روان :لو سمحت عايزة ايس كريم فى علبة
احمد :كام بولة
روان :غالبا كتير هات اكبر علبة عندك ونشوف هترسى على كام بولة فى الاخر
حط شيكولاتة...وفانيليا...ومانجة...وفراولة...وايه البمبى ده
احمد :ده زبادى فراولة احطه
روان :حط منه بولة اه ونسكافية وقهوة
احمد :مفيش نسكافية
روان :خلاص حط قهوة واه حط توت
احمد :فيه توت برى كمان
روان :حط منه
وايه الأخضر ده
احمد :ده اناناس
روان :معرفوش ماشى حط منه
صلاح :ليه ما انتى متعرفيهوش
روان :علشان اعرفه بقى يمكن احبه
وحط من الاوريو ده
صلاح :ما انتى حطيتى فانيليا
روان :الاوريو ده فانيليا مخلوطة ببسكويت اوريو
فيه فرق كبير بينهم
واه حط كمان...
صلاح قاطعها :ما كفاية بقى يا لوجى
روان :لوجى مين انا روان انت نسيت اسمى ولا ايه
واصلا خلصت كنت هقوله بس يحط صوص شيكولاتة عندك صوص فراولة
احمد :اه
روان :تمام حط من الاتنين فراولة وشيكولاتة
ها هتاخد ايه
صلاح :هاخد على دماغى
عشر بولات يا روان دى مش علبة ايس كريم دى كده عربية ايس كريم
انا عايز مانجة بس ومش علبة عايزها على بسكويت
روان :مش هتاخد معاها حاجة تانية
صلاح :لا هى المانجة بس ومتحطش صوص ولا اى حاجة
روان :تاخد تدوق
صلاح :لا انا مش مستغنى عن عمرى
ومش هجرى بيكى على مستشفى اعملك غسيل معدة على فكرة
عايزة تتعبى اتعبى فى بيتكم مش معايا
روان وهى بتضحك :قرة عينى بجد مش هزار يعنى
على العموم متخافش انا بطنى متعودة مش هيجرالى حاجة
صلاح وهو بيضحك :بطنك متعودة على العك ده
روان :بطنى بتحب العك ده
مبشوفوش عك اصلا
صلاح :انتى طالبة عشر اطعمة ملهاش علاقة ببعض يا روان
وتقولى مبشوفوش عك
روان :انا بحب الزحمة فى كل حاجة
الزحمة فى الأماكن الزحمة فى الكلام الزحمة حتى فى الاكل
الفراغ وحش
صلاح :بس الزحمة هتخليكى متاخديش بالك من التفاصيل
الحاجات الكتير دى هتغلوش على بعض
يعنى انتى دلوقتى اكيد مش عارفة طعم المانجة من الفراولة من الشيكولاتة
روان :بحاول اركز مع طعم كل حاجة فيهم
ولو كرفو على بعض مش مشكلة انا كده باكل حاجة جديدة
مزيج منهم كلهم
صلاح :انا مبحبش الخلطبيطة بحب كل حاجة تاخد حقها
روان :حلوة كلمة خلطبيطة دى حبيتها
انا بحب الخلطبيطة
الحياة اقصر منى انى اعمل فيها حاجة واحدة او اكل حاجة واحدة
صلاح :ما انتى هتقضيها مع شخص واحد
روان :مين قال
صلاح وهو بيضحك :انتى ناوية تعددى ولا ايه
حبيبتى انا ينفع انتى لا
روان :اكيد مش هتجوز غيرك
بس انا فى حياتى اهلى واصحابى واهلك وبعد الجواز ولادنا
حياتى مليانة ناس ولسه هتتملى اكتر واكتر
صلاح :وتدى كل واحد فى الناس دى حقهم من وقتك واهتمامك ازاى
روان :ادينى بحاول مقصرش تجاههم
ولا تجاه نفسى
وبعدين احنا مش زيكم
الراجل ميعرفش يعمل غير حاجة واحدة فى نفس الوقت
انما الست تعرف تعمل تلت اربع حاجات مع بعض
بتعرف توزع طاقتها وتركيزها
صلاح :معاكى حق
ماما انا كنت بشوفها بتطبخ وفى نفس الوقت الغسالة شغالة على غسيل وفى نفس الوقت بتغسل المواعين
وهى اصلا بتتكلم مع خالتى اللى بتشتكيلها من حماتها واخوات جوزها اللى مطلعين عينيها
وماما فى وسط كل ده مركزة معاها وبتواسيها وبتديها حلول كمان
فى حين انى لو روحت اطلب من بابا يحل معايا مسئلة رياضة وهو بيتفرج على الماتش هيحدفنى بالريموت فى وشى علشان اخرس علشان يعرف يركز
فكنت بروح لماما المطبخ وهى كانت بتحلها معايا
كانت بتزود فوق كل اللى بتعمله ده انها بتحل معايا الواجب
روان :كائن الست بيعمل عظمة معروفة يعنى
صلاح :الصراحة فى حتة المهمات الكتير فى نفس الوقت دى
اه انتم ملكوش حل
وصلنا المطعم
روان :هتغدينا هنا
صلاح :اه تحبى نروح مكان تانى
روان :لا مجتش هنا قبل كده
حلو اجرب مكان جديد
