اسامة :فى حاجة تانية تحبى تسألى عنها
زينة :انت فى عندك حاجة تانية حابب تسألنى عنها
اسامة :لا
زينة :طيب هو انا خلاص معنديش اسئلة تانية بس فيه حاجة مهمة عايزة اوضحهالك ونتكلم فيها
اسامة :حاجة ايه
زينة :احم احم..هو يعنى..لو حصل نصيب واتخطبنا مش هنبقى زى اى اتنين مخطوبين بالمعنى التقليدى المتعارف عليه
اسامة :مبحبش الكلام الكبير ده قولى كلام بسيط ووضحى قصدك
زينة :قصدى يعنى مش هنخرج لوحدنا كلامنا هيكون فى حدود مش هنعبر عن مشاعرنا خالص قصدى المشاعر الرومانسية لو وجدت يعنى
مش هقولك اكتب مشاعرك فى كشكول لحد ما نكتب الكتاب لانك اكيد مبتحبش الكتابة ومش هيبقى عندك خلق ليها بس خليها جواك ولما نكتب الكتاب ابقى عبر عنها يعنى انا فاهمة انه يمكن اصلا ميحصلش نصيب وانه لو حصل هيبقى اكيد مفيش لسه مشاعر فى الاول كده بس انا بتفق معاك من اولها علشان اللى اوله شرط اخره نور واهو تبقى عارف الوضع من اولها ومتعملش زى خطيبى الاولانى
اسامة :هو عمل ايه
زينة :انا مكنتش اعرفه زيك كده ولما قعدت معاه اول مرة انحرجت اقوله اللى قلتهولك ده وافقت عليه ووافق عليا واتخطبنا بس فى الخطوبة لما جه يتعدى الحدود فى كلامه قولتله انه مش هينفع وحرام وكده هو بقى كلم بنات وهو خاطبنى وواحدة منهم بعتتلى محادثة بينهم لما واجهته قالى ان انا السبب وانى مش بنت وهو حاسس انه خاطب واحد صاحبه وانى معنديش قلب ومعنديش مشاعر ومعنديش بنكرياس
اسامة وهو بيضحك :وايه علاقة البنكرياس بالموضوع
زينة وهى بتضحك :ملوش علاقة انا بهزر هو مقالش كده بس ده كان احساسى بكلامه انه كلام اهبل يعنى انا فهمته انه مش هنعبر عن مشاعرنا ومش هنتجاوز حدودنا علشان حرام مضايق هو من الوضع يطلب نكتب الكتاب مثلا مش يروح يعرف بنات ويجى يرمى اللوم عليا وعلشان كده فسخت الخطوبة مكنش ينفع اكمل معاه
اسامة :واهلك وافقو بسهولة على قرارك
زينة :لا بس انا اتمسكت بقرارى وقدام اصرارى مكنش قدامهم غير انهم يسيبونى افسخ الخطوبة دى حياتى ومحدش هيعيشها غيرى والموقف ده كشفه ليا انسان انانى وميستاهلش اثق فيه
عارف واحدة جارتنا كانت مخطوبة لواحد بيقاطع اهله بالشهور اتجاهلت النقطة دى وقالت مش مهم بعد ما اتجوزو بقى لما يضايق من اهلها يمنعها تروحلهم ممكن تفضل بالسنة واكتر متدخلش بيت اهلها عيبه كان باين من الخطوبة وهى عملت نفسها مش شايفة واديها لبست بعد الجواز وانا قررت انى مش هعمل زيها مش هتجاهل عيب اكتشفته فيه وقررت برضه انى المرة الجاية هتكلم فى النقطة دى بالذات من الاول عجبك الكلام تمام معجبكش وعايز واحدة تبقى فترة الخطوبة احلى ايام حياتكم وكلها مشاعر جياشة وضحك على الدقون يبقى النمرة غلط يا عماد مش انا الواحدة دى
اسامة :وهو كل اللى بيبعبرو عن مشاعرهم فى الخطوبة بيبقو بيضحكو على دقون بعض
زينة :كل اللى بيعبرو عن مشاعر مش حقيقية يبقو كده يعنى واحد شافته مره ولا اتنين وبعدها اتخطبو امتى جات المشاعر وقصة الحب الجامدة دى ولا هما جابوها من عند بتاع الذهب مع الشبكة بزمتك ده مش ضحك على الدقون
اسامة :الصراحة اه
زينة :فترة الخطوبة مش علشان نعيش احلى قصة حب فترة الخطوبة علشان نعرف اذا كان الانسان ده ينفع نكمل معاه ولا لا نشوف مميزاته وعيوبه انما هنقضيها حب ونتجاهل اى حاجة تانية يبقى هنلبس فى حيطة بعد الجواز
اسامة :انتى شايفة ان الحب وقته بعد الجواز
زينة :الحب ملوش وقت ممكن قبل الجواز او فى الخطوبة او بعد الجواز الله اعلم هو ممكن يحصل امتى الاكيد ان الحب بيجى بالوقت ومع المواقف متبقاش لسه عارفاه ومخطوباله من اسبوع وتتكلم عنه كأنهم متربين سوا طول عمرهم
المشاعر غالية لازم منعبرش عنها غير واحنا فعلا حاسين بيها والا تفقد قيمتها وتبقى رخيصة
اسامة بابتسامة :معاكى حق طيب كده الوضع بنا هيبقى ايه بالتفصيل اشرحيه
زبنة :لو حصل نصيب واتخطبنا تقدر تيجى هنا زى ما تحب طبعا ومش هنخرج لوحدنا يا نخرج مع اهلى واهلك ياما بلاها خروج لحد ما نكتب الكتاب وهنتكلم فى الموبايل بس مش كتير وكلامنا هيبقى عادى وزى ما قولتلك مفيهوش مشاعر لا غيرة ولا حب ولا اشتياق ولا اى حاجة من دى
انا اسفة لو كلامى جامد ويمكن دبش والله الموضوع مش سهل عليا وانا شجعت نفسى كتير علشان اقدر اتكلم انا بس بحاول اتجنب غلطة المرة اللى فاتت لان لو الوضع ده مش هيريحك او مش هتقبل بيه يبقى من اولها بقى بلاش علشان متتحسبش خطوبة تانية عليا او عليك على الفاضى ولانى مبحبش اكرر غلطاتى يعنى على الاقل اغلط غلطات جديدة مش اعيد القديمة بحزافيرها
اسامة وهو بيضحك :كده يبقى ملل اوى فعلا..عموما انا مش مضايق من كلامك بالعكس انا معجب جدا بصراحتك ومقدر ان اكيد اللى بتقوليه مش سهل عليكى وانا شايف ان الصراحة اقصر الطرق واحسنها بتوفر وقت ومجهود
زينة بابتسامة :انا كمان شايفة كده
اسامة :طيب ايه
زينة :ايه
اسامة :عندك حاجة تانية حبا توضحيها
زينة :لا انا كده خلصت انت مش عايز توضحلى حاجة تكلمنى عن حاجة
اسامة :لا.. او فى حاجة عايز اتفق معاكى عليها
زينة :حاجة ايه
اسامة :لو انا عملت حاجة ضايقتك او كان عندك مشكلة معايا اتكلمى معايا الاول متحكيش لاهلك او اصحابك على الاقل اتكلمى معايا قبل ما تدخليهم ولو كلمتينى والمشكلة متحلتش وقتها فكرى تكلميهم وتدخليهم
زينة :حاضر لو حصل نصيب هعمل كده
اسامة :لو حصل نصيب
زينة :لو اتخطبنا يعنى
اسامة :اه ان شاء الله تمام يبقى انا كده خلصت
زينة :انا هفكر وهستخير وبابا بأذن الله يبلغك بردى بعد اذنك
اسامة :اتفضلى
