ندى :انا عارفة والله انه حرام بس غصب عنى بيوحشنى انى اخرج بشعرى وهو حر كده والهوا بيطيره من غير الحجاب هو انا ربنا مش بيحبنى انا بحن لنفسى القديمة ليه يا حنين انا ماسكة نفسى بالعافية انى الف الحجاب اللى البنات بتلفه ده اللى هو مفيش فيه دبابيس وبيبين نص شعرهم
حنين :ده مش حجاب يا ندى الحجاب ستر لكل شعرك الحجاب طاعة لربنا هما كده مبيطيعوش ربنا دول مش مثال لا للحجاب ولا للمحجبات
ندى :عارفة وعارفة ان الحجاب بتاعهم ده ممكن يوصل لانى اقلع الحجاب اصلا وابقى باخدها خطوة خطوة بتنازل واحدة واحدة لعبة الشيطان المعروفة مبيقولكيش اعملى الذنب مرة واحدة لا بيجبهالك من بعيد اوى وتفضلى انتى خطوة بخطوة بتقربى لحد ما تعملى اللى هو عايزه
انا عارفة كل ده ومش فاهمة بتوحشنى ندى القديمة ليه انا اوقات مبخرجش لانى مش عايزة البس الحجاب وبحس انى عايزة انزل من غيره فبفضل فى البيت
مش اللى ربنا بيحبه بيحببه فى الحاجات الصح انا لسه بحب ندى القديمة ليه وبحنلها ربنا مبيحبنيش صح اعمل ايه علشان يحبنى طيب انا تعبت وخايفة من نفسى اوى يا حنين وشيطانى عمال يوسوسلى انى متحملة كل ده ليه ربنا مبيحبنيش ومش متقبل توبتى بدليل انى بجاهد نفسى فى لبس الحجاب وانى برغم انى بقالى سنة محجبة لسه متعودتش عليه وحبيته ولسه بحن لانى اكون بشعرى دماغى عمالة تقولى عليكى من ده بايه ما هى كده كده خربانة وتوبتك مش مقبولة اهو على الاقل ترجعى من غير الحجاب مرتاحة ومبسوطة وحياتك اسهل
حنين :دى كلها وساوس شيطان يا ندى انما انتى ربنا بيحبك بدليل انه عرفك ان اللى كنتى عليه حرام ان الله اذا احب عبدا فقهه فى الدين وانتى الحمد لله بقيتى عارفة فى الدين حاجات اكتر بكتير من زمان ربنا بيحبك واستكترك على الذنب وعلشان كده له الحمد خلاكى تبعدى عن الذنب ده وتتوبى عنه
انتى بتجاهدى نفسك وجهاد النفس ده اصعب جهاد عارفة انتى ممكن بجهادك لنفسك فى انك تتمسكى بحجابك ممكن تكونى بتاخدى اجر اكبر من اللى بتاخده واحدة مختمرة او واحدة منتقبة
ندى :معقول بس دول حجابهم اكبر منى ولبسهم اوسع ومتحملين حاجات اصعب من اللى انا متحملاها
حنين :الفكرة فى انك بتجاهدى نفسك فى لبسك للحجاب وبتقاومى اهلك اللى مش مقتنعين بيه لسه وبتقاومى انك لوحدك فى وسط اخواتك اللى محجبة وبتتحملى ضغطهم عليكى وبتقاومى حنينك لندى القديمة ممكن المختمرة او المنتقبة تكون بتجاهد نفسها جهاد اقل منك يمكن تكونى انتى اقرب لربنا منها الله اعلم مين فينا اقرب لربنا بس اللى انا عارفاه ومتأكدة منه ان ربنا بيحبك يا ندى وانك بتاخدى اجر كبير علشان بتجاهدى نفسك
بالنسبة لحكاية انك بتوحشك نفسك القديمة دى ده طبيعى انتى مش علشان اتغيرتى يبقى لازم تكرهى نفسك القديمة عادى تفضلى بتحبيها وتحنيلها بس تبقى عارفة انها كانت غلط وانك مينفعش ترجعى زى زمان لانك دلوقتى احسن لانك دلوقتى صح انتى احلى بكتير من غير الحجاب يا ندى وعلشان كده انتى لبساه علشان جمالك ده مش لأى حد يشوفه انتى من غير الحجاب واللبس اللى الحجاب مخليكى ملتزمة بيه حياتك هتبقى اسهل حركتك اسهل انك تلاقى اللبس اللى هتلبسيه اسهل بدل ما بتلفى كتير علشان تلاقى لبس مناسب للحجاب وعلشان كل ده انتى بتاخدى اجر كبير على لبسك للحجاب لانك بتتحملى كل ده علشان تطيعى اوامر ربنا اللى فرض علينا لبس الحجاب
صديقتى الجميلة القوية انتى بطلة
ندى :بجد اومال انا ليه مش حاسة كده
حنين :علشان مفكرة ان حنينك لنفسك القديمة غضب من ربنا عليكى كلنا بنحن لنفسنا القديمة يا ندى
ندى :اعمل ايه طيب لما احنلها
حنين :متعمليش حاجة بس فكرى نفسك انها كانت غلط وانك دلوقتى صح اقرى عن فضل الحجاب واجره اسمعى خطب عن الحجاب قاومى نفسك ومتستسلميش لشيطانك ووساوسه
ندى :حاضر هعمل كده بس انتى قولتيلى ان ربنا بيحبنى
حنين :بيحبك يا ندى والله بيحبك وبيحبنا كلنا ربنا كريم اوى وقريب مننا وحنين علينا احنا ملناش غيره
ندى :معاكى حق ..جاتلى فكرة انا هنزل اشترى حجابات جديدة
حنين وهى بتضحك :بقالى سنة بحفظك فيها اسمها طرح والواحدة منها اسمها طرحة جبتى حجابات دى منين مش فاهمة
ندى وهى بتضحك :ماشى يا ستى طرح بعد الكلية هروح اشترى طرح جديدة اهى حاجة اجدد بيها طاقتى للحجاب ماشى
حنين :فكرة حلوة جدا
ندى :هتيجى معايا
حنين :طبعا هاجى معاكى ودى محتاجة سؤال برضه
ندى :عارفة يا حنين انتى احلى حاجة حصلتلى فى حياتى بسببك انا عرفت حاجات كتير صح انا بحمد ربنا انى عرفتك
حنين :انا كمان بحمد ربنا انى عرفتك يا ندى انتى نقية وقلبك ابيض وروحك حلوة وقوية لما بتعرفى حاجة صح بتحاولى انك تعمليها ولما بتعرفى عن حاجة انها غلط بتحاولى تبعدى عنها انا فخورة بيكى وفخورة انك صاحبتى
ندى :بجد
حنين :بجد جدا طبعا
ندى :عارفة انا بحس ان انتى احسن منى بكتير اوى
حنين :ده مش حقيقى انا بصلى ولابسة الحجاب من صغرى لان اهلى ربونى على كده فطبيعى اطلع كده انما انتى اهلك معملوش معاكى كده ومع ذلك لما عرفتى الصح بقيتى بتعمليه يعنى انتى مميزة اكتر منى بكتير والله اعلم مين فينا اقرب لربنا انا ولا انتى
ندى :ان شاء الله احنا الاتنين نكون قريبين منه واحنا الاتنين نكون فى الجنة سوا
حنين :اللهم امين عايزاكى تدعى لنفسك ان ربنا يثبتك على الحجاب
ندى :ادعى وانا ساجدة فى الصلاة زى ما قولتيلى
حنين :وادعى كمان فى الوقت اللى بيكون بين الاذان والاقامة ده بيكون مستجاب الدعاء فيه
ندى :حاضر هعمل كده
حنين :فى حاجة يا زياد
زياد :انتى بتكلمى ندى خلاص كملى كلام معاها نبقى نتكلم بعدين
حنين :ندى انا هقفل واشوفك بكرة فى الجامعة
ندى :ماشى يا حبيبتى مع السلامة
