كُحل عرب

البارت السادس و العشرون

- ما تكدر من الاول تكض روحك وتحترم وجودي وتجيني وكت الاكعد لوحيدي وتكلي بويه السالفة كيت و كيت .

ظل يفرك بوجهه مامون و يصد عنه : تجاوز على النسوان مأمون

- ما تجاوزت على وحدة منهن وروح جيبهن وحطهن كدامي ... بس عمتي فخرية وهاي دومها تحاول تحسسني البيت مو بيت ابوي و هاي الامر الناعي وانا خلك خطار هنا .. ما حجيت شي بس كتلها الكبلج حاول ويا ابوي وشوفي تالي صفى وين وابوي وين .

- تكول عن مرتي واللي هي بحسبة امك .. هاي ... يمأمون ؟

- بويه يعني حجيت كل هالحجي وركزت على هالكلمة جاي اكلك مرتك دومها تحاول تبعدني كلش يغثها وجودي ابيتك، كلي اذا انت صاف وياها اخذ امي هدوة واكعد غاد وخلي البيت الها .
كام من مكانه بساع و فتح الباب بعصبية ، لكه مروان و هدوة بالباب ، كضته و كالتله : رد واسمع حجي ابوك للاخير

- يمه وخري عني رحمة لوالديج .

خزرته و هي تكله : ارجع شمالك يمه .
ودفعته للحجره ، صاح سرحان : دخلوا وصكو الباب .

دخلت هدوة ومروان وراها صك الباب : للمرة الثانية و الاخيرة يا مأمون اكلك اكعد .

كعد و عيونه ادمع و يفرك بوجهه وجسمه يرجف ووجهه محتقن ، سرحان يسبح بسبحته و يعاين علي، حجت هدوة : بهداي ويا....... قاطعها سرحان و هو يكلها : يا تكعدون بلايا حجي يا اطلعون .

هدية : سكتت انا جيف ينكسر خاطري علي .
ما رد عليها وهو يعاين لمأمون .. ضاج مامون من هو مغتاض وعيونه مجومرات وابوه كاعد يتورج عليه .

سرحان: مقصر انا وياك بشي مأمون ؟ شفتني احد حجه عليك ورضيتله وما رديته ؟ تجي ليجاي تتامر و تاخذ البيت طول بعرض فرد يوم خاجيتك وكتلك بويه انا هنا شنهي انت تتامر لو احكم اعلى خواتنك ما ينزلن عنك حرف .

- بويه انا ما ك...... قاطعة

- خلني اكمل كلامي ... من احجي لا تقاطعني احترم

- على راسي بويه .. بس وعلي بويه طلعت روحي النار جاي تشب بظلوعي .
وظل يدك على صدره .

- ولك عليش محترك هجي ، تراك انت السابي البيت كاعد انا هنا واسمعنك ما خليت ما رديته .. حجاية الك ويا النسوان ما الك .. لا ترد عليهن و التبزك بحجاية بس اطني اسمها اذا ما احطها الك علاوة نصة بس لا ترد عليهن ... انت ابن شيخ يبوي احجايتك اوزنها من تحجي عن مرتي لو شما عاملة لا تكول هاي .. احجي البكلبك لجن اوزن جلمتك خاطر الجدامك ما يلوف اعلى حكك ويحكك بحجاية الباطلة .. انا ابوك تحج كبالي اعديها ، لجن الف عدو الي بهالديرة و الما يكدر علي يجي ليك يتصيدلك .. لا تطي فرصة اعليك .. يو شما وازتك حرورة العصبية السانك كضة بيدك .. بلسانك تاخذ حك حتى يو جان مو حكك و بلسانك تضيع الحك حتى يو جان الك .