كمنا نمشي ونكعد نستراح ربع ساعة ونرد نمشي .. كل سيارة النكلها على الاجرة ما ترضى الوادم كلها تخاف اعلى ارواحها والاخ تبرى من اخوه .
بطونه اتشككت من الجوع و العطش يبس ارياكنا والشمس حارة تسطع ... واحنا نمش حدرها.
ما اعرف بيش الساعة بس جنه العصر يريد ينزل واحنا نمش بصحرا .. بت جاسم تخربطت وطاحت علينا ، تلايمنا اعليها واحنا نشيلها من الكاع و جاسم اندار راسه يريدله اميه ليها ماكو .
كامت مرته تبجي وتصرخ وادك اعلى راسها ، وركض جاسم وولده يدورون هلبت يكدرون يلاكون ماي يجيبولها .
دكو اعلى باب بيت بس جن اهله مامش ، لكه حنفية اباب البيت ترس النا الجلكانات البيض ماي واجا يركض هوو ولده بيهن النا ، شرباها و غسل الها واحنا نبجي ، شربنا ، ومرته تحاجي : امش وخلنا ننجتل هنا ما نكدر نسير بعد اجدامنا بادن
-بس خل نطلع هالمنطقة هاي وارتاحو .. كومن لازم نطلع
ظلت الجهال تتباجى تعبانة ما بيها تمشي ، كام يشيل على جتافه الجهال الزغار ويزمخ بينا : نعلة الله اعلى الساعة العرفتكم بيها كوموا ، انتم هييي شيل اخوتكم الصغار يااااله .
كامو وولده يشيلون بالزغار وانا نمش وياه بحيل مهدود .
ليما جلجل المغرب واحنا بهالصحرا نمشي ... انعلاتنا تكطعت .. رجلينا صارن مزك .. كل واحد بينا صار يتمنى الموت اعلى هالوجع
مرت سيارة ركض ليها هو ولده ويتوسلون بابو السيارة يعبرنا المنطقة هاي .. رضا ابو السيارة وتراكضوا بينا يحملونه .
صعدنا السيارة وذبتنا على الحدود مالت السعودية و هنا جان الحمل اصعب ... وين متجيهن والمن رايحين ما نعرف ، كل واحد بينا تعب بعد ما اله طاقة يمشي ، فرشنا على التربان و طحنا وانوح مالنا بهالهيمة وجاسم يتعارك ويا ابنه و يغلط عليه ليما تعاركوا عركة جبيرة و جسام طكاه و فك راسه و هو يصيح : سرسري دلولبتنا ، شيخ و اهلي شيوخ و هاذ حالي من حدر راسك وراس امك ، كواااااااا**.
وابنه يرده : انا مو صغير وافهم امري كلش وين ولو رديت هم اطلع و ما اسكت لو مدري شني ، جا تبريت مني و جتلتني كدامهم وافتكيت مني عليش خليتني اعيشن و محملني ذنب هالحريم هاي و تعبكم .
- هو جان المفروض اجتلك و اذبن راسك عد اجدامهم عبنك ردي صايرلي وطني ويدور حقووووق .
صرخ مصطفى : جبت عمرك كله تصفط علينا وتترس اذانه الحسين ثورة الحسين عبرة الحسين ما يرضى بالذل ، جا عليش ترضى بذلة صدام و هو ناعل والد والدينا ، ليش تريدني اسكت واحنا هاذ حالنا .
اغنى بلد بالعالم وادمه ادور خبز يابس وتكلي اسكت .
- وانعل والديك يو حجيت ردي ، كل ورطتنا هاي وبلاوينا وتعبنا من حدر راسك .
ظلوا يتعاركون بالهيمة واصياحهم طالع واحنا مامش احد بيه حيل .
لهناك مرت جوكة ازلام من شافونا كاعدين لاذوا بينا ونشدونا : انتم منين ؟
البارت الثالث و العشرون
Beginne am Anfang
