نعمان :رفضتى محمد خلاص
نادين :ايوه طبعا
نعمان :مش كنتى فكرتى شوية اكتر يا نادين
محمد عريس كويس
نادين :لواحدة غيرى
كويس ومناسب وزى الفل لواحدة غيرى
نعمان :انتى رفضتيه ليه
نادين :لأسباب كتير
محمد ابن خالتى وانا عارفاه كويس هو اتقدملى دلوقتى علشان انا بقيت خريجة جامعة لو كنت فضلت دبلوم زى ما انا ولا كان هيبص فى وشى حتى
وعلشان يضايق على علشان يبقى اتجوز اللى على مقدرش يتجوزها
هو مفكرنى انا اللى سيبت على
نعمان :وهى مش دى الحقيقة
نادين :لا
الحقيقة ان على هو اللى سابنى وهو اللى خلانى اسيبه
انما انا وقتها مكنتش عايزة اسيبه
مكنتش اقدر حتى اسيبه
على وقتها بالنسبالى كان هو دنيتى نفسها
فى حد يسيب دنيته
نعمان :انا فاكر وقتها انتى رفضتى تسمعى كلامه ومتدخليش كلية تجارة
انتى اللى رفضتى يعنى انتى اللى سيبتيه
نادين :رفضى انى مدخلش الكلية ده كان الحاجة الوحيدة اللى رفضتها
على رفض حاجات كتير
رفض ادخل الكلية
رفض اننا نتجوز واكمل اخر سنتين عنده
رفض اننا نتجوز وادخل الكلية وانا متجوزاه
تخيل انا كنت مستعدة ابقى متجوزة ومسئولة عن زوج وبيت وولاد انا قولتله انى مش هأجل الخلفة خالص
انا كنت مستعدة اتحمل حاجات كتير واضحى بحاجات كتير علشان يوافق بس هو رفض
ببساطة رفض
قالى انا مش هتحمل مراتى تبقى اعلى منى
نعمان :انتى كنتى بتحبيه اوى وعلشانه مستعدة تتحملى حاجات كتير
مكتفيتيش بالدبلوم ليه
نادين :مكنتش هستحمل ابقى اقل من اخواتى
وجاتلى فرصة اعوض بابا وماما عن انى خيبت املهم ومعرفتش ادخل ثانوى عام
مقدرتش ادوس على الفرصة دى برجلى علشان على يرضى
بينى وبينك جه عليا وقت فكرت فيه اعمل كده
بس ماما اتكلمت معايا وقالتلى انى بعد شوية هكره على لأنى هشوف انه السبب
وانى علشانه عملت كده
فكرت لقيت ان ده ممكن يحصل
خصوصا وانى كنت بفكر وقتها ان على مبيحبنيش كفاية
مبيحبنيش حب يخليه يتحمل انى ادخل الكلية حتى لو هو مدخلهاش
بيحب كرامته وعزة نفسه كراجل اكتر منى
نعمان :يمكن خاف عليكى
الراجل لما بيحس ان مراته اعلى منه بتولع نار جواه
نار علشان يطفيها ممكن يعمل اى حاجة
يهين مراته يقل منها وممكن توصل انه يضربها
يمكن على بيحبك وعلشان بيحبك مرضيش انكم تبقو فى وضع يخليه فى يوم يعمل فيكى كده
كان بيحميكى من نفسه
نادين :ممكن
وبرضه بيحمى نفسه وكرامته وعزة نفسه
انت متعرفش على عنده كرامة وكبرياء وعزة نفس عاملين ازاى
انا اتعلمتهم منه
دول اكتر حاجة كنت بحبها فيه
وهما برضه السبب فى اننا مكملناش سوا
نعمان :انتم متخطبتوش صح
نادين :لا بابا وخالى كانو قاريين الفاتحة بس والخطوبة كانت هتبقى بعد ما اخلص الدبلوم
نعمان :يعنى على ابن خالك ومحمد ابن خالتك
الوضع كان هيبقى صعب اوى لو كنتى وافقتى على محمد
نادين :اهو الوضع الصعب ده هو اللى محمد عايزه
علشان يحس انه اتفوق على على وقدر يكسره
غبى ميعرفش ان على مبيبصش وراه على بيبص قدامه وبس
نعمان :انتى لسه بتحبيه
نادين :لا
نعمان :لا لما تلؤك
انتى بتحبيه انتى مش شايفة نفسك بتتكلمى عنه ازاى
نادين :انا بطلت احبه
بس مبطلتش احترمه ومبطلتش اشوفه راجل وناجح وطموح وعنده كبرياء وعزة نفس قد الدنيا
على واثق فى نفسه اكتر من محمد
مع ان محمد المفروض احسن
لأنه خريج جامعة
وعلى بس دبلوم
بس الحقيقة ان على ناجح اكتر من محمد على المستوى المادى
وعلى مستوى الشخصية على شخصيته أقوى وافضل من شخصية محمد بكتير
على اتجوز وخلف انا مبقيتش اكتر من بنت عمته
الكل مفكر ان انا اللى سيبت على علشان ادخل الجامعة والاقى حد يليق بيا
والحقيقة ان على هو اللى سابنى
لما خيرنى بينه وبين كليتى
ورفض رفض تام انى ادخلها
نعمان :الحقيقة ان انتم الاتنين سيبتو بعض
بس انتى متأكدة ان على مكنش هيضايق لو كنتى وافقتى على محمد
نادين :كان هيضايق علشانى مش منى
هيضايق لأنه هيشوف انى استاهل حد احسن من محمد
على مبيغيرش من محمد
ومحمد ولا فى دماغه اصلا
وده اللى حارق دم محمد اكتر
كمان انا قولتلك على مبيبصش وراه وانا بالنسباله صفحة وقلبها
انا اتعلمت الحكاية دى منه
نعمان :لو فتحنا قوس وحطينا فيه على وخدنا فاصلة وحطينا محمد تختارى مين فيهم
نادين :هحط فاصلة كمان واحط واحد بشخصية على وبمواصفات محمد وهقفل القوس
وبعدين هختاره
نعمان :واحد بشخصية على
قولتلك انك لسه بتحبيه
نادين :لا صدقنى بطلت
مبغيرش ولا بضايق لما بشوفه مع مراته
مبشيلش بنته وافكر انها كان المفروض تكون بنتى انا وهو
انا بطلت احب على
بس مبطلتش احب شخصيته
نعمان :ومواصفات ايه فى محمد اللى عايزاها
ومن كلامك هو انسان فاقد الثقة فى نفسه وبيحقد على على
نادين :فيه مواصفات كويسة
ابن خالتى يعنى عارفاه وعارفة انه ابن اصول
جامعى وشاطر فى شغله
مش بتاع بنات ولا قليل الادب
كويس مع خالتى وجوزها واخواته
محمد فيه حاجات كتير كويسة
ما عدا حاجتين
غيرته الشديدة من على
وانه عنصرى وطبقى بيقسم الناس حسب شكلهم او فلوسهم او عيلتهم او كلياتهم
نعمان :لو مكنش فيه الحاجتين دول كنتى وافقتى عليه
نادين :لا لأنى عمرى ما شوفته اكتر من ابن خالتى
بس على الاقل يمكن وقتها كنت فكرت شوية قبل ما ارفض
ميبقاش رفضى ليه قاطع ومن غير تفكير ولا تردد كده
