فجر :فكرينى تانى كده انا قبلت اتجوز هشام ليه
فريدة :لانك ارتاحتيله ولانك هتعيشى معاه فى اسكندرية وانتى بتحبى اسكندرية
انتى متخانقة معاه ولا ايه
فجر :لا انا بس حسا انى لوحدى انا بقضى وقت كتير اوى لوحدى هو هنا فى اهله واصحابه وشغله غير انا والبيت
انما انا مليش هنا غير البيت وهو والشغل بقية الحاجات التانية انا بعدت عنها علشانه هو بعد ما يخلص شغله ويخرج مع اصحابه ويروح لاهله مبيفضليش انا وقت انا بروح معاه لاهله بس لسه مخدتش عليهم اوى وحتى لو خدت عليهم برضه هيفضل فى وقت طويل انا بقضيه لوحدى
فريدة :طيب ما تقوليله كل ده
فجر :اخاف يفتكرنى بمن عليه باللى عملته علشانه يفتكر انى عملت كل ده علشان ارجع اقوله انا عملت وسويت علشانك كمان بينى وبينك حسا انه المفروض يعمل كده من نفسه يبقى عايز يقضى معايا وقت اكتر شوية بإرادته مش لانى طلبت مش لانه واجب بيقضيه عايزاه يعمل كده لان هو عايز يعمل كده
فريدة :وافرضى معملش من نفسه هتفضلى كده
فجر :مش احسن ما اطلب منه واتخانق ويعمل كده بس من غير نفس تفتكرى وقتها انا هفرح ما انا برضه هفضل مضايقة
عارفة انا فكرت انى ممكن احاول اتعلم حاجات جديدة من اليوتيوب اخرج والف لوحدى اعمل صحاب هنا اقضى معاهم وقت
فريدة :نعم يا اختى تعملى ايه يعنى مش كفاية اتجوزتى وبعدتى عنى كمان عايزة تخونينى ويبقالك صحاب غيرى ياخدو مكانى
فجر :حتى لو اتعرفت على ناس جديدة مش هياخدو مكانك يا فريدة انتى محدش فى الدنيا يقدر ياخد مكانك كمان انا بقولك فكرت فى كده اهو الاقى حاجة تخفف عنى احساسى انى لوحدى بس لقيت ان كل ده مينفعش انا كده هبقى بلاقى بدايل لوجود هشام فى حياتى وده مش صح اومال انا اتجوزته ليه علشان ادور على بدايل املا بيها مكانه
فريدة :هتعملى ايه طيب
فجر :مش عارفة بس اكيد فى حل..استنى ده هشام بينده شكله رجع هقفل دلوقتى وابقى اكلمك بعدين
فريدة :ماشى يا حبيبتى خلى بالك من نفسك
فجر :وانتى كمان يا قلبى
بعد تلت ايام
هشام :ايه رايك نخرج
فجر :نخرج
هشام :اه اخدك ونخرج نتغدى بره
فجر وهى بتشاور عليه وعلى نفسها :انا وانت
هشام وهو بيضحك :اه انا وانتى ايه الذهول اللى على وشك ده ها ايه رايك اعزمك على اكلة سمك جامدة جدا
فجر :موافقة بس اطلب وناكل هنا علشان اكل براحتى
هشام :خلاص زى ما تحبى انتى كنتى هتعملى ايه دلوقتى
فجر :انا خلصت شغل البيت فكنت هتفرج على فيلم
هشام :تمام نتفرج سوا
فجر وهى بتشاور عليه وعلى نفسها :انا وانت تانى
هشام وهو بيضحك :اه انا وانتى تانى اختارى فيلم على ما اطلب الاكل
بعد خمس دقايق
هشام :ها اختارتى فيلم
فجر :اه تعالى اقعد علشان اشغله
هشام هو بيقعد جمبها :تمام
بعد تلت ساعة
هشام :لا مش قادر اتحمل غيرى الفيلم ده
فجر :ليه بس
هشام :اوفر تمثيلهم اوفر رومانسيتهم اوفر انا بفكر اقطع شرايينى منهم ايه فقع المرارة ده
فجر وهى بتضحك :خلاص اختار انت الفيلم
هشام :الجرس بيرن الاكل وصل هحاسبه وعلى ما انتى تحطى الاكل فى اطباق اكون انا اختارت فيلم
فجر :تمام
