أيها الغائب
لقدجعلتني أدرك أن لا مكانة لي
لديك جعلتني أدرك كم انا تافهآ
بالنسبه إليك جعلتني أدرك أن أفكاري وظنوني ومشاعري
رخيصه ولا قيمة لها جعلتني
أنظر إلى نفسي بأحتقار لكنني
لست كذلك أحلف لك بكل أسماء الله الحسنى
أنني لست كذلك لم أكن إعلم أن اصراري
بالتواجد جانبك واهتمامي بك سيصلني
إلى هذا الحال
يارين - بعد ما عذبني عمار الي الله لا يوفقه ولا يشوفه يوم حلو بحياته واني منا تلطم بيه الدنيا ما ظل شي ما شفته بحياتي لهذا قررت اعتمد على نفسي وبعد ما ادخل اي رجال بحياتي وأصير قوية حتى أطلع حق ابني من عمار اما دارين كل ما اتصل عليها ما ألگاها ونقطعت اخبارها عني گلت احسن حل أروح أسال ام كرار
عسى وعلى عدها خبر عنها من اخوها فرقد الي الله ياخذه اخذة عزيز مقتدر
هذا كل الي صار وحتى من عرفت عمار على حقيقته صرت اخاف من فرقد على دارين منه بس المكتوب على الجبين لازم اشوفه العين.
واسأل نفسي يا ترى لو رجعت دارين على فرقد شنو مصيرها من بين افكاري صحيت على دگة الباب والوكت ظهر والدنيا حاره
طلعت لگيته كرار ابن ام كرار
گال - خالة امي تعيط وتبچي وابويه يگول اذا ما اصير زحمه تعالي شوفيها
گلت بگلبي حمد لله چنت أفكر بأم كرار أريد أروح عليها اجى ابنها عليه الله حقق الي بالي الظاهر ساعة استجابه لو داعيه على عمار وفرقد عسى الله يستجابلي
گتله - أوگفلي هسه أجي وياك
دخلت بلغت امي ولبست عباتي ورحت ويا كرار من وصلنه لبيتهم
دخلت ويا كرار لگيتها تعيط وتبچي وزوجها لازمها يريدها بس تسكت هو شافني
وگال- رحمه لأهلچ تعالي يمها والله فضحتنه الجوارين أجوي عبالهم احترگت
تقربت عليها وهي فلتت نفسها من زوجها وگعدت بالگاع تبچي
گعدت يمها وبقيت ساكتة وهي إلا خلصت بچي ورفعت أيدها من على وجهها
وگالت - يارين فدوه اني راح اموت والله اني الله ليش عاقبني اباوع على نفسي بالمرايه أخوف شعر ما عندي أگول الله يساعده لأبو كرار شلون متحمل يباوع بوجهي
گتلها -ام كرار إنتي راح ضيعين بيتچ ورجلچ بيدچ شوفي ام كرار هذا مو عقاب الچ هذا أمتحان والله يحبچ وامتحنچ بالدنيا حتى يجازيچ بالآخره وانتي ما راح تموتين انتي بمرحلة علاج وبس يخلص العلاج يرجع شعرچ ليش ضيعين الأول والتالي من أيدچ
وحبيبتي رجلچ يحبچ لا سوين هيچي بنفسچ وبي ترى الرجال بسرعه يمل
گالت -يارين ما فكرتي بعرضي عليچ
گتلها -ام كرار اني كرهت شكو رجال بالدنيا من ورا عمار لهذا أگلچ اني اخوتي ما بقى بيهم احد يمي والله وهبني ابو كرار اخ ونعم منه لا تفكرين بعد بهذا الموضوع بعد واني شلون ازوج واني لسة زوجةعمار حبيبتي ام كرار اهتمي بزوجچ أحسن
وهي حاولت ويايه بس اني ما قبلت بعدين سألتها على دارين
گالت ام كرار - والله الگعدة الفصل بين العشيرتين راح اصير نهاية هذا الأسبوع ونعرف شيصير بعدها ودارين اتصل على نفس الحساب بس ما متصل
گتلها - اني قلقه على دارين وين أختفت وليش ماكو خبر عنها واذا فرقد قبل ترجع يمه شراح يسوي بيها وهي مريضه
گالت -لا تخافين اني باچر اروح على فرقد واحچي ويا اشوف شنو ناوي يسوي ويا دارين وشنو غايته من الفصل
بعد ما حسيتها هدئت واستأذنت منها ورجعت على بيتي وطالما اني حياتي مليانه مفاجأت عرفت أثناء ما اني متواجده يم ام كرار مشرفنه بزيارته استاذ عمار بزياره غير متوقعه ولكون امي بدت تتحسن لهذا لسانه شوية ثگيل لهذا تحتاج وقت يلا افهم على حچيها والعرفته من امي انه عمار جاي يتفق ويايه حتى نوصل لحل يرضي ويرضيني
تعجبت شجاب عمار وقبلها بفتره هم أجى ماهر بقى بنفسي اريد أعرف هذوله متفقين لو واحد ما يدري بالثاني بقيت افكار تاخذني وتجيبني مره على عمار وماهر ومره على دارين إلي مستحيل اعوفها بيد فرقد مر ذاك اليوم ويوم ثاني واي خبر من عمار ماكو
وبيوم الثالث ندگت الباب بالليل من طلعت وفتحت الباب والله ظليت متفاجئه من الي شفتهم گدامي چانوا ساره وعمار
گتلهم - ليش أجيتوا المفروض أني أزوركم واجيب ويايه هدية هذا واجبي تجاه أبو أبني ومرة ابو
گالت ساره -احنه نريد نحچي وياچ شلون راح نظل واكفين بالباب
گتلها -ما دخلون تريدون تحچون احچوا هنا لان ما أثق بيكم
گال عمار - انتي مو مال احترام
دفع الباب ودخل وصاح على ساره تدخل
دخلوا ورا الباب واني واگفه مقابيلهم
گال عمار-شوفي يارين خلي نتفق احسن انتي وين تريدين توصلين بالقضيه ترى ما تحصلين شي فكري بعقلچ
گتله -اي استاذ عمار وشنو الحل برأيك
گالت ساره - احسن حل اخذي علاجات مال اسقاط
گتلها -دكتوره ساره وشلون اخذ مال اسقاط واني نهاية شهر السادس
گالت -اذا الطفل چبير يقتله للطفل وهمه بالمستشفى ينزلوا الچ وتخلصين ويعني حتى اذا جبتي وين تودي
رجع عمار كمل وراها گال -شوفي يارين مال اعترف بي بالمحكمه مستحيل روحي يا بنت الناس تخلصي منه والله احسلچ ولا تصورين المحكمه راح تگدر تحميچ مني إذا اريد اسوي بيچ شي والله لو جيش يحموچ ماكو واحد يخلصچ مني روحي نزلي وانطيچ مبلغ محترم تعيشين بي انتي وامچ وجهالچ احسن ما تخلفين طفل يزيد همچ
بصراحه ما أنكر الخوف الي سيطر عليه من التهديد بس تظاهرت بالقوه وگتله -والله انت وزجتك تضحكون واحد يرفع واحد يكبس والله شيطلع بيديكم لا تقصرون بي
گال -يعني إلي أفهمه انه انتي رفضتي العرض
گتله- والله انت فهمك على گدك راح احچي بالقلم العريض اي رفضته واني ادري بيك خايف من المحكمه بس والله الا اجيبك للمحكمة وتتعاقب على كل جرائمك
ضحك وگال - اذكري يارين اخليچ تبچين بدل الدمع دم وعد رجال
وعافوني وراحوا
دخلت للبيت والأفكار تاخذني وتجيبني بس اني بقيت اقوي نفسي بس بقى الخوف مسيطر عليه بعدين دفعت ثمن رفضي غالي
خلص ذاك يوم حاله حال اي يوم كئيب من حياتي ومر اكثر من يومين واني بين البيت وبين الجهال وأمي للظهر دى نتغدى ندكت الباب طلع ابني فتح الباب ودخل يركض
يگول -هاي خاله ام كرار اجتي
دخلت ويا گعدت شربت مي وگالت -چنت البارحه يم اهلي ودخلت لشارعهم لو الأمة مگلوبه سيارات وزلم تارسه الشارع
گتلها -ليش شكو شنو اخوچ راح يسوي جيش يحرر بي فلسطين
گالت -لا لچ بس الشيخ جايب ويا هوايه زلم حتى بس فرقد يرضى يطلع أبنه من السجن
گتلها - والله اني لو بمكان الشيخ اخلي ابني ينسجن ولا أتوسل بفرقد بس هي الدنيا تمشي بالمگلوب فرقد صار صاحب حق والناس والشيوخ تتوسل بي حتى يرضى حمد لله على نعمة العقل
گالت - ولچ هو فرقد شوية حتى انتي تحچين عليه
عذريتي مقابل برائتي بقلم الكاتبة الزهيرية الزهيرية
بعدها راحت ام كرار بس حسيتها ضاجت لكون حچيت على فرقد
گلت بگلبي هسه اني شكو حچيت على فرقد هسه لو سألتها على دارين احسن ألي يلا باچر أروح اسأل ام كرار بعدها خلص يومي
بس امي لسانها لكون ثگيل بصعوبه يلا افهم عليها بحيث اكثر المرات تگوم تعيط ودگ على راسها لكون ما افهم عليها
لهذا لليل يلا فهمت شبيها من دموعها نزلت وبصعوبة تحچي
وتگول - وين دارين
گتلها - انتي أمها ادعيلها اكثر شي تحتاجه دارين هو الدعاء
ظلت تهز براسها وتبچي بس اني هدئتها انه دارين بصحة وخير وانه راح تجي زورنا عن قريب خلص اليوم وأني الصفحه الي حچيت بيها ويا دارين ماكو انغلقت أتصل وماكو يعني ما بقى بس الله وفرقد الي يعرف اخبار دارين وما معقوله اسأل فرقد إلا واني مخبله يلا أروح أسأل على دارين يمه
على ثاني يوم رحت على ام كرار بس وجهه ثگيل سلمت عليها وگعدت سألتها- شبيچ ام كرار شو اليوم مو على بعضچ واحسچ ضايجه مني
گالت -شوفي يارين اني احبچ انتي ودارين مثل أخواتي الله شاهد عليه بس انتي دائمآ تنسين أنه فرقد اخوية فرجائآ لا تحچين عليه گدامي
گتلها - والله موقصدي بس كل ما أذكر شلون چان يعامل دارين أنسى إنتي أخته واظل احچي
گالت -شوفي يارين ترى فرقد ما اصرف ويا دارين بهاي الطريقة الا من ورا لسانها وتصرفاتها والا وربچ ترى هو يحبها ويعبدها عبادة بس هي ما عرفت تستغله لصالحها گاضيتها كله لسانها اطول منها ومع هذا والله چنت اني ما عايفتها
گتلها -اعذريني والله ما قصدي بس فدوه اجيت اسالچ سألتي فرقد على دارين والله گلبي مثل النار عليها
گالت -والله سألت فرقد عليها
يگول فرقد -هي مخابرته وتتوسل بي يعوف ابن الشيخ بس هو ما قابل ومن اجوي يعقدون ويا صلح هو شرطه الا فصل ويفصل الشيخ شلون ما مبلغه انه دارين يمه والاعتداء الي صار عليه من ابن الشيخ
گتلها -فدوه ام كرار شلون دارين ترجع يمه وهو يشك بيها
گالت -والله سألته نفس سؤالچ بس هو
يگول -اي شي يصير بيني وبينها ما اريد اي شخص يدخل
گتلها -ما سوينه شي راح ترجع تحت رحمة فرقد يعني ترجع حليمه لعادتها القديمه
عذريتي مقابل برائتي بقلم الكاتبة الزهيرية الزهيرية
رجعت لبيتي واني همي أعلى من راسي شلون ياربي احير بروحي أحير بدارين والمن انطي وجهي واني وحدي هو عمار نقيب ما أگدر عليه أنوب فرقد عقيد والله اني گد ما دارين تخاف منه اني هم گمت اخاف منه مرت ايام بحدود أسبوع وصارت الگعده مال فرقد لان قبل الگعده بيوم اجتي عليه ام كرار وبلغتني انه باچر الفصل
وگالتلي ام كرار -انه البيت راح يصير هوسه وهي راح تروح يمهم
وبالفعل راحت ام كرار وجان يوم جمعة اني يوم السبت رحتلها
وسألتها - شلونها الگعده مال الفصل
گالت ام كرار - والله شگلچ يگول ابو كرار فرقد ما انطاهم مجال ركبهم الغلط من راسهم لرجلهم
گتلها -وشلون ركبهم الغلط
گالت - حاسبهم حتى على كلام ابنهم وفصلهم مرتين مره على ما مبلغي دارين يمهم ومره على محاولة قتله من ابن الشيخ وشرط عليهم رد اعتبار يدفعون 250 مليون بس الناس الخيره مدخله ومسوين الفصل 150 مليون يندفعن لفرقد وترجع مرته بعد ما حلفهم گدام الكل هي من يا يوم هي عدهم والشيخ وابنه سيف حالفين بكلام الله يايوم اجتي هذا اليوم نفسه الي طالعه بي دارين من بيت فرقد حتى بيش ساعه وأصله إلهم هم محلفهم عليها وشرط عليهم ترجع بنفس الملابس الي طلعت بيهن ومن طلب منه الشيخ يجي ياخذها گايل الهم مثل ما طلعت وحدها ترجع وحدها
گتلها -يعني دارين راح ترجع على بيت فرقد
گالت -اعتيادي غير زوجها ويسلموها اله
گتلها -وترجع على نفس الوضع والمشاكل
گالت - لا تخافين اني بيوم الي تجي اكون بيت أهلي وما اخلي فرقد يأذيها
عذريتي مقابل برائتي بقلم الكاتبة الزهيرية الزهيرية
مر يومي بتوتر اريد اعرف يا يوم تجي بي دارين لبغداد لأن اريد اشوفها قبل ما تدخل لبيت فرقد
بس يا ربي ألمن أسأل حتى ام كرار ما تعرف شوكت تجي
مر يومين وباليوم الثالث من الصبح اجتي ام كرار وخطيه بنفس اليوم عدها جلسه مال كيمياوي
گالت -يارين اجيت أبلغچ اليوم يجيبون دارين لبيت فرقد
والله انصعقت لهذا الخبر
گتلها -منو گلچ
گالت -امي كالت متصلين على فرقد ومبلغي من البارحه انه اليوم يجيبون دارين
گتلها -يعني بيش ساعه توصل
گالت -هي وحدود الساعه الواحدة الظهر
گتلها -ام كرار وانتي ما تروحين شوفيها اخاف فرقد يضربها والله مريضه
گالت -والله اليوم عندي جلسة ان شاء الله بس تخلص الجلسة أروح على بيت أهلي
وخطيه هي راحت وبقيت اني خلصت البيت تنظيف وطبخ وحتى غديتهم من وكت حتى ما بلغت امي برجعت دارين بدلت ملابسي
وگتلها - راح اروح على بيت ام كرار لأن اليوم جلستها
طلعت وخذت تكسي ورحت على بيت فرقد وصلت ظليت متردده ادگ الباب لو لا بس شجعت نفسي وگلت وعليمن خايفه اختي عدهم وأريد أشوفها دگيت الباب وطلعت اخته ظلت تباوع عليه وتهز بيدها
سلمت عليها ما جاوبت
گتلها - أريد اشوف دارين
گالت -بعدها ما اجتي وياريت إذا شريفه ما توصل لبيتنه
بعدني اريد اجاوبها سدت الباب بوجهي ودخلت
گلت -بگلبي الله يساعدچ دارين شلون چنتي عايشه وياهن لا والمصيبه شلون راح ترجع وياهن الچ الله يساعدچ ظليت مثل بلاع الموس لا أگدر اطلعه ولا أگدر ابلعه لا أگدر ارجع للبيت ولا أگدر أبقى واكفه بابهم بس الجو حار بداية شهر آب ابتعدت من بابهم البيت الي مقابيلهم عدهم شجره رحت وگفت جوه الشجره مر وقت وگفت سياره بيضاء عاليه حديثه ونزلت منها الباحثه ودارين وياها وحده چبيره بالعمر وياهن ولد شاب بقى گاعد بالسياره ما نزل اني اول ما شفت دارين رحت ركض عليها وهي هم فتحت حضنها اليه وحده حضنت الثانيه بقوه وظلينه نبچي واني أمسح بدموعها
گتلها -دارين عوفي فرقد وتعالي ويايه وطلگي منه واخذي جهالچ
وقبل ما جاوبني دارين جاوبتني العجوز
وگالت -عيني احنه ما اجينه نسلمها الچ نسلمها لزوجها وبعدين انتي صيري سباعيه واخذيها منه احنه هنا عبد المأمور ونفذ الإتفاق
گتلها -خاله والله يموتها انتي صيري محضر خير
گالت - يع اني كل الخير اجى ويايه حتى من اجيت للدنيا العراق جان مملكه صار جمهورية اكو اكثر من هيچي خير
جوابها الولد الي گاعد بالسياره
گاللها - والله رازقيه انتي هسه من الآثار حتى جنسيتچ خشب
وگالت رازقيه -اسكت انت تمام
وعافتنه وراحت دگت الباب سمعنه صوت وحده الله يستر عليها الي قبل شويه طلعت إلي وهي تگول انتظروا جايه
گالت دارين - هاي قمر اخت فرقد
گتلها -هو فرقد شلونه دى أخته
فتحت الباب وشافتنه گالت - چانت عايزه والتمت
گالتها رازقيه - انتي صدگ ما عندچ أدب جايين من طريق طويل گولي آهلًا تفضلوا
گالت قمر - كورونا ما نستقبل احد وحتى هي اخابر اخويه وأبلغه زوجته المصونه رجعت
وموبايلها بيدها خابرت على فرقد حچت ويا وگالت راح أفتح مايك وانت احچي
وبالفعل فتحت المايك گال فرقد - قمر تدخل تبقى ورا الباب الى ان أجي اني مفهوم
وغلق الموبايل
گالت قمر - سمعتوا يلا دخلي دارين خاتون
هنا تخبلنه كلنه الدنيا حاره وهي مريضه
گتلها -دارين عوفي هو يريدچ يجي عليچ
گالت دارين - اني راح اتحمل كل شي لخاطر أطفالي
دخلت دارين وقمر سدت الباب بوجوهنه بس اني ما سكتت ظليت ادگ بالباب ورجعت قمر فتحت الباب وهي
تگول - وجع امي مريضه تريدين اخذي اختچ وخلصينه
ورازقيه تگول - يع مسميچ قمر والله هذا الاسم هوايه عليچ المفروض يسموچ قهر مو قمر
وهي تجاوب رازقيه - تگلها يلا اخذي هاي وياچ عليه وفارگونه
جاوبتها رازقيه -الله يساعدچ مصارين على هاي البلوه
وراحت الباحثه ورازقيه صعدوا بالسياره ورازقيه
گالت الي - تعالي ما يفيد الحچي وياهن اصعدي نوصلچ لبيتكم حتى نشوف زوجها شيسوي وياها
صعدت وياهم واني بالطريق اتصل على ام كرار بس ما أجاوب
وصلوني لبيتي وهمه راحوا
دارين - بعد ما دخلت اذا اگول اني ما خايفه اچذب على روحي والله بدون مبالغه احس گلبي راح يطلع من صدري ورجلي يرجفن من الخوف وشلون راح أواجه فرقد وقمر واگفه گدامي ونظرة الكراهيه بعينها ولو بدها تشرب من دمي
گالت -اي ست دارين رجعتي ولا هلا بيچ هااا عافچ طارق بعد ما شبع منچ
گتلها - بس اريد اعرف انتن تچذبن الچذبه وصدگنها اني من طلعت من البيت مو چنت وحدي وين بعد اشوف طارق خافن ربچن ترى الله گاعد على حق مو باطل
گالت - هذا الحچي قنعي بي روحچ
وعافتني ودخلت للبيت واني بقيت بالگراج والدنيا حاره تسمط وين اروح ما أعرف ورحت دى أغسل من بوري وهو صاير قريب على شباك الاستقبال نرفعت الستاره وشفت العدوه الأولى حياة ظلت تباوع عليه ونظرة شماته بعينها دنگت على البوري دى افتحه وطفى
الماطور من فتحته ماكو مي لان من ماكو ماطور مي ماكو گعدت قريب الحايط لان الوجع بخاصرتي صار ما ينحمل بس أكيد وجع روحي أكبر
واني صافنه سمعت صوت أبني يبچي ويصرخ ظليت ادگ بالشباك وصيح على قمر
وأگول الها - ولچ قمر انطيني أبني وحق الله هسه اعيط وألم الجوارين عليچ
وهي فتحت الشباك وشوفتني أبني وضربته على قوي على وجهه لو شاغت روحي
من حرگت گلبي گتلها - حقچ ما تعرفين شنو يعني أمومه لان الله خلاچ عاگر وتاليها حتى زوجچ عافچ هاي عدالة رب العالمين حتى يشوفچ إلي زرعتي هسه حصدتي
وهي تخبلت واسمع عمتي تگللها - ولج قمر كافي ارحموا من في الأرض يرحمكم من في السماء ولچ خطيه هذا الطفل شنو ذنبه تضربين بي ذيچ امه وروحي موتيها هذا شعليه
صحت -عمه اروحلچ فدوه لا تخلين قمر تأذي بروقي
وظلت قمر تغلط عليه وعمتي تريد بس سكتها واني صحت على عمتي گتلها. -عمه فدوه والله عطشانه اريد بس اشرب مي
جاوبت قمر - ننطيچ سم والله الي ينطيها مي هسه احرگ البيت بيكم كلكم
عمتي گالت -الچ الله يمه وگعتي بيد الي ما يرحم وهسه بعد شويه يجي ذاك المخبل شيخلصچ منه
ظليت گاعده وأفكر شلون ياربي دخلت عرين الأسد برجلي شلون راح أواجهه فرقد اني إسمه يرعبني أنوب أصيرگدامه ألا ما رايده روحي ساعه أگول أتوسل بي يعوفني وساعه أقوي نفسي واگول اني من شنو خايفه اني ما عندي شي وبقيت الشمس تصگع بيه وتفكير أكل راسي ما اعرف شگد مر وقت ما حسيت الا الباب الرئيسي أنفتح وصار گدامي فرقد والله لو ملك الموت ماخذ روحي ولاشفت فرقد
وهو شافني عگد حواجبه وفتح الباب ورجع دخل سيارته وسد الباب وأجى عليه بس بعد ماكو مهرب وين أروح ونطبق عليه المثل إلي يگول اجاك الموت يا تارك الصلاة يعني العدو امامكم والبحر خلفكم وين أريد اروح يعني
وصل يمي وهويگول -هااا شفتي شگد تروحين وتنهزمين ترجعين على سجن فرقد لان انتي (سجينة فرقد )
گتله- والله فرقد
بعدني ما مكمله جملتي ضربني على حلگي بظهر أيده وهو لابس محبس حتى شفتي نجرحت من محبسه
وهو يگول - لا ذكرين اسمي على لسانچ اكره اسمع اسمي بصوتچ
گتله - فدوه فرقد اريد أشوف ولدي وشتريد سوي بيه
گال -لو تموتين آي ولد ما عندچ يمي فهمتي انتي حيوانه وراح ارجعچ لسجنچ
جرني من أيدي لناحية بيت سنان ومنتهى گلت شنو راح يعاقبني ويخليني أعيش ويا المسمومه منتهى
گتله - لو تموت ما اعيش ويا منتهى حتى تجي يمها گدام عيني وتحرگ گلبي
گال -اخر همي انتي ليش هو اني اريد اشوف خلقتچ حتى احرگ گلبچ
گتله -فرقد أبوس أيدك عوفني والله بعد ما أتحمل
گال - تحلمين والله ألا اشوفچ نجوم الظهر واخليچ تتمنين الموت وما تلگي
وصلني يم باب الصاله مال بيت سنان وطلع كومة مفاتيح وطلع مفتاح الباب وفتح باب ودفعني ودخلني بس تفاجأت ما شفت منتهى والبيت فارغ حتى أثاث مابي
بصراحه الحر ويا العطش ويا الخوف گامت تجيني تخيلات عجيبه غريبه گلت بنفسي هسه أكيد فرقد يقتلني ويدفني هنا وماكو احد يدري بيه بس ارجف والوجع رجع بخاصرتي
گتله - فرقد الله يخليك والله خاصرتي توجعني جيبلي علاج
گال - لو تموتين اني اجيبلچ علاج ألا اخليچ تموتين گدامي وهسه يلا نصفي الحساب الي بينه
يحچي ويتقدم عليه والله ما ابالغ اذا اگول روحي وصلت لحنجرتي رجعت ولزگت ويا الحايط
گتله -يا حساب
گال - شوفي راح اسألچ بس أي سؤال أسأله اجاوبين عليه والا قسم بالله اخليچ تتمنين الموت وما تلگي
عذريتي مقابل برائتي بقلم الكاتبة الزهيرية الزهيرية
گتله - والله الوجع الي عندي بعد ما أتحمله
ضربني على حلگي وگال - اعتبريني طارق لو تمام إلي نايمه بحضنه صار 6اشهر وألي چان راح يموتني حتى تبقين يمه لو نشاطچ القديم ألي حنيتي اله وهذا نضاف لقائمتچ لأن الشيخ انطاني تليفونچ
وما شاء الله لگيت واحد جديد مكنكه ويا بس گليلي شنو ما شبعين من الزلم انتي لازم من حضن لحضن بنت الگوا ....
وبدا يضرب على وجهي وعلى راسي وخنگي حسيت روحي راح تطلع بيده واني صار ايام علاج لخاصرتي ما ماخذه گمت اعيط وابچي وأگله - الله يخليك بس اريد علاج والله راح أموت
بس هو ما أهتم دفعني وطلع بس سمعت صوت المفتاح من قفل الباب
وعافني ما أدري أدعي على نفسي ما أدري أدعي عليه ومنا العطش والجوع موتني شفت البيت فارغ كل شي مابي اگول ياربي هاي المسمومه منتهى وين ولت شو بيتها فارغ گلت بلكت الله وطردها
وجع خاصرتي يروح ويرجع ما اعرف شگد مر وقت ساعتها زاد وجع خاصرتي گمت أعيط بخبال سمعت باب يندگ وصوت
ام كرار تگول - دارين افتحي الباب لچ شبيچ
گتلها - ام كرار الله يخليچ اريد علاج والله راح اموت من خاصرتي وفرقد حابسني هنا الله عليچ والله عطشانه اريد مي
بعد ما سمعت صوت ام كرار بس سمعت صوت فرقد وهو يصيح بأم كرار ويگول - ولا واحد يتقرب عليها والله احرگ البيت بيها الي يوصل يمها
وام كرار جاوبه - الله واكبر عليك حرام عليك حابس هاي البنيه ودگ عليها وما تريدها تنهزم منك البنيه عطشانه والوجع ياكل بجسمها سويها لله وانطيها مي وجيب علاج ألها أعتبرها صدقة عن راس جهالك
وهو يجاوبها - لو تموت گدامي ما اجيب اي شي ألها
وبدا الصياح بين أم كرار وفرقد وسمعت صوت عمتي وهي
تگله - والله يا فرقد اذا ما فتحت الباب لدارين هسه احرگ نفسي وخطيتي برگبتك ولك وتالي وياك البنيه راح تموت وتدخل بخطيتها
وهو يجاوبها -اني اريدها تموت ولا واحد يتدخل
وعمتي بعد ما سمعت صوتها بس سمعت من ام كرار گامت تعيط
ما مر وقت طويل حتى سمعت المفتاح الباب وهو يفتح الباب ودخل فرقد اني
گتله - الله يوفقك والله خاصرتي راح اموت حتى اكل ومي ما أريد بس علاج
وهو أجى يعصر بفكي
ويگلي -أشششش صوتچ القبيح ما أريد أسمعه
دخلت ورا ام كرار واجتي سحبته مني وهي
تگله - بس گلي انت ما تمل عوفها
وهويگلها - والله لو أشرب من دمها هم ما يهدالي بال
اجتي عليه ام كرار بوستني گالت - انتي شنو تاخذين علاج
گتلها - والله ما أعرف أسمه لإن تمام أبن الشيخ هو چان يجيبه إلي دكتور وصفه إلي من جان يوديني
عذريتي مقابل برائتي بقلم الكاتبة الزهيرية الزهيرية
اني گلت هيچي لو الله بلاني گبل هجم عليه فرقد وهو
يگول - إي بنت الگوا..... وين چان يوديچ وشسويتي ويا چان ينام وياچ
ورجع ضربني على راسي وخنگني ورجعت ام كرار أجر بي وبعدته عني وهي تگله - عيب عليك ترى أنت ما تستحي
وهو اجي يجر بيه من أيدي وهو
يگول - اريد أخذها للمختبر أحللها خاف حامل
جرتني منه ام كرار وهي تگله- يمعود بس أطلع أريد اشوف دارين شبيها
بس هو رفض لا يطلع ويعوفنه وحدنه ولا يوديني للدكتور
گالتله ام كرار- انطيني رقم الشيخ أني احچي ويا حتى بس ينطوني أسم العلاج
بس هو صفن اني أخاف من يصفن لان يطلع بأفكار شيطانيه بعدين
گال - لا عليمن دارين تحچي ويا تمام وتگله ينطيها أسم العلاج
گتله - بس اني ما أعرف رقم تمام
گال - لا تخافين اني موجود يمي الرقم
بقيت متفاجئه هذا منين جاب رقم تمام وبنفس الوقت خايفه ما أريد احچي ويا تمام لان اعرف من احچي ويا شراح يگول
والله شگد جانت خاصرتي توجعني بس من طلع موبايله فرقد وطلع رقم تمام الخوف تملكني وما أبالغ اذا أگول الآية ألي تگول وبلغت القلوب الحناجر تنطبق عليه حتى رجلي يرجفن وحتى أحس الوجع الي بخاصرتي يخاف من فرقد وراح أختفى الوجع
گال - ام كرار موبايلچ حتى تتصل دارين على تمام من موبايلچ
گتله - ما اريد علاج طبت لا تتصلون عليه
وهو ظل يباوع عليه بنظرة شك بس
گال - لا شنو أخليچ تموتين لا والله الا تاخذين العلاج مال تمام لأن يشفي بسرعه ما شاء الله حتى اسمه يشفي هسه بس سمعتي اسمه شفيتي
ظليت ساكته ما جاوبته وهو اخذ موبايل ام كرار وكتب رقم تمام وأتصل بس فتح مايك واجى أتقرب عليه وخله الموبايل قريب على وجهي وتمام فتح الإتصال وجاوب
گال - نعم
اشارلي فرقد بمعنى احچي گتله -السلام عليكم
گال تمام - دارين شلونچ گليلي أذاچ هذا العار عوفي وطلگي منه تريدين ارجع عليچ هسه اني بعدني بالطريق راجع للناصريه
بعدني ما حچيت شي ضربني على وجهي فرقد بظهر ايده
والله حسيت عيوني راح تعمى من قوة الضربه
جاوبه فرقد - لك عار أبن العار مو جبت عشيرتك كلها تبوس قنادرحتى بس اتنازل عنك بس أني أعلمك وشوفك فرقد منو
وغلق الموبايل بوجهه تمام وشمر الموبايل على ام كرار ورجع عليه
وبده يضرب على وجهي وعلى راسي من وجع خاصرتي وضرب فرقد گعدت بالگاع گمت ما احس بشي
وهو يگول - ما شاء الله حافظ صوتچ بنت الگوا.... شعندچ ويا احچي ولچ والله اليوم إلا اموتچ چان ينام وياچ لچ احچي لا تخبليني لأن راح أجرم بيچ
جرته ام كرار مني وهي تگول - يمعود راح تموت بيدك
وهويگلها -والله الا اطلع حليب امها من خشمها
وهذا چان آخري ويا وجع خاصرتي گمت أعيط وحتى طلعت ارگض من بيت سنان للحديقه والله آلم الخاصره الله لا يشوفه لأحد گعدت بالحديقه واني راسي بين رجلي من الوجع وهو ما قبل ياخذني للدكتور وچان يصيح الله أكبر آذان المغرب رفعت راسي للسما گتله - ربي أخذني يمك انت ارحم بيه من كل بشر
خطيه ام كرار ما سكتت هاي الانسانه الي شما أوصف حنيتها قليله بحقها كافي وكفت بوجهه فرقد على مودي خابرت على ابو كرار وطلبت منه يجي ياخذني
بس فرقد ما قبل وگال - هسه اني اوديها بلكت مناك وانحرها للنجف
راح جاب سويچ سيارته راح صعد بالسياره واني ام كرار لازمتني من أيدي وهم نفس الوضع السياره عاليه وفرقد من شافني ما أگدر أصعد نزل وأجى دفعني دفعه من قوتها الله شاهد وگعت وحافة الكشن مال السياره صار بخاصرتي صار الوجع اقوى عطت
وهو صاح بيه گال - مرض صوتچ لا يعلى لا وشلون صوت مال گحا...
جاوبته أم كرار - الله وأكبر يمعود ارحم بهاي المسكينه حتى الله يرحمنه من هيچي الله ما راحمنه من عمايل ايدينه
وهو من حچت ام كرار سكت وظل يهز براسه بس يباوع عليه بالمرايه ونظرات الكره بعيونه واني من وجع خاصرتي احس جسمي خدر لما وصلنه لمستشفى أهليه نزلتني ام كرار وهو دخل ويانه دخلت يم دكتور هم شرحتله الوضع مالتي
وهم نفس الوضع تحاليل وسونار بس
گال الدكتور - راح انطيچ علاج اذا شفتي عليه تحسن كان بها ما شفتي عليه تحسن احولچ على دكتور بالحارثيه هو برفسور وشوفي شيگلچ
عذريتي مقابل برائتي بقلم الكاتبة الزهيرية الزهيرية
جاوبه فرقد - بلا زحمه احنه ليش جايين عليك غير انت دكتور شنو احولكم على دكتور لعد حضرتك شتشتغل
جاوبه - اخويه اني دكتور صح بس ذاك بوفسور يعني حتى مستشفيات بالخارج يتعامل وياها لهذا هو انسب مني
گاله فرقد- أنسب منك شنو دى انطيكم مره
رجع نتر بينه گال - يلا امشوا
بس قبل ما نطلع دكتور گال - اخويه بلا زحمه لازم تتحول على الطوارئ حتى يعلگون الها مغذي وبي هاي الأبره
وام كرار اخذت منه الوصفه ورجعنه رحنه للطواورئ علگولي المغذي بين ماهي جابت الابره ضربتها الممرضه بالمغذي قبل ما يخلص المغذي سكن الآلم العندي خلص المغذي اجتي ام كرار گومتني وتمشي بيه من طلعنه وهي
تگلي - أدعيلي الله يشفيني دارين
بعدني ما مجاوبتها اجاني صوت فرقد وهو
يگول لأم كرار - والله لو اني منچ أطلب من بنت ملهى تدعيلي ولا هاي ليش شايفتها خطيه تلزم السجاده وكل مية ركعه تركع وما تعوف السجاده الا وهي خيوط اسكتي رحمه لدينچ
گالت - المريض رب العالمين يسمع من لكون يتآلم
چان يگول فرقد -بهاي حقچ الله يسمع ويشوف واحنه هم نشوف
ويأشر بيده
أنتبهت وين يأشر فرقد شفت شخص ما كان ممكن اتوقع هذا الشخص اشوفه بهذا المكان
ملاحظه
أخواتي وعزيزاتي اطلب منچن اي تجاوز راح يصير. بالتعليقات راح أحذف التعليق وتنحظر صاحبة التعليق
واشكركم على تعليقاتكم الحلوه
تصويتكم يسعدني