انجى :يونس اخبارك ايه
يونس :انا بخير الحمد لله
انجى :عامل ايه
يونس :تمام
انجى :كله كويس
يونس :هما الاجابتين اللى فاتو مأقنعوكيش ولا ايه
انا تمام كويس زى الفل بخير الحمد لله
انجى باحراج :مش قصدى اكرر السؤال
على العموم يدوم حمدك
يا رب دايما تكون بخير
يونس :امين وانتى كمان يا رب
بعد اذنك
انجى :اتفضل
انجى بابتسامة :ده قالى وانتى كمان يا رب
خلصانة بيموت فيا حبه انكشف وبان خلاص
رؤى بغيظ :ده انتى اللى هتخلصى عليا بغبائك الخام ده
لا مش غباء ده عته
انتى عندك عته عاطفى يا بت
اسيل وهى بتضحك :بتحبه يا غاته بتحببببببه
بتحبه يا رؤى
رؤى :يا شيخة يخربيت الحب لو كده
انا لو مت مشلولة ومجلوطة فى نفس الوقت هيبقى بسببك
انجى :فى ايه يا رؤى هو انتى لازم تقطمينى كده بكلامك
والله انا قلبى حاسس انه بيحبنى وعقلى كمان
باين عليه صدقينى
رؤى :بالله عليكى متاخدى برأى قلبك ولا عقلك لأن الاتنين اغبى من بعض
اسيل :مش كده يا رؤى فى ايه
رؤى :مش قصدى عموما
انجى انتى اذكى واحدة فينا اعلى واحدة بتجيب تقديرات مع انك اقل واحدة بتذاكرى
بس بأقل مجهود بتعرفى تجيبى المادة فى شوال
ملكة الحفظ عندك ما شاء الله رهيبة
وكمان اللهم بارك بتفهمى بسرعة
وقلبك ابيض وزى الورد وحنينة اوى مفيش فى حنيتك
انا مش قصدى ان عقلك وقلبك اغبية فى كل حاجة
لا هما اغبية بس فى اى حاجة تخص يونس
انتى مش عارفة تشوفيه صح
انتى بتشوفيه زى ما نفسك تشوفيه
بتقنعى نفسك باللى يريحك
بس ده خطر يا انجى و...
اسيل قاطعتها :خلاص يا رؤى
رؤى :لا يا اسيل مش خلاص
مش هنسيبها تكمل فى قصة حب وهمية من طرف واحد هى بتقنع روحها انها من طرفين
لحد ما تفوق على صدمة انه خطب واحدة غيرها
انجى بدموع فى عينيها :متقوليش كده يونس مش هيعمل فيا كده
مش هيكسر قلبى مليون حتة
رؤى :هو ميعرفش انك بتحبيه علشان يعرف ان قلبك هيتكسر وقتها يا انجى
وهو عمره ما قالك حاجة ولا قالك انه بيحبك ولا حتى لمح
بالعكس بيعاملك عادى
بيعاملك عادى اوى ويمكن اقل من العادى كمان
دى مش معاملة واحد بيحب واحدة او على الاقل معجب بيها
انجى :اقوله طيب انى بحبه
اسيل :لا طبعا اوعى
هو مش هيحبك لما تقوليله يا انجى
هو يا يحبك من نفسه ويشوف قد ايه انتى نقية وجميلة وحنية وذكية وطيبة
يا ان شاء الله عنه ما حبك
مينفعش انتى اللى تبدئى لازم هو اللى يبدء
انجى :المحله طيب
رؤى :عارفة انتى لما تيجى تلمحى هتعكى الدنيا اكتر
اللى هو غالبا هتقوليله صباح الخير انا بحبك يا يونس
انتى مش بتاعت تلميحات يا انجى مبتحبيهاش
انتى صريحة فى كلامك وفى مشاعرك
ولو جيتى تلمحى هتعترفيله بكل حاجة
انجى بحزن :انا هعمل كده فعلا
اسيل :ولا حتى ينفع تلمحيله
انتى كده تقلى من نفسك
انتى لا ينفع تعترفى ولا تلمحى
انتى كل اللى ينفع تعمليه انك تتعاملى معاه عادى تعامل كويس علشان ده المفروض فى تعاملك معاه ومع اى جار من جيرانك
وعلشان هو ميفكرش انك مش طيقاه مثلا
انما غير كده مينفعش
انجى وهى بتعيط :انتى مفكرة انى ممكن اروح اقوله فعلا
انا مقدرش اعمل كده
انا عارفة ان لازم هو اللى يبدء علشان منزلش من نظره ولا من نظر نفسى
انا بحبه من كل قلبى
بس قلبى ده عنده كرامة مش هتتحمل اهينها واروح انا اقوله الاول كأنى بشحت حبه
انا ان مكنش يقولها واصدقه وافرح بيها
يبقى عمره ما هيسمعها منى
بس انا خايفة ان ده عمره ما يحصل...خايفة ميحبنيش ومرعوبة ليحب غيرى
اسيل :ان شاء الله ده مش هيحصل
رؤى :ولو حصل يبقى هو مش نصيبك
وانتى مش نصيبه
وربنا هيبعتلك نصيبك اللى يحبك وتحبيه
انجى :انا مش عايزة احب غيره
ومش عايزاه يحب غيرى
اسيل :وفى الاخر مش هيحصل غير اللى ربنا كاتبه
واللى اكيد هو الخير
يمكن انتى وهو مش خير لبعض
تتمسكى بالشر
ولا تسيبيها لربنا وترضى باللى يقسمهولك لأنك عارفة انه اكيد الخير ليكى
انجى :ارضى باللى ربنا كاتبه طبعا
بس يا رب يبقى مكتوبلى وانا مكتوباله ربنا يجعلنا من قسمة ونصيب بعض
رؤى :انا كتفى الشمال بدء ينمل دى باينها بداية اعراض جلطة
ايه يا انجى هو انتى مدية كل حبك ليونس
مش مخلية لأهلك شوية من حبك لينا كاصحابك
فاضل طيب شوية حب تديهم لولادك ولا خلصتي حبك كله على يونس
اسيل وهى بتضحك :يا خوفى لو مش ولاد يونس متحبهمش
انجى :لا طبعا هحبهم فى واحدة متحبش ولادها
انا بس ممكن معرفش احب ابوهم
لا لا يا رب يبقى يونس ابوهم
رؤى :يا رب تصدقى بالله من قلبى بقول يا رب
يا رب يحبك ونخلص
اسيل :انتى محتاجة تقاومى نفسك يا انجى
متورطيش مشاعرك اكتر من كده
انجى :مورطش مشاعرى ايه
ما اتورطت واللى كان كان
رؤى :يبقى تبعدى عنه وتقللى تفكير فيه
واللى بنتيه ليه جواكى تهديه بايدك
بدل ما يهده هو فوق دماغك بعدين
انجى :يعنى اعمل ايه
رؤى :متعمليش حاجة خالص
ولا تتكلمى معاه
ولا تدخلى كل يوم على السوشيال ميديا بتاعته
اسيل :ولا تقعدى بالساعات تفكرى فيه وتتخيلى شكل بيتكم وحياتكم سوا هتبقى عاملة ازاى
ولا تفضلى تحكلنا عنه
انجى :ما تولعو فيا اسهل
ايه كل ده هعمل كل ده مع بعضه ازاى
اسيل :طيب واحدة واحدة
رؤى :لا فكرة التدريج دى مش هتجيب نتيجة
وهتفشل
الحل فى انها تعمل كده مرة واحدة
علشان الصدمة والحزن يبقو مرة واحدة
انما مش كل شوية تنكد على نفسها بحاجة جديدة هتبطلها
وغير كده التدريج ده ممكن يخليها متعملش حاجة اصلا
او يخليها تعمل بس شوية
وبعدين ترجع لأنها سايبة حاجات تضعفها
والمصيبة اننا لما بنرجع بنرجع اسوء من الاول
كأننا بنعوض الشوية اللى بعدناهم عن الغلط اللى بعدنا عنه
حاجة زى دى محتاجة قوة وارادة والاهم محتاجة ان القرار يكون قرارك وعن اقتناع
انجى :قرار ايه وعن اقتناع مين
انا بحبه
يعنى لو خدت قرار زى ده اكيد هيكون غصب عنى ومن ورا قلبى
اسيل :ولا من ورا قلبك ولا من قدامه
قلبك اللى مش هيقدر ياخد القرار ده ولا يقتنع بيه
هيعمل ايه لو يونس حب او خطب غيرك
انجى :مش عارفة بس اكيد هتوجع جامد ومش هقدر اتحمل ولا هقدر اشوفه مع واحدة غيرى
رؤى :يبقى تنشفى انتى وقلبك وتحاولى تبعدى وتقللى حبك ليه دلوقتى بمزاجك
ولا تستنى لما يبقى مع واحدة تانية فيبقى غصب عنك
وتبقى مشاعرك كبرت اكتر واكتر والموضوع يبقى اصعب
انجى :بالعقل دلوقتى احسن من بعدين
بس...
اسيل قاطعتها :انجى انتى لو هتفضلى تقول بس واصل وما هو
يبقى عمرك ما هتعملى حاجة
انتى خايفة تتوجعى لما تحاولى تقاومى حبك ليه وتبعدى وتنسى صح
بس وهو انتى دلوقتى مرتاحة
على الاقل لما تحاولى تنسى دلوقتى هتتعبى دلوقتى بس هترتاحى بعدين
انما لو كملتى كده هتبقى تعبانة دلوقتى وتعبانة كمان بعدين
لو حب وخطب غيرك
ويا سلام بقى لو اتخطبتى انتى لحد غيره
او رفضتى تتخطبى لحد غيره علشان بتحبيه
صراعات ومشاكل وليلة كبيرة
انجى :اهلى مش هيرضو لا هقدر اقولهم بحبه
ولا هيسيبونى ارفض لو جالى حد مناسب
رؤى :فوقتها تتخطبى وانتى بتحبى واحد تانى
وتبقى حاسة انك خاينة
ومش قادرة تحددى انتى خاينة لمين بالظبط
خاينة لحبيبك علشان اتخطبتى لغيره
ولا خاينة لخطيبك علشان بتحبى حد غيره
انجى :انا مش هستحمل ابقى فى وضع زى ده
انا بكره الضغط وده وضع كله ضغط
خلاص انا هحاول انساه بجد هحاول
مش هتكلم معاه مش هراقب السوشيال ميديا بتاعته
مش هسيب نفسى اتخيل شكل حياتى معاه
بس ممكن افضل بتكلم معاكم عنه على الاقل عن احساسى وحالتى وانا بحاول انساه
ممكن ولا برضه مينفعش ولا ايه
رؤى :لا طبعا ممكن
اسيل :ينفع يا حبيبتى
انجى :كويس علشان انا مقدرش متكلمش عن اللى جوايا
كلامى لما بيتحبس جوايا بحس انه خانقنى ومخلينى حاسة انى هموت
اسيل :بعد الشر عليكى وبعدين كلامك يفضل جواكى ليه واحنا موجودين
رؤى :احنا هنسمعك دايما
