مروة وهى بتعيط :يعنى ايه يسيبنى علشان هو مش مبسوط انا ذنبى ايه فى انه مش مبسوط عملتله ايه انا يخليه مش مبسوط ده انا حتى ضغط اهلى عليا علشان اتجوز مبكلموش عنه ولا عن العرسان اللى برفضهم علشانه علشان مبقاش بضغط عليه وتبقى دى اخرتها بعد تلت سنين تبقى دى اخرتها
نيرة :طيب اهدى يا مروة هو ميستاهلكيش يا حبيبتى
منى :هو ميستاهلكيش يا مروة بس انتى اللى سمحتى ان ده يحصل انتى اللى خليتى واحد ميستاهلكيش فى حياتك وتعبتى علشانه كتير وطبيعى ميقدرش تعبك هو كان باين جدا انه لعبى ولا هيشيل مسئولية ولا هيبقى راجل سنتين مرتبطة بيه فى الكلية وسنة بعد الكلية ومشتغلش بجد علشان يعرف يجبلك ان شاء الله دبلة يخطبك بيها فلوسه ضايعة على لبسه وخروجاته مع اصحابه وانتى عمرك كان ضايع معاه
ندى :بالراحة عليها يا منى
منى :لا يا ندى انا بكلمها لمصلحتها بقالها شهرين بتعيط على واحد المفروض تعمل فرح علشان ندل زيه خرج من حياتها مش كفاية ضيعت تلت سنين من عمرها معاه شكلها ناوية تضيع سنة ولا اتنين كمان فى البكا على فراقه
نيرة :مش عايزة ابقى بضغط عليكى انا كمان يا مروة بس هو اصلا كان ذنب وانتى واقعة فيه بدل ما تتمنى وتستنى رجوعه ليكى استغفرى وتوبى لربنا لو فكرتى فيه على انه ذنب عملتيه لو شوفتيه على انه معصية لربنا هتكرهيه وهتحمدى ربنا انه خرج من حياتك شوفيه على حقيقته يا مروة عيل لعبى ومش بتاع مسئولية ذنب كبير عملتيه بطلى تشوفيه على انه حلمك اللى متحققش
مروة وهى بتعيط :بس هو حلمى اللى متحققش يا نيرة والاحلام اللى مبتتحققش دى بتوجع اوى
منى :اتوجعى على الاحلام اللى تستحق تتوجعى عليها ايهاب ده مش حلم ده كابوس بطلى تديله اكبر من حجمه بقى
لا هو يليق يبقى حلمك ولا هو ينفع زوج ليكى ولا اب لولادك طيب انتى حرة فى نفسك تختارى عيل عمره ما هيبقى راجل وتحبيه وحتى بعد ما سابك بالطريقة المهينة دى قاعدة تعيطى علشانه
انما ذنب ولادك ايه يجو الدنيا يلاقو ابوهم عيل ولا ينفع يكون قدوة ليهم ولا عارف يكونلهم اب
اقولك حاجة يا مروة علشان انا جبت اخرى منك ومن العلاقة المعفنة اللى انتى موقفة حياتك عليها دى بعد كده لو اتكلمنا وقعدتى تعيطى على العيل اللى اسمه ايهاب ده انا هخرج من الشات
نيرة :وانا كمان علشان الصراحة انا كنت بكره ايهاب ده من يوم ما عرفتيه خصوصا وانا شايفاه ذنب مكنش المفروض تقعى فيه ونصحتك وانتى مسمعتليش بس بعد ما سابك ومن يومها وانتى بتعيطى كتير كده بقيت بكرهه اوى اوى يعنى
ندى :انا مش هخرج من الشات بس هغير الموضوع
مروة :هو انا تعباكم معايا اوى كده مش من حقى لما اتعب واتوجع افك عن نفسى مع اصحابى
منى :لا طبعا حقك اومال احنا موجودين فى حياة بعض ليه
بس كمان حقك علينا لما تكونى بتغلطى نفوقك وانتى مسمعتيش لولا واحدة فينا لما ارتبطى بيه اسمعلنا دلوقتى ناقص ايه يحصل علشان تفهمى انه ميستاهلش
نيرة :وانه ذنب ومعصية لربنا
ندى :وانه مش راجل اصلا والحمد لله انه خرج من حياتك
منى :خلاصتها يا مروة ضيعتى تلت سنين من عمرك على واحد ميستاهلش خلاص كفاية كده متضيعيش عليه يوم كمان زيادة
مروة وهى بتمسح دموعها :خلاص ماشى انتو معاكم حق انا سديت ودانى عن كلامكم علشانه وفى الاخر هو عمل ايه اثبتلكم ان كلامكم عنه صح وانى الحمارة اللى غمضت عيونها عن عيوبه واهو كالها على قفاها حتة قفا انما ايه عنب
ندى وهى بتضحك :متزعليش بس ضحكتنى كالك حتة قفا عنب دى
مروة وهى بتضحك :اه طبعا ما لازم تضحكى تعرفى ايه انتى عن الخوازيق وانتى متجوزة ابن عمك اللى محجوزين لبعض من صغركم اللى بيعشق التراب اللى بتمشى عليه
ندى وهى بتضحك :قل اعوذ برب الفلق ايه يا بنتى قولى ما شاء الله هولد ولادة مبكرة من نقك ده
منى :البيبى عامل ايه
ندى :البيبى زى الفل بس مطلع عين ماما من وهو جوه اومال لما يطلع بره هيعمل ايه بقى
نيرة وهى بتضحك :هيطلع عينها اكتر معروفة يعنى
منى :عارفين اللى عمل الواتس ده وعمل فيه خاصية مكالمات الفيديو الجماعية دى عبقرى
ندى :معاكى حق لولاه كنت نسيت شكلكم ايه
مروة :ما سيادتك اللى روحتى اتجوزتى فى طنطا
ندى وهى بتضحك :وهو يعنى قبل ما اتجوز كنا عايشين مع بعض ما احنا من اماكن مختلفة وبنا بحار ومحيطات من يوم ما اتعرفنا على بعض فى الكلية
منى وهى بتضحك :الا ما فينا اتنين بس جيران حتى
نيرة وهى بتضحك :يلا اهو الواتس بيقرب المسافات
وبعدين اولدى انتى بس وهنطب عليكى كلنا علشان نشوف البيبى
ندى :علشان تشوفو البيبى مش علشان تطمنو عليا ده انتو صحاب صينى صحيح
منى :هجبلك شيكولاتة كتير وانا جاية
نيرة :وانا هجبلك مانجا
مروة :وانا هجبلك علبتين موكا
ندى وهى بتضحك :بترشونى وانا بترشى تنورو يا حبايبى
مروة وهى بتضحك :عارفين نقط ضعفك بقى
ندى بابتسامة :ما هو علشان كده انتو اعز اصحابى اللى طلعت بيهم من الدنيا
مروة :لا عينيا دمعت من التأثر وانا عيطت كتير
منى :لا الله يباركلك كفاية عياط انا نفسيتى تعبت نغير الموضوع احسن نيرة ايه اللى حصل مع العريس اللى كان متقدملك
نيرة :خرج ولم يعد
ندى وهى بتضحك :خرج ولم يعد ازاى يعنى
نيرة :يعنى جه شافنى واتكلمنا شوية ومشى من عندنا ومن بعدها لا حس ولا خبر
منى :ااا..عادى يا حبيبتى يمكن لسه بيفكر
ندى :او بيستخير
مروة :او حصل حاجة مخلياه مش عارف يتكلم
نيرة :او هو مش موافق عليا شكلى معجبوش او حاجة فى كلامى او حتى استخار ربنا فيا ومرتاحش
مش محتاجين تهونو عليا وتقولولى حجج انا مش محتاجة حجج ومعنديش مشكلة فى انه يرفضنى لاى سبب شكلى او شخصيتى او اى حاجة
اللى عندى مشكلة فعلا فيه هو انه يصرف نظر عن الموضوع من غير ما يقول حاجة
كأنه سايب الموضوع يموت مع الوقت ويتنسى يعنى
ليه الطريقة الغير انسانية دى فى التعامل مع بعض ما يتصل ويقول انه كل شئ قسمة ونصيب انه مرتاحش او انه مش حاسس اننا ننفع سوا
ندى :يمكن خاف يجرح كرامتك
نيرة :ودلوقتى كرامتى فى السما وانا مش فاهمة هو رافضنى ليه وهو سايبنى لنفسى افكر فى اسوء الاحتمالات انى العيب فيا والمشكلة منى والحقيقة ان هو اللى قليل الذوق
منى :ده العادى يا نيرة انا قبل ما اتخطب لتامر فى تلت عرسان عملو معايا نفس الحركة
نيرة :تلاتة
ندى :وانا عمرى ما قعدت مع عريس فى حياتى بحكم ان انا ومحمد محجوزين لبعض من صغرنا بس الموضوع ده حصل مع اخواتى وبنات عمى
مروة :اه وانا كمان فى ناس مكنتش بحتاج ارفضهم هما من نفسهم كان بيمشو ومبيتكلموش تانى والموضوع بيخلص من بره بره لوحده من غير ما انا ارفض
نيرة :ما شاء الله قلة الذوق دى طلعت حاجة منتشرة
منى وهى بتضحك :اه واضح ان انتى بس اللى اول مرة تحصلك بعد كده هتكتسبى مناعة ويبقى عندك تناحة وتتعودى
نيرة :اتعود على ايه على قلة الذوق وانعدام الانسانية دى لا طبعا مش من حق اى حد انه يعمل فى اى حد كده لا من حقى اعمل كده فى حد ولا من حق حد يعمل فيا كده
ندى وهى بتضحك :انتى تحاولى توصلى صوتك للمسئولين
مروة :وهى بتضحك او تعملى حملة على الفيسبوك
نيرة :انتو بتتريقو انا بتكلم جد من حق اى حد بيترفض يعرف هو بيترفض ليه زى ما من حق اى حد بيتساب يعرف هو بيتساب ليه
مروة :معاكى حق
ندى :بس ده اللى بيحصل يا نيرة مش بس فى الجواز الصالونات حتى اللى عن حب بيحصل كده برضه بيسيبو بعض من غير ما يقولو اسباب بيخونو بعض برضه من غير اسباب
منى :العبث اللى مش عاجبك ده موجود فى حاجات كتير اوى
نيرة :والمفروض ايه نتقبله ونسكت
مروة :هتعملى ايه يعنى
نيرة :مش عارفة
ندى :دى عادات مجتمع يا نيرة مفيش فى ايدك ولا فى ايد اى حد انه يغيرها كل اللى تقدرى عليه انك متعمليش كده مترفضيش حد ومتسيبيش حد من غير ما تقوليله بتعملى كده ليه
منى :بالظبط كل اللى فى ايدك تغيريه هو نفسك
نيرة :مش بس نفسى واخواتى وولادى واى حد بيتعامل معايا هفهمهم ان ده غلط واننا لازم نتعامل مع بعض بذوق اكتر من كده ونحترم انسانية بعض
مروة :حلو تفكيرك عاجبنى
نيرة :لا بس غايظنى وحارق دمى ابن اللذينا حسا انى عايزة استناه على باب شارعهم بمفتاح انبوبة افتحله بيه دماغه
انا يرفضنى من غير ما يكلف نفسه ويقول انه رافضنى
منى :انتى مشكلتك فى انه رفضك ولا فى انه مقالش هو رفضك ليه
نيرة :فى انه مقالش انه يرفضنى حقه زى ما قولتلك وده واحد انا مشفتوش غير مرة واحدة يعنى قلبى مش هيتكسر لو رفضنى انما كرامتى وجعانى علشان متصلش يقول اى حاجة
ندى :ما يمكن يكون لسه بيفكر او حتى يطلب يقعد معاكى تانى
نيرة :ده فى المشمش الكلام ده بعد اسبوعين يقول عايز يقعد معايا تانى ولا حتى يقول موافق لا مش لاعبة على جثتى يحصل
كمان مش منطقى تفكيرك يا ندى عدى اسبوعين بحالهم لو كان عايز يقعد معايا مرة كمان كان طلب من بدرى ومعتقدش بيفكر كل ده
خلصانة هو انسان قليل الذوق ومعدوم الانسانية وميستاهلش نتكلم عنه اكتر من كده
منى وهى بتضحك :شايفة الموف اون اللى على حق ياللى بقالك شهرين بتعيطلنا
مروة :اكلمكم عنه شوية كمان
نيرة :انا هعملك بلوك
منى :وانا كمان
ندى :وانا قبلكم
مروة :حتى انتى يا ندى
ندى :ما انتى اللى اوفر يا مروة
مروة :بهزر ايه الواحد ميعرفش يهزر معاكم
منى :هزرى براحتك بس هزرى عن حاجة غيره اللهى تنسترى ترحمينا وتخلى كلامك الجد وهزارك وحتى عياطك على حاجة تانية غيره اتفقنا
مروة :اتفقنا
