جنات :انت عارف ان بابا وباباك وماما ومامتك عايزينا نتجوز ولا لا
هيثم :عارف
جنات :وعارف ان انا مش عايزة اتجوز ولو اتهفيت فى نفوخى واتجوزت مش هيبقى بالطريقة دى ولا لا
هيثم :مكنتش اعرف بس ادينى عرفت
انتى بقى عارفة ان انا عايز نبقى صحاب ولا لا
جنات وهى بتضحك :مكنتش اعرف بس ادينى عرفت
هيثم :طيب وموافقة ولا لا
جنات :موافقة
هيثم :ليه موافقة
جنات :علشان الانسان بطبعه بيحب الحاجات الجديدة
وانا محتاجة حاجة جديدة تحصل فى حياتى
هيثم :طيب بما اننا بقينا اصحاب ما نروح نفطر سوا لسه شوية على ميعاد شغلى وشغلك
جنات :قشطا
هيثم :نروح ماكدونالز
جنات :ايه الفطار النايتى ده خدنا على محل فلافل
هيثم :محل فلافل
جنات :اه نفطر فول وطعمية وبطاطس ولا مسقعة وفى بيض باللانشون كمان
هيثم وهو بيضحك :انتى بتفطرى بالحاجات دى
جنات :اه ده الفطار اللى على حق هو انت بتفطر بالحاجات اللى فى فطار ماكدونالز دى وبتشبعك وكده
هيثم :الصراحة لا بس قولت كده علشانك
جنات :لست انا هذه الفتاة البسكوتة انا ممكن افطر فى مسمط عادى
هيثم وهو بيضحك :لا شكلنا هنتفق فى حاجات كتير
بعد عشر دقايق
جنات وهى بتاكل :انت بتبصلى كده ليه
هيثم :مستغربك الصراحة عمرى ما شوفت بنت بتفطر بخمس سندويتشات اللى عرفتهم اخرهم سندوتشين
جنات :اه ولو خرجتو تتغدو تطلب بيتزا small ومتكملهاش صح
لا دول بيشتغلوك هما يا بياكلو قبل ما يشوفوك يا بياكلو بعدها انما اكلة العصافير اللى بياكلوها قدامك دى علشان بس يبانو رقاق وكده
هيثم :رقاق
جنات :اه رقاق جمع رقيقة وبعدين انا راضية ذمتك ده حجم سندويتش اكل منه اتنين واشبع ده انت جايب لنفسك ست سندويتشات
هيثم :خلاص اقنعتينى بس احنا طلعنا بنتغفل منكم
جنات :بص هو الموضوع ده ليه شقين اول شق هو انكم بتحبو اللى يغفلكم بتحبو تعيشو فكرة ان البنات كائن رقيق وكيوت فى كل حاجة دى البنات اللى بتلفت انتباهكم النوع الساذج ده هو نوعكم المفضل
تانى شق هو ان البنات نفسها بتحب الفكرة دى بتحب نظرة الانبهار اللى بتكون فى عينيكم على كل فعل رقيق وكيوت هى بتعمله
فالعملية بالتراضى يعنى بتحصل
هيثم :ومين قال انى راضى اتغفل
جنات :وهو انت لو مش راضى كنت صدقت ان فى بنت هتشبع بسندوتشين والسندويتش اصغر من كف ايدى فى حين ان انت نفسك طالب ستة ومش بعيد تكون بتفطر بتمنية ولا تسعة بس اتحرجت تجيبهم قدامى
هيثم وهو بيضحك :خلاص اقتنعت انتو بتحبو تغفلونا واحنا بنحب نتغفل
جنات وهى بتضحك :exactly بالظبط كده اوقف بقى جبلنا شاى ولا نسكافية
بعد تلت ايام
جنات وهى بتضحك :صوت بابا الفرحان وهو بيوافق اروح معاك نتغدى بعد الشغل حسسنى اننا مش هنروح مطعم ناكل لا احنا هنروح نجيب الشبكة
هيثم وهو بيضحك :وماما لما عرفت اننا هنروح نتغدا قالتلى هتلبس ايه وكانت عايزة تختارلى هى اللى هلبسه
جنات :واضح ان انت ومامتك علاقتكم قوية
هيثم :اه جدا خصوصا بعد ما كل اخواتى اتجوزو ومبقاش فاضل معاها هى وبابا فى البيت غيرى
وانتى وباباكى علاقتكم قوية
جنات بابتسامة :قوية جدا بابا ده اعز اصحابى لما باجى ارتب صحابى بابا بيبقى اول واحد فى الترتيب
هيثم :وعلاقتك بمامتك
جنات :حلوة الحمد لله ماما دى احن ست فى الدنيا كلها بس انا وبابا غير علاقة الابوه احنا كمان صحاب
هيثم :هو ليه بيحاول يقرب بينا
يعنى انا فاهم ليه اهلى بيعملو كده صبرو عليا كتير اختار انا وانا مختارتش ومفكرنى شيلت الموضوع من دماغى وحبيت حياة العزوبية
جنات :وهى مش دى الحقيقة
هيثم :مش بالظبط
انتى بقى ليه اهلك بيعملو كده
جنات :هو انا ممكن احكيلك بس ساعتها هيبقى لازم اقتلك بعدها
هيثم وهو بيضحك :طيب وليه تقتلينى وتاخدى فيا اعدام
ما تحكيلى وبعدها انا احكيلك
جنات :شكلك لبست فى خازوق جامد
هيثم :عرفتى منين
جنات :الانسان بطبعه متخزوق والمتخروق بيعرف المتخزوق اللى زيه
هيثم وهو بيضحك :خلاص احكيلى عن خازوقك وانا هحكيلك عن خازوقى
جنات وهى بتضحك :واهو نحط همى على همك وخازوقى على خازوقك ونرميهم فى الزبالة
ماشى هحكى بابا وماما بيعملو كده علشان حاسين بالذنب تجاهى
هيثم :ليه حاسين بالذنب تجاهك
جنات :علشان انا فسخت خطوبتى علشان بابا
حصل خناقة بين بابا وخطيبى او اللى كان خطيبى يعنى ولأنه انسان متهور ولسانه سابق عقله غلط فى بابا قدامنا انا من غير تفكير قلعت الدبلة ودخلت جبتله شبكته وقولتله ان خلاص كل اللى بينا انتهى
هيثم :كل ده علشان غلط فى باباكى
جنات :وهى دى حاجة بسيطة يعنى بابا يخلفنى ويربينى ويصرف عليا علشان لما اكبر اتخطب لواحد يهينه فى بيته وقدام مراته وولاده
انا كده ابقى مستاهلش اى حاجة بابا عملها علشانى وبابا عمل علشانى كتير هو وماما عمرهم كله ضايع عليا انا واخواتى وفى الاخر انا اعمل فيه كده اقبل عليه يحصله كده بسبب واحد انا اللى اختارته ودخلته بيتنا
لو كملت معاه بابا هيتعامل معاه ازاى
هبص فى عيون بابا ازاى وانا قبلت يحصله كده ابص فى عيون اللى كان خطيبى ازاى وانا قبلت انه يهين ابويا اطلب منه بعدها ازاى يحترمنى ويقدرنى ويحترم اهلى ويقدرهم
اذا كان عمل كده مع بابا وانا لسه فى بيت بابا اومال لما ابقى فى بيته هو هيعمل فى بابا وفيا انا نفسى ايه
انا طول عمرى نفسى اللى هتجوزه يبقى ابن لاهلى واخ لاخواتى وانا ابقى بنت لاهله واخت لاخواته
وهو باللى عمله ده اثبتلى انه مش الانسان اللى انا محتاجاه فى حياتى
هيثم :مكنتيش بتحبيه
جنات :لا كنت بحبه اومال قبلت اتخطبله ليه وكلمت اهلى دول وافقو علشانى اصلا
انا اختارته وفضلته على كل رجالة الدنيا بس مش ممكن اختاره وافضله على بابا انا كده هبقى مية فى المية بختار غلط
هيثم :وباباكى وافق على قرارك
جنات :هو قالى طيب فكرى تانى خصوصا ان اللى كان خطيبى اعتذر لبابا كتير
بابا علشانى كان ممكن يجى على كرامته ولو هو يقدر يعمل كده علشانى فانا اقدر مش بس اجى على قلبى لا ده انا اطلعه من بين ضلوعى كده وادوس عليه بجذمتى
انا ممكن احب تانى وتالت كمان انما عمرى ما هيكون عندى غير اب واحد بس
هيثم بابتسامة :باباكى اكيد فخور انه عنده بنت زيك
جنات :انا اللى فخورة انى عندى اب زيه
عارف عرفت من صديقة مشتركة بينى وبين اللى كان خطيبى ان مراته سابتله البيت وراحت لاهلها وبينهم مشاكل ممكن توصل لطلاق لانه بيمد ايده عليها مع ان معداش على جوازه منها تمن شهور لسه
قالتلى انتى فيكى حاجة لله لانك نفدتى بجلدك وسيبتيه
وقتها اتأكدت اكتر ما انا متأكدة انى عملت الصح
هيثم :هو انتى سبتيه بقالك قد ايه
جنات :سنة ونص
هيثم :ولسه منستيهوش
جنات :لا نسيته اللى عايز ينسى بينسى وانا نسيته لانى فهمت انى حكايتى معاه خلاص خلصت على كده
الفكرة انى مقابلتش حد بعده وحبيته وانا مش هتجوز غير عن حب اللى هو عمله خلانى فقدت ثقتى فيه وفى اختيارى ليه وفى كونه الانسان المناسب ليا انما مخلانيش افقد ثقتى فى الحب انا مستنية احب واهلى شايفنى بكبر وحاسين بالذنب شايفين انى علشانهم متجوزتش كان زمانى متجوزة ومعايا طفل كمان
بقالنا اكتر من نص ساعة قدام المطعم ومدخلناش احنا ممكن ندخل ونكمل رغى واحنا بناكل عادى
هيثم :انتى فصيلة على فكرة
جنات :الانسان بطبعه جعان وانا جعانة يا هيثم
هيثم وهو بيضحك :طيب يلا يا ست الجعانة علشان ناكل
