مريم بابتسامة :صباح الخير يا عمى
عامر :صباح النور يا بنتى
مريم :انا حضرت الفطار
عامر :مش قادر اقوم اقعد بره دلوقتى
افطرى انتى وانا شوية كده وهبقى اخرج من الاوضة افطر
مريم :خلاص انا هحط الاكل على صينية ونفطر هنا انا وانت
عامر :كده هنبهدل الأوضة والسرير ممكن يتوسخ
خلاص انا هخرج
مريم :فداك يا عمى
ولو انت هتضايق منها لو كلنا فيها
انا بعد الفطار انضفها وامسحها وارش معطر كمان
عامر :مفيش ريحة احلى من ريحة الطبيعة الورد والنعناع والريحان ومسك الليل
انا زارع الحاجات دى عندى مخليين ريحة البيت دايما حلوة
مريم :شكلك بتحب الزرع اوى
هروح اجيب الفطار وتحكيلى عنه بقى
عامر :كل واحد فى الدنيا ليه هواية وغية
فى اللى بيلعب رياضة واللى بيكتب واللى بيربى حمام
انا بقى بحب ازرع
مكنتش مركز مع حكاية الزرع دى بسبب شغلى
بس لما طلعت معاش مكنش عندى حاجة تشغلنى الا الزرع
مريم :انا خدت بالى ان فى زرع كتير عند حضرتك فى البيت
بس فكرت طنط الله يرحمها هى اللى كانت زرعاه
وحضرتك بعدها بقيت تهتم بيه
عامر :لا فاطمة مكنلهاش فى حكاية الزرع دى
مكنتش هتصدق لو قالولها انى ازرع واطول بالى على حاجة واهتم بيها
مريم :الله يرحمها
واضح ان حضرتك كنت بتحبها
عامر :اه كنت وما زلت
فاطمة هى الست الوحيدة اللى حبيتها فى عمرى كله
مريم بابتسامة :يا بختها بيك
اكيد كنت بتقولها كلام حلو كتير اوى
عامر :لا مكنتش
مريم :معقول ليه كده
عامر :انشغلت بشغلى وهى انشغلت بالولاد
ومفكرتش فى حياتى معاها اذا كنت بحبها ولا لا
بس لما ماتت وسابتنى
لقيت انى كنت بحبها اوى
وانها كانت مهمة اوى فى حياتى
مكنتش بس عمود البيت ونوره
طلعت كمان عمود حياتى ونورها
حياتى ضلمت وفضيت عليا بعدها
مريم :واضح اننا مبنعرفش قيمة الحاجة بجد غير لما بتروح مننا
فى حاجات البعد بيخلينا نشوفها كويس مبنعرفش نشوفها وهى قريبة مننا
عامر :صح
تسلم ايدك
مريم :تسلم من كل سوء يا رب يا عمى
اعمل شاى ولا تشرب عصير
عامر :انا بحب اليانسون
مريم بابتسامة :من عيونى
بتشربه سايب ولا فتلة
عامر :انتى عندك ايه فى البيت
مريم :بصراحة عندى فتلة
بس ممكن انزل اشترى...
عامر قاطعها :اعملى من اللى عندك
مريم :واضح انك بتحب السايب
خلاص المرة دى اعمله فتلة
وهشترى سايب وانا بجيب حاجة الغدا
بعد تلت ساعات
مريم :انا هنزل اشترى شوية حاجات للبيت
حضرتك عايز اى حاجة اجيبهالك معايا
عامر :لا يا بنتى
مريم :طيب ما...تحب تيجى معايا حضرتك بقالك تلت ايام مخرجتش من البيت
المكان هنا حلو ايه رأيك تيجى معايا وافرجك عليه
لو مش عايز...
عامر قاطعها :هغير هدومى واجى معاكى
مريم بابتسامة :ماشى وانا هستنا حضرتك بره
بعد نص ساعة
عامر :العمارات هنا كلها شبه بعض
دى حاجة تتوه
مريم :فى الاول كنت بحس كده برضه
بس مع الوقت اتعودت على المكان
بقيت عارفة مكان عمارتنا ومكان المحلات ومكان كل حاجة هنا
حبيت المكان اوى
عامر :علشان شكله شيك
مريم :لا علشان واسع فيه براح كده
بحب اتمشى اوى هنا اخر النهار
الشجر مالى المكان والجو بيبقى حلو
تشرب عصير قصب
عامر :اشرب عصير قصب
