كام ليهم جاسم : ما لنا اصل ينشد عنه ... جفونا شركم بويه .
- لا تخافون احنا شاردين حالنا حالكم ، ما رايدين شي بس ماي يو عدكم .
جر الجليكان مالت الماي ، بيه شواي مرته ما رضت تطيه ، جراه من ايد مرته و اطاه الهم تعاركوا عليه بيناتهم كل واحد بيهم يجر ويريد يشرب .
ومرته تتعارك وياه جيف اطاهم الماي و هو روحه بخشمه ، راد يكتلها فزعو ولدها يفاككون بيناتهم .
انا متمدد وفارشه عباتي على الرمل ومنومة جهالى على اديه ، و نوبه اغفى ونوبة اعاين الهم والالم يجري برجلية .
مدري شلون غفيت ، ولن جاسم يكعدني ويكله : كووومي يله .
فزيت وانا اكله : ها
سيارة اجت
- وين راح تودينا
- وين ما عد الله كاع .
شلت جهالي اثنينهم وصعدتهم بالسيارة و الزلم يساعدون بصعدت الجهال ويتناوشوهم ، جريت عباتي نكثتها ولبستها اعلى راسي وتشلبهت للسيارة ، ذبونا بمجان بيه وادم جثيرة .. و العرفته كلهم عراقيين لجن لهجاتهم مختلفه وكل واحد شارد من منطقة يو محافظة .
جان الحال اسوء من المرينا بيه ..
ايام واحنا زلامنا تطبع ادور الأكل حتى ورق الشجر تجيبه خاطر ناكله .. جهال ماتت ، نسوان تتخربط .. الوضع كلش ساء ومحد متحمل الاخر .
هكو نسوان اعلى كثر الضيم قست كلوبهن و ذبن ظناهن بهالهيمة .. وتالي تلاكي نياحهن وبجيهن و هن يردن يدورن عليهم .
شوفات ومناظر تشوفها ما تمره اعلى بال اي انسان ..
بعدها اجت قوات يكولون عنها قوات تحالف ، نقلتنا لغير مكان وحطولنا خيم .
نشدت جاسم : احنه وين ؟
- احنا بصحراء رفحا
- وهاي وين صايره
- بصحراء السعودية
- يعني هسه احنا بالسعودية ؟
- اي
- وليش بالصحراء ليش ماكو بالسعودية مدن ؟
- وياهو اليرضالج تعيشين ابمدينه ؟
- السوالف جثيرة يراديون
- وليمتها يظل هاذ حالنا ؟
- هالحال احسن ما ننجتل احنا وجهالنا .
- وليمتها
- ليما ربج يفرجها .
-انت لو مطلكني كل هاذ ما يصير بيه ولا بجهالي
نتر :- وهسه شنهي رايدة الطلاك ؟
- شني ذني انا والجهال يجرى اعلى حالنا هجي بسببك انت وابنك ... الف مرة كلت الك طلكني وانت الكاض بذيالي
- كاض بذيالج شنهي بت **** جفيني شرج لا وعلي فوك هالضيم ابتلي بيج .
- ابتلي بروحك وهدني .
شلت جهالي ورحت قدمت على خيمه اكعد بيها انا و جهالي ، بس رفضوا ، ظليت كاعدة باطراف الخيم وما رضيت اردن ليه .
البارت الثالث و العشرون
Start from the beginning
