عمر :سايبة الفرح وواقفة بره لوحدك ليه
هنا :فقرة الجاتوة فقرة من ضم فقرات بكرهها فى الافراح اكيد الوقفة قدام البحر كده احلى مية مرة من اللى بيحصل فى القاعة دلوقتى
عمر :سمعت انك هتقعدى مع عريس كمان يومين
هنا :ان شاء الله
عمر :وهتعملى ايه لو سألك عنى
هنا :هجاوبه
عمر :هتجاوبيه..هتقوليله انى سيبتك
هنا :اه
عمر :عادى كده
هنا :اه
عمر :مش فارقلك يعنى ان انا اللى سيبتك
هنا :انت بتحسبها غلط
عمر :ازاى يعنى بحسبها غلط انا متأكد ان انا اللى سيبتك
هنا :وجودك مكنش مكملنى وبالتالى غيابك مكنش صعب عليا يا عمر
انت اللى سبتنى ده حقيقى بس مخدتش بالك انى متمسكتش بيك
عمر :عمرى ما فكرت فى الحكاية دى
هنا :لانك عمرك ما فكرت غير فى نفسك كل اللى كان فارقلك ان انت اللى تسبنى انك تخطب احلى بنت فى العيلة وانت اللى تسيبها
عمر بتوتر :لا..ااا..ده مش حقيقى انا سيبتك لانى مكنتش مرتاح معاكى
هنا :بص يا عمر غير انك كنت خاطب احلى بنت فى العيلة فانت كمان كنت خاطب اذكى بنت فى العيلة
عمر :قصدك ايه
هنا :قصدى انى فهمتك قضيت شهور بعد فسخ خطوبتنا بفكر فى ليه انت عملت كده بفكر فى كل حاجة عملتها معايا ووصلت للتفسير ده انت خطبتنى علشان يتقال انك خطبت احلى واحدة فى العيلة وسيبتنى علشان يتقال ان انت اللى سبتنى مشكلة ثقة فى النفس بتحاول تعوضها ونقص بتحاول تداريه لما فهمت ده مبقتش مضايقة منك بالعكس بقيت صعبان عليا
عمر :انا دكتور وناجح ومهتم بشكلى ولبسى انا حلم كل بنت كل ام تتمنى يكونلها ابن زيى انا اللى سيبتك المفروض يصعب عليكى نفسك مش انا اللى اصعب عليكى
هنا :انت فعلا دكتور وناجح ووسيم وتتمناك اى بنت بس ده كله مش كفاية يضيعلك احساسك بالنقص اللى كانت السبب فيه مامتك اللى سابتك لجدى وراحت اتجوزت وخلفت بعد موت عمى انت عملت كل حاجة تخليك الابن المثالى اللى تتمناه كل ام علشان تضيع احساسك بان مامتك اتخلت عنك علشان تضيع احساسك بانك مكنتش كفاية ليها
عمر :انتى ازاى ..
هنا قاطعته :انا مبحاولش اجرحك او اضايقك بكلامى يا عمر انا مبكرهكش على فكرة ولا حتى مضايقة منك كنت مضايقة فى الاول بس لما فهمت مبقتش مضايقة منك بقيت مضايقة علشانك خرج نفسك بره الدايرة دى يا عمر متضيعش عمرك بتثبت لنفسك انك مكنتش تستاهل اللى مامتك عملته فيك
روح لدكتور نفسى لو محتاج لمساعدته
عمر :علشان كده بقيتى بتتعاملى معايا عادى بعد ما كنتى بتتجنبينى من بعد ما فسخت الخطوبة علشان صعبان عليكى بتشفقى عليا يا هنا
هنا :لا مبشفقش عليك بس فهمت انك متستاهلش اكرهك فهمت ان مشكلتك مكنتش معايا مشكلتك مع نفسك واى واحدة كانت هتكون معاك انت كنت هتعمل فيها كده
لما فهمت ارتحت لان اللى عملته كان مضايقنى بس عمره مهز ثقتى فى نفسى عارف ليه يا عمر لانى ثقتى فى نفسى بستمدها من نفسى مش منك ولا من اى حد خليك زيى
عمر :انا..
هنا قاطعته :انا لازم ارجع القاعة زمان فقرة الجاتوة خلصت من بدرى
عمر :هنا انتى اتكلمتى مع اى حد فى اللى قولتيهولى ده
هنا بابتسامة :لا متقلقش انا وانت اهل يعنى دم واحد والاهل ميعملوش كده فى بعض
انا بس كان لازم افهم علشان ارتاح
عمر :وارتحتى
هنا :ارتحت وكلمتك دلوقتى علشان انت كمان ترتاح انت تستاهل ترتاح اللى فات من حياتك كان صعب يا ابن خالى مش لازم الجاى كمان يكون صعب
هدخل انا بقى القاعة بعد اذنك
