نجوم :يحيى هو انت مش حاسس انك عايز تقولى حاجة
يحيى :حاجة زى ايه
نجوم :اى حاجة يعنى احنا خارجين ولوحدنا وبنتمشى فالجو ده مش جاى معاك بحاجة
يحيى :جاى معايا بجوع كفاية مشى وتعالى اعزمك على الغدا
بيتزا ولا شاورما ولا تيجى نروح ناكل سمك
نجوم :اى حاجة اللى تحبه انا معاك فيه
يحيى :يبقى بينا على حضرموت نضرب وجبة فراخ وعهد الله جوعت اكتر وانا بتكلم عن الطلب المهم ان...
نجوم قاطعته :انت المهم...انت المهم يعنى بتحب الفراخ المشوية صح
يحيى :اه جدا ممكن اكلها كل يوم ومش هزهق يلا بينا لحسن جوعت اوى بجد
نجوم :تمام يلا بينا
شيريهان بحماس :ها قوليلى عملتو ايه النهاردة واتكلمتو فى ايه قالك كلام حلو صح...اكيد قالك شكلك واكلة فراشات
نجوم :لا واكلة فراخ شواية
يحيى مش بيأكلنى فراشات يحيى بيطفحهالى انا بطفح فراشات
شيريهان :متقوليش مقالكيش حاجة خالص معقول
نجوم :عارفة اوقات كتير بسأل نفسى هو خطبنى ليه
انا وافقت عليه علشان بحبه
هو بقى اتقدملى ليه
شيريهان :يمكن حاسس انك بتحبيه
نجوم :حاسس لا انتى كده متعرفيش يحيى
يحيى مستحيل يحس بحاجة مقولتهالوش واضحة وصريحة
تصدقى حاسة انى حتى لو قولتها مش هيعتمدها لازم ابعتله بيها ايميل
شيريهان :ولما هو كده بتحبيه ليه
نجوم :علشان الحب مش اختيار يا شيرا
كمان انا مش زعلانة انى بحبه بالعكس انا مبسوطة انى بحبه
انا بس نفسى يحبنى علشان اعرف اعبرله عن حبى
شيريهان : هو مش ladies first ولا ايه
نجوم :الستات الأول فى اى حاجة الا حتة الاعتراف بالحب دى الرجال اولا واخيرا وقبل كل شئ وكل شخص
شيريهان :انتى تقليدية فى تفكيرك
نجوم :فى حاجات الحداثة فيها بتضر مبتنفعش
وبعدين مين فات قديمه تاه
شيريهان :يعنى هتفضلى مستنياه يعبرلك عن حبه الأول
نجوم :ايوه
شيريهان :مش قصدى اضايقك بس لو مثلا عمره ما عبرلك عن حبه
نجوم :يبقى عمرى ما هعبرله عن حبى
شيريهان :بالبساطة دى
نجوم :لا بالصعوبة دى بس ده الصح
اعترافى بحبه الأول وانا مش متأكدة مليون فى المية انه بيحبنى ومنا عينه يسمعها منى
تنازل كبير اوى يا شيريهان تنازل كبير انا مقدرش اعمله ومينفعش اعمله
شيريهان :مينفعش تعمليه وانتى مقتنعة انه غلط فعلا
طيب هتعملى ايه
نجوم :مش عارفة ادينا زى ما احنا مخطوبين عادى مش عارفة احنا اصحاب ولا احنا وضعنا ايه واديه بيطفحنى فراشات وخلاص
بعد اسبوع
يحيى :بس انا مش فاهم ليه اهلك سموكى نجوم ليه مش نجمة
نجوم :ماما بتحب السما بالليل اوى كان نفسها تكون رائدة فضاء ولا على الاقل يكون عندها تليسكوب تراقب منه الكواكب والنجوم
لما خلفت ليل اخويا سمته ليل لانها بتحب الليل جدا وبعده سمت سماء اختى وبعدها قمر اختى
يحيى :واخيرا انتى سمتك نجوم
نجوم :لا بابا اللى سمانى قالها سمينا ليل وسماء وقمر مش فاضل غير نجوم السماء فبابا قرر يسمينى نجوم وماما عجبها الاسم بس كده
يحيى :هو اسم غريب بس حلو ومختلف انا عمرى ما سمعته قبل ما اعرفك اول حاجة جذبت انتباهى ليكى هى اسمك المهم...
نجوم :انت المهم...انت المهم مين اللى سماك مقولتليش باباك ولا مامتك
يحيى :جدى اللى سمانى يحيى على اسم ابوه يعنى انا متسمى على اسم جد ابويا
نجوم :حظك حلو ان اسم جد باباك حلو
يحيى :عاجبك اسمى
نجوم :بحبه
يحيى :هو ايه ده
نجوم :اسمك يا يحيى
