عذريتي مقابل براءتي

البارت الثامن

يا قاضي الحب قلبي متهم مظلوم

أفتح ملف القضيه واسمع اقولي 

واحد ذبحني وجرحي بالحشا مكتوم

مجروح واللي جرحني للأسف غالي

ماني أناني ولا أنا في الخطأ معصوم 

والغدر يا سيدي ما هو من افعالي 

بس البشر قاسيه ومن إحساسها معدوم

الحر في السجن والسجان رحالي

يارين - بعد ما حسيت اني حياتي ما ألها معنى عمار حرمني من كل حق ألي حتى امي حرمني

منها وين أروح حسيت روحي طير مذبوح وبأنفاسه الأخيره شوكت يلفظ هاي الأنفاس وتفارك

الجسد حتى يسكن آلم ذاك الجسد لا رحم شبابي ولا عمري حتى أحلامي تبخرت بماهر اني

أسأل اني غلط لو اختياري غلط وليش كل مره الاختيار الغلط وحياتي شلون تستمر بدون امي

أو  ماهر ألي خاني وخله خنجره بكلبي بدون رحمه وشنو ذنبي  ولشوكت أبقى أدفع الثمن

حسيت حياتي ما ألها طعم او لون تعاركت عمار جنت أريد اسوي شي بنفسي بس شنو ما اعرف
ردت حضن امي مثل كل بنيه تحتاج أمها بس أمي ماكو صعب تشتاقين للشخص ما تعرفين

هو يفكر بيج أصلآ لو ما تخطرين على باله ويفكر بغيرج مثل ماهر من ركضت للسطح ما

أبالي بس انتحر شلون ما اعرف بس خطر على بالي اذب روحي من السطح من فوك السياج

ذبيت روحي بس سبحان الله الفاشل بحياته يكون بكل شي فاشل

من وكعت صارت وكعتي بالحديقه ما حسيت بس رجلي صار بيها وجع وصوت كسر كمت اعيط

من الوجع وثواني وأم عمار وأخته سهى فوك راسي واجى عمار

رادن أمه وأخته يكومني بس الوجع ما ينحمل وبس أصرخ

أجى عمار شالني ويحجي ويا سهى

ويكول لأخته روحي جيبي السويج مال السياره

وأمه تكول - والله هاي بلوه وراح تبلينه مو كتلك طلكها وأخلص منها شفتها شلون عرمه

لك ابني عوفها رجعها الشارع الي إجت منه بنت الفكر جانت اللكمه ما شايفتها حسه هنا

يمنه تعافت بنت المعوقه  

هاي تحجي وعمار واكف يم السياره ينتظر سهى اجتي فتحت باب السياره دخلني على المقعد

الخلفي وطخت رجلي باب السياره لو كمت اعيط والناس كامت ادك بالباب يريدون يعرفون

شصاير وأمه  وكفت وياهن وكل وحده تنطي سبب شكل بس وحده

كالت اني شفتها من ذبت روحها من السطح ترى حرام على ابنج قبل كم يوم ذبيتوا أمها

المعوقه بالشارع ارحموا من في الأرض يرحمكم من في السماء

فتح الباب الرئيسي وطلعنه من الكراج وسهى ويانه والنسوان بعدهن مستلمات ام عمار

رزايل وهي تبرر

أخذني على دكتور خاص أخذوا اشعه طلعت برجلي المينى كسرين لأن من وكعت ثكل جسمي

صار كله عليها وجبسها ورجلي الثانيه لا بيها رضوض وانطاني ألها علاج

ورجعنه من وصلنه راد يدخلني لبيتهم وما قبلت اني

كتله - دخلني للمشتمل

ما حجى شي سوه مثل ما أريد واجتي ام عمار

تحجي على سهى وتكول ليش رحتي وياها لا تبليج وتكول هي دفعتني

وانت عمار هاي بعد ما أريدها ما كافي فاتن معوقه أنوب  دارين  وتعالوا خدموها مثل ذيج

كال - شلون اذبها وهي زوجتي بس فتره وترجع وياجن

بصراحه شكد اكو أخلاق سز مثل عمار ماكو كل الي شاغل بالهم منو يخدمهم بس مو مهمه اني

عدهم راحن عمتي وسهى وبقى عمار يمي

كتله - عمار والله شتريد أسوي وانفذه بس كلي امي وين

كال - شوفي اذا جريتي عدل 6 أشهر هنا يمي والله ارجع أمج

كتله - ودارين اني متأكده انت تعرف مكانها أو تكون عندك بغير مكان وهم مزوجها

كال  - على كيفج شنو هذا الخيال الواسع لا انتي غلطانه ما موجوده عندي وشلون ازوجها

وانتن أخوات حرام شرعن ما يجوز

صدك ضحكت من كل كلبي كتله ، انت تحجي صدك انت تعرف شرع الله اذا تعرف شرع الله

إلي أسوي بيه هذا حلال لو حرام مو الله يكول أمساك بمعروف او تسريح بأحسان

واني صار أشهر  اكلك طلكني ومتقبل هذا هم شرع الله

كال - هذا الحجي بعد ما يفيد نفذي إلي كتلج عليه واني عند وعدي وياج

وعافني وراح بقيت وحدي ونايمه على السرير  بمكان أمي واشم ريحتها وابجي عليها

اعرف هي دى تدفع ثمن أغلاط الماضي واحنه كلنه رهائن الماضي واغلاط الحاضر هاي

اللعنه شوكت نخلص منها إلي تحولت حياتنه جحيم بسبب هاي اللعنه وأفكر بحركة كلب

هسه منو إلها ومنو يوكلها ويغسللها ويبدللها تفكير موتني

ومن ضمن تفكيري اجى على بالي الأنسان إلي اخذ كلبي وخاني آخر واحد جنت أتوقع أنه

يخوني هو ماهر هو أكثر واحد يحبني ويدافع عني هيجي يسوي بيه الظاهر جنس بني أدم

كلهم خونه واني غلطت من وثقت بماهر من تفكير إلى تفكير نمت نومه ما حسيت ألا ثاني يوم

ب 6 الصبح يكعد بيه عمار جايب ريوك وسندني رحت للحمام ورجعت

كال - إني راح أروح للدوام من ارجع اشوفج وصيت عليج امي وسهى هم اني رايح محتاجه شي
كلت بكبلي راحت روحك وما طابت جروحك بقيت ساكته وما جاوبته

وهو راح بقيت بالكذب محد سأل عليه ومثل ما كال وموصيهن عليه صرت اترجى رحمة الله

من أريد أروح للحمام شده لأن وحدي أتحمل الوجع وامشي على رجلي وأتكئ على الحايط

صار عندي ملل اتذكرت موبايلي وهم بقل هو الله آحد يلا وصلت للجنطه طلعت الموبايل

لكيت مكالمات ورسائل لا تعد ولا تحصى من ماهر واني أقره بالرسائل هو عرف اني

ذبيت روحي من السطح شلون عرف بعدين اذكرت سهى معروفه منين عرف

وأكو   رساله ذاكر بيها هو بره شفت التوقيت ب2 بالليل وبعدين كاتب اذا ما احجي وياج

راح أطفر على بيتكم  وهوايه رسائل بين تهديد وبين يتوسل اسمعه

عفته ما رديت عليه وقررت ابقى ويا عمار إلى أن يرجع ألي امي ودارين ويصير عدنه راتب

واطلك منه وانعل أبو بعد إلي يدور رجال

مرت الأيام اني نفس الروتين وكمت أمشي على رجلي بدون ما تأذيني بس بعده الجبس بيها

بس بعد مرور 17 يوم على الحادث  جان دأئمآ يرسل رسائل تهديد أنه اذا ما يشوفني

أو يحجي ويايه راح يطفر على البيت اني جنت ما أهتم لأن ماهر قررت أخلي صفحه

وأطويها من حياتي وبيوم بالليل أسمع دك خفيف على الباب بين النايمه وبين الكاعده

اسمع صوت ماهر يحجي بصوت منخفض

ويكول - يارين حبيبتي بس أريد احجي وياج كل شي ما أريد والله بس افهمج

عرفت هذا المخبل ماهر نفذ تهديده وطفر على البيت ونعلت الساعه إلي ما جاوبت بيها عليه

كمت فتحت الباب

كتله - أنت مخبل أمشي روح لا أحد يشوفك وصير مشكله وبلوه على رأسي روح واني

احجي وياك بالموبايل بسرعه روح

كال - ما يهمني اذا أحد  يشوفني بس انتي مهمه عندي والله راح أموت من عرفت ذبيتي

روحج من السطح ليش هيجي يارين تحركين كلبي عليج

كتله - روح ابوس إيدك خابرني واني أجاوبك والله بس روح راح تفضحني

جر أيدي وطبع بوسه طويله وكال بس أوصل للبيت اتصل عليج وجاوبي عليه

وسبحان الله الإنسان لو يعرف الله شكاتبله ما يكول راح اسوي هيجي لأن اكو هوايه

أشياء اذا ما نكول أن شاء الله ماصير وهذا الشي انطبق على ماهر

كال من أوصل للبيت وهو ما أتحرك كم خطوه وطلع عمار يصيح عليه يوكف بس ماهر ما وكف

ركض ما سمعت غير بس طلقه بعدها  صوت جسم وكع طلعت شفت ماهر

قريب على السياج واكع وخاصرته كلها دم كمت أعيط اتهسترت من شفته بهاي الوضعيه

وأم عمار وسهى هم طلعن والناس كامت دك بالباب ويسألون هذا شنو صوت الطلق

الناري وهو يصيح عليه اسكتي وفتح الباب

والناس دخلت واكو شباب هم دخلوا شالوا ماهر وخلوا بسياره وياهم عمار هم راح وياهم

والناس واكفين وكل من يألف سيناريو على راحته وحده تكول حرامي وحده تكول ما

معقوله لازم يعرف أحد منكم واجى عليه وإلا شلون طفر عفتهم ودخلت للمشتمل واني

ارجف وكمت ادك والطم على وجهي بس لا ماهر مات والليل كله التفكير بماهر شلون

لو صار بي شي

للصبح اجى عمار مثل ثور وهايج اجى كبل خنكني وهو يكول هذا شيسوي هنا كوليلي

جان ينام وياج واني الكوا.... نايم على أذني وهذا إلي حبلتي بي جان من عنده وامج

إلي جانت تكو..... الج وهسه رجع يكمل هنا مو

دفعته قوي وهو هم ترك ركبتي وابتعد عني

كتله - ماهر أشرف منك ما لمس شعره مني مو مثلك ساقط ويدور حرام

اني حجيت و هو إبليس كام يركص على أعصابه حصرني بالزاويه وكام يضرب وين ما تجي أيده

واني من ورا جبس إلي برجلي ما اكدر أتحرك وهو يضرب اجتي أمه وسهى

خلصني من أيده طلعنه وهو يتهدد عليه واخذنه وراحن

والي عرفته بعدين أنه ماخذين ماهر للمستشفى و متصلين على أهله وصايره مشكله

وأهل ماهر مشتكين على عمار على أنه ضارب ابنهم وعمار مشتكي على ماهر أنه طافر

على بيته والناس إلي نقلوا للمستشفى شهدوا أنه طلعوا من بيت عمار

أما ماهر مدخلي صالة العمليات ومستأصلين جزء من البنكرياس وحالته بعد بيها خطوره

أما عشائريآ فكل واحد يريد الحق إله وآخرها اتفقوا العشيرتين أنه شيكول القانون الحق المن

يصير الحق إله   واليخسر القضيه هو الي يفصل لعشيرة الخصم مر على حادثة ماهر 10 أيام

وطلع من المستشفى

واستغربت أنه ماهر ليش ابد ما اتصل بيه بيوم الي طلع بي من المستشفى اتصل بيه رقم

غريب ما جاوبت عليه كرر الإتصال واني ما جاوبت عليه

اجتي رساله من نفس الرقم الغريب

كاتب - جاوبي عليه اني ماهر

حسيت كلبي راح يطلع من مكانه من فرحتي

من جاوبته كتله - حمدلله على سلامتك ماهر

كال - الله يسلمج يا نور كلبي مشتاقلج بكد دكات كلبي 

كتله شلون صرت والله بالي يمك ما أنام الليل كد ما أفكر بيك

كال - انتي شلونج يا نور كلبي شلون صرتي

كتله - صرت احسن وفتحت الجبس من  رجلي وهسه احسن اريد أطلب منك طلب

كال - انتي مو طلبين انتي تؤمرين

كتله - لهنا وبس بعد كل واحد يروح بطريقه وحجيتله اتفاقي ويا عمار

كال - شنو انتي كل عقلج صدكين بحجي عمار ليش هو رجال ويحترم كلمته

  لج بعد ما أتحملت على مودج كل هذا تجين تكولين كل من يروح

بطريقه شوفي لج اني بعد ما أذل روحي الج ومال نفترق أنسي والله افضحج واكول هاي

صديقتي وجنت أنام وياها وهي الي جانت تفتحلي الباب ودخلني يمها هو إني على الشغله

الأولى راح ادفع  فصل افضحج وهم ادفع فصل واعوفج بيد عمار يموتج

وسد الموبايل بوجهي اتصل عليه ما يرد بعدين كام يطلع مغلق

دارين - من رجعنه للبيت وفرقد جاب أكل ويا من المطعم وعرفن اني حامل

هذا اليوم أسجل من أسوأ أيام حياتي ويا مكثرهن أيام حياتي السيئه حتى ايام الفرح محدوده

وحتى معدودات من جنت بيت أهلي اني ويارين القهر ملازمنه وأفكر شصار بيهن هي وامي

كلت أريد أفتح الموضوع ويا فرقد بس اخاف كلت خلي استغل فرحته بحملي وأطلب منه

يشوف وين صارن مر أسبوع من عرفن بحملي وهن متخبلات

وخصوصآ قمر أما الباقيات حدث ولا حرج ودائمآ من أنزل ماكو كدامي بس عمتي تدعي عليه

والثلاثي المرح يغلطن بحيث كرهوني بروحي بس أحاول بكل جهدي اتجنبهم بس هذا بعد

فوات الآوان كمت ألاحظ أشياء غريبه مثل حياة جانت من تخابر بالموبايل بغرفتها هسه

عادي كدام منتهى وقمر تحجي كلت اني شعليه

هو إني مكروهه وجابت بنيه نوب احجي عفتهن كلت هن والله قابل احاسبهن

بس حياتي صارت ملل هن حتى من يكعدن بغرفهن عدهن موبايلات بس اني حتى سما

عدها موبايل واني لا  وكل وقتي لو ويا ابني لو شغل البيت ألما يخلص واني من أشوف

الموبايلات عدهن احسدهن وهن حاسداتني على فرقد يعني خصم الحجي احنه هاي الدنيا

كل واحد حاسد الثاني على الي بيده وماكو أحد قانع بقستمه

وكلت من يجي فرقد أطلب منه وأشوف وبهذا حملي صارت روحي بفرقد اجى العصر من

دوامه اول ما دخل للغرفه ركض عليه بارق وهو أخذه ورفعه وخلا على صدره ويشم بي

ويبوس

باوعت عليه بطرف عينه وهو يضحك عليه

ويكول - ها اشتغلت هرمونات الخبال شبيج تباوعين عليه هيجي

رحت سحبت منه بارق وخليته بالكاع وخليت أيدي على خصره وهو هم اخذ شفايفي بوسه

قويه وابتعد وكال - خير شبيج سالمين

كتله - تدري  أحبك روحي صارت بيك بحضورك غيابك عيني ممتلئه بيك وما أشوف غيرك

واشوفك كل شي بحياتي وكلبي ما دق حب ألا الك وبيك انت وما تهمني الدنيا اذا انت مو بيها

كال - الله بس الزوجه اذا  أدلل زوجها لو تريد منه شي لو عدها مصيبه ها حبيبتي يا هو منهن

كتله - والله حتى وانت ويايه اشتاق الك

رجع يبوس بركبتي ويكول ولج واني شكول والله إني بحياتي ما حبيت بس انتي حبيتج

صرتي روحي وعشقي والله ميت بيج اذا ابتعد عنج أحس روحي مختنك وشسوين وارجع

الج ولحضنج الي أنام بي مرتاح حبيبتي دارين شلونه حملج اخذي بالج منه حتى بعد

ما تحبلين هذوله كافي

كتله - أريد منك هدية حملي

كال - تؤمرين احلى هديه لأم بارق

كتله - حبيبي فرقد اني بالنهار اضوج والله واختنك وماكو أحد اسولف ويا أريد موبايل

انقهر والله من أشوف حتى بنتك سما عدها موبايل وإذا متريد اجيب الي اشتري لبروقي

واني ويا وانت يوميه فتشه

دفع أيدي من خصره وكال - شوفي دارين حتى انطيج من الأخير حتى بعد ابد ما أطلبين

وهذا الموضوع اسدي هو وموضوع ثاني ينسد هم وبعد ما نرجعله ابد

اولآ موبايل ماكو لو حياتج عليه أختار تموتين ما يصير عندج موبايل

ثانيآ وطلعني بيت وحدي هم أنسي

كتله - يعني بعدك ما نسيت واشك بيه وما راح أكلك لا أريد تشوف امي وأختي وين صفى

بيهن الدهر

كال - حتى اهلج أنسي عندج أهل اني كل اهلج شتريدين اني حاضر بس باستثناء الي

رفضتهن لا طلبيهن لأن مرفوضات

صدك ما أتحملت صدك صعد عندي هرمون الخبال على كولته كمت احجي شيش  بيش

على انت ما تكدر بس عليه ومن يم نسوانك واختك ساكت وهن كل وحده عدها واحد

وانت تعرف وساكت ودارين كل شي حرام عليها روح صير رجال عليهن مو عليه

كال - خلصتي يعني افهم من كلامج اني كوا..... مو عفيه عليج يا شريفه وقبل شويه

مال أحبك وما اكدر بدونك وين راح والله لما حامل جان اليوم اخلي الدفان كل شي

ما يلكي منج شي يدفنه  

اخذ ملابسه راح سبح واجى بدل وطلع واني انتهيت ما أدري بجي ما أدري غيره يعني

شعور مخربط مثل حياتي المخربطه بس الكلامي ويا فرقد ما مر مرور الكرام وعاقبني

فرقد بس بطريقته الخاصه كما أموت عليه وهو ميحس يحجي ويا الكل وما يحجي ويايه

وحتى يحرك كلبي غير الموبايل لسما بنته واني افور لا اكدر احجي ولا اصرف  وصاروا

ياخذهم ويطلعون للمول وحتى ياخذ بارق ونبقى بس اني وعمتي بالبيت وكل مره ياخذهم

بره يتعشون وأبقى بس اني وعمتي واكعد اسوي عشا النه وهو ما يهتم

أكثر المرات الي يصعد بيهن يمي يبدل بس وينزل استمر هذا الحال أكثر من شهر خلصت

الشهر  الثالث ودخلت بشهر الرابع وهو نفس الوضع ويايه أعتذر اتوسل ما يفيد

والكل أنتبه أنه ما يحجي ويايه وهذا جان كفيل أنه يعصبني وتلفت أعصابي كمت اموت على

النومه بحضنه وهو يعرف بس محاربني كمت من يطلعون ويرجعون بس اتعارك وياهن ومن

دخلت بشهر الرابع كلهن يلحن روحي للدكتوره شوفي جنس الجنين واني معانده ما أقبل أروح

وهو مطنش أكثر من مره اجتي حوراء ورادت بس اني ما اقتنعت كلت إلا أحرك كلب فرقد 

وما أخلي يعرف جنس الطفل ابد وهو أكثر من مره طلب مني أروح وهم ما قبلت

إلى بيوم نزلت وجانت قمر بنوبة خبال شبيها ما اعرف أسمعها تكسر وتغلط وسب

ما عرفت شبيها كلت بكلبي أن شاء الله ناركم تأكل حطبكم أن شاء الله كون ظلين هيجي

محترك كلبج وكفت بالمطبخ سويت ريوك لأبني  خلصت طلعت صارت هاي المخبله بوجهي

قمر اني بصراحه خفت بس أتظاهرت  بالقوه وأريد أعبر على مود بس أريد أصعد الدرج

حتى انهزم من كدامها  بس هي هجمت عليه وحصرتني قريب الباب

وتكول - كله من وراج يا خريجة السجون يا ام زلم  ولج حتى من اخذج ما ندري انتي بنيه لو لا

دفعتها  كتلها أي حبيبتي انت مصوره العالم كلها مثلج لو تريد وحده وياج على الواهس

وهي تخبلت بعد أكثر كالت والله اليوم اذبحج

عافتني  ودخلت للمطبخ تركض سمعتها من فتحت الجرار مال السكاكين عرفت راح أجيب وحده

اني ركضت والقرأن صرت أسرع من غزال البراري واستلمت الدرج كل 3 درجات اصعد سوه

ولا كأنه حامل وهي ورايه تركض وبيديها السكين اني دخلت لغرفتي وقفلت الباب وكفت اخذ

أنفاسي    وهاي المخبله ادك بالباب انصدمت من التفتت وما لكيت بروقي وهاي بالباب

شلون بس صدك الأم من يكون الموضوع يخص  أبنها تصير لبوه وفتحت الباب وهي

شافتني  واني دفعتها بكل قوتي وطلعت من الغرفه اصيح على بارق وصلت يم الدرج  وما

حسيت  إلا بدفعه بظهري وكعت من فوك الدرج وصلت لنهاية الدرج أيدي اعيط منها

وبطني توجعني ودم على التراك مالتي وعمتي تلطم على وجهه

وتكول  - هسه الطفل مات بطنها وفرقد يكلب الدنيا

اجتي حياة تريد تكومني بس الوجع يموت خابروا على حوراء وهي هم خطيه ما اتأخرت هذا

كله اني كاعده بالكاع ما اكدر   اكوم اجتي حوراء شافتني  كامت صيح

وكالت - بس اريد اعرف شوكت فرقد المسكين يرتاح ولجن كافي خلص عمره بالمشاكل

والله اليوم يحرك البيت بيجن

اجتي حياة وجابت ملابس ألي وكومني هي وحوراء واخذني للحمام غسلت وبدلت

بس الدم بعده ويزيد هم

كالت - أمشي نروح للمستشفى احسن ونطمئن على الطفل

ورجعت حياة جابتلي جبه وشال ولبست وطلعنه اني وحوراء بعد ما وصت حياة على بارق   

وصلت للمستشفى واني بطني احسها تتكطع ودخلنه على دكتوره نسائيه وهي من عرفت

حالتي اخذتلي سونار كالت ، حبيبتي الجاره مفطوره واخذتني وياها على صالة الولاده هنا

بهذا المكان حسيت حتى الوجع مال بطني راح لأن الي عدهن ولاده الصريخ مالهن يكزبر الجلد

ردت انهزم والدكتوره تكول  انتي عندج مغذي وأبره تخلصيهن وروحي مو ولاده وتخافين

نمت على السديه خلت المغذي والابره وراحت لما خلص المغذي وطلعت اني مية مره

شاهدت   كتبتلي الدكتوره علاج  وايدي طلعت بيها رض بس انطوني الها علاج ولفوها وطلعنه

للبيت ومنعت الحركه والجماع وحوراء تمشي

وتوصي بيه لا تتحركين وماكو جماع

ضحكت  وكتلها - ومنو يخليج تكعدين وما تتحركين وإذا على الجماع حمد لله اخوج صار

شهر ونص ما واصل يمي

وهي تهز بيدها وتضحك تكول يلا انتي هم بحجة الحلمان ابجي على ولفي انتي اليوم بحجة

الوكعه أصالحي ويا

وصلنه أخذت ابني لكيته ميت بجي عليه وصعدت فوك وهن استلمن حوراء يستفسرن منها

من صعدت قررت اسوي يوم أكشر على فرقد اذا ما طلعني بشقه وحدي

وكفت كدام المرايه واني اغم بروحي وبحظي الي ما سواني ويا النسوان

وباقيه هنا مكفخه لا وما يريد يطلع بيه وأرتاح خايف عليهن وهن يخوفن جيش وهو يا هو

يباوع عليهن هذا الحجي أصبر بي نفسي

نمت على السرير وأبني ونام يمي وغفى وكمت أذكر اول ما جابني فرقد للشقه شلون

جنت بس أريد انهزم منه وهسه اموت عليه بس ما أريد أعيش ويا  أهله

نمت ما كعدت غير على أيد  فرقدوهي تتحسس وجهي حسيت عليه

كال - شبيج بابا شكو تركضين على الدرج  هم زين ما صار بيج شي الله لطف بحالج

كتله - بس اني ما جنت اركض قمر هي تركض ورايه وبيدها سكين

تعجب كال ، شنو عيدي شكلتي

رجعت حجيت إله كل الي صار بس كالعاده لازم اكول كلام يخسرني كل شي

بعدها

كتله - شوف فرقد اذا مطلعني  بيت وحدي والله أحرك البيت بيك وعلى راسهن

كال - لج احجي عدل وهذا لسانج الزفر بطلي لا تندمين وراح تبقين هنا مال اطلعج بشقه

وحدج أنسي

وعافني ونزل وهو يصيح على قمر وطلعن هي وامها ومنتهى وحياة الآيه نكلبت 180 درجه

وجذبني واسمع عمتي تكله أي بنت الفكر تريد يطلعها بيت وحدها حتى تلعب بكيفها

وما كو واحد يكلها على عينج حاجب هو طارق ما خلص منها نوب وحدها حتى انت تطلع منا

وهي جيب صاحبها منا

وهو كام يصيح ويكسر على اسكتوا عنها شويه احترموا الكلب لخاطر أهله احترموني شويه

والله بزعت هي صيح ما أريد أهلك وانتوا ما أريد دارين ويانه بس كلولي وين أرتاح تعبان من

الدوام أجي للبيت المشاكل أعلى من راسي وين أروح واخلص منكم

شو كامت عمتي تبجي وتكله روح فرقد الله يفجعك بخلفتك مثل ما الله فجعني بسنان

وصرت بيدك وبيد دارين 

بس انتبهت أنه يحاولون يشككوا بيه بعدها المشاكل كثرت خصوصآ بعد ما عرفت قمر ليش

هجمت عليه لأن عرفت طارق تحدد عرسه لهذا تخبلت عليه

وحتى صار اي حجي بيني وبين فرقد ماكو وإذا تحاجينه لازم نتعارك استمرت ايامنه

بارده كل مشاعر بينه انعدمت وقرب عيد ميلاد السنه والثلاثي المرح يوميا بالسوك

يشترن شجرة عيد ميلاد وزينتها ونشراتها وحتى ملابس مال بابا نؤيل اشتروا لسما

واني ابني محد جابله شي متت قهر وحتى من يجن وجايبات شي ويريد يشوف او يمد ايده

على حاجه مثل كل طفل بعمره يضربنه وكامن يحاربني بأبني وين ما يشوفنه يضربنه

وهو بعده ما يعرف يحجي بس يأشر على الي ضربه ومن اشكي لفرقد

يكولن هي تعلم ابنها علينه حتى اسوي مشاكل خلصت الشهر الرابع واني دخلت بشهر

الخامس والحمد لله الحمل ثبت ورحت راجعت دكتورتي

وكالت - طفلج بخير أن شاء الله أبقى متابعتج إلى يوم ولادتج من راجعت الدكتوره جان

قبل عيد ميلاد رأس السنه 10 أيام وحتى من طلبت منها أشوف جنس الجنين

كالت - والله ما مبين أن شاء الله على الزياره الثانيه أشوفه عسى يبين ويانه من طلعت من

يم الدكتوره سأل فرقد  عن جنس الجنين من ورا خشمه

اني هم جاوبت من ورا خشمي كتله ما مبين

بس هو ما صدك راح سأل السكرتيره وهاي خطيه دخلت على الدكتوره سألتها رجعت الجواب

نفس جوابي وهبني النسوان الي يم الدكتوره استلمنه على حرام عليك ما صدكها وهذا رزق

من الله أحمد ربك الله انطاك أحمد الله وأشكره 

اني طلعت من يم الدكتوره ميته ضحك حتى خاصرتي كامت توجعني من الضحك

ركبنه بالسياره وهو بي طبيعه من يسوق يخلي بروقي بحضنه

شافني أضحك كال منج من الشيطان تضحكين حتى نسيت ضحكتج

كتله حيل النسوان فشلنك شبيك كاتل روحك بس تريد تعرف ولد لو بنيه حتى تروح تبلغهن 

عبالك اكذب عليك

كال اني شكد شايف  ناس عقول ما عدها بس مثلج ما شفت اني سألت حتى أسويلج مفاجئه

بس انتي الظاهر مو وجه نعمه

رجعنه للبيت وهم نفس القوانه واني صار عندي اقتناع أنه الكذاب يصور الناس كلها تكذب  مثله

لأن محد صدك أنه الطفل ما بين جنسه شنو

وعمتي استلمت فرقد على شلون صدكت بيها هاي متفقه ويا الدكتوره واكيد معوق متكول

وهاي حوبة المسكينه قمر الي طلكت بسببها بصراحه اني تعبانه حتى بعد ما بيه حيل

أجاوب عفتهم وصعدت فوك وبقى فرقد يمهن يبرر ألهن

ظليت اكتم بكلبي على حفلة رأس السنه وانقهر ما بقى على راس السنه الا هوايه 4 ايام

اجتي حوراء

وكالت - اكلج خلي نروح للصالون شكو كاعده بالغرفه انتي وابنج

كتلها - ما أكدر اطلع لأن فرقد ما موجود وهو منبه ما أطلع اذا هو ما موجود

اتصلت عليه كدامي وافق اطلع ويا حوراء بدلت اني وأبني بأسرع من البرق  ورحنه للصالون

وما خليت شي بنفسي ما سويته كملنه ورجعنه على بيت حوراء أخذت ابني لأن عفته يم بنتها

ورجعنه دخلت واني اصلآ ام الصالون خلتلي مكياج يجنن وفتحت الشال ونزعت القراصه من باب

المطبخ ونزل شعري على كتافي ودخلت للصاله اني وحوراء وهن شافني  لو إبليس تربع

بعقلهن وكل وحده تنطوي كلمه بس عمتي أخذت دور البطوله

والله بدون مبالغه لو قاتله سنان ما جان سوت بيه الي سوي

ما خلت كلمه تعتب عليها اول كلمه

كالت - النهار كله دايحه وعايفه ابنج وشعندج بالصالون تحيرين شسوين حتى بس يرجع ينام

وياج عمت عين هيجي نسوان دايحه وأنواع الغلط بقيت بس اباوع عليها أرد اخاف بعدين ما

اخلص صعدت فوك بس واني على الدرج كالت كلمه استوقفتني

كالت - هي الكح.... شلون صير لونها هذا لونها

وكفت والتفتت عليها وكتلها - حمد لله شريفه ومن أخذني جنت بنيه مو مثل بنت اختج

وهي ما خلت غلط بالقاموس العربي الإنكليزي ما كالتها لكون جبت طاري حياة بس تعجبت

شو ولا وحده ضربتني من رجعت أريد أكمل صعدت الدرج صار كدامي فرقد وهو ط

يصيح خير شكو واستلمته عمتي تسفيط حجي يعني خصم الحجي شحنوا عليه  وهو صعد

متخبل لكون عيرت حياة وهو

يكول - إني مو كتلج هذا الموضوع مال حياة محد يعرفه وانتي متحجين بي

اني من عصبيته ما حجيت شي هذا الحجي مالتي وياهن بعدين دفعت ضريبته غالي

مر يوم وباليوم الثاني  رجع من الدوام  كال حضري روحج راح نسافر الصبح

اني طرت من الفرحه جهزت جنطه الي وجنطه إله ولبارق والظاهر ما ناطيهن خبر واحنه

طلعنه الفجر  وما شفت ولا وحده منهن سوها الي مفاجأه طلعنه على تركيا وجانت السفره

حلوه  واشترينه اشكال من ملابس وعطور ومكياج واحتفلنه بعيد رأس السنه هناك جانت السفره
تجنن وبقينه هناك 10 شبعنه ونسه بس من رجعنه جانت الوجوه ثكيله علينه بس عمتي

انهدت بفرقد   هي ترزل بي وهو يبوس براسهأ بعد رجعتنه من تركيا المشاكل كل ما

يمر الوقت تكثر وصاروا يزرعون الشك براسه وهو منا يشك بأضافيره كمت من طلع من الغرفه 
يفتش ملابسي وأغراضي وأكثر من مره أشوفه ومن أسأله ليش أدور بأغراضي

يطلع أعذار واهيه متخش بالعقل وكل ما تمر أيام شكه بيه يزيد وهن كل يوم يكولن

فلوس نباكت وآخرها  حوراء اجتي يمنه خطار وهم

كالت - موبايلي وفلوس انباكت مني

وفرقد كل ما يكولون انباك شي يجي يدور يمي بالغرفه  وهذي الأشياء صارت بشهرين

بحيث اني دخلت بالشهر السابع ومر على دخولي بشهر السابع 18 يوم وبهاي الفتره

فرقد العيشه ويا لا تطاق صارت أي شي أسوي يشك واني ألبس واتعدل حتى بس أرضي

بس للقدر جانت اكو حسابات أخرى بيوم جنت طالعه من الحمام بالبرنص دخلت بغرفتي

ومشطت وحطيت مكياج وجففت شعري بعدني واكفه كدام المرايه وبروقي نايم

اندكت الباب بدون ما أكول أدخل دخلت حياة  وبيدها موبايل  

كتلها - غير من دخلين دكين الباب بعدني بالبرنص وما مبدله

كالت - حبيبتي شبيج خايفه

وانطتني الموبايل وتكول خالتي تكول هاي صديقتها انطيها رقم الموبايل مال دكتورتج

أخذت الموبايل خليته على أذني

كتلها - لحظه خاله هسه خلي اطلع الرقم

اجاني صوت واحد يكول فدوه لخالتج أنتظر حبي

تفاجأت بصوته بعدني ما حاجيه ويا وانفتحت الباب ودخل فرقد يلهث

صاح بيه بصوت هز أركان الغرفه وحتى بارق هم كعد على صوت صياح أبو ويبجي

وفرقد يكول - هذا الموبايل منين جبتي ويا من تحجين

يتبع

أحب كل بارت أشكر متابعيني على تصويتهم وتفاعلهم وتعليقاتهم الحلوه الي أدل على أخلاقهم

الفاضله اختاريت اول تعليق
حبي اختاريت تعليقج

ثاني تعليق حبي اطفالج شنو ذنبهم

دمتم في آمان الله وحفظه

تصويتكم يسعدني