احمد :ما تركب يا استاذ او تعدينى اركب انا
ابراهيم وهو بيركب :لا خلاص هركب...اتنين من عشرين
هالة :واحد من عشرة
ابراهيم :انا دفعت
هالة :مفيش داعى
ابراهيم :قولت انا دفعت
هالة :وانا قولت مفيش داعى ولا صفة تدفعلى بيها
ابراهيم وهو بيبصلها :ما تسمعى الكلام وانتى ساكتة ولا هو مفيش فايدة ولازم مقاوحة وخلاص
هالة :اه هو مفيش فايدة...واحد من عشرة لو سمحت
ابراهيم وهو بياخد العشرة جنيه من ايدها يرميها من الشباك :يا رب ترتاحى بقى
هالة بصدمة :انت عملت ايه
انت رميت فلوسى من الشباك
حد يعمل كده فى نعمة ربنا
ابراهيم :انتى اللى استفزتينى
كمان ان شاء الله يلاقيها حد محتاجها او حد يفرح لما يلاقيها
هالة :يا سلام بتعمل خير بفلوسى
ابراهيم :خلاص خدى عشرة جنيه بدالها واهو ابقى بعمل خير بفلوسى انا
هالة وهى بتاخدها منه :انا هاخدها علشان هى حقى...اديله واحد من عشرة لو سمحت
محمد :اخدها يا استاذ
انتو كلتو دماغ امى
ابراهيم وهو بيضحك :خدها اه
معلش حقك عليا انت عارف البنات ودماغهم بقى
محمد :عارف طبعا ربنا يكون فى عونك
هالة :انت...
ابراهيم قاطعها :اهدى بقى وسيبى الراجل فى حاله زهقناه معانا
هالة :انت السبب وفى الاخر ايه اللى جرا دفعت لنفسى
ابراهيم :دفعتى لنفسك من فلوسى
هالة :لا من فلوسى
ابراهيم :فلوسك زمانها حد لقاها وجاب بيها كانزتين يطرو عليه فى الحر ده
ربنا يجازيكى خير بقى ويعوض عليكى
انما الفلوس اللى دفعتى منها دى فلوسى انا
هالة :انت اكتر واحد مستفز فى الدنيا
ابراهيم :وانتى اكتر واحدة عنيدة فى الدنيا
ساعة مناهدة علشان تسيبينى ادفعلك
هالة :وانت تدفعلى بتاع ايه بصفتك مين
ابراهيم :تموتى فى تكبير المواضيع طول عمرك
هالة :انت اللى طول عمرك رايق بزيادة ومصغر كل حاجة حتى الحاجات الكبيرة
ابراهيم :قصدك ايه
هالة :واحنا هنفتح حوار ونقلبها دردشة ولا ايه
مش دفعتلى وعملت اللى انت عايزه خلاص خلصت على كده
سمعنى جمال سكوتك بقى
ابراهيم :لسه دبش
دبشاية عايشة معانا فى الدنيا انتى زى ما انتى مبتتغيريش مهما عدى عليكى وقت
كأنى سايبك امبارح مش من تلت سنين
هالة :مفيش حاجة ولا حد بيفضل على حاله
انت اللى كالعادة عندك قصر نظر ومبتشوفش ابعد من تحت رجليك
ابراهيم :انتى ازاى تسمحى لنفسك انك تقولى...
هالة قاطعته :زى ما انت سمحت لنفسك تقول
وانا لا عايزاك تقول حاجة ولا عايزة اقول حاجة
احنا حتى مينفعش نتخانق طول الوقت زى زمان
مبقاش حقنا
ابراهيم :صح مبقاش ينفع
مع انها وحشتنى
هالة :هى ايه دى
ابراهيم :خناقاتنا
هالة :انت بتقول اى كلام علشان تفتح مواضيع صح
ابراهيم :لا انا بتكلم جد
هالة :وانا...انا مش عايزة اتكلم يا ريت تسكت
بعد تلت اسابيع
ابراهيم :مش هتركبى
هالة:لا
ابراهيم :هالة بلاش عناد وجنان
انتى ممكن تفضلى واقفة كده ساعة كمان على الدائرى على ما يجى اتوبيس تانى
هالة :مش مهم
سيد :فى حد قاعد هنا
ابراهيم :اه خطيبتى اللى واقفة دى اطلعى بقى ولا انزل انا علشان ترضى تطلعى
واحدة كبيرة من اللى راكبين الاتوبيس :اسمعى كلام خطيبك يا بنتى
سواق الاتوبيس :ما تخلصينا يا انسة وتركبى عايزين نمشى
هالة وهى بتركب وبتقعد جمب ابراهيم :حاضر...انا مش خطيبتك بطل كدب
ابراهيم وهو بيضحك :خطيبتى السابقة
كده احسن
لسه بتتوترى لما اكتر من حد يتكلم معاكى فى نفس الوقت
هالة :وانت لسه بتستغل ده وبتطلعنى على المسرح علشان اعمل اللى انت عايزه
انت انسان مستفز انت عارف انك مستفز ولا لا
ابراهيم وهو بيضحك :عارف قولتيلى قبل كده كتير
هالة بغيظ :انت بتضحك
فرحان بحرقة دمى
ابراهيم بابتسامة :لا فرحان بخناقنا
قولتلك خناقاتنا وحشتنى
هالة :ده على اساس انها كانت حاجة نادرة مبتحصلش كتير
ده انا اتخانقت معاك خناقات تكفيك بقية حياتك
ابراهيم :لا طلعت متكفيش ولا حاجة
هالة :بتهزر اكيد
احنا كنا بنتخانق كتير اوى
كتير ايه احنا كنا بنتخانق بس
على فستان الخطوبة اتخانقنا
على اليوم اللى هنعمل فيه الخطوبة اتخانقنا
على المكان اللى هنعمل فيه الخطوبة اتخانقنا
ابراهيم وهو بيضحك :وعلى بيبيون الخطوبة اتخانقنا
علشان انا مكنتش عايز البس كرافتة
احنا كنا بنتخانق على حاجات تافهة اوى
انا فاكر مرة اتخانقتى معايا علشان عملت رنة موبايلى نفس رنة موبايلك
هالة :فاكر خناقة البيتزا
لما كان فاضل منى حتة وانت كلتها
ابراهيم :لا معلش بقى انتى اللى قولتى انك شبعتى
وبعدين ما انا طلبتلك واحدة بدالها وممدتيش ايدك عليها
وانا اللى كلتها
هالة وهى بتضحك :انت بتاكل كميات اكل مهولة اموت واعرف بتوديها فين مبيبانش عليك خالص
ابراهيم وهو بيضحك :قل أعوذ برب الفلق
قولى ما شاء الله طيب
هالة وهى بتضحك :انت اكيد عندك ديدان على فكرة
ابراهيم وهو بيضحك :انا كبرت على انى يبقى عندى ديدان على فكرة بطلت العب فى الشارع من زمان
كل الحكاية انى معدل حرقى عالى بس غير انى بروح الجيم
وكفاية نق بقى انا حاسس انى مش هعيش لحد التلات الجاى بنقك ده
هالة وهى بتضحك :نسأل الله التساهيل
واحدة كبيرة من اللى راكبين الاتوبيس :ايوه كده اضحكو واتصالحو
ربنا يهدى سركم ويتمملكم على خير
ابراهيم بابتسامة :امين
هالة بسرعة :امين ايه انت هتظيط انا مش...
ابراهيم قاطعها :هوب هوب هوب
ايه يا ست الكل هتطلعينى كداب
هالة :وانت يعنى مهندس بترول ما انت كداب
ابراهيم وهو بيضحك :طيب استرى عليا يستر عليكى ربنا
سواق الاتوبيس :اللى مبعتش الاجرة يبعت
ابراهيم :شوفتى نستينى ادفع
هالة :وانا كمان اديله واحد...
ابراهيم قاطعها :هديلك على وشك لو كملتى الجملة
هالة :المفروض اخاف انا كده يعنى
ابراهيم :اتنين من عشرين...مبخوفش انا صح
هالة :انا مبخافش منك
ابراهيم :ودى حاجة حلوة ولا وحشة بالنسبالك
ميزة يعنى ولا عيب
هالة :الخوف ده لعنة وبتحل على حياة الواحد
الخايف ده مش عايش
لو علاقتك بحد كان اساسها الخوف اعرف انها علاقة فاشلة وهتنتهى عاجلا او اجلا
العلاقات غالبا بتفشل بسبب الخوف
ابراهيم :واحنا فشلنا ليه مع انك مبتخافيش منى
هالة :مش لازم تكون بتخاف من حد علشان علاقتك بيه تفشل
ممكن تفشل علشان مفيش خوف اصلا
علشان انت مش خايف تخسره ولا باقى عليه
وممكن تفشل من كتر الخوف
اللى هو انت خايف تتوجع لما تخسره
او خايف يسيبك هو
فتسيبه انت وتخسره وتخسر نفسك معاه
ابراهيم :طيب ومادام العلاقات بتفشل بسبب الخوف
احنا فشلنا ليه
هالة :انا قولت غالبا بتفشل بسبب الخوف مش دايما
ابراهيم باصرار :احنا فشلنا ليه يا هالة
هالة :علشان مخوفناش نخسر بعض
ابراهيم :ويا ريتنا خوفنا
كان يستاهل اننا نخاف عليه
هالة :هو ايه ده
ابراهيم :اللى بنا
هالة :قصدك اللى كان بنا
ابراهيم :وحشة الكلمة دى كلمة كان
هالة :حقيقية ومعبرة
حاجات كتير بتتحول لكان ماضى عديناه وكملنا من بعده
ابراهيم :مش معنى اننا عديناه اننا كملنا من بعده
هالة :انت اكيد كملت فى حياتك عادى
ابراهيم :كملت اه المفروض خطبت مرة وفسخت
هالة :شيرين بنت عمتك
ابراهيم :لا
شيرين اتجوزت من سنة ومعاها سليم دلوقتى
هالة :ربنا يباركلها فيه
ابراهيم :بس اشمعنى قولتى شيرين
هالة :اصلها مكنتش بتطيقنى
وكانت بترزعنى اسافين كتير اوى والانسان مبيكرهش الا واحد من اتنين
حد احسن منه
او حد معاه حاجة هو عايزها
وانا كنت الاتنين
ابراهيم :مش ممكن على الغرور يا هلول
هالة :اولا متندهليش غير بأسمى
ثانيا مش غرور دى ثقة
هى كانت عايزاك
وانا احسن منها كفاية انى عمرى ما عملت فيها اسافين زى ما كانت بتعمل فيا
مع انى كنت اقدر
بس مرضيتش
ابراهيم :ليه علشان انا مش فارق معاكى
هالة :لا علشان هى مش فارقة معاك
انت مش شايفها اصلا
حسيت ده عقاب كفاية ليها
ويمكن كانت صعبانة عليا كمان
وحش اوى انك تبقى بتحب حد ومش شايف غيره وهو مش شايفك اصلا
ابراهيم :بتتكلمى بتأثر
هو انتى اتخطبتى بعدى
هالة :حاجة متخصكش على فكرة
ابراهيم :هالة مش وقت رخامتك
ردى اتخطبتى بعدى
هالة :اتقرت فاتحتى وقبل ما تبقى خطوبة انا نهيت الموضوع
ابراهيم :ليه
هالة :علشان مقدرتش...علشان مكنتش مرتاحة فمقدرتش اكمل الموضوع للأخر
وانت
ابراهيم :بعد ما فسخنا خطوبتنا بشهر خطبت تانى
وبعد شهرين فسخت
مش هدخل فى تفاصيل ربنا يصلح حالها وحالنا جميعا
بس هى كانت لا تطاق
محدش يتحملها ساعتين على بعض مش شهرين
كفرتلى ذنوبى اللى فاتت واللى جاية
هالة :كنت متوقعة انك هتعمل كده
هتدخل فى علاقة سريعة من غير ما تحسبلها وبعدين تفوق لنفسك وتلاقى انك لبست نفسك فى حيط
فتمشى زى كل مرة
ابراهيم :انا مش بمشى كل مرة
انتى اللى خلتينى امشى
انتى اللى قولتى مش هقدر اكمل كده
هالة :وانت كالعادة مفهمتنيش
وحتى مسألتنيش قصدى ايه
ابراهيم :هى مش هقدر اكمل ليها مليون معنى
هو معنى واحد
هالة :مفيش كلمة واحدة فى الدنيا ليها معنى واحد
كل كلمة ليها مليون معنى
على حسب بتتقال امتى وفين ولمين وفى اى موقف ومين اللى بيقولها
ثوانى هرد على موبايلى
الو يا ريم عاملة ايه يا حبيبتى
ريم :انا زى الفل انتى اخبارك ايه
هالة :بخير الحمد لله
ريم :انتى فين كده انا عندنا وعايزة اشوفك
هالة بسعادة :بجد انتى عند اهلك انا خلاص راجعة من الشغل اهوه
ريم :قشطا هتغدى مع اهلى واطلعلك
هالة :قصدك نطلعلك جميلة هانم قبلك والا مش هدخلك من باب الشقة
ريم وهى بتضحك :ما بلاش جميلة طالعة زنانة لامها ومش هنعرف نتكلم براحتنا وهتزهقى
هالة :على قلبى زى العسل زنها هى وامها
اطلعيلى على طول انتو وحشتونى اوى
ريم :من عيونى يا قلبى
يلا سلام
هالة :سلام
ابراهيم :ريم اتجوزت وخلفت
هالة :اه جابت جميلة
الاميرة جميلة مهند الدسوقى
ابراهيم :اتجوزت مهند
هالة :اه مستغرب ليه اومال كانت هتتجوز مين يعنى غيره
ابراهيم :انا كنت مراهن نفسى انهم هيفركشو
من كتر ما كانو بيسيبو بعض ويرجعو
هالة :دى كانت فركشة اى كلام
فركشة كده وكده
انما هما عمرهم ما يقدرو يبعدو عن بعض لأنهم بيحبو بعض
اللى بيحب حد عمره ما بيسيبه ده يعنى لو بيحبه بجد
ابراهيم :انتى قصدك عليا صح
هالة :انا بتكلم فى العموم
ابراهيم :لا انتى قصدك عليا
هالة :وانا هقصدك بكلامى ليه
ابراهيم :وهو انا مش عارفك انتى قصدك عليا يا هالة
هالة :اه انت مش عارفنى
انت من امتى كنت عارفنى
ابراهيم :انتى...
هالة قاطعته :انا وصلت سلام...على جنب يا اسطى لو سمحت
