عذريتي مقابل براءتي

البارت السادس عشر

أريد أبجي وأسمعك صوت الدموع

ويخلي يحجي الدمع ويسولف شماله 

تدري شكد معاني تشيل العيون

بس يوكع دمع تتوضح الحاله

واضن صوت الدمع بين وحده من أثنين 

لو فاكد عزيز ويذكر أطلاله

لو مزنة فرح واتخيل انت الصار

يعني اثنين هنه العين هماله

أنه بعيني الحزن والفرح ما موجود

دورته شكثر لكيته رحاله

يارين - بعد ما أتصلت بعمار وبلغته بقراري واني خايفه وحتى جسمي يرجف من الخوف

كال عمار -  انتي شكد عليج هسه

كتله - ما اعرف ما حاسبه

كال - انتي يا وقت تكدرين تجين عليه حتى اخذج للدكتوره

كتله - والله ما أكدر لأن من صار الوباء و ماهر وأبو ماهر كاعدين بالبيت واني ما أكدر أطلع

كال - لعد شلون أجيتي من كتيلي اني حامل

كتله - أجت ويايه ساره جانت واكفه بالباب

كال - شنو وليش ما كلتي ساره ويايه

كتله - عوف ساره هسه خلينه بالمصيبه إلي احنه بيها

كال - ما أعرف شوفي طريقه وتعالي بسرعه لأن من تتأخرين الوقت مو بصالحنه

انتهى الاتصال بيني وبينه بس مشكلتي الوحيده شلون راح أطلع رحت على ساره حتى تنفذ

أتفاقها ويايه من كالت اني أساعدج تتخلصين من الحمل

وصلت يم غرفتها قبل ما أدك الباب سمعتها تحجي بس من خلال الحجي فهمت هي دا تحجي

ويا عمار لأن سمعتها

تكول -  اي لازم تسقط الطفل لأن اذا بقى زواجنه مستحيل واهلي ما يقبلون عليك

اني ما دكيت الباب كبل فتحت الباب ودخلت وهي تفاجأت بتصرفي وغلقت الموبايل

كتلها  - لا زال سمعتج خلي نحجي على المكشوف انتي نطيتي رقمي لعمار ومن أتصلت

وما جاوبني جان يعرف اني حامل انتي كتيله ومال تعالي أريد أشوف عمار هاي حتى نروح 

اني وياج ونتفق اني وعمار على الأسقاط صح

جان تكول - عفيه عليج فهمتي وهسه روحي حضري نفسج حتى نروح  باجر

عفتها ورجعت  للغرفه واني أفكر شلون لعبه صرت بيد قدري ما أكدر أثق بأحد ما أستغرب

لو ماهر خيب أملي لأن نعدمت الثقه حتى بنفسي أحس نفسي تايهه بدروب ظلمه وأريد

اي شخص ينتشلني من ظلمة نفسي ولشوكت أكدر أقاوم وقوتي ما تنهار خلصت ظلمة

الليل واني أستعد لصبح اسود من ليلي  حدود الساعه 8 اجتي ساره عليه مبدله

وكالت - يلا حتى نروح لازال نايمين

كتلها - شلون لو تأخرنه شنو العذر

كالت - لا ما نتأخر لأن عمار متفق على كل شي

بدلت وهي واكفه على راسي وتراقب خاف أحد يكعد خلصت من طلعنه براس الشارع واكفه

سيارة عمار صعدنه ويا وهو سلم على ساره ويسولف ويضحك وياها

واني الخوف اخذ كلبي وعقلي بين إلي دا يصير وبين خوفي لو ماهر عرف بعد وقت وصلنه

لمكان شعبي والدكتوره بيه اباوع على عيادة الدكتوره وسخه وهاي السكرتيره ضعيفه

بحيث حتى تلاميح لجسمها أنه هي أنثى ماكو ومسويه حواجبها تاتو اسود وتعلج وتحجي

ويا عمار وساره واني الخوف خله جسمي يرجف ورجلي وحده أطك بالثانيه اتفقوا وياها

بس انتبهت ماكو أحد بالعياده بس احنه

كتلها لساره - ليش بس احنه بالعياده

كالت - مو هاي الدكتوره تكعد العصر والعمليات الصبح أسويهن

والسكرتيره رجعت كالت - اتصلت على الدكتوره وهسه هي على جيه اكعدن انتظرن شويه

وتجي

احنه كعدنه  وعمار طلع بره اذكرت موضوع ماهر إلي كل ساع يكولون هاي ثاني مره ندفع

فصل 

كتلها - اكلج ساره من اجيت يمكم وانتوا كل ما تتعاركون ويا ماهر تكولون هاي ثاني مره

ندفع فصل ليش اول مره الفصل جان مال شنو

كالت - ليش انتي ماهر ما  كايلج  اذا كتلج إياك تكولين ساره كالتلي

كتلها - لا ما كالي احجيلي انتي وما اكول ساره كالتلي

كالت - انتي تدرين ماهر جان مزوج وعنده ولد

كتلها - شنو لا ما أدري

كالت - ماهر جان يحب وحده ويموت عليها امي جانت متريدها وتريد بنت خالي إله بس هو

ما قبل وأصر إلا يزوجها وجبرنه حتى نروح نخطبها وبالفعل رحنه ويا وشيطلبون اهلها ماهر

يقبل وكمل كل التجهيزات بوقت قصير أما طلبات العروسه وأهلها مجابه كامت ماما تحذر

ماهر أنه عائلة العروسه  مو زينه وأستغلاليه بس ماهر ما سمع وأزوجها وبقوا حدود سنه

ما عدهم أطفال بس ماهر يحبها يموت عليها وهي خلال هاي السنه تصرفاتها كلها تغيرت

كامت تختلق المشاكل خلقه والموبايل ما يوكع من أيدها بس ماهر جان يتلاشى كل مشكله

في سبيل ما تزعل هي وكامت تطلع حتى بدون ما تكله ومن يحجي وياها تزعل وتروح لأهلها

ويرجع يروح هو يبوس قنادر حتى يرجعها  وبشروطهم بعد هاي السنه حبلت من ماهر

وهو جان طاير من الفرح  الله حتى يسبحها ويوكلها وكل شي تريده يجيبه  ألها  كولي

كملت الأشهر مال الحمل والله رزق ماهر ولد وهو عبالك ملك الدنيا بس بعد الولاده 

رجعت لنفس أسلوبها مال المشاكل وطلعه وطبه والموبايل وهو هم بده ينتبه عليها

ويتعارك وياها وتروح لأهلها وتاخذ الولد وياها ويرجع يروح يصالحها على مود أبنه

ويرجعها وبيوم جان طالع ويا أصدقائه وهي هم تركت أبنها يم أمي وطلعت  ورا

ما طلع ماهر بنص ساعه وراها رجعت للبيت تركض بس دخلت للبيت أخذت أبنها

من يم أمي وطلعت تركض  ورا ما راحت  بعشر دقايق

خابر ماهر  كال - أبني لا تنطوا لأمه لو تموت واني هسه بمركز الشرطه راح ابويه

للمركز على ماهر والي كاله ماهر أنه جانت كاعده بمطعم ويا واحد ولازم أيدها ويفرك

بيها  من شافهم ماهر ساحب كرسي والكرسي القاعده مالته حديد ومن جان يريد يضرب

هذا إلي ويا زوجته الشباب إلي موجوده مدخله حتى لا يضرب هذا إلي ويا زوجته بس

ماهر جان رافع الكرسي دا يضربه من نزله بقوه الضربه أجت براس ولد من ذولي إلي يريدون

يمنعون ماهر من ضرب صديق زوجته والولد إلي نضرب وكع غركان بدمه  من أخذوا الولد

للمستشفى جان فاقد و ماهر راح  وياهم وسلم نفسه للشرطه وزوجة ماهر انهزمت هي

وصديقها والولد إلي نضرب بقى بالمستشفى 5 أيام وبعدها توفى  ماهر نحكم 6 سنوات

بالقتل الخطأ وفصل 150 مليون لأهل الولد إلي مات وهو بالسجن رفعت عليه قضيه

وأطلكت واختفت وين راحت ماكو واحد يعرف وأخذت أبنه وحركت كلبه من طلع من السجن

هوايه دور عليها  بس كأنه يدور على سراب وظل بهذا وضعه إلى أن عرفج وحبج و ماهر

بي طبيعه  من يحب يسامح حبيبته على كل اغلاطها مثل ما سوه ويا زوجته و وياج وهذا غلط

من عنده بس هو إلي يحبها يصير وفي وياها وما يشوف غيرها ويضحي بالغالي والرخيص

على  مود حبيبته أدعي من الله تخلصين من حملج وتزوجون والله ما تلكين مثله أبد بهذا

وكتنه

ما انتظرنه هوايه اجتي الدكتوره ودخلنه وراها 

وكالت الدكتوره - خلي اخذلج سونار حتى أعرف شكد عليج

نمت على السديه والخوف يقرأ عندي مليون اخذتلي سونار

كالت - مستحيل أسوي عملية أجهاض الطفل مكمل 3 أشهر وداخله ب 4 صار ايام قليله

ظلت ساره تتوسل بيها حتى سوي العمليه بس كل شي ما يفيد ويا الدكتوره لا توسل ولا

أجرتها إلي رفعتها ساره

الدكتوره كالت - تبقى حاله وحده انطيج أدويه أسوي توسعات ونزيف حتى يسهل الإسقاط

ومن يصير عندج وجع ونزيف تعالوا عليه

كتبت الأدوية وطلعنه من العياده وساره مدخنه من العصبيه صعدنه ويا عمار بالسياره وعرف

الموضوع لو تخبل كام يحجي عليه

ويكول - يعني شنو راح يبقى الطفل شوفي حاولي بكل جهدج تنزلي لأن مستحيل اعترف بي

فهمتي ومنو يكول هذا مني تريدين يبقى خلي ماهر يعترف بي  أكيد هذا أبنه

وجابني الطريق كله يسب ويغلط عليه وساره كالبه خلقتها وهمه أثنينهم واحد يرفع والثاني 

يكبس إلى ما وصلنه للبيت من دخلنه كلهم كاعدين بالصاله اول ما شافنه ماهر

كال - وين جنتن طلعاتجن كثرت ترى وكله من الصبح أطلعن وين تروحن محد يعرف

كالت ساره - رحنه  للسوك وبعدين السوك شوكت نروح أله غير من الصبح

كام ماهر يصيح - على بعد لا طلعن إله اني وياجن وماكو أطلعن من الصبح بدون محد يدري

سكتنه ما حجينه شي

كال ماهر إلي - انتي من ناسيه موبايلج بالبيت ليش جنتي كاتله روحج عليه وليش بي رقم

سري وهو منو متقرب على موبايلج روحي جيبي وتعالي

ما حجيت شي رحت جبت الموبايل بعد ما لغيت المكالمات مال عمار وغيرت اسم  رقم عمار

إلى ام كرار فتحه وظل يكلب بي من ما لكى  شي  رجعه عليه 

واني رجعت على حظي الأكشر شلون راح أخلص  بس المصيبه الثانيه أجتي ساره

تكول - عمار جاب العلاج بس شلون ناخذه منه ما نعرف  مرت أيام على روحتنه على الدكتوره

ولكون اني أكلي قليل بده ينزل وزني بشكل مو طبيعي  حتى اني بشهر الرابع وبطني ما

مبينه بس سبحان الله إلي مشلوع كلبه يبقى طول عمره مشلوع كلبه مر على روحتي ويا

عمار وساره على مود الإجهاض أسبوع واني أقسم بالله الليل كله كاعده الفجر يلا أنام

بيوم جنت نايمه حدود الساعه 11 كعدتني ام ماهر وهي

تكول - كومي يا مصيبة كلبي يريدوج لان اني السكرتيره مال أبوج

كعدت واني يا دوب استوعب كلامها

كتلها - منو خاله يريدني

كالت - وخلخاله بكلبج اكو مره وياها 3 جهال وعمار وياهم يريدوج

كمت غسلت وجهي وأخذت شال خليته على راسي وطلعت اني وصلت يم باب المطبخ 

سمعت صوت  وحده صحت شكو ذكرى بيه مؤلمه وصوت أكرهه

من طلعت من المطبخ للكراج صارت كدامي عمتي رويده   وياها جهالي وشهد بنت معتز

جان تكول - هلا بالمسعده نايمه هنيال كلبج تعالي عيني أخذي جهالج وبنت أخوج انتي أولى

بيهم علاء عاف جهالج وسافر وأزوج  وعلى أساس يدز عليهم وياخذهم بس خابر عليه

كال - وديهم لأمهم  اني بعد ما أرجع وزوجتي اجنبيه ما تربي جهالي 

و رؤى أزوجت وعافت شهد عليه واني ما بيه حيل مره جبيره ويراد مصرف منين أجيب الهم

أخذيهم يمج

كتلها - إني وين أوديهم اني حايره بروحي وبأمي  الي اريد اطلعها من دار العجزه ومنين

اني أصرف عليهم

كالت هاي مشكلتج اني وين أوديهم وكحين ومصرف ما عندي وعلاء ورؤى ذبوهم عليه

وكل شي ما يدفعون شي اجيت أجيبهم ألج انتي تحيرين بيهم ولما نقيب عمار جان شلون

وصلت ألج انتبهت على عمار شفته يخلي علاكه سوده ورا سندانه مال زرع ما فهمت معنى

لتصرفه لأن بالي يم عمتي رويده إلي بعدها تحجي بمناسبه وبدون مناسبه وعافت الجهال

يمي وطلعت هي وعمار واصيح وراها الحايط يرد وهي ما ترد والجهال ماتوا بجي عليها

لأن الظاهر متعلقين بيها وهي راحت صعدت ويا عمار بسيارته

وعافتهم يمي يصرخون ويبجون وسامعين إلي يكول مكروه وجابت بنيه هذا المثل ينطبق علينه

اني بعدني دى أسد باب البيت الرئيسي طلعت ام ماهر على صوت عياط الجهال 

كالت - هاي شنو وين هاي المريه الي جانت وياهم

كتلها - خاله هذوله جهالي وهاي بنت أخويه وعمتي جابتهم أليه لأن متعرف وين توديهم

كالت - أكلج انتي كاعده ملفيج انوب جيبين جهالج لو تموتين بعد ما دخلين للبيت وامشي

أطلعي للشارع الي أجيتي منه وطبت وسدت الباب

صرت يا أم حسين جنتي بوحده وصرتي بثنين منا ام ماهر ومنا هذوله الأطفال يبجون  وأريد

أسكتهم وهما يبجون مستغربين كعدت بالكراج أبجي على حظي يا ربي وين أروح  والمن انطي

وجهي يا ربي والله إني أبجي وهمه يبجون وأدعي على علاء الي حرمني من أطفالي  وخلاني

لا أعرف جهالي ولا يعرفوني وهذا حالنه هو طلكني على مو شغلة دارين حتى أطفالي حرمني

منهم وهسه ذبوهم عليه وحتى بنت معتز هم 

ظليت كاعده بالكراج والجهال صريخهم ترس الدنيا وأم ماهر ما خلت واحد بعشيرتي ما سبته

ونبشته واني كاعده وابجي وألطم على حظي الأغبر نفتح باب المطبخ وطلع ماهر شافني

أبجي والجهال يبجون أجى كعد كبالي

وكال - ليش البجي شوفي خطيه ذوله أطفالج شبعوا بجي كومي دخليهم جوه

كتله - أمك متقبل كالت لا دخلين

كال - معليج بيها اني أحجي  وياها

كمت واني اسحل بالجهال كوه دخلتهم بعدنه بالمطبخ وأجتي ام ماهر كلبت عليه الدنيا

وهجمت عليه وتضرب بيه

وتكول  - تطلع من بيتي ما أريدها هو إلها أكرهه انوب جهالها

إلى ما ام ماهر وكعت بالكاع تلهث وتخربطت أخذوها للمستشفى ماهر وساره بعد ما كعدناها

من النوم راحوا همه للمستشفى وأبو ماهر من  النوع النومه ثكيل ما حس على هاي الهوسه

كلها أخذت الجهال للغرفه الي اني بيها وكعدتهم وكلتهم بس هوسه كل تربيه ما شايفين

يعني الغلط والفشار بينهم طبيعي والضرب بينهم واحد يملخ الثاني بالكوه أفاككهم تعبت هاي

من اول ساعتين تعبت شحال راح يعيشون يم ام ماهر وهي بيتها يلمع انوب من جابتهم ما

جايبين هدوم ألهم وهنا ماكو اي طفل بعمرهم وأريد أغسللهم كعد أبو ماهر من النوم مزعوج

من شاف الجهال

كال- هاي شنو منو ذولي وشو ماكو أحد بس انتي

كتله - عمو ذوله جهالي وخاله ام ماهر أتخربطت و أخذوها للمستشفى ماهر وساره

هو كتله هيجي لو تخبل كبل راح على غرفته بدل وأخذ هويته وطلع يركض  وهو يحجي

بالموبايل أخذت الجهال للغرفه لأن ما يكعدون نبشوا الصاله هسه اذا تجي ام ماهر تكلب

الدنيا على راسنه صارت حدود الساعه 3 اجوي من المستشفى وأم ماهر يمشون بيها

بطيئ ودخلوها والجهال بالغرفه والهوسه واصله لرأس الشارع والي يدك بالباب

كامت  تباوع على ماهر وتكله اذا اني أمك نفذ الي كتلك عليه

فاتوا  من يمي ودخلوا ام ماهر لغرفتها ترتاح  واني رحت على ذوله القروده الي بالغرفه

أريد بس أسكتهم ما يسكتون صاح عليه أبو ماهر وجان كاعد ويمه ماهر وساره

من اجيت كال - تعالي يارين اكعدي

من كعدت قريب عليه كال - شوفي بنتي انتي هنا كعدتج يمنه مؤقته يعني ما يصير

اجيبين  أطفالج   وياج هنا شنو احنه أبتلينه وديهم يم عم يم خال احنه شنو ملجئ مال

أطفال

كتله - عمو والله ما عندي أحد وين أوديهم اسمحلي بس اكمل العده واطلع بيت وحدي الله

يخليك 

كال - عندج حل واحد هو ذبيهم بدار للأيتام

دارين -  بعد ما طلب الشيخ شاهين من عدنه اني والحجيه رازقيه على عرس سيف وبعد ما

رحنه ورجعنه جبنه  أخت تبارك ويانه وماكو واحد راح بس سيف وتمام واني ورازقيه وكلنه

بسياره وحده ويانه راحوا شكم سياره من كرابتهم راحت ويانه جبناها ويانه ومن صعدوا

العرسان فوك وكلنه كاعدين

كالت رازقيه - ابو تمام اليوم عليوي وامه خطبوا مصارين مني

كال الشيخ شاهين - أي رازقيه توكلي على الله وكوليلهم احنه  موافقين

كتله - مستحيل شيخ شاهين ازوج اني مزوجه ومو مطلكه

أنصدم الشيخ شاهين كال - شنو مزوجه ومو مطلكه انتي مو كلتي مطلكه

كال تمام - شنو مزوجه انتي كاعده صار أشهر يمنه وهسه جايه تكولين اني مزوجه اذا ما

تريدين تتزوجين ماكو داعي تكذبين وتكولين اني مزوجه

صاح بي الشيخ وكاله - اسكت تمام انتي شنو مصيبتج تعالي كليلي

كتله - شيخ اني نهزمت من زوجي لأن أخاف منه وراد يقتلني ولما أمه هزمتني منه جان قتلني
كال - ماكو رجال يوصل لهاي المرحله لما اكو سبب قوي يخلي هيجي يصرف

وحجيتله على الي صار ويا حياة سالفة ابن عمه

كام يصيح وحتى شرايين ركبته بينت وهو

يكول - عفيه عليك شيخ شاهين حرمه بكد  زرك لعبت عليك يا فضيحتك بين العربان لج

ام تمام تعالي شوفي شلون نلعب على شارب زوجج وانتي توصين بيه على هاي اليتيمة

أجى تقرب عليه تمام وهو يباوع بعيوني

ويكول - لج شنو مزوجه ومنو زوجج كليلي وليش ما حجيتي من البدايه

كتله - والله اخاف منه لأن جان كله  يضربني وحتى خسرت وحده من كلياتي بسببه والثانيه

مريضه  وانتوا تدرون بيه صار أشهر عدكم  تعالجوني

صاح الشيخ شاهين - هذا مو عذر تكولين الصدك واحنه نتفاهم ويا انتي تدرين ضيعتي حقج

بيدج اذا جان الحق ألج صار الحق  عليج انتي دخيله عند شيخ هسه كل حق ما ألج

لأن الدخيله ألها في خلال 3 أيام اذا ما مزوجه يتبلغون أهلها أنه هي دخيله عند شيخ وإذا

مزوجه يتبلغ زوجها أنه دخيله عند شيخ وتعال يابه نتفاهم وياك مو صارلج أشهر انتي يمنه

وما تحجين انتي تدرين مو بس انتي غلطانه أحنه هم غلطانين هسه هو كل الحق إله

كال تمام  - انتي تدرين هو هسه إله حق يكاومنه عشائريآ لأن انتي يمنه صارلج أشهر يمنه

وأكيد هسه الناس تعايره بيج

بعدهم يحجون نزل سيف من فوك شافته رازقيه وعافت تمام والشيخ شاهين شايطين

وتسأل سيف - ولك ها يا سويف شسويت سبع ضبع

كاللها سيف - إني سبع بس إلي يشوفها وهي جنها بومه يصير غراب

كالت - يع سويف  يعني ما سويت شي فضحتنه بين الاوادم

كال الشيخ - تعال يا سيف شوف المصيبه الي حلت على رأس شاهين

كال - خير هو اليوم المصايب بس كل المصايب مو مثل المصيبه الي عندي يباوع على تبارك

ورجع كمل كلامه الله لا ينطي الي جان السبب

كال تمام - تحضر لكوامه جديده

كاله سيف - ليش خير رازقيه طفرت على واحد وصخمت وجوهنه ترى اذا الي طفرت عليه

رازقيه مو حلو وصاك والله ولا ألي علاقه بالكوامه نذب ورقة رازقيه من العشيره ونخلص

ولا أدفع عليها فصل

ورازقيه تكول - يع سويف اني بشبابي ما أصد إلا على الحلوين وهسه اذا مو حلو ما أصد

يا عويناتي يا كليباتي

صاح الشيخ - شنو هاي السفاهه احنه وين وانتوا وين تحجون 

كاله تمام - لا عمي طلعت رازقيه ملاك بصف الدخيله عيني الدخيله طلعت كذابه ضحكت على 3

زلم مشوربه واحنه صدكناها طلعت الخاتون مزوجه وكذب ما مطلكه  يعني اذا سمعت العشيره

هسه يكولون والله خوش شيخ لمن بنيه بعدها 18 ما مكمله ضحكت على شيخ ولده أثنين

يعني هسه يجي يكاومنه وعشيرتنه كلها  تسمع ويرجعون يكولون لازم تتنازلون عن الشيخه

سيف تخبل من سمع بالحجي وهجم عليه يريد يضربني وهو

يكول - شنو مزوجه بنت الكلب لمن مزوجه ليش ما حجيتي مكابلتنه وكاعده شكو وتكولين

جايه أدور على أمي وأختي

بس ما خلا تمام يضربني صار كدامه بس سيف مو يتهدد يريد يضربني دفع تمام عليه بحيث

صرت بين الحايط وتمام واني دا أدفع تمام لأن نحصرت ويا الحايط خليت أيدي على ظهره

هو أندار عليه ظل يباوع عليه اني سحبت أيدي منه  وهو جر سيف ولازمه حتى لا يرجع عليه

وتمام يكله - انت مخبل اليسمع شيكول ابن الشيخ شاهين يضرب دخيله عدهم هسه نصير

سالفه بكل الناصريه والي يطلع يفضحنه منه وبينه

كال تمام هذا الكلام وهو يباوع على تبارك

وسيف يكول  - وانت تريد تسكتلها بعد ما كذبت لج ما فكرتي من نكشف كذبج شلون

ورجع يريد يضربني بس تمام لازمه

ويكله  -  لك انت غبي هاي مريضه تروح تموت ويبلونه بيها

كام يعيط الشيخ ويكول - الله أكبر عليكم خلونه نفتهم منها شنو مصيبتها

وسيف يكله - شنفهم منها بعد يجوز حتى أطفال عدها واحتمال نهزمت ويا واحد وبعدين لعب

عليها وعافها واجتي هنا سوت روحها شريفه براسنه

كال الشيخ - تعالي بنتي

من صرت قريبه منه كال الشيخ - بنتي بصراحه بيتي بعد يتعذرج ما يستقبلج أكثر من هيجي

بس اني شيخ ابن شيوخ لهذا راح ادز على رجلج واتفاهم ويا بهدوء وأترجى يسد الموضوع

وترجعين ويا بدون أي شرط وتتحملين كل شي منه لأن أكيد هسه الناس تعايره  بيج

اني شيخ شاهين راح أتوسل بي بس حتى يسكت لأن اذا كاومنه يعني نحسب حساب

احنه أنفضحنه على أيد بنيه  ضحكت على شيخ حتى عيب بحقي  شيخ شاهين تضحك عليه مره

وإذا قبل ترجعين ويا اتوقعي كل شي يسوي يضرب يغلط تتحملين لأن انتي ضيعتي حقج بيدج  
كتله - واله شيخ أخاف منه ما تتصور جان شيسوي بيه 

كال الشيخ - بنتي هذا مو عذر انتي بسالفتج ضيعتي سبيل المعروف على المره جايه 

بعد ما أقبل بأي دخيله

وكلها بصفحه ورازقيه بصفحه اجتي كعدت يم رجلي وتاخذ طرف دشداشتي وتمسح بيها وجهه

وتكول -  من بختج مصارين بركاتج مصارين مزوجه ويخطبوج ريتني من بختج ما تكليلي منيلج

هذا الحظ  بيش غاسلته بمي زمزم ولج تعالي سجاوي أخذي من بخت مصارين هاي بخيته

بلكت تتعلكين بذيالها وتحصلين رجل   

كال سيف - اي والله رازقيه حظ العواهر جواهر

كال تمام - كافي خلي نسمع منها شنو سالفة زواجها أحجي انتي منو زوجج وشلون نوصله

واني بديت أحجيلهم من اول ما مات ياسر وتهموني بي إلى روحتي للمركز إلى يوم  انهزمت

بي من فرقد

وهذا الحجي كله تخبل الشيخ كال - يعني زوجج ضابط شلون راح نسد الموضوع ويا بس

الله اليعلم 

وهذا الحجي كله ورازقيه تبوس بطرف دشداشتي وتكول من ذيالج من بختج مصارين

اليوم تنامين بحضني عسى وعلى تعديني بخت من عندج

كال تمام - شلون نوصله  لزوجج وين بيته حتى نشوف شلون نتواصل ويا

اني أنطيتهم مكان شغله بس طلعت غلطانه لأن إني انطيت العنوان مال المركز القديم

وعنوان البيت ما اعرف أوصف بس دليتهم على المنطقه

رجع كال تمام - شمسه زوجج

كتله - اسم فرقد

كال سيف - انت صار ساعه تأخذ عنوان البيت هو وين اكو طريق المحافظات كلها مسدده

ماكو مال تطلع من محافظه وتدخل على محافظه اني اكول تدخلون على صفحته على الفيس

وتدخلون عليه خاص وتحجون ويا هذا احسن حل

كال تمام - شنو اسم صفحة زوجج على الفيس

انطيته الاسم والعشيره وعرفتهن من سجى من دخلنه على صفحته بحث هم نفس الوضعيه

مال سجى طلعت أكثر من صفحه بنفس الاسم

كال تمام تعالي شوفي منو هي صفحة زوجج

كتله - على صحفة فرقد لأن مخلي صورته هو وبروقي

راسله على الخاص وبس كتب بلا زحمه عليك أريد احجي وياك بموضوع كلش مهم مهم مهم

كالت رازقيه - أنطوني الموبايل خلي أشوفه لزوج مصارين

انطاها الموبايل وهي شافته وظلت تبوس بشاشه

وتكول  يمه هذا انطونيا نبقى بالحجر اني ويا
 
كال  سيف  - اللهم ثبت علينه العقل  كال لتمام  أفترض شافها وحذفها وما رد عليك 

كال الشيخ شاهين - انتي تعرفين رقم موبايله اذا حافظته انطينيا

كتله - لا والله شيخ ما أعرف اني حتى موبايل ما عندي لأن هو جان ما يقبل يصير عندي موبايل

كال سيف - حقه لو اني منه اربطج بزنجيل لأن  حمد لله مو ثقه

كال الشيخ - يلا كل واحد لغرفته صدعنه والله يحلها من عنده

رجعت للغرفه وضحى ورايه ورازقيه تكول - اليوم مصارين فرشي يمي حتى أصير بخيته مثلج

كتلها -لو بخيته جان ظلت كليتي

وسجى تضحك عليها فرشنه ورازقيه حلفت إلا تنام يمي بقيت ذاك الليل أفكر شلون راح

نتواجه اني فرقد بعد هاي الأشهر وإذا قبل ارجع ويا شراح يسوي ويايه بعد ما الشيخ شاهين

رفع حمايته مني واني النوم يفارك عيني بالليل لوجه الصبح يلا أنام ورازقيه تشخر كل ساع

من تتحرك تضربني لو تدفرني ليله جانت مأساة لما كعدت الفجر على الصلاة يلا خلصت

ونمت كعدنه الصبح على رازقيه تكول الي ولسجى كومن يا مسعدات الدنيا صارت الظهر

حتى العروس كعدت كعدنه اني وسجى  لكيناها ب 7  بعدها

من غسلت ورحت للمطبخ شافتني آمال وجانت متردده بعدين تقربت مني

وكالت - سامحيني دارين والله ما جنت اعرف سالفتج الله يهدي زوجج عليج وترجعين بسلامه

كتلها - فدوه بس أدعيلي  يقبل أرجع وأشوف ابني 

كامت تدعيلي بس اجتي تبارك المسمومه وياها أختها هي تبارك وحدها ما تنحمل انوب وياها

أختها ظلم يبسمرن بيه بالحجي واني أسكت وصحيح الي  يكول الواحد ما يحس بالنعمه الي

بيده إلا لمن تروح منه وهذا حالي ما حسيت بقيمة فرقد إلا لمن طلعت من يمه جنت يم

فرقد على الكلمه ما أسكت هنا شبعت أهاين ورزايل صرت اكول مثل ما كال أبو المثل

نارك ولا جنت هلي  بس اني جربت الذله صرت اتمنى الموت على أيد فرقد ولا هاي الغربه

واحنه ناخذ الأكل للصاله سمعت الشيخ يحجي ويا تمام

ويكله - خلي ابن خالتك يروح على المركز ويجيب الرقم مالته حتى نحجي ويا بس أيام تكله

أنه نريد نحجي ويا على موضوع زوجته ما نريد نفضح نفسنه من نحجي ويا نجيبه ونتفق

حتى نخلص من هاي المصيبه الي ورطنه أرواحنه بيها

مر اليوم عادي بين القال والقيل مال تبارك وزادت أختها هم

أجي تمام من شافني كال -  تعالي  ويايه للمضيف

لبست عبايه ورحت لكيت بس الشيخ شاهين دخلنه اني وتمام

كال الشيخ  - حصلنه رقم فرقد ابن خالة تمام راح للمركز الي كلتي عليه بس ما موجود بذاك

المركز لأن منقول منه ومحصل رقم تليفونه راح نتصل بي كدامج حتى تكونين على علم بكل

شي

أتصل الشيخ شاهين وفتح مايك

والله بدون مبالغه أحس كلبي راح يطلع من مكانه من الخوف دك الموبايل يم فرقد

رد فرقد كال  - نعم

الشيخ شاهين - السلام عليكم

فرقد - وعليكم السلام

الشيخ - حضرتك مقدم فرقد

فرقد - مال فرقد اي اني فرقد بس اني حاليآ مو مقدم صرت عقيد ترفعت هسه اني عقيد فرقد

كال الشيخ - على راسي عقيد فرقد ممكن تتفضل يمي اني عازمك اني شيخ شاهين من

الناصريه

كال - والله تعذرني لأن أمي

يتبع

ملاحظه /إلى كل حبايبي المتابعين الي افرح من أشوف تعليقاتهم الحلوه إلي أكيد بجمال

عيونهم الحلوه

أول تعليق 

ثاني تعليق

ثالث تعليق

  دمتم في آمان الله وحفظه

تصويتكم يسعدني