زياد :الو لميس معايا
لميس :ايوه انت اكيد زياد
زياد :عرفتى منين
لميس :توقعت رقم غريب بيكلمنى وعارف اسمى توقعت انه انت
زياد :مضايقة انى بكلمك
لميس :لا شايفاها فرصة كويسة المرة الوحيدة اللى شوفتك فيها بحضور والدك ووالدتك واخواتك وبابا وماما واخواتى كأنها حفلة عيد ميلاد مش قعدة تعارف ليا انا وانت
زياد :صراحة مكنتش عارف اتكلم معاكى كلمتين على بعض فى وجودهم كلهم ومش فاهم ازاى متخيلين اننا هنعرف نتكلم كده اخد قرار ازاى وافكر بناءا على ايه وانا معرفتش اسألك عن اى حاجة تقريبا وعلشان كده قولت لماما تطلب من والدتك اننا نتكلم فى الموبايل صراحة اتحرجت اطلب اجيلكم تانى
لميس :ولو طلبت ما هى كانت هتبقى حفلة عيد ميلاد تانية زى اللى فاتت لا كده احسن واعتقد حتى التوتر كده اقل عن لما كان لو اتكلمنا وش لوش
ها كنت عايز تسألنى عن ايه ومعرفتش
زياد :خطيبك الاولانى
لميس :عايز تعرف سيبته ليه
زياد :اه بس الاهم عايز اعرف ليه رافضة ترجعيله اوى كده ماما قالتلى انه حاول كتير يرجعلك بس انتى رافضة رفض تام وكونه رغم كرامته ورجولته يحاول كتير يرجعلك رغم رفضك المتكرر فدى حاجة كبيرة مش صغيرة
لميس :هى حاجة كبيرة فعلا بس عارف ايه الاكبر من انه يجى على كرامته ويفضل بيحاول يرجعلى
زياد :ايه الاكبر من كده
لميس :اللى هو عمله الغلط اللى هو غلطه اكبر من ان كلمة انا اسف او انه يحاول بدل المرة اتنين وعشرة انه يرجعلى
زياد :هو عمل ايه بالظبط
لميس :خانى بكذا طريقة
زياد :يعنى ايه خانك بكذا طريقة
لميس :يعنى خانى انواع مختلفة من الخيانة عرف بنات وهو خاطبنى ده نوع من الخيانة وعدنى وعود كتير منفذش منها وعد واحد بس حتى وده نوع تانى من الخيانة كسر ثقتى فيه وثقتى فى نفسى وده نوع تالت من الخيانة تقدر تقول كده هو مفيش نوع من انواع الخيانة مخانهوليش ومعلش مش هقدر احكى بتفاصيل
زياد :ليه الموضوع بيوجعك
لميس :لا لو كان لسه بيوجعنى مكنتش قبلت انك تتقدملى واشوفك كل الفكرة انى مش هكون مرتاحة وانا بعرفك اسراره او بقولك مواقف غلط عملها حسا ان دى حاجة غلط ومش من حقى
زياد :هتحسى انك بتخونيه بتعتبرى انك تتكلمى عن غلطاته وعيوبه نوع من انواع الخيانة ليه
لميس :هحس انى بخون نفسى لان ده ضد مبادئى واللى عنده مبدء بيمشى عليه مع الكل مع اللى يستاهل واللى ميستاهلش لو عملت كده مبقاش صاحبة مبدء
زياد :كلامك صح بس برضه مش متخيل انك رفضتى ترجعيله رغم كل محاولاته دى
لميس :انت بتفكر بس فى قد ايه هو ندمان على اللى عمله وعلشان كده بيحاول يرجع ومفكرتش ان يمكن الفكرة فيا انا اللى استاهل كل اللى هو بيعمله ده واكتر
زياد :ده غرور
لميس :لا مش غرور دى معرفة للنفس انت عارف هو بيحاول يرجعلى اوى كده ليه
زياد :ليه
لميس :خطب بعدى مرتين وفسخ هو جرب يعرف غيرى وملقاش الاحسن يعنى هو مش من نفسه ندم وعرف قيمتى لا هو الايام ربته وعرفته قيمتى هو لو كان لقى الاحسن مكنش رجع ولو بيحاول كتير اوى كده فده لانه عارف انى استاهل ده عارف بقى ايه اللى انا مستاهلوش
زياد :ايه
لميس :اللى هو عمله ده اللى انا مكنتش استاهله وعلشان كده انا مستحيل ارجعله وهو يستاهل يندم مش غلط وانا مش فارقلى يندم ولا لا بس مش هنكر ان اصراره على الرجوع ردلى جزء من كرامتى قدام نفسى وقدام اهلى
زياد :انتى مبتعرفيش تسامحى
لميس :لا الحمد لله بعرف بس بسامح اللى يستاهل السماح ومش كل الناس تستاهل السماح ولو فرضا عرفت اسامحه مش هعرف ارجع اتعامل معاه هو شوه صورته فى عينيا كل ما هشوفه مش هشوف غير نسخة مشوهة نسخة عمرى ما هعرف اثق فيها ولا أامنلها ولا اعتمد عليها تانى كمان انت بتحاول تقنعنى ارجعله فى اول مكالمة بنا على الموبايل لو مش موافق عليا تقدر تقول ده ببساطة عادى يعنى
زياد :مش هتزعلى لو عملت كده
لميس :هزعل ليه انا معرفكش وانت متعرفنيش محدش فينا هيكسر قلب التانى برفضه ودى الميزة فى الصالونات انت عندك الاوبشن انك ترفض من غير ما يرفلك جفن انما تخيل لو متقدم لواحدة بتحبها حتى لو ظهرتلك عيوب فيها او لقيت انك مش متوافق مع اهلها او اهلك مش حابينها او مش حابين اهلها انت مجبر تحاول توفق بينهم ومجبر تكمل فى الموضوع
زياد :وايه اللى هيجبرنى
لميس :قلبك انت حبيت قبل كده
زياد :افندم
لميس :بسألك انت حبيت قبل كده
زياد :سمعتك بس مش شايفة ان سؤالك غريب شوية بالنسبة للوضع اللى احنا فيه
لميس :وهو ايه الوضع اللى احنا فيه الموضوع بسيط واحدة مرتاحتش منك او واحدة قلبى مقبوض منى قادرين يفركشو الموضوع ويجيبو ضلفه الموضوع بسيط يعنى انت تقدر تجاوبنى بصراحة
زياد :انتى غريبة
لميس :لا انا بسيطة مبحبش التعقيد كمان انت عرفت حاجات خاصة عنى لما كلمتك عن خطيبى الاولانى لو معرفتش حاجات خاصة عنك انا كمان هحس بالضيق والحرج شوية
زياد وهو بيضحك :لا انتى بجد غريبة انتى مبتفكريش فى الكلام قبل ما تقوليه
لميس :لا طبعا بفكر فيه
زياد :ومع ذلك بتقوليه برضه
لميس :لانه صح بص لو انت وقعت فى الشارع قدام صاحبك هتحس بايه
زياد :هتحرج خصوصا لو ضحك هو
لميس :بالظبط بس لو وقعتو انتو الاتنين انتو الاتنين هتضحكو ومحدش فيكم هيتحرج من التانى
فهمت قصدى
زياد :فهمت انتى عميقة
لميس :انت كمان
زياد :ليه بتقولى كده
لميس :لانك سألتنى كل ده عن خطيبى الاولانى علشان تعرف اذا كنت لسه بفكر فيه ولا لا تتأكد انى مثلا مش بحاول اغيظه بيك وتعرف حاجات عن شخصيتى
زياد وهو بيضحك :انتى مش سهلة على فكرة يعنى عارفة انى بسأل علشان كده وبرضه جاوبتينى بصراحة
لميس :لان ده حقك حقك تعرف حقك تطمن حقك تفهم
وقبل ما استنى منك تكون صادق معايا لازم اكون انا الاول صادقة معاك
وانا جاوبتك بصدق دورك تجاوبنى
زياد :عايزة تعرفى حبيت قبل كده ولا لا
لميس :متوقعة الاجابة مش معقول عايش فى الدنيا بقالك تمنية وعشرين سنة ومحبتش ولا حتى مرة واحدة
زياد :مش هيفرقلك لو كنت حبيت قبل كده
لميس :اللى يفرقلى انك متكونش بتحب دلوقتى ده حقى عليك او يعنى ده هيبقى حقى عليك لو الموضوع كمل
صدقنى ده مش فخ انا بسأل عادى ومش متوقعة منك اجابة افلاطونية ساذجة تقولى فيها انك مجربتش غير حب ربنا وحب اهلك واصحابك وحب الوطن بس
زياد وهو بيضحك :ماشى هجاوبك جربت كل اللى انتى قولتيه ده وجربت الحب اللى بجد مرتين
لميس :احكى طيب
زياد :اول حب كان فى الجامعة ارتبطنا شوية كده بس بعدين هى زحلقتنى
لميس :ليه حصل مشاكل
زياد :لا سابتنى علشان واحد فى اتحاد الطلبة روش وكل الدفعة عارفاه
لميس :ايه ده دى واطية اوى طيب والتانية
زياد :التانية كانت فى شغلى القديم يوم لما جيت اعترفلها لقتها جايبة للمكتب كله جاتوه بمناسبة خطوبتها
لميس :ايه الحظ ده انت يعنى مكنتش عارف تتكلم قبل كده ولا حتى تلمحلها
زياد :قولت هاخد الموضوع جد بلا ارتباط بلا لعب عيال وعلى ما ظبطت امورى وكنت هقولها واطلب رقم والدها خدها الغراب وطار قصدى خدها العريس وطار
لميس :ومن بعدها محبتش
زياد :لا
لميس :ايه اتعقدت
زياد :لا متعقدتش ولا حاجة بس محصلش وخلاص
لميس :وايه اللى خلاك تتقدملى وانت متعرفنيش
زياد :واحد صاحبى اتجوز بالطريقة دى وبينى وبينك مبسوط اوى فقولت اعمل زيه يمكن تمشى معايا زى ما مشيت معاه خصوصا انى محبتش ولا اتشديت لحد من اللى اعرفهم يعنى
وانتى قبلتى تشوفينى ليه
لميس :اصلى لقيت ان اللى اعرفه مجاش منه غير التعب فقولت ادى فرصة للى معرفوش يمكن يكون هو الخير اقولك حاجة
زياد :قولى
لميس :اعرفه معرفوش هيفضل الجواز زى البطيخة اصلك مهما عرفت حد فكرة انكم تعيشو سوا فى بيت واحد وتتشاركو الحياة دى حاجة تانية خالص
زياد :وتفتكرى انا بطيخة حمرا ولا قارعة
لميس وهى بتضحك :وبتقول عليا انا اللى غريبة ايه السؤال ده
زياد :جاوبنا بعض على اسئلة اغرب منه فجاوبيه مجتش عليه
لميس :هو انا معرفش واكيد مش من قعدة معاك ولا من مكالمة تليفون هعرف هحتاج وقت طويل شوية علشان اعرف اجاوب السؤال ده
زياد :طيب ايه رايك يكونلنا مع بعض الوقت الطويل ده
لميس :مش فاهمة قصدك
زياد :قصدى يعنى ايه رايك ندى بعض فرصة نعرف بعض ونتخطب
لميس :هو انا اه بسيطة بس مش لدرجة انك تعرف موافقتى او رفضى منى مش من بابا
زياد :مفكرتكيش تقليدية كده
لميس :مش فكرة تقليدية ولا مودرن الفكرة ان هو ده الصح
كمان انت ليه متسرع كده احنا بنتكلم فى الموبايل علشان نعرف بعض اكتر فرصة ومتاحة ليك ليه تضيعها كده
زياد :مش حاسس انى محتاجها بس واضح ان انتى اللى محتاجاها عموما تمام نتكلم شوية كمان علشان تعرفى تاخدى قرار
لميس :تمام نكمل كلام بكرة بقى اتكلمنا كتير النهاردة
زياد :خلاص ماشى مع السلامة
لميس :مع السلامة
