انا ابراهيم دكتور نفسي عندى خمسين سنة بس اللي شفته في حياتى واللى سمعته من المرضى بتوعى يخلونى عندى ولا مليون سنة خبرة في الدنيا طبعا طول سنين شغلي عدت عليا حالات كتير وبفضل الله عالجت حالات كتير
بس انا عايز احكلكم عن اربع حالات مالك ويارا وعلى وخديجة
الاربعة وغيرهم كتير حالات جاتلي بيعانو من نفس الحاجة وهى ان كلهم عندهم حياة سرية
حياة سرية بيتفرجو فيها على افلام اباحية ومنهم اللي بيتكلم في التليفون مكالمات اباحية والاربعة بيمارسو العادة السرية
زيهم زى آلاف ويمكن ملايين الناس دلوقتى للاسف
مالك كان بيتعالج عندى من عشر سنين
هبدءلكم بحكايته وباللى هو قالهولي في اول جلسة علاج ليا معاه
ابراهيم :بقالك نص ساعة قاعد ساكت انت مش جاي لحد هنا ودافع فلوس علشان تيجى تسمعنى سكوتك
مالك :مش عارف اقولك ايه
ابراهيم :قولي اللي انت جاى هنا بسببه
مالك :مش عارف اقوله محروج اللي هقوله وحش اوى
ابراهيم :مهما كان وحش قوله علشان اساعدك تتخلص منه ومتبقاش بتعانى منه في حياتك
مالك بتردد :انا..انا...اا ..ب..بمارس العادة السرية
ابراهيم :بقالك قد ايه
مالك :اربع سنين
ابراهيم :ليه
مالك :ليه ايه
ابراهيم :ليه بتمارسها يعنى بدأتها ليه
مالك :بسبب غضبي
ابراهيم :غضبك من مين
مالك :من ربنا
انا كنت بحب بنت جارتى كان اسمها ليلي كانت ملاك ماشي علي الارض وعايش وسطنا
هى كانت اصغر منى بتلت سنين انا اشتغلت من وانا اخر سنة في الجامعة علشان اقدر اتقدملها بشكل اسرع ومحدش يسبقنى وياخدها منى واتقدمتلها وهى وافقت واتخطبنا بس قبل فرحنا بتلت شهور عرفنا ان عندها سرطان فى الدم
اهلها صرفو كل اللي معاهم علي علاجها وانا كمان انا كنت مستعد اخسر اي حاجة بس مخسرهاش
وكنت بدعى ربنا كتير اوى يشفيها ويسبهالي لانى مش هقدر اعيش من غيرها بس هو مستجبش
ابراهيم :ماتت
مالك :ماتت رغم كل دعايا لربنا رغم انها كانت بتتعالج ربنا خدها منى وخلانى وحيد من غيرها في الدنيا
ابراهيم :وانت عملت ايه
مالك :عملت كل حاجة حرام وغلط معملتهاش في حياتى
شربت حشيش مبقتش اصلي ولا اصوم مقدرتش اعرف ستات معرفتش اخون ليلي بس بقيت بتفرج علي افلام اباحية وبمارس العادة السرية
بعد سنتين غضبي قل خصوصا ان اهل ليلي نفسهم صبرو علي فراقها ورضيو بقضاء ربنا
رجعت اصلي تانى وواحدة واحدة بطلت الحشيش بس معرفتش ابطل العادة السرية حاولت كتير ومقدرتش كانت زى حاجة مقدرش استغنى عنها مش عارف اوصلهالك ازاى زى...زى
ابراهيم :زى ادمان بالنسبالك
مالك :ايوه بالظبط بقيت مدمنها مع الوقت شهيتى قلت مكنتش بحس بالجوع تقرييا كمان بقيت بنفعل بسرعة بقيت عصبي جدا وده مينفعش مع شغلي انا شغال في قسم التسويق فى شركة استيراد وتصدير بعد اكتر من مشكلة عملتهم بسبب عصبيتى مشاكل مع عملا ومشاكل مع زمايلي قدمت استقالتى قبل ما هما يطردونى
ابراهيم :وقت الجلسة خلص نكمل الجلسة الجاية
مالك :تمام نكمل الجلسة الجاية
