فكرتك ملاك
طلعت اسوء من البشر
عشقك هلاك
قلبك اسود سواد ليل ملوش قمر
انا سيباك
لانى فهمت الدرس بالمفيد المختصر
كتبته وضغطت نشر فى صفحتى اسمها "هجر "انا اللي اخترت الاسم ده هو بيعبر عن اللي بكتبه فيها لانه اغلبه بيكون زي اللي كتبته ده او مش اغلبه هو كله الصراحة عن الفراق والوجع امال انا سميت الصفحة هجر ليه
انا ملك عندى تلاتة وعشرين سنة لسه متخرجة من كلية تربية قسم لغة عربية امى متوفية عايشة مع ابويا ومراته اللي اتجوزها بعد موت امى واياد وكريم ولاده منها واخواتى من الاب بس
انا تعبانة عندى دور برد مدروخنى هنزل اجيب دوا من الصيدلية لانى بقيت بجد مش قادرة
لبست اسدال الصلاة ولسه بنزل علي السلم شفت مالك ابن عمتى
مالك :رايحة فين كده
ملك وهى بتعطس كذا مرة ورا بعض:عطسي...رايحة...
عطسي ...الصيدلية
مالك :انتى بتعيطى ليه
ملك :عطسي ...من الفرحة علشان شوفتك ..عطسي ...علشان عندى برد يا مالك انت مش شايف يعنى
مالك :وانتى ازاى تسكتى علي نفسك لحد ما زاد كده
ملك :افتحلي...عطسي ...محضر بقي وسين وجيم وانا البرد هيموتنى
مالك :انتى رايحة تجيبي دوا
ملك :عطسي..اه المفروض لو سيادتك سمحت يعنى
مالك :خلاص هروح انا اطلعى انتى وانا هجيبلك الدوا واجى
ملك وهى بتفتح البوك بتاعها :استنى خد
مالك :ملك بلاش غباء اكيد مش هاخد منك فلوس
ملك وهى بتديله ورقة :مكنتش هطلع فلوس وانا عارفة انك مستحيل تاخدها..عطسي..دى ورقة انا كتبا فيها اسماء الادوية ...عطسي ..اللي عايزاها
مالك وهو بياخد منها الورقة :تمام هجيبهوملك وارجع علي طول مش هتاخر عليكى
بعد ربع ساعة
مالك :اتفضلي..الف سلامة عليكى
ملك :عطسي ..الله يسلمك
مالك :هو انتى كنتى هتنزلي باسدال الصلاة ده الصيدلية
ملك :اه الصدلية تحت البيت مش بعيدة..عطسي.. وفيها ايه يعنى
مالك :هو اصل شكله عليكى يعنى ..
ملك :مش قد المقام يعنى انا مش رايحة حفل تخرجى يا مالك.. عطسي..كمان انا مبحبش التصنع ده بيخنقنى
..عطسي..هقوم اخد الدوا واعملك قهوتك واجى..كمان هعرف بابا انك هنا
بعد خمس دقايق
ملك :اتفضل
عبدالرحمن :معملتليش معاه قهوة ليه يا ملك انا مش عايز عصير
ملك :عطسي...علشان الدكتور قايل هما فنجانين بس في اليوم وانت شربتهم يا بابا ..عطسي..
عبدالرحمن :خدتى دوا
ملك :اه اخدت..عطسي...الدوا خلي دماغى تقلت وعايزة انام بعد اذنكم
مالك :اتفضلي
ودخلت اوضتى بصيت في المرايا لقيت عيونى مدمعة ومناخيرى حمرا وخدوى كمان البرد مخلي شكلي مدهول اوى يا ربي بقالي شهر مشوفتوش ولما اشوفه يبقي ده شكلي
ونمت من البرد بس قمت بعد تلت ساعات كان الكل في البيت نام كلت وعملت لنفسي شاى بليمون علشان البرد وخدت الدوا وفتحت فيس
لقيت مالك فاتح فيس هو كمان وبعتلى
مالك :الف سلامة عليكى بقيتى احسن دلوقتى
ملك :الله يسلمك اه بعد ما اخدت الدوا
مالك :انتى ازاى تسكتى علي نفسك لحد ما البرد زاد عليكى كده
ملك :هو انا لحقت اسكت علي نفسي يبنى انا الصبح كنت زى الفل جيت علي بعد العصر عطست كام مرة المغرب لقتنى بالحالة اللي انت شفتنى بيها دى الموضوع اتطور بسرعة اوى😂😂
مالك :ومخلتيش اياد ينزل ليه يجبلك الدوا
ملك :كان قاعد علي موبايله ومكنش هينزل او كان هينزل وهو مضايق فعلي ايه يعنى
بس ايه اللي انت عملته ده جايبلي علبتين نسكافيه اكياس وبرطمان نسكافيه بلاك ليه
مالك :انتى كنتى كتبا في الورقة متنسيش النسكافية
ملك :ايوه دى كتباها لنفسي علشان اجيبه ومنساش
مالك :ما انتى منزلتيش وانا اللي جبتلك الدوا فجبتلك النسكافية كمان بس معرفتش انتى بتشربيه بلاك ولا بتشربيه اكياس فجبت الاتنين
ملك :شكرا يا مالك مش عارفة اقولك ايه بجد تسلم
مالك :معملتش حاجة لكل ده مكنش نسكافية جبتهولك
ملك :انا بحب النسكافية جدا ووجوده مهم بالنسبالى جدا
كمان كفاية انك اهتميت وجبته لمجرد انك قريت في الورقة انى عايزاه انت اجدع ابن عمة في الدنيا
مالك : تسلمى بس ايه اللي منزلاه النهاردة ده يا ملكة الحزن يا اميرة التعاسة
ملك :صفحتى وانزل فيها اللي يعجبنى كمان اسمها هجر عايزنى انزلك فيها كوميكس وافشات افلام
مالك :لا طبعا ودى تيجى برضه مينفعش لازم تكتبي كتابات حزينة وتنكدى علي اللي خلفونا
ملك :يا عم متقرفنيش معاك مش عاجبك الغى متابعتك للصفحة اقولك اعملي انا نفسي بلوك ولخص
مالك :لا اصيلة يا بت بالسهولة دى بتقولي كده
ملك :اعملك ايه مش انت اللي مش عاجبك كلامى
مالك :قصدك مش عجبانى كئابتك
ملك :انا مش كئيبة
مالك :لا يا شيخة طيب اثبتيلي
ملك :اثبتلك ازاى
مالك :اكتبي حاجة مش كئيبة
ملك :موافقة
مالك :معاكى فرصة ست ساعات بس من دلوقتى
ملك :ست ساعات بس ليه
مالك :ما هو ده التحدى بقي
ملك :وانا قد التحدى
مالك :انا هنام علشان عندى شغل بدرى اول مهصحى هفتح اشوف اللي كتبتيه لو ملاقتش حاجة تبقي خسرتى وتمن خسارتك انك هتغيرى اسم صفحتك من هجر لكئابة اهو اسم يعبر عن محتواها الحزين الكئيب
ملك :هكسب وعمر صفحتى ما هيتغير اسمها
تصبح علي خير
مالك :وهو احنا بنقول في اخر كلامنا تصبح علي خير برضه
ملك :مش عارفة ايه سر تمسكك بالى لقاء قريب دى واننا ننهى بيها كلامنا وفي الاخر مبنشوفش بعض غير كل شهر او شهرين انا حسا ان الجملة دى نحس 😂😂
مالك :😑
ملك :خلاص اسفة بهزر ايه يا رمضان مبتهزرش
الى لقاء قريب الي لقاء قريب الى لقاء قريييييييب
مالك :ايوه كده اتعدلى
ملك :تصبح على خير
الى لقاء قريب
مالك :وانتى من اهله
الى لقاء قريب
