ما احتاج افكر بشي ثاني .

ظل يعاين علي مغتاض حيل : اشلون راح تعرس وانت طالب كلي ؟ شني ناطر انا اصرف عليك وعلى مرتك وتكعد وتنام و تعتمد علي .. انا الحجي هاذ بويه ما يصرف وياي ..

- قصدك تريدني ابطل

- تبطل من عرسك و من دوامك ما تبطل انا رايد افتخر بيك جدام الوادم تروح تبتلشلي بعرس بويه ، فلس احمر ما تشوفه مني مو حرص بس المرة الما يصرف عليها رجلها ما تحترمه

وهاذ زواج يعني شغل ومسؤليه و تجد على عايلتك شلون ادبرهن ذن بويه وانت طالب .

- يدبرن

- مو حجي السان .. انا راح احج ويا اهلها واكللهم نخطب بس نطول بالخطب ليما مامون يخلص دراسته ويتوضف .

- انا كدامي سنتين ونص على التخرج شنو رايدني اطول بالخطبة كل هالمدة .

- الدنيا ما طايرة .. البت ما اريد اعيبنها بس انا مستغرب منك شلون رضيت بيها وهاذ حالها .. اكولن عاشكها و مالي غرض وصم حلكك يسرحان والبت رضت بس مو مالت بساع بساع .. اطي مجال سنة سنتين البت تتعلك بيك تعرفك تتوالم وياك تحبك .. منها مخلص دراستك ... عگبها عود نعرسلكم .

- السالفة التطول تخرب و انت التكول خير البر عاجله .

- هاي لو جانت كل الامور تمام يا بويه امورك كلها مخربطة ما تعرف وجهه من كفاها غير تطي صاول تجري امورك بهداي وتفرزن .. خو اكلك بالتأني السلامة و بالعجلة الندامة .