- هاي شنو ادور رجعت عليه اي شبيك يا رجال ، بنية وتحجي ويا صاحباتها ما بيها شي .
ما عارلي انتباه و ظل كاعد .. اني بصراحة خفت اعرف جمارة تحب خنجر واوقات تروح لبيت هدوة هناك حتى تشوفه .
يربي لا يكون هو اللي دا تخابره يومية و حاكم شاك بيها !!
خفت ادخل للغرفة جوا كدامه ويحس دا انبهه ..
طلعت للحوش دكيت الباب الحديد اللي على المخزن مال كواغد بس ما فتحتلي الباب.لبست ربطتي و مديت راسي من الباب ..
البنات ديلعبون شدة يا ورد و الولد طوبة و مؤيد يركض ، باوعلي .. اشرتله يجيني بساع .. ركضلي : ها ماما- روح لكواغد كللها تجي بسرعة
- عليها ناس
- كللها بس تطلع احجي وياها وتروح .
ركض للمحل .. واني رجعت راسي للبيت ، كمت اميل بروحي بس دا اشوف حاكم .. كام من مكانه ، عفت الباب و مشيت دخلت بساع .. سمعت التليفون يندك بغرفة جمارة .
رفعت صوتي حتى بلكت جمارة تحس و كلت ؛ اكلك حااااااااكم ما تروح تجيبلنا فد نص كيلو طماطة للعشا.
اشرلي حتى اسكت و خزرني و تقرب للتليفون شبك .. وشال السماعة و حط ايده ع الدكمة ..
جمارة : الووو خنجر
خنجر : عيون وكلب خنجر وافادة
- ههههههههه شلونك
- هو انا بلياج يا لون اليظل بية
- مشتاكتلك هواي
- اروحن فدوة لليشتاك خايب ااااخ هم تصيرين عدي وبين ادي الا امرعدج وعلي .
- هههههههههههههه
قفل حاكم السماعة و توجه للغرفة اللي بيها جمارة و ضرب على الباب : جمااااااااارة
من الخوف جمارة سدت الخط بساع ووكفت .. ظل يصيح على الباب : فتحي الباب لجججججحح
ايمان : حاكم بس اعصابك .. حاااااكم
- ميلييييي عني ، ولج جمااااااارة فتحييييي الباب .
كواغد : اسم الله الرحمن شنهو شصاير ، خايبة فهميني شجرى .
طلعت لالة حتى تفهم شكو .. و كواغد ذبت روحها وياه و جمارة ملتفة بروحها بالغرفة .. و كواغد تصيح : بس حاجيني شمالها البت كلييييي .
- بتج مصاحبة يكواااااااغد ، اليوم الذبحها هنا ، جماااااارة فتحي الباب ووووووولج .
كام يدافع ويا الباب ويرافس بيه و جمارة تبجي، كسر الباب ، صرخت جمارة بكل علو حسها ، ودش عليها .
.
.
.
.
.
.
.
سرحان : يا ابو ستار ما يصير هيج ، محسن ناهي اعليها و البت موش راضية بالخطبة انت جاي تفتح النا اعلى اعويلك .
- النار ما تشب غير اعلى اليجيل ، وانا اريدن واحد يعارضني ، الا انعل سلفا سلفاهم .. يجون نقرا فاتحتهم و اطيها وتنتهي ، غير هالحجي ما عدي .
..... هدوة : ها شكالك ؟
- شكالي ابوج غادي نار و ما جاي يسمع من اي احد ... شكلها الطلايب مجبلة يهدوة .
مأمون : بووووية بووووية
- يا يا مأمون
- عمي خنجر اجا انا شفته براس الشارع و اجيتك ركض اخبرنك .
هدوة: لطمت اعلى خدود "سرحان ادخيلك الحك ، يمه لو شافه ابوي وعلي يتذابح اوياه رووووح"
طلع سرحان يركض خاطر يوكف بوجه خنجر و يمنعه من بيت حاكم ... بالفرع ولاكاه : شعدك خنجر .
- السمعته صحيح يسرحان
- حط عكلك براسك و رد .
- السمعته صحييييييييح
- ابوها متحلف يو شافك يتذابح اوياك ، يواشك خل الامور تهدا هساه مشتعل نار .
- تكلي تهدا وانت حاضر بخطبتها و تريدني اسكت ميلي عني .
- خنجر لا تتوهدن وياهم ، لهساه ال ثجيل محملينا اثام جسام ، و ابن العم ناهي و الأمور متلايمة لا تزيدها و تبتلش وياهم .. حاكم متحلف يشرب من دمك خنجر
-ميل عني اكلك اليوم اشعلهم وعلي.
- خنجررررررر
- ميييييييل مني
دفعه و مشى و ركض سرحان وراه : خنجر خنجررررررر
☆☆☆☆☆
مشهد قصير عن مستقبل رواية كحل عرب حسب ما طلبتو ...
هذا مو مشهد عادي .. هذه شرارة اكبر كارثة حتقبل عليها الرواية .
وضحت بهالمشهد عدة نقاط
نهوة محسن .. اعتقد تتذكروه ؟واثام جسام ..
وعقدة خلاف حاكم و خنجر .
كل هاي الإمور راح نوضحها و نفصلها بالجزء الثاني ان شاءالله .
السؤال هو ... من بعد مدينة السماوة .. يا ترى اي منطقة من مناطق بغداد راح تكون محطتنا بكحل عرب الجزء الثاني ؟
كل ما فات كان هين
والقادم اصعب ..التقيكم .... قريباً
#زينب_ماجد
مشهد من المستقبل
Start from the beginning