هند بابتسامة :الف مليار مبروك الترقية يا عمرى
زياد بابتسامة :الله يبارك فيكى يا حبيبتى
هند :اتفضل
زياد :ايه دى
هند وهى بتفتح الشنطة :دى بدلة جديدة هدية الترقية للهيرو حجى
زياد وهو بيضحك :الهيرو حجى اللى بتقوليهالى دى رهيبة لا وكمان مسجلانى كده على موبايلك
هند وهى بتضحك :اسم مميز هاتلى واحدة فى مصر مسجلة جوزها كده غيرى
زياد وهو بيضحك :مش هلاقى غيرك بس هو انتى مسجلانى كده علشان الاسم مميز
هند بابتسامة :لا مسجلاك كده لانى شايفاك كده انت كده فى عينيا وعلشان كده فكرت فى الاسم ده ليك المهم البس البدلة عايزة اشوف شكلها عليك
زياد وهو بيلبس البدلة :لونها حلو اوى
هند :طبعا الكحلى لونك المفضل اعتقد انك الوحيد فى العالم اللى الكحلى لونه المفضل
زياد :جايبة كرافتة كمان تعالى اربطيهالى طيب
هند وهى بتربطهاله:من عيونى بسم الله ما شاء الله البدلة تحفة عليك
زياد بابتسامة :حلوة عليا
هند :حلوة لانك لبستها القالب غالب يا عمرى
زياد :جبتيها بكام
هند وهى بتضحك :فى حد يسأل عن سعر هدية جاتله اكيد مش هقولك
زياد :يا هند اكيد غالية وكلفتك كتير
هند بابتسامة :مفيش حاجة فى الدنيا تغلى عليك وبعدين الغالى للغالى المهم تكون عجباك
زياد وهو بيبص لنفسه فى المرايا :عجبانى اوى زوقك حلو فعلا
هند :طبعا زوقى حلو مش اختارتك انا فرحانة انك الحمد اخدت الترقية وان ربنا كرمك وعوض تعبك خير واستجاب دعايا
زياد :انتى دعتيلى
هند :دعيتلك انا بقالى اسبوع فى كل سجدة من كل صلاة بدعيلك انت بس بدعيلك ربنا يجازيك عن تعبك خير وتاخد الترقية دى وتفرح وترتاح
زياد :مش محتاج الترقية علشان افرح وارتاح يا هند كفاية انك جمبى ومعايا مش محتاج اكتر من كده علشان اكون فرحان ومرتاح متدعليش افرح وارتاح خليكى جمبى وانا هفضل فرحان ومرتاح طول عمرى
هند :انا جمبك ولاخر عمرى هفضل جمبك انا مقدرش اعيش من غيرك يا زياد
زياد :ربنا ما يحرمنى منك
هند :ولا يحرمنى منك
زياد وهو بيقلع البدلة :انتى اشتريتى البدلة دى امتى
هند :النهاردة بعد الشغل
زياد :خدتى حد من اخواتك او اصحابك معاكى
هند :اااا...لا روحت لوحدى
زياد :لوحدك..روحتى محل رجالى واكيد كل اللى شغالين فيه رجالة لوحدك يا هند
هند :الله يا زياد مش علشان اجبلك البدلة
زياد :وطبعا ممكن يكون معجبكيش حاجة فى اول محل دخلتيه فقومتى داخلة خمس ست محلات ولا حاجة
هند :لا جبتها من تانى محل دخلته
زياد :لا فيكى الخير دخلتى محلين بس واتكلمتى مع الرجالة اللى شغالين فيهم غير الرجالة اللى كانو فى المحلين بيشترو هما كمان كل ده وانتى لوحدك
هند وهى بتخرج :اه ابتدينا خناقة كل مرة لا انا مش عايزة اتخانق انا هروح احط الغدا علشان ناكل
زياد وهو بيدخل وراها المطبخ :اتكلمتى مع مين وقولتو ايه
هند وهى بتغرف الاكل :سألت على بدلة كحلى بمقاسك يا زياد ووفقت معاها قميص وكرافت حتى دبابيس البدلة جبتها من نفس المحل كلام عملى وبسيط اكيد البياع مكنش بيقولى نكت يعنى
زياد :لا احكى بالتفصيل
هند :تفصيل ايه اكتر من كده ده انا كنت صورتلك نفسى فيديو اسهل اهو تشوف بنفسك كل تحركاتى وتعد عليا النفس اللى بتنفسه براحتك
زياد :انا بعد عليكى النفس اللى بتتنفسيه يا هند
هند :انا حطيت الاكل انت اكيد راجع جعان اقعد كل ولما تخلص اكل عرفنى علشان اجى اشيله واعملك الشاى
زياد :وانتى مش هتاكلى
هند :لا مش عايزة اكل كل انت
زياد وهو بيمسك ايديها :مش هعرف اكل من غيرك خلاص بقى متقفشيش
هند :انا مبقفش يا زياد بس دى مش اول مرة
زياد :ولا هتبقى اخر مرة اعمل ايه طيب فى نفسى بحبك ومبتحملش حد يشوفك غيرى خلاص بقى متزعليش ويلا علشان ناكل انا هموت من الجوع ومش هاكل لو مكلتيش يرضيكى مكلش اهون عليكى
هند :متهونش وانت عارف خلاص يلا علشان ناكل
زياد وهو بياكل :بس البدلة اللى انتى جبتيهالى حلوة اوى الواد شريف وقت خطوبته كان بيدور على واحدة زيها وملقاش لما يشوفها عليا هيسألنى جبتها منين
هند وهى بتاكل :هبقى اقولك المكان اللى جبتها منه لو سألك قولهوله اصلا عايزاك اى حد يشكرلك فيها قولهم هند اللى جابتهالى
زياد :نعم يا اختى اقولهم هند اللى جبتهالى
هند :قولهم مراتى يا زياد قول الجماعة او الحكومة اقولك قولهم الفرخة اللى آنيها فى البيت جابتهالى قولهم اى حاجة تريحك وابوس ايدك غير الموضوع انا وعهد الله ما حمل خناق ولا مناهدة
زياد :الغيرة مش خناق ولا مناهدة يا هند الغيرة حب
هند :الغيرة لما بتزيد بتخنق يا زياد عايزاك تفكر فى كلامى وتحاول تتحكم فى غيرتك شوية انا خايفة غيرتك تموت حاجات حلوة بينا
زياد :لا اكيد ده مش هيحصل
هند :يا رب ميحصلش يا زياد يا رب
