عذريتي مقابل براءتي

البارت الحادي عشر

انا لم أتغير
لكن ابتعد عن كل من لم يعرف قيمتي
لا ليس هذا بصمت رضا
ولا حتى صمت عتب
هو نوع آخر من الصمت اسمه
لكم حياتكم ولي حياتي

يارين / كل أنسان يولد وقدره ورزقه وفاته مكتوب على گصته لهذا المكتوب لازم أشوفه العين وأكو ناس تنولد قدرها السعاده واكو ناس تنولد بس للفقر والحرمان والتعاسه واني من ضمن الناس التعيسة يعني ما ولي وجهي تجيني كفخه وكل كفخه ربي يعلم بيها تكسر ظهري وكل نفس بما كسبت رهينه

لهذا إلي صار ويايه اولآ دفعت ثمنه غالي وثانيًا اني جبته لنفسي أني لو طالعه أستجدي بالشارع وجامعه فلوس العمليه احسن ما ماخذه من أبو سامي بعد محاولاتي ويا أبو سامي وتوسلاتي أنه بس يقلل من ربح الفلوس وهو ما يقبل آخر روحه الي لأبو سامي طلب مني طلب غريب والله ظليت صافنه عرفت اني وگعت بيد منو من خلال طلبه

وهيچي ناس لا ينفع وياها لا توسلات ولا اكو رحمه بگلوبهم طلبه چان
گال / شوفي اني ما انطيتچ الفلوس ثواب على روح شهداء العراق اني من انطيتهن أعرف ما تگدرين توفين

گتله/ ولمن تعرف عمو آني ما اگدر اوفي ليش انطيتهن الي ما گلت لنفسك شلون ترجعهن

گال /هذا الحچي گولي لنفسچ مو ألي إنتي چان فكرتي شلون ترجعيهن لا تخافين اني عن نفسي اگدر اخذهن من عيونچ هن وارباحهن مال 5سنين ليگدام

سبحان الله انطفى الترميش مال عيونه وظهرت نظره ثانيه نظرة شر تخوف
گال/ شوفي أنتي من أول شهر ما عرفتي سددين الأرباح بقية أشهر الله شلون اني عندي كوفي أرعى بي بنات لوجه الله لان خطيه يكونن ما عدهن بس الله وأبو سامي أشغل بي البنات ذني البنات هم يستفادن وهم يفيدني منو يرحمهن غير الله وأبو سامي

گتله/ عمو وشنو مصلحتك من شغلهن

گال / خدمه للوطن ولهذوله الشباب الي يريد ينسى مأساة حياته يجي على كوفي آبو سامي وأولاده وحتى خدمه دليڤري عدنه

گتله/عمو هسه اني ما فهمت شنو نوع الشغل وشوكت اجي
أقسم بالله أني كل مفهومي عن الكوفي يقدمون چاي گهوه عصاير ما چنت أعرف شيدور بالكوفيات أبد لهذا گلت سهله اذا هيچي أروح اشتغل وأوفي ابو سامي

گال/ شغلچ يبدي من 8 بالليل ل 4 الفجر يخلص
واياچ باچر ما تجين ورحي عدلي چهرتچ لان انتي راح تشتغلين عند أبو سامي كلها تحلف بآمانته احنه الزبون نخدمه خدمه 3جي ثلاثية الأبعاد

گتله/ عمو أني أمي ما صار زمان متوفيه شلون أعدل وجهي والناس من شوفني شتگول مو حزينه على أمها

گال/ تبوشي من تطلعين من بيتكم ومن تجين للكوفي ذبيها شنو لكون امچ ميته الزبائن تعلن حداد على روح الفقيده

گتله/ موافقة باچر بالموعد آني يمك بس ماگتلي شگد راتبي عندك حتى أعرف يعني شگد دى أسدد من الأرباح

گال/ اني مثل الدوله الراتب الاسمي 600 الف وتلحگچ حوافز وهاي الحوافز بعد انتي وشطارتچ  عندچ بنات بالكوفي الحوافز مالتهن توصل المليون مثل اختچ مياده وصلت بهذا الشهر مليون ومية الف حوافز غير راتبها الاسمي

گتله/ عمو بس اني ما عندي اخت غيرواحده اسمها دارين وهي ما تشتغل عندك بعد شلون مياده أختي

گال / لا تگولين عمو گولي حجي وبعدين من گلت مياده اختچ انتي مو راح تشتغلين بالكوفي يعني راح أصير عندچ عائله جديده إلي يشتغلن هناك كلهن اعتبريهن اخواتچ  وأكيد انتي حريصه على عائلتچ واخواتچ شسمعين وشوفين تجين تگليلي مفهوم أريد اصيرين عيني وأذني بالكوفي بعد ما اوصيچ وخصوصًا الزبائن ذوله أريدهم اقرب من حبل الوريد الچ

گتله/ صار حجي باچ أني يمك بس ما اندل الكوفي وين انطاني العنوان وطلع بمنطقه راقيه على هذا الإتفاق رجعت من يم ابو سامي

في وقتها حسيت بالراحه كل ظني خلصت ما چنت أعرف هذا بداية السقوط بالمستنقع وبعدها ماكو أي راحه ولا راح أشوف الراحه بعيني

رجعت للبيت وأني هوايه افكار تراودني من ضمنها دارين شنو عذري گدامها وهي خطيه محبوسه بالبيت بفترة نقاهه بس لازم أشوف طريقه احچي بالموضوع وياها

دخلت للبيت وهي گاعده كتبها گدامها تقرا اجيت گعدت يمها اريد أبدي بالموضوع شلون ما أعرف
بعدي چان لأبد اگول إلها
گتلها/ دارين اكو وحده جابتلي شغل بكوفي والراتب 600 آلف وحوافز بيها هم واني قررت أشتغل بالكوفي

گالت/ شلون تروحين تشتغلين بالكوفي واحنه دى نشتغل بالبيت وخير من الله وساترنه

گتلها/ دارين المصاريف هوايه إيجار وسحب وإنترنت واطفال 3 ومصرف البيت وأنتي تعرفين أبو الصيرفه كل شهر ياخذ أكثر من ثلاثة أرباع الراتب منين نجيب حتى نصرف احنه نشتغل والله يرحمنه برحمته الواسعه
أسعى يا عبدي وآني اعينك واگعد يا عبدي واني آهينك ولو اعرف چان شراح يصير بيه بعدين چان مو بس اگعد لا والله أتمنى لو مقعده ولا رايحه مشتغله بذاك المكان

على ثاني يوم رتبت وجهي وسويت شغل الناس لان أكثر اعتمادي على شغل الطبخ للناس ظلت دارين تباوع عليه

وگالت / أنتي مو عندچ شغل ليش ما رحتي الى الان

گتلها/ شغلي بالليل من ساعه 8 الى 4 الفجر

گالت/ انتي تحچين صدگ ترى الناس اذا اشوچ طالعه بالليل شتگول

گتلها/ الناس من نموت الجوع والديون ما راح يجون يطونه والي ينطينه يحملنه منيه خلينه ندبر حالنه أحسن

لهذا ما سمعت من دارين ولليل بدلت جبه وشال وخليت طرف الشال على وجهي وطلعت

ورحت على المكان إلي ذكره الي وگفني يم أبو التكسي وهو يباوع عليه بنظرات غريبه
نزلت مكان چبير واكثريته شباب وأكو ولد عدهم عضلات واكفين باب الكوفي تعجبت على شنو واكفين وحتى أنتبهت حتى اسلحه عدهم والله رجلي ظلت وحده تضرب بالثانيه من الخوف

تقربت منهم عبالهم اسأل صدقه واحد منهم
گال/ وين أدري أكو وحده عاقله تجي تطلب صدقه بهيچي مكان الله ينطيچ أحسن ما الحجي ينطيچ

گتله/ لا اني جايه على ابو سامي أريد احچي ويا

بعده يريد يجاوبني طلع واحد
گال / تعالي الحجي يريدچ

دخل هو ودخلت بس شنو الصاله كلها شباب وكل واحد نرگيله گدامه وبيهم اكو مسطولين شلون هذا إلي يطلعلي كل ما اروح على بيت ابو سامي وضعهم غريب واكو بنات بس شنو كلهن حلوات وصغار يعني حتى اكو بنات عمرهن 15 سنه الى عمر 23 سنه ودخلت ورا لمكتب بي الحجي
أول ما شافني صاح بيه
گال / هاي شلابسه اكو وحده تجي على شغل بكوفي تلبس جبه شنو جايبچ ادخلچ للأسلام

گال/ لهذا إلي دخلني اله
أخذها للبنات حتى يرتبنها  يلا بسرعه
رحت ويا هذا الولد وصعدني فوگ لغرفه دخلت أكو بنات أثنين لابسات جينز كابوي وبديات كيمونه وكل وحده جگايرها بحلگها ويعلچن ويدخنن اني هذا كله عقلي ما مستوعبته
شنو هذا الوضع معقوله كله من چاي وگهوه وعصائر ما تنعقل شنو الوضع هنا والواضح أني خليت رجلي بوحله شلون راح أطلع منها ما أعرف

أجني ذني البنات وظلن يسألن اسئلة ما ألها أول ما إلها اخر شسمچ وين بيتكم مزوجه لا
بس اني ما أجاوب انطني جينز مثل الي لابساته
وبدي كيمونه لبست بس شنو احس نفسي عريانه گد ما أستحي اخذت الشال وخليته على كتافي وسون شعري ومكياج

بقيت متفاجئه شغليش هذا كملني ونزلت ويا وحده ودتني على صاله يسوون بيها مشروبات ونراگيل وبيها شباب وبنات والضحك بعلو الأصوات وهاي الي ويايه وصاحت على وحده اسمها مياده
گالتلها/ هاي جديده علميها أصول الشغل

وراحت وظلت هاي البنيه تباوع عليه أنتبهت عليها كلش حلوه ضحكت ضحكه خفيفه
وگالت / مياده وذني البنات كلهن اني معلمتهن على الشغل شسمچ والحجي گلچ شنو اختصاصچ

گتلها/ اسمي يارين وشنو اختصاصي قابل دى أقدم على جامعه هو كوفي مشروبات

گالت / حبيبتي ادري گلچ مشروبات نراگيل صياده شنو

گتلها / مشروبات ونراگيل افتهمنه صياده شنو ما فهمت

بس من خلال ما احچي وياها احس نفسي دخت وأريد اتقيأ

گالت/صياده يعني جيبين زبائن حبيبتي للكوفي

واني احس بدوران گتلها/ شلون يعني قابل أرفع لافته واگول تعالوا للكوفي وانطي عنوان الكوفي

گالت/ لا حبيبتي يعني تتعرفين عن طريق النت او من طلعين للسوگ او ابو التكسي تتعرفين عليه وتستدرجي وجيبي للكوفي واحنه نستلمه بعد معليچ

گتلها/ رحمه لأهلچ هذا كله على مود يشربون مشروبات ونراگيل عدكم ترى عادي اكو بغير كوفيات

شو هاي ماتت ضحك تريد أسيطر على نفسها ما تگدر وچان تگول/حبيبتي أنتي غبيه لو تستغبين
تعالي ويايه افهمچ

أخذتني يم ذوله يسوون إلي يسوون نراگيل شفتهم من يحضروها ما أدري شيخلون مثل العجينه الخضره ويفتفتها على الجمره
گالت / شوفي الي يجي هنا مره يطلب نرگيله يظل يوميه يجي

رجعت گالت/ والمشروبات ألي يشرب منها يصيرمدمن عليها والشغل هنا ما نلحگ عليه

هسه عرفتي شگلچ الحجي شنو اختصاصچ
إني أول شي نصدمت لأن عرفت اني وين خليت
نفسي وبديت ادوخ أكثر من الريحه

گتلها/ خليني على المشروبات احسن
وما چنت أعرف نوعية الشغل مال المشروبات
طلع هذا الشغل شغله أضرب من شغله

اخذت صينيه عليها كوبين العصير
وگالت / تعالي شوفي شلون الشغل مال المشروبات

رحنه على الصاله الي بيها الشباب وهوايه اكو شباب مكتظه بيهم والبنات أكو إلي تقدم نرگيله وأكو إلي تقدم مشروبات بس انتبهت على البنات الي تقدم المشروبات شو ذوله الشباب تتلمس بيدهن واجسامهن وهو بعده ما ماخذ المشروب وصوت الضحك والعربده والدخان مال النراگيل مشكل غيوم بالقاعه وبدت عيوني تغوش واحس معدتي وصلت لبلعومي بس أريد اتقيأ
رجعت أنتبهت على هاي البنيه الي واكفه يمي مياده هم نفس الوضع الشباب الي گاعدين اثنينهم يتلمسون بيها وچان هذا حدي

بديت اتقيأ بنص الصاله وهي وذوله الشباب اثنينهم توسخوا من تقيئت لهذا سحبوني لغير مكان
واجتي مياده على شبيچ وانتي هسه چنتي زينه
وصل الخبر للحجي موصيهم يرجعوني للبيت على أنه باچر اشتغل عدهم

على هذا الإتفاق رجعت للبيت همه رجعوني وچانت حدود الساعه ب 1 بالليل من رجعت وچانت الباب مقفول من جوه بس دگيت الباب
طلعت دارين وفتحت إلي الباب ودخلنه للبيت
من فتحت الأناره وشافتني وظلت تحچي على أنتي مقتنعه بشغلچ جايه بنص الليل والمكياج تارس وجهچ ولا تگليلي شغل هذا موشغل هذا اله آسم ثاني

لهذا اگلچ اذا بعد اذا طلعتي على هذا الشغل اعذريني اخذ شهوده بنت معتز واطلع ما أبقى وياچ هسه فتره وتجيني سمعه حلوه من وراچ هو أني بلا شي فرقد يگلي متگدرين بدون الزلم أنوب سمعتچ أصير اسفل السافلين شيگول عليه لا حبيبتي اختاري وگليلي الصبح

وعافتني وراحت نامت أني أصلًا چنت مقرره ما أروح بعد من شفت كل شي بعيني خفت بعد اكثر
لهذا ثاني يوم ما رحت بقيت بالبيت وحتى الشغل تستلمه ام موسى واجيبه الي واي شي أحتاجه انطي لأم موسى جيبه إلي من السوگ وابني يجيب اي شي نحتاجه من نواعم من المحلات يمنه وظل هذا الوضع أسبوع الى ما بيوم اجتي بنيه عليه طلع ابني ورجع

گلي/ ماما اكو بنيه تريدچ
طلعت شفتها وهي گالت / حبيبتي الحجي دزلچ إنذار بيدي لو تجين تشتغلين بالكوفي لو ترجعين الفلوس +الأرباح

گتلها/ حبيبتي بيه كورونا لان مصابه من رجعت من يمكم سويت مسحه وكالوا بيچ كورونا لهذا ما أگدر اجي هسه آلا اصير زينه

گالت/ يوصل كلامچ كله اله وهو يقرر ونردلچ خبر بس انطيني رقم موبايلچ

انطيتها الرقم وراحت وبعد يومين حدود الساعه 10 ونص الصبح اجتي نفسها بلغتني آنه الحجي
يگول/ إلها أسبوع اذا ما اجتي تشتغل اسوي بيها آيدز مو بس كورونا
وراحت

وراه ما راحت بنص ساعه ندگت الباب طلعت واحد عنده دفتر وكومة أوراق بعد السلام
گال / هذا تبليغ ليارين وانطى أسمي الكامل

گتله/اني يارين شكو

گال / هذا تبليغ الچ وقعي واخذي
واني هم وقعت واخذته ومن دخلت قريت التبليغ چان من عمار رافع عليه قضيه تشهير بي وعليه المثول امام المحكمه وموعدها بعد 3 أيام يعني مرفوعه قبل أقل شي 22يوم ظليت ما اعرف شسوي كل ما يمر وقت اغرگ بالمشاكل أكثر
المن احچي سيف وأبو كرار ما اگدر ادخلهم بعد أكثر ويايه خطيه ذيچ المره طلعهم الثور المقدس فرقد

أخذت التبليغ وخليته بالجنطه وما أعرف شيصير بعد بيه وشلون وكل المشاكل تكومت على راسي وبعد يوم واحد للمحكمه واني شلون وما أعرف شسوي وبالليل واني متت اريد واحد يساعدني ما لگيت غير اطلع رقم أبو كرار وأيدي تاخذني وادوس اتصال ظل يدگ ما رد أبو كرار أنقطع الإتصال لان هوايه رن عنده

انتبهت على الساعه مجاوزه 2 بالليل اعتيادي نايم نوب ظليت أحسب هسه شيگول عليه ليش متصلة عليه بنص الليل بعدني هاي الفكره براسي

أتصل أبو كرار ولان كلهم نايمين اخذت الموبايل ورحت للمطبخ ورديت عليه من سلمت عليه

گال/ عندي أعتراض بعد لا تگولين أبو كرار گولي أحمد هذا شي لازم نكون منتهين منه من زمان لهذا حبيت انبهچ عليه وهسه گليلي شذكرچ بيه سولفي اسمعچ يارين

گتله/ أريد احچي بس اخاف متساعدني

گال / يا يوم اني ما مساعدچ گليلي يا يوم يارين ما واگف وياچ سولفي وكأنه تحچين ويا نفسچ

گتله/ عمار مشتكي عليه وباچر الصبح المحكمه وقبل يومين أجى التبليغ لازم أحضر أنت شتگول

گال/ هذا يريدچ متحضرين حتى تنحكمين غيابي
لا لازم تروحين وأني الصبح اشوفچ بالمحكمه وأريد أشوف شلون يرفع القضيه آلا أخلي كل شي ما يحصل بس صخام وجهه

شكرته وغلقت ويا الموبايل واني دائمآ ما أعرف ليش من أريد شي أتصل بأبو كرار احس هو ألي اشد بي ظهري لان بكل محنه وهو يايه وما يعوفني نمت حسيت الصبح من وكت

بدلت وأريد إطلع دگ تليفوني أنتبهت هذا أبو الصيرفة إلي اخذت منه 30 مليون بضمان كي كارد تقاعد مآل أبويه الله يرحمه رديت عليه

گال / شوفي لچ الفلوس إلي اخذتيهن بضمان التقاعد اذا ما ترجعيهن للعصر أجي احرگ البيت عليچ وعلى راس الخلفچ لأن البنگ مبلغي انه التقاعد على هاي البطاقة المستفيده منها متوفيه

دارين/ أكثر المزوجين يحبون ينرزقون بداية زواجهم ولد حتى يكبرون وياهم وحتى اكثرنه نگول حتى يشيلون كبرتنه ويدفنونه هذا أمل كل رجل سواء كانت أو أمرأه اني ما حسيت بأمومتي الا من صار بروقي بين أيدي اما قيصوري چنت دائمآ أعتبره مظلوم لان من نولد الى 6 أشهر يلا عرفت هو ما ميت بس يبقى ظل حسره بگلبي لان ما عشت ويا مثل بروقي

ولكون بعده صغير من چنت بالسياره ويا فرقد اعصابنه متوتره ننتظر منو راح يطلع بصحته ومنو راح يكون جوه التراب أول مره أشوف فرقد عاجز انه يرد الموت عن أقرب الناس اله وهمه اطفاله لهذا بعد ما عرفت المجزره شلون صارت تذكرت من جيت على فرقد من راد يطلگني چانت سوي حركات غريبه بعدها من اجيت بعقد فرقد وضحى اجتي لزمت أيدي وصح گالت گلي قتليهم

هاي چانت عليمن تحچي من سألت فرقد
گال / مو گتلچ متلبسها جني
ظليت ما أعرف شگول بعدها شفت سيف وتمام وأخوة منتهى كلهم يركضون نزلت اني هم وفرقد
ركضنه دخلنه للمستشفى وراهم بس أركض وأحس رجليه ثگال احس أريد أطير حتى أشوف أطفالي شلونهم بس رجليه ما يعينني  وصلت للعنايه المركزه طلعوا سديه ومغطيها بچرچف أبيض
وبعدها طلع الدكتور گال / واحد من الأطفال مات 
الدكتور ما گال اسمه بس اني حسيت بي والله حسيت قطعه من گلبي بعد ما اشوفه

أتقرب عليه فرقد وكشف عن وجهه لو شاغت روحي لرب السماء من شفته الرگبه مخيطيها والدم جامد عليها ظليت اعيط صريخي ملأ المستشفى تخبلت عليه
دنگ عليه فرقد باس راسه ودموعه صب على وجه قيصوري اني ظليت ادگ على وجهي وصدري

وسمعت واحد من اخوان منتهى
يگول / خلي ماخذه نخلي بالثلاجه منا للصبح حتى ناخذه ندفنه
تخبلت رحت عليه سوده عليه مخلي بچيس ازرگ مال مستشفى گبل شلته من على السديه وضميته لصدري
گتلهم/ ماكو واحد ياخذه هذا ابني والله ما شبعت منه ولا من ريحته
ظليت أبوس براسه گعدت بالگاع وخليته بحضني
واحچي واگله/ قيصوري حبيبي اگعد ماما اگعد حبيبي تعوف ماما بعد ما اشوفك ان شاء الله أعمى كون ولا اشوفك هيچي
أضمه لصدري واشم بي اگله ريحتك تخبل ولك أفتح عيونك
وابوس بعيونه وأرجع اگله بعد ما اشوف ضحكتك بعد ما اشوف اسنيناتك من تضحك وابوس بحلگه
أخلي أيدي على رگبته أتلمس الخياط والدم الجامد
اگله حبيبي قيصوري بعد ما اخلي حلگي برگبتك وابوسها
رفعت راسي ليفوگ واحاچي رب العالمين
واگله / ليش ربي مو طلبته منك طلبه وردت بس طلعه سلامات وتالي اخذه رگبته مخيطه وبلا روح ليش ربي انت عاجز تنقذ ابني انت خالق الكون كله ليش أخذت ابني مني وانت عندك الكون كله

أجى فرقد يريد ياخذه
وهو يگلي /جيبي دارين حرام عليچ لا تحچين هيچي امانه والله اخذها
گتله/ فرقد لا تاخذه مني سلمتك ولدي رجعت واحد بلا روح والثاني بالعنايه المركزه انطيتكيا حي خلي عندي وهو ميت لا تاخذه
وفرقد يگلي / كافي دارين جيبي
گتله/ فرقد تريدون تخلوا بالثلاجة والله يبرد ومنو يغطي ويجوع منو يرضعه
أسحب بملابسي من ناحية صدري واگله خلي يرضع وين ماخذي وهو جوعان ينطيك گلبك فرقد تعوف قيصوري جوعان وبردان
طلعت صدري واخلي بحلگه وهو مسدود

وأگله / فرقد ما يريد يرضع قمر تنطي رضاعه خابرها وگللها خلي جيب الرضاعه وحليب شلون قيصوري يظل جوعان
وخلته بحضني وكل ما يگول فرقد جيبي احضنه اقوه
وبالگوه اخذه فرقد من عندي گمت اعيط واتوسل بي نزلت على رجله وبستها
واگله/ الله يخليك انطينيا فرقد والله اموت اذا تاخذه مني وتخلي حضني فارغ
انطى لاخو منتهى واني تخبلت شنو راح ياخذوا
رفعت أيدي أريد اضرب بيها وجهي أنتبهت أيدي كلها دم وأني اگله/ فرقد هذا دم قيصوري شوفه على أيدي هذا البقى منه وظليت أبوس بالدم

گومني فرقد من يم رجله بس أحس بعد عميت وطرشيت لا أشوف ولأ أسمع بعد ما حسيت بشي
الا من گعدت ويمي فرقد وهو يحچي والي فهمته يحچي ويا أبو كرار

ويگله / جيب أختها ترى راح تتخبل عد هاي شويه أسيطر عليها
وهو انتبه أني صحيت أنهى حديثه ويا ابو كرار
واجى يطمئن عليه
گلي / شلون صرتي أم بارق
ما جاوبته لأن ما أصور اگدر اوگول صرت زينه ولا في يوم ممكن اگول أني زينه

بس دموعي تجري خلص المغذي جريته من أيدي قوي بحيث حتى الكانونه نجرت من أيدي والدم گامت أيدي تنزف دم قوي من مكان الكانونه أجى فرقد مكان النزف خله ايده عليه
آني امشي وهو يمشي ويايه ومخلي أيده حتى لا يجري الدم صاح على الممرضه
اجتي خلت لزگه على مكان الكانونه وچان حتى الفجر طلع

وبعد شويه تطلع الشمس تضوي الكون واني شمس حياتي طفت
بعدني بالممر أجى أبو كرار ويا يارين وبعدهم سيف وقمر
شافتنه قمر وگامت تعيط وتبچي وهي مبين على وجهه لاطمه على وجهه لما مزلغته
وحضنت فرقد وهو هم حضنها ودموعه ويا دموعها
وتگله / فرقد وين قيصوري أبن گلبي وين وديتوا

هو گاللها / بالثلاجه لو تخبلت حتى صوتها راح من العياط هي ويارين

اجتي عليه قمر تبچي وتعيط وحضنتني ظليت واكفه مثل التمثال بعدتها عني يارين ظليت أمشي بالممر مال المستشفى أدور عليه ويارين تمشي ويايه فاتت من يمي ممرضة
گتلها/ عفيه أبني مات واخذوا خلو بثلاجه وين هاي الثلاجه
وهي دلتني وأني امشي وأتلفت نداريت شفت فرقد ورايه
صارت مقابيلي غرفه مكتوب عليها ثلاجة الموتى

وصلت يم بابها أريد افتحه مقفول ظليت ادگ بالباب واعيط واگلهم أنطوني أبني اجتي يارين تريد تسحبني متگدر

إجى واحد لابس بالطو أخضر يركض
گاله/ فرقد الطفل إلي سلمنا الك وينه
جاوبه هسه گرايبك راح يجبون تابوت
بقينه حدود نص ساعه واجوي ولد عمه لفرقد جايبين تابوت صغير مآل أطفال
حطوا التابوت بالگاع وفتح هذا ابو البالطو الأخضر الباب وطلعوا وخلوا بالتابوت هنا تخبلت عليه فرفحت روحي عليه
وحتى الچيس الازرگ ملطخ بدمه والله احس بكابوس وما إصحى منه أبد ولكون تابوت مآل اطفال غطوا بقطعة قماش مخطوط عليها أدعيه وآيات والتابوت صغير بس فرقد حضنه وحطه على كتفه

ويمشي بي واني ويارين ولد عمه ويانه طلعنه من المستشفى واخذه فرقد وفتح باب السياره  الخلفي وخله تابوت قيصوري اني صعدت يم التابوت وسد باب سياره فرقد
ويارين صعدت بالكرسي الأمامي قمر ظليت
الطريق كله حطيت راسي على التابوت وعيوني صب واحچي ويا قيصوري
الى ما أنتبهت وگفت السياره يم بيت فرقد تخبلت حضنت تابوت قيصوري أخاف يدخله فرقد مره ثانيه للبيت

نزل وفتح باب السياره ويجر بيه يريد ينزلني واني ما أريد اخاف عليه وهو سحبني بهدوء ونزلني ونزل التابوت ودخله جوه ودخلت ورا
وأول ما دخل بده العياط من ام حياة وام ابو كرار واخوات أبو كرار وهوايه من نسوان گرايبهم
واني تخبلت من شفت حياة

گبل هجمت عليها وضربتها وكلهن صارن بيني وبينها وشگد حقيرات گرايبهم ما همهم ابني المات همهم حياة شلون ضربت حياة
گمت اعيط وأگلها لچ حياة أبني شنو ذنبه ذبحتوا أبني شنو ذنبه نحرتوا سلمتوا الي جثه
وهي تبچي وبيد وحده دگ على وجهه
وتگلي/ ولچ والله ما أدري راح يصير الي صار ولچ أتمنى لو ميته ولا ميت قيصوري

هذا كل الي صار وفرقد عبالك مغيب ما يحچي أبد بس اخذ التابوت وطلع والعياط ملا البيت
واني طلعت أركض اجتي سيارة چبيره وحديثه
مال ابن عمه فتح الباب وصعد فرقد التابوت
وحطه بالكراسي الخلفية وصعدت اني هم وقمر وابن عمهم سد باب السياره وما قبل واحد يصعد
وهو صعد وتحركت بينه السياره بأتجاه النجف
حتى يندفن بيها قطعة گلبي

واحنه دى نطلع من فرعهم ولد عمه ظلوا يرمون بالجو
الى ما طلعنه بغداد كلها وصلنه للنجف وزورنا الإمام علي عليه السلام
وتوجهنه للمقبره وصلنه واجينه لأصعب موقف وهو دفن قيصوري هنا من نزلوا التابوت والدفان محضر وحافر الگبور فتح التابوت ابن عمهم وهم نزل فرقد للگبر حتى ينزل قيصوري لهاي الحفره إلي احنه الكبار نرعب منها

وابن عمهم نطى قيصوري لفرقد ظليت بس اعيط لمًا نگطع صوتي وفرقد بقه گاعد بالحفره وحاضنه ويبچي
ويگله/ سامحني حبيبي راح انزلك بهاي الحفره واعوفك ياكلك الدود
نزله فرقد باللحد ولد عمه بالگوه طلعوا وبدوا ينزلون التراب عليه وراح قيصوري كأنه ما أجى لهاي الدنيا وآخذ گلبي ويا وادعي من كل گلبي الله لا يخلي احد يجرب فقدان الضنى وما قبلت اعوفه وحده وبقينه الليل كله ويا

اگله/ لفرقد خليني ويا خاف يبچي ومن اجى الصبح يريدني فرقد ويا أرجع بس آني ما قبلت
الى ما گلي بعد عندچ ولد ثاني محتاجچ تعوفي
ولازم اضمد جروحي بيدي وأرجع لخاطر بروقي من رجعنه رحت بوجهي على المستشفى
وسالت على بروقي

گالوا / زين وحولوا على الردهة رحت ركض عليه اريد اشوفه وأطمئن عليه

من دخلت للردهة لگيت قمر يمه
اجيت گعدت يمه شويه أحسن وعى على نفسه
وحمدت الله وشكرته وبقيت يمه اني

مر وقت لليل صارت هوسه مو طبيعية گالوا اكو واحد مات
وصار عياط من طلعت من الردهة عرفت حسن أبن سنان سلمها لله
وهذا خطيه هم چانت حالته خطره بقت بس منتهى  وضحى بالعناية
إني أبني تحسن شويه وطلعوا من المستشفى ما قبلت آلا آخذ أبني ويايه لبيتي
بالرغم ما فرقد چان معارض بس اني اصريت اخذه 
رجعت للبيت وأبني ويايه  مر يومين بتوتر وشد اعصاب بالنسبه لفرقد لأن هو فجاءه ولد اثنينهم ما موجودين يمه
احتاجيت ملابس لبروقي أخذني في وقتها أبو كرار وهمه بعدهم بعزه حسن أبن سنان من دخلت للبيت احس رجفه بجسمي البيت هوسه صعدت فوگ. أصلًا ماكو واحد ينتبه عليه

ظلت گلبي يوجعني من فتت للبيت وأذكر شلون چانت ذيچ الليل لأطفالي وهمه يطعنون
اني من صعدت وصلت يم غرفة حياة ظل عندي فضول أشوف وين سما

دخلت لغرفة حياة وشفتها مزنجليها ومربطه وگاعده مو ذيچ نفسها سما كلش حلوه صايره تخوف وتريد كل شويه تهجم عليه حسيت بواحد ورايه يتنفس بس التفتت شفته فرقد

گال / شفتيها هذا وضعها اذا ما نربطها تأذي الكل

گتله/ بعد مو مهم فرقد
طلعت صارت حياة بوجهي
گتلها/ شوفي ربچ يمهل ولا يهمل الله كلنه عاقبنه
بس بشنو عاقبنه بأطفالنه القرآن لا ينحلف بي لا صادگ ولا كاذب
گالت / اني خسرت كل شي
گتلها/ لا ان شاء ما شوفين الخير بحياتچ
بعدني أريد أتوجه لغرفتي سابقًا وگاعد فرقد يم
سما يحچي وياها
وچان تگول سما / بصوت ما اعوف شلونه صوتها تحسه بي خشونه
الذهب بالحديقة الذهب بالحديقه وهوايه كررت هذي الجمله
رجعت عليها وفرقد صافن عليها
گتلها/ يا ذهب بالحديقه
گال فرقد / أنتي كل عقلچ تاخذين كلام منها
گتله / ليش هي بيا حال حتى ماكو واحد ما ياخذ بي
گال / هاي الجمله تكرربيها من يوم تمرضت

عفتهم وطلعت رحت على غرفتي اخذت ملابس لبروقي وشفت ملابس قيصوري لو خنگتني العبره
سمعت صوت عياط نزلت شفت عمتي يا مولاي كما خلقتني بالگراج وفرقد يحاول يدخلها للبيت
صفنت على حكمة رب العالمين دعيت عليه ما يرتاح أبد وسبحان الله نشلع گلبه وما يعرف شيسوي شافني اباوع عليه وخصوصًا من يصير موقف بيه گدامي يصور اني دى أشمت بي

هو ما يدري أني بعد قيصوري صرت اكره الدنيا كلها
من طلعت من المستشفى صار أسبوع رجعت للبيت على أبني لأن اخاف عليه من الهوه الطاير أجى خبر ثاني من المستشفى
گالته الي يارين عرفته من ليناس بنت حوراء
گالت / دارين انتي تدرين اليوم منو من نسوان فرقد راحت الجوار ربها

يتبع

أولًا آسفه ما گدرت أكتب والقرآن أكثر من هذا گد ما ابچي واكتب هذا أصعب بارت كتبته والله حتى أيدي ترجف وأكتب أعذروني ان شاء الله اعوضكم على البارت الجاي

ثانيًا عظم الله اجركم بأستشهاد ابا الاحرار الحسين ابا عبدالله عليه السلام

دمتم في آمان الله وحفظه اختكم الزهيرية الزهيرية
تصويتكم يسعدني