في شريعه العشق

البارت الاخيـرر

#شريعة_العشق

#الاخير....

نورا ناصر

كان قد وعد زوجته فجراً بأنه سيصل مساءً إلى بغداد ليروي عشقه منها ، بالذكرى السنوية الأولى من زواجهم بعد سنين طويلة من مقابلتها لحبه لها  بالرفض والعناد لكن بالنهاية رضخت العنيدة المملوحة لشغفه  وتكلل عشقهم بالزواج لكن القدر قلب نيران الحب الدافئة في صدورهم إلى نار حارقة جمّرت أفئدتهم.

.... العراق  جار عليهِ الزمان والناس...
الزمان إلذي سمح بإعتلاء الجبابرة الخونة الحكم وجبروتهم على الضعفاء  ، طغاة باعت ضمائرها لدول تكره ان ترى العراق شامخا ...
بواحدة من أعظم المجازر التي حدثت على ارض العراق  وسالت منها آلاف الدماء الطاهرة والمغدورة  دماء أجمل وأطهر الشباب البريئة ..

لم يكن يعلم بان الغدر تربص به ، لم يكن يعلم بان القدر غير مخططاته ، فاحت رائحة الغدر والخيانة حتى كادت ان تزكم الانوف ، حيث غادرت القيادات المقر في الصباح  ، رائحة الغدر تخللت انفاسه ، كانت الفرصة سانحة له لكي يغادر معهم كما خطط له ، الا انه رفض ان يترك جنوده وابى الا ان يبقى الى جانبهم حتى الرمق الاخير .

انه زمان الغدر والظلم والجبروت نعم تركوهم لقمة سهلة لجنود الشيطان العابثين بالارض والعرض كما حدث في سبايكر و السجر والصقلاوية ، حيث يتركهم القادة قبيل الهجوم وهذا ما اكده العديد من الناجين من تلك المجازر .

لا والله لم يكونوا لقمة سهلة ، فقد قاتلوا قتال الابطال قتالا مستميتا حتى اخر قطرة من دماهم الفوارة التي تجري في عروق نشأت على حب الوطن وعلى التضحية والفداء ، من اجل ارض تعشق دماء ابناءها
ولاتنفك ان تشبع منها  او ترتوي قط .

وتحققت شكوكه اخيرا ، حيث حاصرهم جنود الشيطان "داعش" من كل حدبٍ وصوب ، قاتلهم مع جنوده قتال البواسل لساعات متواصلة ..طلبوا الدعم مرارا وتكرارا ، لم يجدوا اذانا صاغية لهم
انها والله خيانة عظمى .

احس ان الموت اقترب وحان موعد الفراق ، مرر اصابعه المليئة برائحة دخان الاسلحة وصدأ البنادق
على رقمها هي لبة قلبه التي عشقته اخيرا ، بل امتلأت روحها بهيامه وفاض عشقه منها ، تلك القاسية الباردة
و العنيدة التي رفضته مرارا ، اصبحت متيمةً به وكيف لا تعشق رجلاً مثله ، كان يعاملها كأبيها ، كطفلة لم تولد من صلبه بل من لب قلبه .

اعتلى مكانا غير ابهٍ بأزيز الرصاص من فوقه ، فقط ليسمع صوتها ليقترن بقلبه ، ليطلب السماح منها انه ذاهبٌ للموت لاولائك الجرذان لن يسمح لهم بقتله
بل سوف يقضي عليهم بشجاعته ورجولته .

اتاه صوتها الانثوي ، شعر بنياط قلبه تتقطع انها المرة الاخيرة ايتها الحبيبة ، سامحيني واطلبيني بالجنة .

انها معجزة ، فالاتصالات هناك شبه معدومة
كيف اتصل بيها لايعلم ، سمعها تصرخ ..
قسووور احبك لاتتركني .. وانقطع الاتصال ..

ترجل من مكانه اخذ يحشو جسدهه بالمتفجرات
الموت اتٍ لا محالة ..

استغرب بعض جنوده تصرفه فالبعض مشغولون بالتصدي للزمر الشيطانية ، اقترب اقرب المقربين منه
سأله ؛ سيدي شنو جاي تسوي ؟

اجابه بخشونة وهو منهمك في وضع المتفجرات على جسده الرجولي  ؛ اسمع حيدر الموت اولها وتاليها احنه مبيوعين ، انتوا كلكم عدكم عوائل واطفال اني مارزقني الله بطفل اني  اهون منكم كلكم اذا طلعتوا منانه سالمين هاي الجنطة بيها امانة توصل لمرتي .

_ بس سيدي الدعم وينه ؟ صار الليل وهم ماكو ؟

_ ماكو دعم يطول يله يوصل او يمكن مايوصل كتلك احنه مبيوعين عتاد بلش يخلص راح اشغلهم اني وانتوا اطلعوا لاتبقون بالمقر اتسللوا وروحوا عن طريق البساتين حاولوا تبقون عايشين وان شاءالله توصلون لاهلكم سالمين .

قال كلماته ااالاخيرة من ثم ودعهم واحدا تلو الاخر
الموت يحيط بهم لم يكونوا وجلون قط ، لم يكونوا جبناء ابدا " الجبان يموت الاف المرات  لكن الشجاع لايذوق الموت الا مرة واحدة " .

......

عبير .. جان الاتصال يكطع كل شويه وهو مااستمر غير اقل من دقيقتين او لا جان صوت الرصاص يمه يرعبني تكلكني القلق والخوف واني وحدي ، اخر شي سمعته منه " اطلبيني بالجنة "

صرخت قسور احبببببك لا تتركني ، حباب ارجعلي انتظرك اني والله العمر كله انتظرك ، لكن هيهات ماسمعني انقطع الاتصال ، وكع مني الفون واني مااعرف شنو الي صار وياه ، ظليت الوب ، مرت الدقايق انهاريت ظليت ادك والطم ومحد يسمع صدى صوتي بس االحياطين .

رجعت اتصلت بي كومة ماجاوبني ماحصلته ...
وييينك قسور داانتظرك لتتركني وحدي ، العام هيج وكت انت يمي ، جنت لابستلك الابيض ، جنت يمي عريس وينك انت هسه ويييين .

شمرت التليفون عني اريد اكوم اتوضى واصلي حتى ادعيله يرجعلي سالم ، ماكدرت ، جسمي يرجف
جنت مدنكة ومتربعة ، حسيت قطرات دم توكع بحضني ، مديت ايدي لخشمي جان ينزف هوايه .

ررررن موبايلي ، صرخت " قسوووور"

حتى مباوعت للشاشة كبل جاوبت ..
اجاني صوت امي " ها بنتي وصل زوجج "

من كل البجي جاوبتها : ماما قسور يكووول حيموت مااماااا راح  قسور ماااااماااا حموووت ورااه مااما ادعيله ميموووت حبابة .... اريده ماما اريده يرجعلييي مااااام

بعدها ماحسيت بشي وكعت ، وبين الوعي واللاوعي
موبايلي يمي يررن وصوت الباب تندك بقوووة...

كمت على حيلي اصلا ماكو حيل حيلي مهدود ..
اخذت الموبايل بعده الامل بيه يخابرني قسور
ويكول" اني مابيه شي" وجايج بالطريق " !!!
" انتظريني لتنامين نحتفل سوى"
كل هالكلام رسمته بمخيلتي ، لكن الواقع يختلف .

جان المتصل بابا وصوت بابا اجاني مو ع الفون لان ايدي ترجف وكع مني ، بعد ما خاب املي من ان اتلقى مكالمة من قسور ،  جان صوت بابا ع الباب .

كوه مشيت احس بأي الخطوة الي بعدها اوكع
ورحت فتحت الباب ، جانوا ماما وبابا ومريم
اخذني بابا بحضنه وظل يستفسر مني
اجاوبه والدموعي مغركتني الكلام مااعرف شون يطلع مني .

اخذني للداخل ، اللحظات جانت عصيبة كلش .
ا

نهاريت وكعت ، اتوسلوا بيه حتى اروح وياهم للبيت رفضت ، اصريت ما اطلع من بيته ، ابقى بي الى ان يرجع ، هيج جنت متأملة ، جنت اتمنى مكالمته مجرد حلم واصحى منه بعد شوية اشوفه يمي .

صبرك يارب احس روحي راح تغادر جسمي بعد شويه
من شدة الالم ، الم ماينحمل ابد ، ربي والله محتاجته والله اريده والله احبه ، اتركه الي ولتاخذه مني .

مااعرف شكد مر الوقت مااعرف اذا جنت نايمة او جنت بغيبوبة او فاقدة للوعي ، كعدت اني بغرفتي
غرفتنا اني "وياه" الغرفة الي شهدت على ايام وليالي حبنا ، كلامه الي جان يملي اسماعي ، بكلمات احلى من كلمات غزل الشعراء واحلى من كلام الي ينكال بالاغاني .

راح افتقده طول العمر ، راح اشتاقله طول ما اني عايشة ..

مااعرف شوكت وبيش الساعة بس جانت الشمس يرسم خيوطها الاولى .. مريم كاعدة بصفي ، زهراء واكفة يم الشباك ، شوكت اجت مااحسيت ..
توه فاتحة عيوني  اجت ماما ، ماجنت اشوف زين بس غواش  عيوني مليانه بالدمع .. واسمع امي تشهك ..
ووراها بابا اجه كعد يمي ، لزم ايدي .

_ بنتي زوجج عريس الجنة ، الله يجمعكم بالاخرة .

سمعت صوت صراااخ اخواتي وامي بس صوتي ماكو صوتي مات واختفى ، تخايلتي صورته هيئته الرجولية
مبتسم واكف كبالي ، يحاجيني يرفع حواجبه ، صورته مطبوعة باجفاني مستحيل انساها ، غمضت عيوني مرغمة يائسة .

انهاريت وكعت من السرير .. حصرت نفسي بالزاوية بين الكنتور والسرير وكمت الطم ع رأسي دخل بابا يركض أخذني بحضنه
_قسوووور والله احببك حباب لتموت عيش علمودي أنت مو كلتلي صيرلي أهل والله اصيرلك أهل بس لتموت بعدنا ببداية الطريق قسوووور ........

بجيت لمن تعبت أحس الحزن تغلب عليه كل فترة افقد عزيز واستشهاد قسور كسر ظهري مااتحمل فراكه ابد لك ليش  من حبيتك عفتني ليييييش قسووور ..

جان بابا يحجي بأذني : عبرة أنتي قوية قسور عريس الجنه راح شهيد خلص من ظلم الحياة هنياله بقينا احنه لج انتي لازم ترفعين رأسج وتكولين اني حبيبة الشهيد الدافع عن ارضه وماانطه بيها ابويه انتي ..

_ بابا قسور مشاف شي بحياته تالي راح للكبر  للكبر صرخت اخخخخخخخ ....

....

كوموني خواتي لبسوني اسود ، الفاتحة جانت ابيت عمه ، اخذوني لهناك ، جنت شبه فاقدة ، تخربطت جابولي للبيت سستر خلتلي  الكانيولا الي مافارقت اديه على طول ايام  العزاء .

المغرب فات موكب عسكري جبير من يم باب بيت عمه  والنشيد الوطني يشتغل

كمت كوة كعدت بعتبة الباب والنسوان طلعت  وظلوا يهوسون (عريس وربعه يزفونه )

بعدين صاح واحد بيهم : وصيتك تنفذت سيدي الملتقى عند الحسين سيدي

اتذكرت امه من جانت تدعي..
عليه تكوله يوم الي يجيبوك ملفوف بالعلم واخلص منك...

من تذكرت دعائها تمتمت  :
قسووووور الله استجاب لدعاء امك واخذك منييييي

جانت يمي زهراء لازمتني ، عمه جانت يم التابوت واسمع بس صوتها تصرخ هيه واخواته ، عاتبتها بداخلي ولا اقوى على شي غيره ..

الي موتني اكثر وكطع روحي لمن عرفت انو مفجر نفسه .. على داع ش .. وماوصل منه بس اشلاء ..
مااعرف شلون اعبر عن المي احس روحي تطلع ..

اجه عمو لطيف ابو قسور جان منهار كلش ، خله بيدي جيس وكال هاج بنتي هاي امانة من زوجج ..
اخذت الجيس وظليت اشم بي واخلي على قلبي واحضنه احتاريت شسوي ، اخذوني اخواتي جوه
جان بي حلقته ومحبسه وعلگ وتربة مالته الي جان يصلي عليها ، حضنته واحس ريحته بيها ..

قسور صار جزء من صلاتي بكل صلاة ادعيله وتربته لليوم اصلي عليها وبكل امام ازوره اقراله قرأن واهدي لروحه ..

زهراء .. بهاي الفترة عبير حيل تعبت واصرت متجي يم اهلي واله تبقى ابيتها هي وقسور " الله يرحمه "
فظلينا يومية وحدة تبقى يمها تبات وياهه ، جانت تبقى سهرانة للصبح وونينها يبجي الحجر ، وحالتها الصحية مووتمام .

اني هم هملت نفسي جنت احس نفسي موزينة بس مهتميت اختي جاي تذبل كدامي واني ماابيدي شي اسوي الها ابد .

لحد مادخت فد نوب معدتي ظلت تكلب وصار عندي تقيء ، شكيت بنفسي حامل ، سويت تحليل بالمختبر
وطلعت النتيجة ايجابية .

ماجان عندي مجال للفرح ابد ، حياتنا بأخر فترة
كلش مخربطة ، خابرت صفاء لان جان مموجود بالمستشفى عنده مؤتمر  خابرته وبشرته .
حس على نبرة الحزن بصوتي ..

كال شبيج يبعد روحي ليش هيج صوتج حزين ؟
تنهدت ؛ صفاء تدري مو وكته ابد شفت حالتنا شلونها وشلون محتارين بعبير حتموت روحها والله .

_ ميخالف حبيبي هو الطفل شنو ذنبه خو مانرجعه بعد صار وراح وبلكي وجهه خير علينه .

_ ان شاءالله حبيبي ..

_ هسه ديري بالج على نفسج وماريد تتعبين تمام ؟

_ ان شاءالله ...

_ انت اليوم يم عبير ؟

_ لا عمه ام قسور حتبات يمها الله هاديها مدري شعجب .

_ الله يهديها ..

_ امين ياربي .. ختمتها وياه ..

مرت الايام والاشهر ، كوة ورة العدة بابا قنعها لعبير لحتى تجي ويا لبيت اهلي ، كوة قبلت ولمن اخذت اغراضها ورادت تطلع كلبتها مناحة ، عبالك قسور مات هسه ، طلعنه ملابسه الي جانت بعدها جديدة ، هي اخذت كم قطعة احتفظت بيهم والباقي تبرعنه بيها للفقره .

...

ومرت الاشهر ودخلت بشهر  الثامن طبعاً هالحمل تعبني اكثر من حملي الاول ابد ما جان سهل خلصتها مستشفيات ويومية يم دكتورة

وبوحده من المراجعات جانت مريم ويايه فحصتني الدكتورة كالت اسبوعين وتجين موعد عمليتج ومن رجعت خبرتهم صفاء انعقج لان عملية ومرت الاسبوعين ورحت للمستشفى علمود الولادة بابا حبيبي جان ويايه خطوة بخطوة ومريم هم وهمام بقى يم ماما ..

وصار لازم افوت  لصالة الولادة وقبل لا ادخل وصيت صفاء ع همام

وكلتله : أني مسامحتك ومبري الذمة ع كولشي سويته واذا طلعت سالمة من العملية ننسى الفات ونعيش علمود اطفالنا واذا ماطلعت

مخلاني اكمل كلامي حط أيده ع شفايفه : اشششش اسم الله عليج أم همام تكوميلي بالسلامه

دخلوني لصالة العمليات ، بنجوني ، ماحسيت بشي بعد

لمت صحيت من البنج الم فضيع ببطني اول مفتحت عيني لكيت مريم  يم رأسي نسيت المي ووضعي

سألتها :  همام شلونه ؟

_حبيبتي همام ويا عبير ولج بنتج الفصعونه الصغيرونه ولج تخبببل تنكرط كرط حمرررة وعيونها رصاصي مثل اخوها المطي

_لتغلطين ع أبني ولج
_ايبااااه

كامت باستني وبجت : حبيبتي ربي يحفظج ويحفظ اطفالج الج تعبتي هواي زهرة ان شاءالله ايامج الجايه كلها سعادة .

تذكرت عبير ودمعت عيوني ، دعيت الها ربي يريح قلبها ويرجعها مثل قبل ، لان هواي تعبت ..

ثاني يوم طلعت من المستشفى رحت لبيت أهلي جانوا مجهزيلي الغرفه القديمه مالتي لحد الان محد اخذتها من اخواتي وبقوا ينامون سويه سمينا الطفله سدن جانت ماخذه عقل بابا وماما واخواتي

اما همام تمرض بسببها يغار وصفاء كل عقله يكوله
_دكوووم لك ارعن عيش العشته أني من اجيت انت للدنيا

يموتني ضحك سدونه جانت نسخه من ماما ومني ودنفوشه تخبل ومريم واكعتله عض تخيلني اتخبل

تكولي: ولج مااقاوومها اكزكززز من أشوفها ام خدود بعد لتخلفين يمكن اكرطهم

كبرت سدن صار عمرها سنة وهمام ٤ سنوات وبعدني كل فترة افتش موبايل صفاء وهو يدري بس ميحجي حتى سيارته افتشها وملابسه هم أشمهم مرات يضوج بس يغلس ويكتفي يطلع برا البيت أتمنى ابطل هالعادة بس مااكدر الشك انزرع بداخلي

الى أن فديوم مل من شافني افتش بموبايله وحجه ويايه: زهراء لشوكت؟

_ماادري
_الله يخليج ثقي بيه ولج والله مو بأرادتي الصار وعيونج مااخونج بعد لو يصبوها من ذهب

_منيه هي اليصبوها من ذهب؟

صفن: لا بالله متصيرلج جارة اولي انام بالصاله احسلي

طلع نام بالصاله بنص الليل لحكته ردت اشوف شديسوي لكيته نايم ع بطنه دحست نفسي بصفه

فز باوعلي وعيونه دم من النعاس خزرني ابتسمت : ها خبلتي شعندج جايه يمي

_أحبك

بسرعه أنكلب وصار فوكايه : عيدي شكلتي ولج؟

_وخررر عني ثكيل انت
_شكلتي ؟
_احببببك

شو هذا عاط بصوت عالي امووووووت ع ربج

ضحكت بصوت عالي وهو صار يبوس بكل انش بوجهي وجسمي واني خربانه ضحك عليه ..

مريم  : بدأ الدوام والدراسة كولش صعبة كولشي مداافهم احس نفسي بدوامه والاغلبية مثلي ومن جنت ارجع للبيت اخلصها بجي حتى فكرت ابطل تالي صفاء اقترح عليه اروح ويا للمستشفى واشوف طبيعة عملهم لان كال من تشوفين الشي الي دتدرسي يتطبق شويه حيسهل عليج

وبالفعل من بديت اروح وياه للدوام بدت المواد تسهل عليه وكمت اشارك بالمحاضرات بعد مجنت بس اتصفن هسه حتى الطلاب بدوا يطلبون مني اشرحلهم كمت ع وقت فراغي اروح ويا صفاء للمستشفى

جان صديق صفاء عينه عليه ومرات من صفاء يدخل عمليات هو ياخذني وياه ويخليني اساعده ويعلمني هم الولد جان اريحي كولش وحباب وبس ينكت

مرة من جان ديعاين مريض واني واكفه بصفه ومركزه وياه حيل هو انتبهلي

كال : ها دكتورة مريم افتهمتي هسه اني شسويت وشلون شخصت الحاله؟

جاوبته :بلي

طلب مني اطبق واني داامارس العمل دخل صفاء بس جانت نظراته دتخترق دكتور إياد تقدم صفاء باتجاهي وسألني

_ها مريوم شلونج شنو الصعب عندج؟

ظليت اباوع بينه وبين أياد وهم يوزعون نظراتهم مااعرف ليش حسيت اكو شي

جاوبته : زينه ودكتور أياد ممقصر هواي دااتعلم منه

_امممم زين اني هسه عندي عملية واريدج تدخلين ويايه بيج حيل لو تخافين ؟

الموضوع لحاله رعبني بس كلت بداخلي لازم اجازف واتعلم وبالنهاية هاي مهنتي يعني بالمستقبل هواي حدخل صالة العمليات شي أكيد

طلعت قبل صفاء شفته ديشاور دكتور أياد وذاك مبتسم

وقتي جان مخصص بين دوام بالكلية وبين المستشفى وهكذا حتى مرات انسى اكل وماما تفتر ورايه وتخلي الاكل بحلكي

والمضحك بالموضوع همام بعد ماجان مصادقني هسه كام يخاف مني لان مرة عبير ارتفعت حرارتها وهو جان يمنه واني ضربتها أبرة وهو من ساعتها يصيحلي ميومه الشليله عود الشريرة

دكتور أياد انطاني رقمه خاف احتاج شي منه هو خوش ولد بس أني جنت دائما اصده حسيت هو يريد يتقربلي بس أني محبيت تكون بيناتنه علاقه مااريد هالشي أبد

لحد مافديوم جنت دااقرا وصعدتلي عبير ظلت تباوعلي عبالك دتدرسني

كالت : منو اياد؟

_دكتور بالمستشفى وصديق صفاء ليش؟

_امممم وهذا منيله رقمي؟

_رقمج؟ ماادري
_الولد خابرني ويريدني احجي وياج اقنعج شنو بينكم ؟

_ماكو والله بس هو طلب علاقه واني رفضت اطمئني عبير مو الي ببالج والله

_وشنو البالي ؟
_عبالج بيناتنه شي وو...

_انجبي بله انجبي كامت تتفلسف هذا الولد حباب شو ارتاحيتله حسيته شاريج وعليهِ

_شنو؟
_اني قررت اتوسط لنسيب العائلة يمج بلكي تقبلين بي

_لا عبير بعد وقت كدامي الحياة طويله
_هو اني هم كلتله مو هسه وخليك بعيد عنها منا لمن توصل مرحلة رابعه او خامسه عود الله كريم والولد محجه شي بالعكس رحب بالفكرة

_الله كريم عود
_ماكو اكرم منه بس احسج راغبته
_وليش ماارغبه ع الاقل احسن من محمد الخايس يومية سكران وكل ميشوفني يسوي نفسه العاشق الولهان وهو ريحته تذبح عبالك فطيسه

وهسه يلا حبي طكطكي نعالج وشوفيني عرض اكتافج اختج عدها دراسة...

_ اممممم ..
تريد تطلع صحت عليها  وانتي شوكت ترجعين لدراستج .. ؟؟ لج عبير قسور اكيد مايريدج تبقين هيج حزينة اكيد يريدج تكملين دراسة ..

_ هزت راسها الله كريم يصير خير .. يله اقري معليج بيه ..
وانطيتها بوسه بالهواء ورجعت ادرس ..

... عبير مرت الايام عصيبة عليه ، فراك قسور هلكني وصار سنة على وفاته ، رحت لقبره بجيت عليه عاتبته هواااي ، بعده يحز بنفسي انو هذا القبر يحوي اشلاء من جسد الي بقيت ليالي انام على صدره ، جنت اندب حظي لان رحمي مااحتوا بذرة منه ، جان رحمي اقسى من قلبي الي هام بحبه .
جنت اتمنى طفل منه يشيل اسمه ، شجاع مثله ..
بس ماصارت الي ..

رجعت داومت بعد ماتركت سنة كاملة ، اهلي وكفوا ويايه ، ساندوني ، شجعوني ارجع ، رغم الكلام الي سمعته من بيت عمتي الي جان يأذيني ..

وبيوم جنت متمددة بغرفتي صعدتلي مريم ..

كالتلي : عبير اجه كرار جوا هو أمه ويريد يشوفج يلا تعالي انزلي

هزيتلها رأسي كمت وكفت دخت رجعت كعدت ..
تذكرت قبل هوااايه وقت قبل كم سنة بوقتها جان كرار بعده ممتزوج مها .. لمن كعدت من النوم ونزلت شفت كرار وجماعته بحديقتنا ، جنت بوقتها مرحة احب الحياة ، فرق شاسع مابين الماضي والحاضر ..
جان مجرد طيش صار كله وهم هسه ..

اتاخرت واني كاعدة افكر  ، صعدلي كرار اول مشافني

كال : ها لج حمارة صار شكد من دزيت مريم حتى تنزلين اشوفج

_اي هسه حنزل

_خاف زحمه عليج هو اني صعدتلج بعد يلا كومي سلمي ع أمي لو هم تريديها هي تصعدلج

نزلت سلمت عمه بقوا يمنا ع العشاء قبل ليطلعون صاحني كرار : تعالي عبورة عندي حجايه وياج

رحت دااشوفه شيريد شغلي تسجيل صوت جان لقسور وهو يحجي عني وعبالك يعرف حيموت جان ديوصي كرار عليه : باوع لك حبيبي العار دتشوف ذاك النجم

كرار جاوبه : أي شبي؟

_عبيري عندي مثل النجم شكد مااريد اوصللها تظل بعيدة عني بس هم أحبها وأعرف هي تريدني بس امي اخخخخخ من أمي كل متشوفها تسممها بالكلام تاليتي أموت وابقى بحسرتها

كرار المطي اذا متت ولك أني اخيك عبيري امانة بركبتك محد راح يحميها غيرك بعد اخوك لتخلي أمي تأذيها

خلص التسجيل وأني دموعي مااسيطر عليهم لزمني كرار من كتفي : صعبة مو؟

_كرار أول مرة أعرف شنو يعني فقدان وانك تخسر قطعة من روحك قسور جان ملاك أبد مااذى احد خسرته كرار

ابتسم بحزن : أنتي انتبهتي لشي لولا؟

_لا شنو؟

_اي مو غبية بس لسان انتبهي مها وصتج بيه وقسور وصاني بيج شنو هالمعادلة الصعبة ولج

صفن وابتسم تاليتي اتزوج نيلز هههههههه لج غير اخلصها مكافش وياج بمحمد اكومج بدفرة واكعدج بجلاق هههههه

_ايبااااه فدووة ع اساس أني وافقت بيك وكاعد تتحلفلي وتعال يمه تدفر ؟

_اعتذر سيدي مااقصدك انت شبيك دااتشاقى وياك عبود ..

ابتسمت بوجهه بعدها بقوا يمنه للعشه واني صعدت فوك .. لمن طلعوا صعدتلي مريم كالت حجوا بموضوعج ..

وكفت سألتها شنوو ؟

كرار جاي ديخطبج بس مكالوا كدامج ..

انصدمت ،  مجنت متوقعه كرار حيخطبني ظليت صافنه وافكر بتصرف كرار وليش سوه هيج وهو يعرف البداخلي شنو ويعرف ردة فعلي هم هو زوج صديقتي ومها الله يرحمها جانت تحجيلي كولشي وجنت اني اتدخل واصالحهم اذا تزاعلون لزمت فوني واتصلت ع كرار ظل يدك هواي ومجاوب رجعت اتصلت وهم مجاوب وكأن هو يعرف ليش دااتصل ومتعمد ميرد

دزيتله مسج اذا مجاوبت ترى اجي لبيتكم والله

بسرعه هو اتصل بيه قبل لا احجي كال : اعرفج مخبله تسويها اول مرة اشوف عروس هي تجي لبيت الولد عمي ترى اني خاطبج مو انتي متستحين تجين لبيتنا هههه

حسيت ديتشاقى ويايه ديريد يلطف الجو لان عرف اني معصبة منه تحسرت وكلتله: كرار انت شلون تسوي هيج ؟

_شمسوي بنت عمي ودااخطبها قابل كفرت؟

_لا مكفرت بس احنه اثنينا نعرف كل واحد بينا شنو بداخله وتصرفك ابد محلو شلون مكتلي انت جايب  عمو وعمه وحجيت ويه اهلي بدون علمي انت ترى دتفشل اهلك بهذا تصرفك وعيب ..

بعدني ممكمله كلامي عاط بيه : شنوووو العيب ست عبير شنووو العيب ها دتعلميني بالعيب انتي وتعالي جاي الحياة لازم تستمر يمكن تكولين عني قاسي او نسى الماضي لا منسيت بس لازم اتعايش ولتظلين تخوطين بصف الاستكان

_اني مااقبل بيك

_تقبلين عبير تقبلين اليوم او باجر حتقبلين ولتنسين اكو وصية ميت وحتبقى ذمة بركبتج

_وانت تريدني اوافق علمود وصية ميت؟ واحطم نفسي ويا شخص ميريدني ليييش ؟ وبعده زوجي

_ مخلاني اكمل ؛  شوفي انتي هسه معصبة مني من تهدأ اعصابج عود نحجي يلا باي

سده بوجهي نزلت جوا لكيت بابا كاعد ديشرب جاي صاحني رحتله

كال : عرفتي بيت عمج ليش اجو؟

_بلي

_وشنو رأيج ؟
_مموافقه

_فكري باباتي كرار خوش ولد واني مااجبرج ع شي بس انتي وكرار كولش مناسبين لبعض وبالنهاية الله يقدم الي بي خير

سكتت مجاوبته وصعدت .

مريم : صرت مرحلة خامسه ودكتور أياد رجع صارحني وهالمرة مرفضته كلتله انطيني مجال ومن رجعت حاجيت عبير كالت خلي يدز أهله ورجعتله خبر وثاني يوم اجوا امهاته جانت زهراء وزوجة عمو كريم يمنه

اهله جانوا كولش راقيين وامه أبد مرفعت عينها مني ورا اسبوع رجعنالهم الموافقه وحددوا يوم المشية والخطوبة اتمنيت عبير تجي ويايه بس مقبلت

كالت : فالي محلو

شكد بجيت وعيطت ولا اهتمت ،  زهراء خلت الاطفال يمها ورحنا اني وياها نحجز البدلات والمصيبة اني ممتعودة ع زهراء كل شويه وكلتلها عبير وهي تضحك لان زهراء تزوجت واني صغيرة فحتى متعرف اطباعي ولاتعرف ذوقي

فعلت نت ع الخط وصورت لعبير وهي اختارتلي البدله

وبيوم العقد كعدت الصبح اخذتني زهراء للصالون واني هم محبيت احرج عبير ومن رجعت جانت عبير دتنتظرني اول مدخلت للبيت حضنتي وباركتلي

شويه واجوا اهل اياد واشتغلت الهلاهل والركص بعدها صاحوني حتى نعقد من كلت نعم وانت وكيلي الهلاهل طرشت اذني

دخل عليه اياد عيونه تريد تاكلني كعد بصفي نظراته جانت جريئة واني البدله مالتي فاضحه

همسلي : يا يابه ذني كلهن شافن الشفته احترك عممممي

جفلت صحت ع عبير اريد شال بس شو هاي اجت باركتلنا وراحت لا جابت شال ولا هم يحزنون

سمعنا صوت طلق عبالك هجموا علينا طلع اياد

واسمع صوت تبسبس :هذا منو يصيح مريم اليه والياخذها اكتله وانوب سكران

عرفته محمد كمت ارجف خفت ع بابا واياد اجت زهراء وماما يهدأن بيه شويه ورجع اياد لبسني الذهب بسرعه وباركلي

كولشي مفهمت من خطوبتي صعدت ابجي وظليت ادعي ع محمد اندك باب الغرفه دخل بابا اجه باركلي شاف وضعي

كعد ع سرير عبير وطبطبلي بصفه : تعالي باباتي

رحت كعدت يمه سألني : ليش البجي بابا لعد أحسن محمد يقتل أياد انتي ماشفتي شلون وجه السلاح وحطه برأس خطيبج يعني لو كاتل الولد شنكول والله ستر لو ما ولد عمج كرار وعبدالله جتفوا محمد وصعدوا بالسيارة لا والله جان صار بدل الفرح عزاء تقبلين هيج بابا؟

_لا بابا بس مفرحت

ابتسم : الايام طويلة كدامج والله يجعل ايامج كلها افراح واياد خوش ولد أني واثق منه كومي غسلي باباتي ويلا تعالي نزلي ولتنزعين فستانج يااميرة البنات

باسني ونزل كمت غسلت وعدلت وجهي سمعت صوت مزيقا بغدادية نزلت اركض طلع أياد جايب مزيقا ووياه اخوانه واخواته من شافني

همسلي : يروحي عرفت بيج ضجتي واني ماخذ،عهد ع نفسي مااشوفج حزن ولا اخليج تضوجين

ابتسمتله : احبك

فتح عيونه : شلوووون؟

ضحكت ودرت وجهي عنه اشو هذا كام يركص بس ركصه يجنننن انوب اجه جرني ركصت وياه من صدوك تونست ..

واتفقنا بعد  التخرج نتزوج .. 

زهراء : مرت السنوات ، وبيوم اجه لصفاء اتصال انتبهت ع صفاء معصب وظل يغلط ويفشر ومن كد ما جان عصبي خشمه طك دم ركضت عليه والكلنكس بيدي خليته ع خشمه

همستله : شكو حبيبي شبيك ليش هالعصبية؟

حط اصبعه السبابه ع شفايفي يريد يسكتني سكتت وظليت استمع وياه

عاط صفاء : نعل لتاكل وانجب وسد حلكك افتهمت لولاااا ومنو يكول كلامك صح اختك من جانت هنا سقطت متعمدة واني طلكتها مو لان هجمت بيتي لااا طلكتها لان قتلت أبني جنت ناوي اطلكها بعد ما تولد واخذ أبنها منها واحرمها منه طول العمر بسبب سوايتها مال بنات الشوارع لك هيه الي تفوت للسحارين والمشعوذين كولشي تسوي ..

سكتت وجان ديستمع لضرغام رد جاوبه : لاا كول والله ولك كمت ارجف من الخوف لتظل تسربت بالحجي لك مخنث تعال للبيت دااربيك من جديد

فتح سبيكر وراح ديلبس ساعته يريد يروح للعيادة جاوبه ضرغام : اسمع لك صفاء انت قشمر ترى اختي لا سقطت ولا شي شفت بعينك سقطت؟ شفتها بعد ما طلكتها ؟ لا مو بسرعه سافرت للاردن

جاوبه صفاء : گرة عينك اختك خايطه بشواربكم خوط وانت جاي هسه تعددلي سوالف اختك العوجه الطفل مااعترف بي وشتسوون سووا شمدريني هذا أبني اوو اكولك اخذه اسويله تحليل DNA بس معتقداتي اذا طلع كلامك جذب اشعل شيب الخلفكم

سد الخط بوجه ضرغام احس من سمعت كلام ضرغام انضربت ع رأسي لشوكت أني ابقى الملم ورا صفاء تعبت واني اسامح هو ظل يباوعلي اجه اتجاهي

_زهراء

رفعت رأسي باوعتله : شنو صفاء شنو عذرك هالمرة ولك تعبت منك من ساعة السودة التزوجتك بيها انت شنووو يااخي متكولي

جاوبني : لتكونين ظالمه ولج مو طلكتها وكسرتها كدامج وهي السز سافرت بعد ما انفصلنا شنو اروح ادور وراها بالاردن اذا هي لاذمة ولا ضمير أني شكووووو

انوب هو كام يعيط سكتت هم حقه شمدري واحسه هو انضغط طول هالسنوات الراحت بقيت خازرته

عاط بيه : لتخززررييين لججججج ترى افكسهن عيونج

مدري ليش حصرتني الضحكه درت وجهي عنه : اسمع صفاء الطفل أذا طلع أبنك اني أريده بالنهاية هو اخوه اطفالي ليش يتحمل ذنب مو ذنبه هو
شنو ذنبه أم شريرة واب مط....

_اني مطفي زهراء؟

مجاوبته اجه يطلع عطت ورا : صفاااااء تجيب الطفل لهنايا ترى اتخبل عليك والله شنو ذنبه يعيش بعيد عن أبوه واخوانه وحيصير حقد بين الاخوة والسبب انت لتسوي نفسسك بريئ انت خلصتها تتخشش تالي طكوك بسحر حييييل تستاهل

وهسه اجه الوقت تصحح بي غلطك الطفل يجي لهنا لا اخذ اطفالي واحرمك منا طول العمر والله

حك لحيته : ترى اسراء بيها كانسر وهاي مراحلها الاخيرة

ضربت صدري وهو قبل منبهني مااسوي هالحركة يتخبل منها اجه بسرعه عليه وجر ايدي

_لججج كم مرة كلتلج لتسوين هالحركه مخبله انتي باباتي

بجيت :صفاء حباب اتأكد من الطفل ابنك لولا وبداعتي اذا أبنك جيبه هنا خواله ادبسزية متشوف تخلوا عنه
لتخلي يصير مهمش هو معليه معليه بسوالف الكبار طفل بريئ

ابتسم : باباتي هنيالي عليج والله أحسد روحي الله انطاني هيج جوهرة فدووة اروح لطولج عمري أنتي

بس ترى أني مو نذل واترك أبني بنص الوحوش ومتأكد منج راح تعاملي مثل ولدج واتقرب باسني

ابتعد وعبس وجهه : حتى بوستج مالحه من كد متبجين كلها دمووع

ضحكت وهو ظل يمسح بدموعي وحضني وطلع ..

عبير ..  كاعدين أني وبابا تخرجت من فترة ومريم تزوجت وماما جانت يم بيت خالتي ، سمعنا  الباب تكسر عليه جانت ساعه وحده ونص بالليل أني وبابا واحد باوع بوجه الثاني رحنا ع الكاميرات دنشوف منو هذا

شفنا ضرغام شايل طفل صغير يجي عمره سنتين ونص او ٣ سنوات ومبين الطفل ديبجي طلع بابا للباب واني لحكته بس فتح الباب بابا دخل ضرغام للطرمه بدون احم ولا دستور

ضرغام : عيني دكتور هذا أبنكم اخذوا الكم احنه ماابتلينا بي هو أني كوة معيش جهالي واهلي انوب أجي احير بطفل مو أبني لا وفوكاها اهله يلعبون بالفلوس لعب شال الطفل وشمره شمر ع بابا

وهذا المسكين مفرفح من البجي وضرغام ولا عنده ذرة رحمه بقلبه باوعت ع الطفل يدور بالوجوه يريد أمان وجان وسخ وملابسه مبهذله ووسخه وريحته تلعب ستين نفس هسه لو أبن عدوي هم مااخلي بهالحال

اجه يطلع ضرغام استوقفه بابا : لحظه أبني ترى كولشي مافهمت هذا ابن منو وشنو شمرته علينا غير نفتهم؟ تعال اتفضل جوا نحجي

دخلوا جوا واني جنت شايله الطفل وهو يبجي ومبين شابع ضيم وكتل رحت كعدت يمهم

حجه بابا : اسمعك أبني احجي

ضرغام : عمي أختي ماسقطت واني جنت اشتغل بتريله ع البصره ومن اجيت لكيت أختي مسافرة وبعد فترة رجعت أسراء ووياها طفل وحجت سالفتها كلها

ترخصت من بابا : شنو سالفتها ؟

التفتلي : اسراء ما سقطت ابنه لصفاء وانما سافرت وهي حامل وتزوجت ونسبة الطفل لزوجها ..

سألته : وعمه تدري؟كلتلها قبل لتجينه ؟

_قصدج خالتي ام حسين لا ماتدري ..

سأله بابا : وشنو اليثبت كلامك صح وهذا الطفل أبنه؟

ضرغام : عمي أني مو غشيم وعرفت ماراح تصدكون وحقكم وهذا دليل يثبت كلامي صح

طلع اوراق بيها تاريخ الولادة وجان يثبت أنو هذا الطفل بالفعل أبن صفاء لان اسراء من طلعت من بيت عمو جانت حامل شهرين ونص وبالبيان مال الولادة يوضح انو هي والدة الطفل بعد ٦ اشهر ونص معناها هذا صدوك أبن صفاء

بابا : واختك وين هسه وشلون قبلت تنطي ضناها بعد كل هالمدة وهي حرمته من ابوه ؟

_اسراء الله انتقم منها وبيها كانسر وواصله لمراحل متقدمه وذيج وياها نايمه بالمستشفى منبوذة

سألته : بس احنه سمعنا هي تزوجت شلون تتزوج وهي حامل معناها طلاكها باطل وزواجها هم باطل لان صفاء طلكها وهو يعرف انو هي سقطت وماطول ماعنده علم معناها اختك هسه زانية

جاوبني ودنك رأسه : للاسف كلامج صح

بعدها استأذن وطلع وبقى الطفل يمنا وحتى احنه منعرف أسمه تالي رحت للبيان وقريت اسمه جود وعمره ٣ سنوات خرررررب ضميرج اسراء سمعته ديبجي اخذته غسلتله وعندي ملابس لهمام يمنه لبستهم اله صح همام اكبر منه بس ناعم وهذا ضخم فصاروا فت عليه ..

جان مبين جوعان طلعت لكيت بابا ديسويله اكل وكله بابا وجان يضرب صفنات باوعلي : اختج اذا عرفت شيصير بيها؟

_كولشي ميصير هي تحملت الاقوى منها متتحمل هاي

سكت بابا

بقى يمنا جود انتبهت عليه عدواني بشكل ووكح ولسانه زفر

مرة من المرات اجه علينا كرار جان يسمينا بيت الارامل ههههه لان هو ارمل ودومه يجي يمنا ..

صاح من الباب : العبد المسكين الارمل يبحث عن لجوء لديكم

طلعتله هو انت بعد دخلت للبيت ياعبد يا مسكين

كال : ولج هاي مرة عمج تخبلت الا اتزوج انوب شحنت أبويه اني من شفتها راحت للصالون وصبغت شعرها كلت راح بيها كريم شمدريني راح تفره عليه اشو كعد الصبح واستلمني سين وجيم وشوكت تتزوج وانت كبرت والى متى تبقى بالماضي

وهاي اجيت يمكم وحتى لو تطردوني اطردكم ومااطلع

...

سألته : كرار انت ليش متتزوج وتفضها مو احسلك من هاي البهذله يومية عمو وعمه متعاركين وياك وانت طالع من البيت

جاوبني : ولج مااكدر ليش هو بيدي عبالج شكد حاولت بس مااكدر كل ليله طيفها يزورني صار ٦ سنوات ومااكدر انسى واذا ردت اتزوج فماافكر بغيرج ابد ولاعبالج راح أاذيج لا راح اداريج اكثر من روحي واحاول انسى الماضي لان انتي تستحقين اليسعدج ولا عبالج علمود وصية مها لااا انتي غلطانه

اني فكرت بيج لان فعلاً انتي الزوجه المناسبة اليه

مجاوبته اما زوجة عمو كريم جانت وين متشوفني تصيح جنتي واكثر من مرة خطبوني ورفضت بس كرار ماسكت يبقى يلمحلي واصلاً هو مسوي اقامة ببيتنا قليل يروح لبيتهم ..

صفاء : خابرني عمي تحسين وحجالي ع ضرغام وشلون شامر الطفل يمهم جنت مسافر عندي مؤتمر خارج العراق

جاوبت عمي : بس ارجع اسوي تحليل DNA واتأكد هذا ابني لولا

وبالفعل بس رجعت رحت لبيت عمي وشفت الطفل اول ما شفته گلبي رف عليه حسيت هذا قطعه مني بس يبقى الحذر واجب وخصوصاً اني عرفت اسراء شنو اخذت كم شعره من الطفل

رحت عليه حضنته جريت شعره وهو بسرعه غلط عليه

_يا حقير يامطي ليش كفشتني حيوان

ظليت مصدوم من لسانه معناها المشوار طويل لعنت اسراء بداخلي هم حرمتني منه وحرمته مني وتالي تربيته مبينه صفر

اخذت الشعر ورحت سويت تحليل وبقيت انتظر ٣ اسابيع وطلعت النتيجه مطابقه زهراء اول معرفت النتيجه مطابقه راحت ع بيت اهلها واخذته منهم

وبيوم رجعت من الدوام لكيت جود كدامي اول مشافني غلط : اهوووو اجه الحمار

خزرته زهراء: عيببب ماما احنه شحجينا شنو هالحجي

دنك وسكت اشرت لزهراء تلحكني للغرفه اول مدخلت سألتها : شوكت اجه جود؟

_اني جبته الصبح ليش عندك مانع؟

خزرتها: احجي عدل لج واسمعي لتخلي يختلط بسدن وهمام لسانه فالت خلي نبعده عن هالالفاظ واحاول اغير نفسيته الولد تعبان

اجت كعدت ع رجليه: انت ليش ضايج ؟ مو جنت تكولي اريد اربع اطفال اثنين بنات واثنين ولد وهياتهم صاروا اثنين ولد معناها بعد بس بنوته اذا الله رزقنا شوف اجت من مصلحتي حتى بعد مااخلف هواي ههههههه

باوعتلها اعرفها دتهون عليه حتى ماانقهر : اني شمسوي وربي عوضني بيج ها؟

ضحكت: انت حباب صفاء وع نيتك بس انت عصبي وصوتك خشن ومن تعيط عليه اكرهك

ضحكت بصوت عالي : هسه حباب لو تكرهيني ههههههههه؟

دتريد تحجي دك موبايلي اشرتلها تسكت جاوبت جان الاتصال من المستشفى البيها اسراء طالبه تشوفني نهيت الاتصال

بعدني محاجي جان زهراء تكولي اجي وياك حباب اريد ابريها الذمه

محجيت وبالفعل ثاني يوم رحنا ولكيت عبير كدامنا بس اسراء طلبت تشوفني ع انفراد دخلت

من شفتها انصدمت ماباقي لاشعر عدها ولا حواجب لا رموش منتيهه كوة تجر النفس أبتسمت من شفتها وهي كامت تبجي

سلمت عليها وجريت الكرسي كعدت كدامها كالت: صفاء اني حموت ابريني الذمة حباب هواي اذيتك بس والله لان احبك هيج سويت

جاوبتها : لان تحبيني تسحريني وتدمرين حياتي وتبعديني عن زوجتي وابني ولان تحبيني تكوليلي سقطت وتاليها تشردين بأبني ولج ياحب دتحجين عنه اني من جنت احبج من شفت زوجج الله يرحمه خوش ادمي اتمنيتلج السعادة لان أحبج هذا الحب مو الحب نأذي الشخص الي نحبه

_يعني متسامحني؟

_أكيد لا واني مو رب العالمين حتى اسامحج ولا أني كريم الله يسامحج بس أني لا وعسى كل لحظه انحرمت بيها من زوجتي وأبني تحركج بنار جهنم وكل لحظه بعدتي بيها أبني عني الله يطلع عدالها يوم القيامه بيج وكل الي انتي بي حوبتي وحوبة زهراء

همست : صفاء أبني اني بس ردت اعاقبك بس الله بالمرصاد ..

جاوبتها : لتخافين عليه اهم شي خلص منج ام سحارة وزانية ومن يكبر لو اموت مااكوله عليج وحتى جنسيته لو اعرف ادفع دم گلبي واغير أسمج راح اسوي هذا الشي اتأكدي

طلعت وتركتها ..

زهراء: أني اليوم أم لاطفالي احاول احتويهم وبالذات سدن مااريدها تطلع مثل عمتها اغلب وقتي لاطفالي وزوجي

صفاء بعده عصبي ويحبني بكل حالاتي صرت افهمه من نظرات عيونه ويفهمني من ملامح وجهي اذا جنت ضايجه او فرحانه ودائما يكولي الله عوضني اجمل تعويض بيج

اما جود صار قطعه من قلبي وابد ماافرق بينه وبين اخوانه وهسه أني حامل بشهر الخامس وبيه بنوته ادعولي اكوم بالسلامه

اما كرار بعده يحاول يقنع عبير توافق تتزوجه مرات اشوف عدها تقبل للموضوع ومرات لا ترفض

وبالنسبه للملاك بابا هذا اجمل واحن بابا بالدنيا احتوانا بكل اوقاتنا ومن يشوف وحده تتألم من عدنا يحاول بكل الطرق ياخذ المها منها لو نلف كل الدنيا ما نلكه مثل حضنه وامانه

امي هاي الانسانه العظيمه التعبت وسهرت وجاهدت علمود راحتنا وسعادتنا شكد تعبناها وهي تنطينا سعادة وحب وامانوحضن دافي ابد ماقصرت ويانه ومستحيل نكدر نجازيها لا اني ولا عبير ولا مريم

عبير رغم المها وحنينها للماضي بس هي سند اليه أني ومريم اغلب مشاكلنا هي تحلها صح عصبيه وتعيط بس عدها روح مرحه ومع ذلك اطفالي يخافون منها اكثر من اي واحد بالعائلة بخزرة منهم يكومون يبجون وبالذات سدن وهي من تشوفها هيج تكولها زهراء الثانية ضربه وحده ع الرأس توجع مو ضربتين ..

كرار : اعتذر منكم ع كل دمعة وكل حسرة طلعت منكم علمود مها هي اسمها الحقيقي مها اني طلبت من نورا متغير الاسم حتى تترحمولها الله يحفظكم وميشوفكم شر ويحفظ كل احبابكم

مها وقسور : جانوا ضيوف ارق والطف ضيوف ع عائلتنا

قسور : بطل مجاهد ضحى بنفسه من اجل الوطن والحبيبة جان دائما يكول لعبير (انتِ وطن الوطن يجب ان يقدس)

مهاوي: شابه وام شهيدة مظلومة فاركتنا وهي تاركة بصمة حلوة بعائلتنا الى ان استشهدت وهي ماسمعنا منها كلمة محلوة

ادعولهم بالمغفرة لان هم شباب وشهداء مظلومين

اسراء ورشا : اسراء اخذت جزائها اما رشا بعدها مثل ماهي الله يهديها ... رغم بعد اطفالها عنها الماتعرف عنهم شي الا انها بين فترة والثانية تسويلنا مشاكل ..

نقلتلكم قصتي عن طريق بنت البصرة نورا  بحلوها ومرها بيكم البجت ع الصار ويايه  اكو بيكم كالوا بدون كرامة أني مو بدون كرامة بس مرات لازم نسامح حتى تستمر الحياة بالنهاية رضينا او ما رضينا الدنيا متوكف ع أحد ابد ..

انتهت ..

اول مشهد ٢٥ / ١١ / ٢٠١٩ ..
اخر جزء ٢٥ / ٦ / ٢٠٢٠ ..

انتهت القصة اعتذر على كمية الالم بعد ماكتبت رواية حلال ممنوع ، وعدت متابعيني مااكتب قصة نهايتها موت 😞اسفة ماوفيت بوعدي ، غصبا عليه والله
لمن جانت تحجيلي القصة جانت مركزة على زهراء وصفاء وجان اكثر كلامها على كرار وصداقتهم ومواقفهم عبالي متزوجة كرار وعبالي قسور شخصية شريرة 💔😭لان جانت تتجنب الحديث عنه على كد ما يألمها هالشي ، مجان عبالي هيج ابد ولا جنت اعرف شلون استشهد والله شاهد عليه لان انطتني نبذة عن القصة عجبتني وبعدها حجت  التفاصيل ودتشوفون شكد طويلة ،  جان لازم نخلد اسمه يستاهل منه البطل ، انا بطبعي لمن استقبل قصة قليل اسألهم  كلش قليل ويشهدولي الي دزولي قصصهم لذلك ماجنت اعرف بالوضع المأساوي للقصة
💔

تحياتي الكم واشكركم على متابعة القصة وان شاءالله وصلت الرسالة والهدف منها ..

ادعولي  براحة البال .. احبكم ..
# نورا ناصر