عذريتي مقابل برائتي
بقلم الكاتبة الزهيرية الزهيرية
لا احد يعلم كم كافحت وكم تألمت
لا احد يعلم عنك أكثر مني
فلا احد يعلم ما أصابك
لا احد يعلم معاركك الخاصة مع الحياة
ومع نفسك
لا احد يعلم ما الذي زعزع امانك
وقتل عفويتك
وأطفئ نورك
لا احد يعلم كم كافحت كم خسرت
كم تألمت
كم تعذبت
لا أحد يعلم من انت
يارين - عواقب تصرفاتنه الغير مدروسة راح توگعنه بشر اعمالنه
من اشتكيت على فرقد چان همي اساعد دارين بس أني خسرتها كل شي ولو يرجع بيه الوقت چان ما سويت إلي سويته بس لو بعد متفيد
من رجعنه من المستشفى ويا أبو كرار من حچي ويا دارين على فرقد والله ما انكر اذا اگول ما خايفه بالعكس الخرف صار أكثر لأن اذا طلع فرقد ما راح نخلص لهذا صرت أفكر شلون وين ننهزم نروح للناصرية يم الشيخ شاهين ما يفيد لأن إذا رحنه راح تثبت تهمة أنه دارين عدها علاقه بتمام وما أصور بعد الصار الشيخ راح يقبل يساعدنه بقيت حايره والله لا يحير عبده وأني بتفكيري صارت عندي أوجاع بطني ذكرت هذا الطفل خطيه شلون بي وشراح أسوي ويا عمار بعدين گلت نفس الوضع هو أشتكي عليه بالشوؤن اتصلت بتمام وحچيتله وضعي
-گال- أي أشتكي عليه بالمحكمه وبعدين حتى تتأمنين انه يوصله التبليغ لا توصلي أله عن طريق المركز انطي للمبلغ إلي بالمحكمه هو يبلغه
شكرته ونهيت إتصالي ويا بقى أسوي هذا الشي والله كريم طلعت ثاني يوم ورجعت رحت يم الباحثة وگتلها على ألي أقترحه تمام
ضحكت وگالت - والله ما أدري تمام صاير خريج حقوق حبيبتي يگدر من يرحون ما تلگي ويطلع اي واحد بالبيت يگول انتقل من هذا البيت وبهذا الشي يكتب لم يستدل على عنوانه ونفس الوضع تنرد الدعوه لإن ما سويتي شي نفس الوضع
-گتلها- والحل شنو والله تعبت وهذا الطفل راح يجي واني بعدني أركض ورا عمار
گالت - والله أني مثلچ ما اعرف شنو الحل بس نرفع القضيه وننطيها
للمبلغ إلي بالمحكمه ونشوف عسى ولعلى يصير حل
گتلها - أكو شي اني زوجته الأولى علاقتي بيها زينه أگدر أتفق وياها أنه هي تستلم التبليغ وتنطيهيا
-گالت - أي أحسن حل هسه أوصي المبلغ باچر تجين الصبح يطلع وياچ وأنتي اتفقي وياها حتى من يروح المبلغ هي تكون قريبه على الباب وتطلعله وتستلم التبليغ بهذا الحال أجى يحيلوه للفحص ياخذون منه عينه من تولدين بخير وسلامه يطابقوها ويا العينه إلي أخذوها منه إن انطبقت عليه يثبتون الطفل ابنه وينسبوا اله وأن ما حضر نفس الوضع ينسبون الطفل اله لأن يكون تبلغ وما أجى
-رحت رفعت قضيه ثانيه ودخلت الباحثة وقعتها يم القاضي وطلعت انطتها إلي سويت تبليغ واتفقت وياها على ثاني يوم اجي على بس أخذ المبلغ وأروح رجعت للبيت وللعصر أجى أبو البيت وراد البيت من عدنه وظليت أتوسل بي بس ما قبل وراح اتفقت ويا دارين ثاني يوم اروح اشوف بېت بس قبلها أروح للمحكمه
-ولليل اتصلت بفاتن وگتلها على كل شي وهي هم ما قصرت
گالت- تعالي أنتي والمبلغ بس قبل لا توصلون اتصلي عليه حتى يساعدني بناتي واگعد بالكراسي المتحرك ومن تجون أكون قريبه على الباب وأني اطلعلكم واستلم التبليغ
غلقت الموبايل وياها وكلي أمل انه رب العالمين راح ينصرني ونمت ذيچ الليله وأني أنتظر الصبح بفارغ الصبر
- گعدت الصبح بهمه ونشاط وبيومها اجتي رازقيه وياها تمام من راحوا اني طلعت ورحت للمحكمه وأخذت المبلغ واتصلت على فاتن أنه احنه راح نوصلهم بعد شويه وهي ماقصرت من وصلنه أني بقيت بالسياره والمبلغ دگ الباب وبالفعل طلعت فاتن وقعت على التبليغ وأخذته بس سعادتي ما تنوصف رجعنه اني والمبلغ للمحكمه وثبتت بالقضيه إنه هو تبلغ وبقى بس يجي على يوم المحكمه
- رجعت للبيت والله الفرحه ما سايعتني وأخيرًا وصل التبليغ
بس للمغرب أجى عمار وهو يفور ويرعد
من ندگت الباب بهمجيه عرفته عمار طلعت ومن فتحت الباب
گال- شوفي لچ خاف عبالچ أني خايف لا حبابه تحلمين والله جنيتي على روحچ وهسه شسوي بيچ حلال
وراح والله تعجبت على قباحته بس ليل صار إلي ما كان بالحسبان كلنه نايمين وصار صوت رعبنه بحيث گعدنه ما نعرف شنو هذا الصوت
- وحتى من صراخنه وصراخ الجهال گمت كل شي ما اشوف بس شفت دارين وهي تجر بالباب وتريد تفتحها واني گمت فتحتلها الباب ونسمع الناس ألي بره يصيحون أطلعوا بعد وحده راح تنفجر
بعد ما شفت دارين وأني طلعت جهالي بره ورجعت أريد أطلع أمي
دخلوا الناس وساعدوني أطلعها
- بعدها اجتي دورية مال شرطة وبعدها سياره مال شرطه وگاموا يحققون وگالوا أنه هاي رمانات صوتيه يعني متأذي بس صوت سوي قوي ومن شمروهن وحده اجتي بالجام وكسرته وحده ما أنفجرت وظلوا يسألون بالناس بس أكو شباب گالوا احنه شفنه ولد اثنين ملثمين على دراجة ناريه شمروهن وراحوا وطلب أبو دوريه أنه شكو بيت مركب كاميرا يشوفون التصوير واذا موجوده مقطع مال ذوله اهل الدراجه موجود يسلموا للشرطه
-ورجع يسأل بيه عندكم عداوه ويا واحد شكون بواحد بعدني ما حاچيه صارت دارين گدامي رجع كرر نفس السؤال أنوب أني تاهت عليه منو هيچي سوه فرقد لو عمار چنت أريد اتهمهم اثنينهم بس صار فرقد گدامي نرعبت منه وسكتت
- اجى فرقد أخذ اطفاله من دارين بحضنه وگام يبوس بيهم وهذا بروقي شلون حضن أبو وتقدم فرقد من هذا ألي صار ساعه يحقق
وگال - أخوية أني عقيد فرقد أريد تقيدلي الحادثة كلها بمحضر رسمي وأريد جيبلي نسخه منه
وهذا الصار مثل الالف ودگ تحيه ورجع صور البيت شلون البقايا مال الانفجار
- رجع فرقد انطى اطفاله لدارين وراح بس أنتبهت من دى ينطيها الأطفال قرب حلگه يم اذنها بس ما أعرف شنو گاللها
راح فرقد والشرطة ودورية الجيش هم راحوا والناس كلمن راح لبيته دخلنه للبيت وهو عباره عن فوضى گعدت دارين بالگاع وأطفالها بحضنها
-وظلت تندب الحظ وهي بعدها ترجف من هول الصدمه عزلنه البيت من الجام المتكسر وگعدنه وبعدها الصدمه بينه ومنعرف شيصير بينه بعد والله ذاك الليل ما غمض ألنه جفن للصبح احنه گاعدين ومن 6 الصبح إجى أبو البيت يهد ويرعد على خربتوا البيت
وانتوا ناس مشبوهين وما طلعون من البيت ألا تنطوني تعويض والتمت الناس وهو يصيح وكلها صيح حقه وفرض علينه ندفع مليونين تعويض اله عن الأضرار الي سببناها لبيته وعلى هذا الإتفاق راح أبو البيت
-دخلت للبيت ودارين صارت گدامي من شفتها نزلت دموعها
وگالت - بس أريد أعرف احنه شسوينه والله هيچي يعاقبنه والله وين ماكو واحد ما بگلبه رحمه يسلطه علينه وهسه هذا من وين راح نجيب اله تعويض شنو نبوگ وننطي ظليت لا ابث ولا أستلم من گد ما أحس راسي راح ينفجر من التفكير هسه هذا منين اجيبله فلوس
-للعصر اجتي أم كرار وظلت تلوم بدارين على أنتي خسرتي وهسه لو گاعده يم فرقد چان أنتي بأمان بس أنتي ظليتي يوميه مسويه هوسه وحقه الرجال بزع منچ روحي شوفي غيرچ شلون يتممن بس يباوع عليهن وأنتي تتعيقلين عليه بصراحه بعد ما اتحملت
- گتلها - وعليمن يتمنن شو هو شايب عايب على شنو بعد عد أقلها تعوفه وتروح تزوج الأحسن منه
تخبلت ام كرار گالت- وعليمن يجي الأحسن منه على سمعتچ الحلوه شو حمدلله سيرتچ على كل لسان
هنا بعد ما تحملت صار الصياح بينه وهي گامت تغلط عليه وأني أغلط عليها ألى ما صرت عصبيه
وگتلها- شحال ما الله خله بيچ عله چان شسويتي
وهي تخبلت گالت - حمد لله مريضه والناس تدعيلي أصير زينه مو حبله من واحد وأركض ورا حتى بس يعترف بأبني
- گالت كلمتها الأخيره وطلعت وهي من طلعت ظلت دارين صيح عليه
وتگلي- شبيچ تخبلتي مريضه وتعايرين بيها
ظليت متفاجئه على دارين شوكت كبرت وگامت تعلي صوتها عليه وحسيت على غلطي من عايرت ام كرار بمرضها
ورجعوا الشرطه وجهوا أستدعاء ألنه علمود حادثة الانفجار إلي صار بيتنه حتى ياخذون اقوالنه
ظلت دارين متردده تروح لو متروح الى ما حسمنه امرنه ورحنه ثاني يوم بس حمد لله ما توصلنه الى الفاعل لأن إلي جايين راكبين دراجه ناريه وملثمين ودنيا ليل وماكو شاهد عيان شافهم واحنه ما گدرنه نتهم فرقد أو عمار أو أي شخص كان لان تعتبر تهمه بدون أي دليل ملموس
- رجعنه للبيت والمثل إلي يگول مثل ما رحتي اجيتي احنه هم الظاهر نأيس ما نگدر لأن إي شي من ناحية الحكومه ما راح يصير
رجعنه واحنه نضرب أخماس بأسداس منعرف شنسوي
لازم نعوف البيت ونعوض أبو البيت واحنه منو يعوضنه بس الله اليعلم مر اليوم عادي إلى ان أجى أبني
گال - ماما موبايلچ يدگ
اخذته منه شفته رقم فاتن بالبدايه أستغربت بعدين رديت ويا ريت لو ما راده أو لو الله گاص لساني ولا راده على الموبايل
لأن أول ما رديت گتلها - هلو فاتن اگلچ بس لا عرف عمار احنه متفقين على موضوع التبليغ
وچان أسمع صوت عمار وهو
-يگلها-تعالي بنت الكلب تتأمرين عليه والله إلا اموتچ أنتي وذيچ الساقطه والله لا اخليچ تندمين على عمرچ وبعدين سمعت صوت العياط ما فاتن وبعدها نغلق الموبايل ظليت بالي يمها وأريد أعرف شصار وياها بس المن اسأل
- دارين - صار الانفجار وهاي أول مره يصير بيه هيچي وأسمع صوت يرعبني بعد ما ركضت وطلعت أني واطفالي من انتبهت على نفسي رجعت للبيت لگيت الشرطه ودوريه مال جيش وگفت
أشوف أمي وين اني التفتت ناحية الباب شفت فرقد والله لو ماخذ الله عمري ولا شايفته لإن أموت خوف منه وعب گد ما راهبني
- وأني اطفالي اثنينهم يصرخون أجى تقرب عليه أخذ بروقي لحضنه وظل يبوس بي وقرب وجهه على قيصوري وظل يبوس بي
راح يم هذا أبو الدوريه وعرف عن نفسه وذاك خطيه هم دگ تحيه
وآمر أنه حتى تصوير يصورون والله في وقتها عبالي
راح يساعدني بس كنت غلطانه
- من كملت الإجراءات رجع بروقي يمي وقرب حلگه يم أذني
وچان يگول - اي شي يصير على أطفالي والله أنتي وعشيرتچ ما تخلصون مني
وعافني وراح وهذا بروقي ثبر الدنيا بالبچي عليه من دخلنه للبيت
سألتني يارين على شگال فرقد
وهي تگلي - يمعوده خلي يولي لا تخافين هذا لكون اخذتيهم منه
- سكتت لان آني ما مقتنعه أنه فرقد يخاف وأعرف آنه أكو باله شي
ويريد يسوي بس شنو هذا ما أعرف وشنو هذا الهدوء إلي عنده
اي شي افكر بي أريد اطابقه على شخصية فرقد ما تحظرني فكره عليه وليش هذا الهدوء العنده
على ثاني يوم استدعونه للمركز حتى يسمعون اقوالنه بداية الآمر ما قبلت أروح خفت بس بعدين رحنه وچنت عبالي راح أشوف فرقد هناك بس چنت مخطئه ما شفته ولا أجى من رجعنه للبيت واجتي ام كرار سألتها شلون عرف فرقد بالانفجار واجى
گالت- اساسآ فرقد چان يمي لأن أبو كرار ما موجود راح يبات خارج البيت ومن صار الانفجار سمعنه بس ما عبالي انتوا بس من الهوسه ألي بره طلع من رجع گلي على الموضوع
- مر يومين حتى شفت ردت فعل فرقد وهذ شي ما چنت متوقعته من ندگت الباب طلعت يارين وبعد شويه رجعت وبيدها ورقة بس أشوفها مو على بعضها وهذا چان شي مو بحساباتي من سألتها شنو هاي الورقة
گالت- فرقد رافع قضيه بضم حضانة الأطفال اله أني تخبلت ما چنت متوقعه هذا الشي
أخذت الورقه من أيدها بس ما چانت ورقه وحده لا چانت ورقتين تبليغ وحده طلاگ وحده ضم حضانه تخبلت
- من حلات روحي لبست عباتي وطلعت أركض رحت على ام كرار ظليت ادگ على الباب بقوه الى ان طلع أبو كرار
گتله - أبو كرار أبوس أيدك أريد أشوف ام كرار
گال- عوفن ام كرار لأن هي مريضه عندچ شي بعد روحي على فرقد ذاك زوجچ احنه شكو وبعد عفيه لا دخلون ام كرار بأي شي يخصچن ودخل لبيته وسد الباب
- رجعت وأني منهاره شلون ياخذ اطفالي مني والفكره إلي رعبتني انه راح يطلگني معقوله بعد ما أكون على ذمة فرقد وبعد ما اگول أني زوجة فرقد واي شي يربطني بفرقد ينتهي
گالت يارين- وين رحتي شم گبل طلعتي
گتلها - يارين والله أموت إذا طلگني فرقد واخذ أطفالي مني
گالت- يمعوده اخلصي منه شسوين بي
گتلها - أني اي تصرف اصرفته ويا ربي يشهد من حبي اله وغيرتي عليه من حرگت گلبي منه ومن أنه صارت منتهى زوجته شرعيه
وهسه راح يطلگني ولچ أموت يارين ما أتحمل فكرة أنه أكون طليقة فرقد گعدت بالگاع وظليت ادگ على وجهي بكل قوتي
- اجتي يمي يارين ولزمت أيدي وهي
تگلي - شبيج تخبلتي بعد إلي سوا بيچ وبعدچ تحبي وتريدي
گتلها - ولچ أحبه كلمه قليله بحقه گولي أموت عليه روحي من الدنيا هو
من شوغت روحي ما اگدر اگعد بمكان واحد ما ادري وين أروح روحي تنازع أحاول أهدئ روحي ما أگدر باوعت على الساعه حدود الوحده إلا ربع الظهر من حرگة گلبي ما اهتميت لا بظهر ولا بالحر طلعت اركض ويارين أصيح ورايه ولچ تعالي تخبلتي وين رايحه
بس أني ما اهتميت وصلت لراس الشارع وأخذت تكسي ورحت على بيت فرقد وگظيت الطريق كله ابچي وصلت لبيت فرقد احس گلبي نار ظليت ادگ بالباب والجرس سوا طلعت حياة من فتحت الباب گبل دفعتها ودخلت أركض
وأصيح- وين فرقد اريد احچي ويا طلعت عمتي من غرفتها وقمر هم وعمتي استلمتني على شكو جايه وشتريدين منه وأنتي هجامت بيوت واذا ما طلعتي هسه اعيط والم الناس عليچ
- بس أني ما اهتميت ردت أصعد الدرج أريد أشوف فرقد فوگ لو لا
شفت أبن منتهى طلع من الغرفه إلي بصف غرفة قمر
واستلمتني قمر تغلط وتفشر عليه واني هم عفتها وصعدت فوگ شايطه گلت بنفسي هسه هو ويا منتهى بغرفتي رحت لغرفتي السابقه إلي كانت تجمعني بفرقد بدون ما ادگ الباب
دخلت وهو من دخلت أني انتبه عليه لأن چان مخلي هتفون بأذانه
گبل گام وبعد الهتفون
وگال- شجابچ هنا
بعدني أريد اجاوبه دخلت منتهى وياها عمتي
وگالت منتهى - شدخلچ هنا انتي ما عندچ أحساس
گالت عمتي- أمشي اطلعي منا وبعد لا تجين فهمتي سجنتي وجايه هسه عليه أمشي ولي اطلعي لا هسه أشتكي عليچ واگول هاي باگتنه
وهي اجر بيدي أني جريت أيدي منها وعطت بيهن بصوت عالي
وگتلهن- أني ما جايه عليچن جايه على فرقد من أجي عليچن طردني
-ورحت ركض صرت ورا ظهرفرقد وهو
گال - يمه أنتي ومنتهى انزلن هسه بس أشوف دارين شتريد
گاللتله- شلون تبقى وياها لو جايه تدحس بيك مثل الگح..... حتى ترجع طردها لهاي الدايحه
گاللها- يمه مره ثانيه من تجي دارين ما أسمح لواحد يطردها شوكت ما تجي هلا بيها هذا بيت ولدها
وعمتي ظلت تهز بيدها وتگله- هااا حنيت لو شتاقيت للگح.... مالتك
وهو ظل يصيح ويكفرويگللهن أطلعن بره
وهن طلعن بس عمتي تغلط عليه وهو راح سد الباب وراهن وچان
يگول- تفضلي احچي اسمعچ
تقربت عليه گتله - صحيح تريد طلگني وبعد متريدني فرقد آني دارين إلي تحبك وتموت عليك والله ما أگدر أعيش بدونك
بعده يباوع عليه تقربت عليه حاوطت رگبته بيدي وخليت شفايفي على شفايفه
-وهو گبل دفعني قوي حتى وگعت
وچان يگول- لا تسوين هاي السوالف مال الگح.... لأن اني لعبت نفسي منچ ولا تتقربين مني فهمتي
رجعت تقربت عليه ونزلت على رجله وبستها ورفعت راسي
وگتله - الله يخليك فرقد لا طلگني والله والله أعيش خدامه بس لا طلگني
گال- صدگي چنت اتمنى أسمع هذا الحچي منچ گبل بس هسه لا گمت ما أحب أسمع صوتچ هسه صرتي تريديني ولچ ما چنت أجي يمچ وألا احس بيچ بلگوه متحملتني ولچ حتى من أجي يمچ تريدين دائمًا حتى رغبتي تذليني بيها مو عبالك زوجتي عبالك وحده تتقصد تهين المقابيلها وأسكت واگول ميخالف بعدها صغيره وبعدين تكبر وتفهم ولچ من اجتي عليه الشوؤن وأخذتني ندمت على الساعه الدنت بيها نفسي عليچ
بس وصلت مرحله فهمت أنه أنتي ما يفيد وياچ اي شي لهذا يا بنت الناس أني بعد ما اريدچ أني الي يمچ بس أطفالي ما اخليهم يمچ لو تنطبق السما على الگاع
روحي يا بنت الناس اني بعد ما أريدچ واذا عندچ ذرة كرامة تعالي للمحكمه حتى نطلگ ورحي الله وياچ وشوكت ما تريدين شوفين أطفالچ تعالي
- هنا بهاي اللحظه حسيت أني متت وخسرت كل شي
گتله - فرقد والله چنت اسوي ألي أسوي من غيرتي عليك وخصوصًا بعد ما عرفت انت زوجت منتهى
گال- راح اگلچ شي هذا بس حتى اوضحلچ اقسم بكل كلمه بالقرآن ماكو وحده گدرت على فرقد بس أنتي وماكو وحده چنت اطلب رضاها بس أنتي وأني بيه طبيعه ما يهمني المقابيلي شيفكر بيه والله ما أبرر موقفي لآي أحد بس أنتي چنت يمچ مثل الطفل وربي يشهد بس چنت أريد احتويچ وتحتويني بس للآسف فشلنه وأقسم بالله من يوم ألي دخلت بيچ والله ما حلت بعيني غيرچ وشگد چنت احب علاقات الرغبه بس من زوجتچ صرت أموت منها وأحب هذا الشي الا وياچ وآمني يا بنت الناس عمري ما راح تحلى بعيني غيرچ والله العظيم منتهى بالنسبه ألي أخت وبس وهسه تگدرين تروحين الله وياچ واشوفچ بالمحكمه
- وراح فتح الباب وأشر براسه بمعنى اطلعي بره طلعت من غرفته
وهو سد الباب ورايه بس أني دى أفوت من يم باب غرفة حياة أنتبهت على سما بالغرفه أسوي حركات غريبه ما فهمت شنو هاي الحركات نزلت وأني دموعي تصب وتأكدت أنه إلي بيني وبين فرقد نكسر وألي ينكسر بعد ما يصلح من نزلت شفتهن الثلاثي المسموم
وعمتي بس شنونظرة الشماته بعيونهن طلعت بس أكو صوت
گلي- مو گتلچ طلعتچ من هذا البيت على أيدي
ألتفتت شفتها حياة گتلها- الله يمهل ولا يهمل يجي يوم والله يظهر الحق بس ساعتها تكونين خسرتي أعز شي عندچ وطلعت من هذا البيت إلي چان بالنسبه أليه بيت الحب والرعب
-رجعت للبيت اني راسي گوه افسر أي كلمة واحد يگلياها واحس ريگي ناشف شگد أشرب مي نفس الوضع أني أبقى عطشانة ظل أبو البيت يوميه يجي يسوي هوسه گدام بابنه دفعناله الإيجار مثل ما راد
لأن يگول- الا دفعون التعويض يلا طلعون
وهاي چانت هاي أول مساوئ الطلعه وحياة بدون فرقد مرت الأيام
واحنه نفس وضعنه بس فرقد يجي يشوف أطفاله ويروح وحتى من يجي يجيب ويا كرار أبن حوراء وهو يبقى گاعد بالسياره وكرار يجي ياخذهم يشوفهم وينطيهم فلوس ويروح إما أم كرار ابد بعد ما شفناها مرت علينه الأيام بحلوها بمرها أني أجى موعد المحكمه مال النفقه بس ما رحت على الجلسة وسقطت الدعوه واجى يوم تمنيته ما يجي أبد أو أني ميته وما أشوفه موعد جلسة الطلاگ والحضانه لان هو رفعهن بنفس الوقت أني قبلها بيوم اتصلت بالباحثه
وحچيتلها على موضوعي ويا فرقد
گالت الباحثة - حبيبتي أله حق يطلگچ عادي ماكو أشكال بس الحضانه ما من حقه من حقچ أنتي وهو ملزم يدفع نفقه للاطفال
- ومن غبائي نسيت أذكر حادثة الانفجار لهذا كانت هاي أهم نقطه ركز عليها فرقد گعدت من الصبح بعد ليله متعبه من التفكير وأني اباوع على اطفالي الي ما أسمح لأي أحد ياخذهم مني ويرجع بالي على فرقد ألي هذا اليوم الأخير أني بي على ذمته بدلت أني
گالت يارين- أجى وياچ
گتلها- لا أبقي يم أمي والأطفال أني أروح وحدي
وبالفعل طلعت حدود السبعه ونص الصبح وأخذت تكسي وصلت للمحكمه من شافوا إلي باب المحكمه التبليغ
گالوا - قضيتچ يم الشرعيه
طلعت بالطابق الثاني بعده ما جاي فرقد والله چنت أتمنى بعد ما يجي للمحكمه
ويگلي - ما اطلگچ وتعالي ارجعي ويايه
بس تبقى الامنيه امنيه لإن صحيت من تخيلاتي على فرقد واگف مقابيلي هو والمحامي مالته
- بقينه واحد يتبادل النظرات ويا الثاني لو يرجع بيه الوقت چان مستحيل اصدگ أنه يجي يوم ونوگف أني وفرقد بالمحاكم واحد ضد الثاني ما اعرف وين راح المحامي ورجع حچى ويا ورجع عليه
گال المحامي - تعالي يم الباحثة
صدگ تحولنه اني وهو يم الباحثة وبدت تسأل على المشاكل وانه احنه عدنه أطفال ولازم نفكر بيهم ان كان أكو مشاكل نگدر نحلها
بعدين گالت الباحثه - تگدرون تاخذون وقت تتفقون بي آما إمساك بمعروف آو تسريح بأحسان بس هو رفض أي فرصه
وگال - لا بعد هاي هيه خلص وصلنه لطريق مسدود لهذا تسريح بأحسان أحسن وأفضل
أني گال هيچي لو دموعي گامت صب شافتني الباحثه
گالتله- فكر شوف گامت تبچي يعني بعدها تريدك
گال- لا أني مفكر وحاسم امري هذا أحسن حل أليه والها خلي كلمن يروح لحال سبيله ويشوف حياته بعيد عن الثاني
بس هو يحچي وابد ما يباوع عليه
گالت الباحثه- تگدرون تتفضلون هسه أكمل البحث وانطي للمحامي
- طلعنه وگفنه قريب على غرفة القاضي الشرعية شويه ودخل المحامي يم القاضي وطلع واحد من غرفة القاضي
وصاح- فرقد ودارين
هو تقدم وگال- أني فرقد
أني احس رجلي يرجفن لأن بعد ثواني أصير غريبه على فرقد نفتح الباب ودخل فرقد وأني أعصابي كلها ترجف احس عندي غثيان وجع راس وگدامي ألباب وأخاف أدخل لأن بس أعبر هذا الباب أصير بعد ما أحل على فرقد
إلى ما هذا الواگف بالباب صاح يلا أختي مشيت بس مثاقله دخلت يم القاضي كل واحد من عدنه وگف بجهة وبدا المحامي بالبدايه بقضية الحضانه وبعدين بطلاگ وقدم الملفات القضيه
سألني القاضي - أنتي گاعده إيجار
گتله- أي
گال- صحيح معتدين على بيتكم برمانات صوتيه
گتله - صحيح
گال -القاضي وقت النطق بالحكم فرقد انت ودارين واحد يوگف مقابيل الثاني وأرمي عليها اليمين
صرنه واحد مقابيل الثاني واثنيناتنه واحد يباوع بعيون الثاني
وچان يگول القاضي- يلا أرمي عليها اليمين
گال فرقد- أنتي طالگ
مو گال طالگ لا حكم عليه بالاعدام وبعدين كمل القاضي حكمه من
گال- وبضم الحضانه لفرقد على ان يتم تسليمهم بالمحكمه وتحت أنظار القاضي بعد أسبوع رفعت الجلسة
أني طلعت من يم القاضي أول ما عبرت الباب قوتي كلها إنهارت وگعت بالباب على ركبي وهو طلع وشافني وعبر من يمي ولا كأنه يشوفني
أجني أكثر من بنيه ذني إلي عدهن مراجعات لو على طلاگ لو جايات ياخذن ورقة حكم ظلن يرشن مي على وجهي وهن يسالن شبيچ عد وحده جاوبتها- خطيه يمكن اطلگت
وهن بعدهن يسالن گتلهن - إي طلگت
عد وحده چان تگول- هاي بس بالبدايه تنصدمين بس بعدين لا عادي
گومني طلعت شفت فرقد دى يصعد سيارته هو شافني بس صعد سيارته وراح رجعت للبيت أول ما شافتني يارين
گالت- ها شسويتي
أني مثل الفاقده أگول إلها فرقد طلگني وأخذ اطفالي گعدت بالگاع وأني گمت الطم على وجهي واعيط واگول فرقد طلگني وأخذ أطفالي بحكم محكمه گمت فتحت الباب مال الصاله
واباوع للسما واگله ربي شسويت وهيچي تعاقب بيه وبعلو صوتي أعيط واگول شسويت بعدها ما حسيت بشي
- حسيت وأني بالمستشفى ومعلگيلي المغذي ويارين يمي وابو كرار
إلي من صحيت گلي - حمدلله على سلامتج بنتي
گتله - الله يسلمك فرقد اخذ أطفالي
گال - لا بنتي ما اخذهم أنتي صيري زينه والله كريم ربچ يحلها من عنده
أنتبهت أنه احنه بمستشفى أهلي تعجبت منين ندفع حق المستشفى
بس ما فهمت ليش اجيت على مستشفى أهلي كملت المغذي وطلعنه والطريق كله ابچي وابو كرار ويارين يهدئون بيه الى ما وصلت للبيت دخلت اخذت أطفالي بحضني أريد أشبع منهم قبل لا ياخذهم فرقد
بعدين عرفت انه من تخربطت هو طالب من أبو كرار يجيبني لمستشفى أهلي وهو دافع تكاليف المستشفى وحتى من چنت بعدني ما فقت چان هو موجود بس بعدين دافع الحساب وطالع
بعدين عرفت انه أني من الشوطه مال الطلاگ صاير عندي سكر گالتلي يارين
گتلها - حمد لله بعد شأشوف أكثر من هيچي ربي شتاخذ مني بعد حتى ترضى
- مرت أيامي أسود من السواد وكل ما يقترب موعد المحكمه احس گلبي راح يطلع من صدري ونرعب يعني راح ياخذون أطفالي واظل بدونهم والله اگعد بالليل أبوس بيهم واشم ريحتهم واظل اباوع عليهم أريد عيني تشبع منهم ماكو أحس أريد اخليهم بصدري وأجى اليوم الموعود ليله كامله أني ما نايمه مگابله أطفالي وگاعده واتمنيت ما يجي هذا الصبح ابد بس اجى هذا الصبح الاكشر ولازم أروح أسلم أطفالي لفرقد بدلت ألهم واني واني دموعي صب عليهم واخذتهم ورحت للمحكمه اول ما دخلت ورحت قريب على مكتب قاضي الشرعية لگيت فرقد گدامي جاي قبلي بروقي أول ما شاف أبوه راح يركض عليه وهو هم اخذه بحضنه وظل يبوس بي ظليت
اباوع عليه وحضنت قيصوري قوي أحس أريد ادخله بگلبي مو بس بصدري بس ما يفيد ما مر وقت هوايه حتى صاحوا بأسامينه اني فرقد دخلنه يم القاضي سلمته بعد قيصوري وبروقي بيده أصلن وقعت يم القاضي على تسليم أطفالي لفرقد
- ورجع هو سلم گدام القاضي خمسة ملايين مؤخري اخذتهن وقعت أنه استلمت مؤخري بس شنو طلعت ارجف وهو أخذ اطفالي وطلع من گدامي يمشي وأمشي وراه واباوع عليهم الى ان صعدهم بالسياره وراحوا واختفوا من نظري رجعت للبيت منهاره وابچي أول ما شفت أمي گدامي
گتلها- كله بسببچ اخذ أطفالي بس گليلي شوكت أخلص راح أظل طول عمري أدفع الثمن
وهي تباوع عليه وما أعرف شتحچي بعدها مرت أيام هدوء بس گلبي يم أطفالي شلون يا ربي يعني خلص بعد ما أشوفهم ردت أروح على أم كرار بس أعرف أنه هي مريضه إلى ان حسمت امري ورحت على ام كرار من طلعلي أبنها
گال- والله أمي نايمه
ردت أروح بس طلع ابو كرار وصاح عليه
گال- دخلي بنتي تعالي
دخلت أخذني أبو كرار لغرفتهم دخلت شفت ام كرار نايمه بس تعجبت من شفتها ضعفانه صايره من الضعف كأنه هيكل عظمي
والسواد حول عيونها قاتم
گتله- شبيها ابو كرار ليش هيچي صاير بيها
گال - قبل أيام رحنه راجعنه الدكتور گال منتشر السرطان بجسمها
وهي منا نفسيتها تعبانه لهذا كتبلها على آبر منوم حتى لا تتعذب
صدگ هنا نزلت دموعي على هاي الانسانه إلي چانت بمثابة ألأم والأخت أليه نزلت على أيديها وبستها وراسها هم بسته وتمنيت من الله يرحمها بساعتها الاخيرة
طلعت من يمهم واني منتهيه من قهري على أم كرار رجعت للبيت وگتلها ليارين على ام كرار هي هم راحت زارتها من رجعت أول ما دخلت للبيت
- ندگ الباب رجعت يارين فتحته طلع أبو البيت يريد التعويض المليونين والنه لراس الشهر ونطلع من البيت
دخلت أخذت مليونين من المؤخر مالتي وطلعت انطيتهم اله بقت يارين تدعي عليه وبعد راس الشهر باقيله 10 أيام ويخلص لازم بحدود هاي الأيام نلگى بيت
بيومها بلليل سمعنه صوت عياط قوي طلعنه للباب وجان اكو
ولد بالشارع سألنه أني ويارين شنو هذا صوت العياط
گال- أكو وحده بالفرع إلي ورانه ماتت
گالتله يارين - منو هايه الي ماتت
گاللها - اي أم كرار
أني ويارين نصعقنه من الخبر لبسته بسرعه وطلعنه نركض وصلنه لگينه هوايه ناس يم بيتهم مجمعه دخلنه شفنه تابوت نايمه عليه بنتها
وقمر وحياة بس منتهى وام فرقد ما شفتها
انهاريت گعدت يم التابوت أني ويارين وبچينه عليها هاي الانسانه الطيبه راحت سكنت بجوار ربها ورحمها من معاناتها خطيه بنتها ملخت شعرها وجهه كله زلغته بأظافرها وهي تون وتبچي على أمها
گوه لازماتها أني ويارين دخل فرقد
وصاح - يلا سون طريق إكرام الميت دفنه
دخل أبو كرار ويا فرقد ويا واحد انصدمت من شفته
ملاحظة/ لعيون أحلى متابعين ألي احب أوجه شكر ألكم إلي إنتوا تكملون نجاحي طبعًا بالبارت السابق أنتبهت على التعليقات إلي جاوزن على أم كرار أني ليش أطلب لا تجاوزون لأن انتوا ما تعرفون الاحداث من تغلطن عليها وهي يم ربها شتكولن رجاءً ما أريد أي وحده تجاوز
وأطلب من كل وحده تقرأ البارت تقرأ الفاتحه لأم كرار وتدعيلها الله يرحمها
دمتم في آمان الله وحفظه
أختكم الزهيرية الزهيرية
تصويتكم يسعدني