شخص بيحاول يساعد كل الناس
ومش بيعرف يقول لا ده انا
كتير جدا بحس انى لوحدى
وانى الاقى حد يفهمنى ده كل المنى
بحب كل حاجة تلمس قلبى
حتى لو مبدلتش حزنى بهنا
الوفاء هو صفتى المفضلة
وفى كل علاقاتى مفيش عنه غنى
بلف وادور فى متاهات التفكير
من قرن بحاله ويمكن بس من سنة
#فضفضة
قدرى وهو بيضحك :لا هو اكيد انك بتلفى وتدورى من سنة بس مينفعش من قرن علشان من قرن مكنش جدك اتجوز ستك اصلا
وبعدين مش هتبطلى تكتبى عن نفسك بقى مش كفاية غرور
جوهرة :لا ده مش غرور ده جنون عظمة عادى
وبعدين صفحتى ومسمياها فضفضة علشان افضفض فيها عن نفسى مش عاجبك الغى المتابعة وريحنى اقولك اعمل بلوك للصفحة وخلصنى
قدرى :لا هفضل بقرء فضفضاتك وبحفل عليكى بعد ما اقراهم انا كيفى كده
جوهرة :فضفضاتى
ده على اساس ان جمع فضفضة فضفضات
ده انت اللى نجحك فى العربى ظلمك وظلمنا
ولا انت ترجع تاخد املاء من الأول
قدرى :ولا فى واحدة محترمة تقول لخطيبها حبيبها ولا
جوهرة :مين قالك انى محترمة وانك خطيبى حبيبى
ده انا مخطوبالك شفقة اصلا
مين كان هيعبرك غيرى
قدرى :فشر ده انا كل البنات كانت هتموت عليا
طبعا شكل وهيئة وشخصية
انا اللى سيبتهم واختارتك
جوهرة :ما خلصنا يا عم براد بيت
شكل وهيئة وشخصية ايه انت مفكر نفسك ابو تريكة
قدرى :لا هو محدش زى الماجيكو
بس انا احسن من براد بيت
جوهرة :اه طبعا
وانا اجمل من جينيفر انيستون وجوليا روبرت يلا ما هى ظاطت بقى
فوق يا فنان انت اسمك قدرى
قدرى :وماله اسم قدرى اسم عظيم ومعناه كله فخامة
هل تعلمين يا خطيبتى العزيزة ان معنى اسم قدرى
هو القوى المقتدر ذو القدر والمقام الميسور ذو الغنى
جوهرة :وهل يا ترى اهلك سموك قدرى علشان معنى الإسم اللى كله فخامة ولا علشان ده اسم عمك
زى ما عمك سمه ابنه ايمن على اسم باباك
وعمالين يجاملو بعض بأسماء ولادهم
قدرى وهو بيضحك :لا سمونى على اسم عمى فعلا
بس ده ميمنعش ان فخامة الإسم تكفى
وبعدين ما انتى اسمك جوهرة على اسم ستك
جوهرة :انا معنديش جدة اسمها جوهرة جداتى الله يرحمهم واحدة كان اسمها يسرية والتانية ابتهاج
قدرى :ابتهاج ستك كان اسمها ابتهاج بجد
جوهرة :اه الله يرحمها كان اسمها ابتهاج
قدرى :اومال انتى اسمك جوهرة على اسم مين
جوهرة :مش على اسم حد
بابا لما اتولدت وشالنى وبص فى وشى لقى عيونى زرقا
قال يا ما شاء الله دى عينيها زرقا زى الجوهرة
فقرر يسمينى جوهرة
قدرى :نعم يا اختى انتى عينيكى بنى ولا عسلى باين انتى هتشتغلينى
جوهرة :لا هى كانت زرقا بس بعد شهرين للأسف قلبت ومفضليش غير الإسم وحكاويهم عن عيونى الزرقا اللى كانت زى القمر
قدرى :ويا ريتها ما قلبت ياه لو كانت فضلت عيونك زرقا كنتى هتبقى زى القمر بجد
جوهرة :ده على اساس انى دلوقتى زى الشمس ولا ايه
قدرى :لا زى القمر برضه بس كنتى هتبقى زى القمر بزيادة
يلا الحمد لله ادينى راضى بقضاء ربنا وقدره
جوهرة :ايه ده مالك بتتكلم بحسرة كده ليه كأنك خاطبنى بعيون زرقا وبعد الخطوبة قلبت عسلى
انت مشوفتش عيونى لما كانت زرقا انا نفسى مشوفتهمش
فعلى ايه الأفورة دى كلها ولا انت فرقالك الحكاية دى
قدرى :لا مش فرقالى لو فرقالى ما كنت خطبت واحدة عيونها زرقا
انا برخم عليكى بس كالعادة ومينفعش تزعلى على فكرة
جوهرة :ليه ان شاء الله
قدرى :علشان انتى كاتبة انك نفسى تلاقى حد يفهمك اومال انا ايه فى حياتك شاحن موبايل
جوهرة :لا والله مش كده
انا بتكلم عن حالة تانية انك تحس ان حد بيفهمك اكتر ما انت بتفهم نفسك
يفهمك فى الوقت اللى انت نفسك مبتكونش فاهم فيه نفسك حد يحبك اكتر من نفسه
قدرى :محدش هيفهمك اكتر من نفسك ولا حد هيحبك اكتر من نفسه ده كلام اغانى
جوهرة :ما هى الأغانى كلامها حلو
قدرى :حلو اه بس ملوش علاقة بالواقع
مبالغ فيه ومش حقيقى
جوهرة :يمكن
مش مهم قولى طيب عملت ايه النهاردة فى الشغل
قدرى :اشتغلت
جوهرة وهى بتضحك :الرد المختصر اللى يجيب شلل بتاع كل يوم
قدرى :ما هقولك ايه انا يومى عادى زيه زى كل يوم روحت الشغل اشتغلت وروحت من الشغل
جوهرة :ايوه فين بقى التفاصيل اللى بين روحت الشغل وروحت من الشغل
قدرى :لا ما هو مفيش تفاصيل انا اشتغلت بس كده
وخلينا نكمل كلام عن الأفورة اللى فى الأغانى
شوفى كده كام اغنية يتقال فيها بقالى ايام وشهور وساعات تلاقى المغنى بيعلى بسقف المبالغة ويقولك بقالى سنين فى بعده منمتش
سنين ايه اللى منمهاش الجاحد ازاى يعنى
ولا اللى يقولك هكونلها حبيب وزوج واب وابن واخ وعم وخال وعم محمد البواب
ايه ده ايه كل الافورة دى
هو لو عرف يكون زوج وحبيب كويس يبقى الحمد لله اتعشت على كده
مصيبة الأغانى والأفلام والحاجات دى انها بترفع سقف التوقعات عند الناس وبتعيشهم فى الخيال الساذج
ويجى الواقع يهد سقف التوقعات ده فوق دماغهم
جوهرة :مش للدرجة دى
قدرى :لا للدرجة دى واكتر
شوفى كده فى الأفلام البطلة بتكون طول الوقت حلوة ازاى حتى وهى لسه صاحية من النوم بتكون ولا اللى خارجة من كوافير والشاب من دول يتفرج عليها ويقولك بس انا لو متجوزتش واحدة بالجمال والحلاوة دى مش هتجوز
طيب كام اغنية كان المغنى بيوصف جمال حبيبته اللى ملوش زى وشعرها اللى معرفش ماله وعيونها اللى مفيش فى حلاوتها وخدودها وعودها ويقولك ميكفيش سنين علشان يوصف جمالها
ليه ان شاء الله متكفيش سنين علشان يوصف جمالها
وليه اصلا بيوصفلنا جمالها بيحليها فى عيونا يعنى ولا هو بيدورلها على عريس
جوهرة وهى بتضحك :فى دى معاك حق الوصف فى الأغانى والأفلام والروايات بيكون اوفر لا وخصوصا الروايات حاجة كده فى منتهى المبالغة والأفورة
وفعلا بتعلى سقف التوقعات عند الشباب والبنات
وللأسف بتخليهم سطحيين مركزين فى الشكل وبس
قدرى :اه الشاب من دول يبقى عايز يتجوز موديل زى اللى بيشوفهم فى الأفلام والإعلانات
والبنت من دول تبقى عايز البطل القوى الغنى ابو لسان حلو اللى بتقرء عنه فى الروايات
يدورو بقى عليهم فى الواقع ميلاقوهمش يقومو يا عينى يتصدمو ويرتبطو بناس مش زى التوقعات المبالغ فيها اللى كان نفسهم فيها ويكدروهم ويزهقوهم فى عيشيتهم علشان طبعا مش راضيين بيهم
جوهرة :دى حاجة مقرفة ومستفزة جدا بجد
انك تقرف الطرف التانى فى عيشته علشان هو مش قد توقعاتك الأوفر المبالغ فيها
معاك حق كتير من كلام الأغانى والأفلام والروايات بيكون اوفر وكله بلح
اللى بيكتب ده ممكن يكتب عن حاجة عمره ما عاشها ولا حتى هو يقدر يعملها
انا نفسى اوقات بعمل كده كنت كتبت حاجة مؤثرة جدا مع انى مكنتش حاسة بيها ولا عمرى حسيت بيها بس كنت قريت رواية وده كان احساس البطلة فكتبته انا علشان اعبر عن احساسها هى
قدرى :قوليهالى طيب
جوهرة :استنى ثوانى هجيب كشكولى علشان اقراهالك منه...هى كانت فين...اه اهيه
