اية : انا مش مرتاحة يا كاريمان مش مبسوطة هيثم كويس بس يعنى...رومانسى زيادة بصراحة حالم جدا بحس انه مش عايش معانا علي ارض الواقع مش طموح مبيفكرش في المستقبل
كاريمان : سيبيه
اية :مش حسا ان دى اسباب كفاية علشان اسيبه
كاريمان :وهو يعنى لازم يوقع من جيبه ورقة جواز عرفى علشان تكتشفي ان اخلاقه مش كويسة وتسيبيه
انك مش مبسوطة ومش مرتاحة مش سبب كفاية
انك من يوم ما اتخطبتم من تلت شهور وانتى كل ما اقعد معاكى تقعدى تشتكى من عيوبه وبعدين تتكلمى عن مميزاته علشان تصبري نفسك وتستحملي مش سبب كفاية
الجواز اساسه المودة والرحمة وانتى مفيش جواكى ليه مودة ولا افكارك دى عنه وعدم راحتك معاه هترحمه
مش لازم يكون شيطان يعنى ولا بتاع بنات ولا عاق باهله علشان تسيبيه
انك تكونى مش مرتاحة معاه ومش مقتنعة بيه ولا بشخصيته اسباب كفاية
وعادى هو ممكن يكون انسان كويس وانتى انسانة كويسة بس مع بعض انتو مش كويسين ومش لايقين علي بعض
اية :معاكى حق بس انا برضه لسه مش متاكدة ان صح انى اسيبه
كاريمان :استخيرى وفكرى تانى وخدى قرار
بس لازم تاخدى قرار
يتسيبيه وتدعيله ربنا يرزقه باللي تريحه وتكون مرتاحة معاه
يتفضلي معاه وتتقبليه بكل اللي فيه
مش كل اسبوع تكلمينى عن مميزاته وعيوبه كده وتنتقديه بدل ما هديكى قلم اوقعلك بيه صف سنانك انا زهقت
اية :زهقتى منى
كاريمان :لا زهقت من انك بتكلمينى في نفس الموضوع
انتى تستاهلي واحد تكونى مرتاحة معاه وفرحانة بيه يا اية
وهيثم نفسه يستاهل واحدة تكون شايفاه احسن واحد في الدنيا راضية بيه وقابلة بعيوبه
اية :معاكى حق...خلاص انا هستخير وهفكر تانى وباذن الله هاخد قرار
كاريمان :قومى اعمللنا كوبايتين نسكافية بقي بقالي ساعة قاعدة معاكى مشربتنيش بوء مياه يا معفنة
اية وهي بتضحك :البيت بيتك يا ماما يعنى تدخلي المطبخ تجيبي لنفسك اللي انتى عايزاه
كاريمان :واشوف اخوكى وهو بيتجول في بيتكم وهو لابس بنطلون برمودا مشجر لا يا ختى مش عايزة
اية وهى بتضحك :عمرو معندوش بناطيل برمودا مشجرا
كاريمان :مش مهم انا مش عايزة اشوفه كل مرة اشوفه بيبقي في موقف محرج وشكلي بيبقي مسخرة
اية وهى بتضحك :اه فاكرة لما كنتى بمناسبة عيد ميلادى عايزة تعمليلي مفاجاة وخلتينى اروح اعمل نسكافية وقعدتى انتى تعلقيلي بلالين ولزقتيلي علي دولابي ورق كتبالي فيه كلام حلو
كاريمان :اه ودخلت بلكونتك جبت الهدية والبالونات علشان انفخها لانى كنت حطاها في السبت ومدلدلاها من اوضتى لاوضتك وخلصت بسرعة قبل ما انتى تيجى ولقيت الباب بيتفتح رحت بكل سعادة وثقة في النفس فردا دراعاتى وانا بقول تتتاتتتااا مفاجاة
اية وهى بتضحك :وطلعت المفاجاة ان عمرو اللي فتح الباب مكنش يعرف انك جوا وكان عايزنى في حاجة
انا ساعتها ضحكت كتير اوى على شكلك كان مسخرة بجد والله كان احلي عيد ميلاد عدى عليا
كاريمان :ولا ساعة مكنت نازلة علي السلم واتكعبلت وقعت وهو شافنى
اية :ولا لما كنت بهزر معاكى ووقعت عليكى العصير وانتى كنت هتطلعى تغيرى هدومك ولسه بتفتحى باب شقتنا لقيتى عمرو في وشك
كاريمان :ولا ولا ولا...تاريخى مع اخوكى ما شاء الله مشرف المهم قومى اعمللنا نسكافية ولا اطلع اشربه في شقتنا
اية :تطلعى ده ايه لا انا هقوم اعمله اهو
