مساء الورد على حبايبى
عاملين ايه يا رب تكونو بخير
امبارح جانى خاطر كده قالى افتحى طلبات المراسلة على الفيسبوك
حاولت اتجاهل هذا الخاطر الا انه الح وفضل يزن فى دماغى وانتم عارفينى مبحبش الزن قومت استجابت لهذا الخاطر وفتحت طلبات المراسلة
والحقيقة انى ندمت انى فتحتها ندمت انى عملت فيسبوك من اصله من اللى شوفته
هحكيلكم نبذة من العبث اللى لقيته سارة بتقولى احكى كل حاجة مش هينفع يا سارة كده اللايف هيبقى ست سبع ساعات انا بقالى كتير مفتحتش طلبات المراسلة وحقيقى لقيت بلاوى وفى حاجات مكررة فانا هحكيلكم المهم يعنى
مبدأيا فى بتاع اربعين واحد باعتينلى مساء الخير
وحوالى عشرة باعتنلى السلام عليكم ورحمة الله وبركاته طلب مراسلة فيه لمسة دينية كده
وفيه عشرين او خمسة وعشرين طلب باعتنلى العلامة دى 👍بس اللى هو كسل يكتب كلام اصلا فرمى دى وخلاص
وتسعة باعتنلى اخبارك ايه كأن ابن خالتى داخل يطمن عليا بعد ما عملت عملية اللوز مثلا
وفعلا مش عارفة ايه اللى يخلى حد يبعت لحد تانى ميعرفوش يقوله مساء الخير او السلام عليكم او اى تحية من اى نوع ليه التطفل ده
وفيه تلت طلبات مراسلة بيقولو عنى ملكة ومستعدين يبقو جذمة عندى وفيه واحد مستعد يبقى شبشب بصباع هو كاتبلى كده انا عملت للتلاتة بلوك وبتاع الشبشب ده بالذات عملت بلاغ للاكونت بتاعه وبعدين عملت بلوك
ايوه يا اية هو يستاهل فعلا
ولقيت بقى طلب مراسلة اغرب من كل دول
ابتهال بتقول اغرب من كده ايه
اسمعى الأغرب يا ابتهال
لقيت اكونت صاحبه اسمه ابانوب مرقص باعتلى ايه بقى استاذ ابانوب باعتلى قلب احمر وصورة فيها سلمان خان مكتوب عليها بحبك
فانا استغربت حاجات كتير الحقيقة
ابانوب منين جاب الصورة دى ده انا مشوفتش الصور دى من ايام ما كنت فى اعدادى
وليه ابانوب باعتلى صورة فيها سلمان خان انا مبحبوش
وليه ابانوب باعتلى الصورة دى اصلا
يعنى انا خديجة محمود وانت ابانوب مرقص
ايه المستقبل اللى شايفه لعلاقتنا يعنى شايفها فين كمان خمس سنين
عايز تعمل فتنة يا ابانوب هو مش الهلال مع الصليب ولا ايه
لا يا ياسر متغلطش فى ابانوب هو حكاك فعلا وحكاك حك غير مبرر بس برضه متغلطش فيه لسه بنقول الهلال مع الصليب ووحدة وطنية وكده
وانا حفاظا على الوحدة الوطنية عملت لابانوب بلوك علشان نحافظ على أمن الوطن واستقراره
الناس اللى سايبين المأساة اللى انا فيها وبيدافعو عن سلمان خان يا جماعة عادى هو ممثل عظيم رهيب بالنسبالكم حبوه براحتكم انما انا مبحبش تمثيله دى حرية شخصية يعنى وهو مش هيخسر حاجة علشان انا مبحبوش فكو كده وخليكم فريش اومال
نرجع لموضوعنا لقيت واحدة بعتالى انا بكرهك حسبى الله ونعم الوكيل فيكى ربنا ياخدك يا رب تموتى وارتاح منك
ومش كاتبة ليه بتقولى كده وبتدعى عليا
شكرا لحبايبى اللى بيقولو بعد الشر بس متدعوش عليها ربنا يعينها على سواد قلبها ده ويمكن اكون اذيتها من غير ما اقصد او اعرف
من حقها تكرهنى لو عايزة عادى مفيش حد كل الناس بتحبه وانا مش استثناء وهى حرة فى مشاعرها
بس اكيد ده ميديهاش الحق تدعى عليا من غير ما حتى تعرفنى ليه لو كنت غلطانة فى حقها كنت هعتذر وهحاول اصلح غلطى ولو هى فاهمة غلط هوضحلها سوء التفاهم انما هى مدتنيش فرصة اعمل اى حاجة
ما انا بعتلها يا هدى اسألها ليه بتقولى كده عملتلى بلوك من غير ما تعرفنى ليه بعتتلى الكلام ده
يلا ربنا يسامحها
وبتاع اربعة خمسة كاتبينلى ردى يا مغرورة وطبعا مرديتش علشان انا مغرورة فعلا عادى
وفيه واحد كاتبلى طظ فيكى يعنى انت لما تقولى كده هرد يعنى
واخر حاجة بقى لقيت واحد كاتب رقمه وكاتبلى ابعتى ميتين جنيه من فودافون كاش على الرقم ده بسرعة
بس كده مش كاتب اسباب ولا حاول يبرر موقفه او يقنعنى ليه ابعتله الميتين جنيه
وعلشان عدم التقدير ده انا عملت بلوك ومبعتش الميتين جنيه
مايكل بيقولى ده داخل يشقط ولا يشحت
الاتنين يا مايكل وعلشان بيحاول فى حاجتين فشل فى الإتنين عارف لو كان حاول فى حاجة واحدة كان فشل فى حاجة واحدة
يلا نسيبنا من طلبات المراسلة العرة اللى جاتلى انا كده كده بعد القرف اللى شوفته ده قفلت طلبات المراسلة خالص
والحمد لله ان اللى بيحب يكلمنى علشان عايز يحكى حاجة منكم بيبعتلى على الانستا
ودلوقتى خلص وقتى وجه وقت ان يدخل معايا فى اللايف اللى هيحكلنا النهاردة
وكالعادة طلب يحكى وهو فى الضلمة وده حفاظا على خصوصيته
ميرا بتقولى وليه كل اللى بيتكلمو فى اللايف بيحكو فى الضلمة
يمكن علشان لو فى النور مش هيحكو براحتهم يا ميرا
يمكن مش عايزينا نعرفهم او مش عايزين ناس فى حياتهم هما اللى يعرفوهم
يمكن هما كده مرتاحين اكتر
فى كل الأحوال هما احرار وانا اللى يهمنى انهم يحكو وان كلامى وكلامكم يساعدهم
يحكو بقى فى الضلمة فى النور يولعو شمع وهما بيحكو عادى براحتهم
ادينى دخلته اهو انت سامعنى
احمد :ايوه...ايوه يا خديجة سامعك مساء الورد
خديجة :مساء الورد يا احمد اخبارك ايه
احمد :انا تمام الحمد لله
الله يكون فى عونك على طلبات المراسلة اللى جاتلك دى كلهم يستاهلو البلوك بصراحة ايه السخافة دى
خديجة :يلا ادينى ريحت دماغى وقفلت طلبات المراسلة خالص
احمد :احسن حاجة
عارفة انا مبيجيليش طلبات مراسلة خالص الأكونت بتاعى على الفيسبوك معليهوش حاجة تقريبا وانا حتى مش مشارك فى جروبات كتير وحتى الجروبات اللى مشارك فيها مبتفاعلش فيها خالص
خديجة :هو ده اللى انت عايز تحكيه ولا انت حابب تتكلم فى اى حاجة مش اكتر
انا اسفة مش قصدى اضايقك انا بس قصدى انا ممكن اساعدك بإيه عايز تفضفض عن ايه
ايه مشكلتك يا احمد
احمد :ما هى دى مشكلتى يا خديجة
انا معنديش حد افضفض معاه او اتكلم معاه فى اى حاجة ونرغى فى اى حوار وخلاص
معنديش حد اشاركه حزنى او فرحى
ولا عندى حد يشاركنى حزنه او فرحه
انا معنديش صحاب غيرك ده لو ينفع اقول اننا صحاب
انا بقول كده على اساس انى بسمع حكاويكى عن نفسك وانى لما احتاجت احكى وتسمعينى انتى وافقتى كده نبقى نوعا ما صحاب صح
خديجة :صح الصحاب بيسمعو بعض وبيحكو لبعض وبالمنطق ده احنا صحاب
احمد :بس انا عايز صحاب يكونو موجودين فى حياتى
انا لوحدى يا خديجة والوحدة حاجة وحشة اوى
خديجة :عارفة
طيب انت عمرك ما كان عندك صحاب ولا كان عندك صحاب وبعدت عنهم او هما بعدو عنك
احمد :لا عمرى ما عملت صحاب فى حياتى
خديجة :ليه
احمد :مكنتش فاضى كنت بذاكر
انا اصلى طول عمرى متفوق
عارفة اللى بيكون بيطلع الأول على المدرسة ودايما بيذاكر حتى فى الفسحة وكل المدرسين ييشكرو فيه لما بيخلو كل الدفعة تكرهه وتغير منه
اهو ده انا عشت عمرى كله بذاكر حتى دلوقتى بقيت معيد فى الجامعة وبحضر ماجستير وده بالنسبالى حلو لأنى فعلا بحب المذاكرة والامتحانات
بس مؤخرا اكتشفت ان عمرى عدى وانا بذاكر فاتتنى حاجات كتير اوى واهمهم انى اعمل صحاب
لقد فاتتنى الحياة بينما كنت ادرس يا خديجة
خديجة :مفاتتكش ولا حاجة انت لسه عايش يعنى لسه عندك فرصة تعوض اللى فاتك
احمد :اعوضه ازاى انا معنديش ذكاء اجتماعى خالص مهارات التواصل عندى تكاد تكون معدومة
خديجة :مش انت معيد يعنى فى طلبة بتدرسلهم علاقتك بيهم عاملة ازاى
احمد :علاقة عادية بشرحلهم السكاشن باخد الاتندنس بستلم منهم الشيتات بشرحلهم لو فى حاجة مش فاهمينها كده يعنى
خديجة :ليه تعاملك معاهم ميرى كده انت مش كبير اوى عنهم
احمد :لا انا عندى ستة وعشرين سنة بس
خديجة :طيب يعنى ممكن تخلى علاقتك بيهم احسن من كده هزر معاهم خد وادى معاهم فى الكلام فى حدود طبعا لازم تفضل فى مكانة المعيد ولازم يحترموك ده اكيد بس ممكن تكون المعيد اللى هما بيحبوه وبيحترموه
وزى ما الناس كاتبينلك فى التعليقات روح جيم وحاول تتعرف على ناس هناك
وحاول تعمل صداقات مع المعيدين اللى معاك فى الجامعة فى ناس كاتبينلك اخطب بص هو فكرة انك تخطب دى مش وحشة بس متخطبش اى واحدة والسلام لازم تخطب واحدة فى بينكم تفاهم ويكون فى بينكم حاجات مشتركة علشان تعرفو تبقو صحاب وعلشان يبقى ينفع تتجوزو
شيل عينك من الكتب يا احمد وبص بيها على العالم حواليك واكيد هتلاقى صحاب وهيبقى عندك صحاب غيرى
انا سعيدة انك شايفنا اصحاب
احمد :مش انا بس ده اكيد احساس كل اللى بيتفرجو عليكى
انا نفسى تعملى كتاب انا هكون اول واحد يشتريه
خديجة :اعمل كتاب اكتب فيه ايه
احمد :حكاويكى او حكاوينا وردودك عليها
ناس كتير محتاجة كلامك حقيقى كلامك بيفرق مع ناس كتير وناس كتير محتاجينه
انا مبيفوتنيش ليكى لايف
خديجة :كلامك على راسى والله بس مش اى حد بيعرف يتكلم يعمل كتاب يا احمد
الكتاب ده حاجة كبيرة اوى ومهمة اوى
انا عن نفسى مدفعش ولو عشرة جنيه فى كتاب فيه كلام شبه اللى بقوله فى لايفاتى
زى ما انت قولت انا بفضفضلكم وانتم بتفضفضولى الفضفضة دى مكانها هنا وبس
انما هنكبر الموضوع واعمل كتاب ليه
احمد :على راحتك بس اتمنى فى يوم تغيرى رأيك لو فى كتاب اسمه حكاوى خديجة او احكى مع خديجة انا ادفع فيه فلوس كتير وانا الكسبان
خديجة :انت كلامك وتعبيراتك حلوة ومميزة واضح انك بتحب القراءة
اسمه :انا بحب الكتب جدا سواء قراءة واطلاع او مذاكرة مبيفرقليش انا حقيقى بحب الكتب
خديجة :طيب فى جروبات للكتب الناس عليها بتتناقش فى رأيها فى كتب وكتاب وحاجات كده جرب تشترك فى جروبات من النوع ده واتفاعل معاهم حتى لو مطلعتش بصحاب اديك هتلاقى ناس تتبادل معاهم الحوار وفى اهتمام مشترك بينك وبينهم ودى حاجة اكيد هتفيدك
احمد :فكرة حلوة هعمل كده
شكرا يا خديجة كالعادة كلامك مريح جدا
خديجة :شكرا ليك انت يا احمد
انا حقيقى اتبسطت بكلامى معاك
احمد :مش اكتر منى
ربنا يسعدك زى ما بتسعدينا وبتساعدينا بكلامك
خديجة :على فكرة انت بتعرف تقول كلام معبر ومنمق لو فكرت تكتب كتاب فى يوم انا هكون اول واحدة تشتريه
احمد :جربت قبل كده معرفتش الكتابة دى اصلها موهبة مش عند اى حد
مبسوط انى اتكلمت معاكى يا خديجة
مع السلامة
خديجة :مع السلامة يا احمد
وكده اللايف بتاعنا النهاردة خلص اشوفكم اللايف الجاى مع حكاوى جديدة منى ومنكم الى اللقاء يا حبايبى
