عمر :برضه غلط...ايه التخلف ده بقى ..انا جربت كل حاجة هتكون ايه يعنى
سلمى :فى مشكلة
عمر :افندم
سلمى :بسألك فيه مشكلة انا قاعدة فى الترابيزة اللى قدامك ولاحظت انك متعصب ومضايق فى مشكلة اقدر اساعدك بحاجة
عمر :لا
سلمى :تمام بعد اذنك
عمر :بصى هو فى مشكلة بس مش عارف هتعرفى تساعدينى فيها ولا لا
سلمى :ايه المشكلة
عمر :طيب اقعدى هنتكلم وانتى واقفة كده واحد صاحبى فتح الفيس بتاعه من عندى دلوقتى انا بحاول افتح الفيس بتاعى ومش عارف لانى مش فاكر الباسورد بتاعتى كانت ايه جربت حاجات كتير وكلهم غلط
سلمى :ممكن موبايلك دقيقة
عمر :اتفضلى
سلمى :انا هضغط على جملة هل نسيت كلمة السر وبعدين الشركة هتبعت كود على الخط اللى انت عامل منه الغيس بتاعك مش هو الخط اللى انت حاطه فى موبايلك دلوقتى
عمر :اه هو
سلمى :اهى الرسالة وصلت اهيه هنكتب الكود اللى هما باعتينه فتتفتح صفحة الفيس بتاعتك تقدر بقى من الاعدادات تحط باسورد جديدة بس اختار باسورد تكون سهلة ليك بحيث متنسهاش
عمر :تمام جدا مش عارف اشكرك ازاى
سلمى :على ايه انا معملتش حاجة
عمر :انا عمر
سلمى :وانا سلمى..صحابى اخيرا وصلو هروحلهم بعد اذنك
عمر :اتفضلى
بعد اربع ايام
عمر :سلمى اذيك
سلمى :عمر صح
عمر :صح
سلمى :اخبارك ايه
عمر :انا تمام الحمد لله ايه مستنية صحابك برضه
سلمى :اه
عمر :هما دايما بيجولك متأخر كده
سلمى :لا هما بيجو فى الميعاد انا اللى باجى بدرى
عمر :كل مرة
سلمى :كل مرة
عمر :ليه
سلمى :عادى مش عارفة بس مبعرفش افضل فى البيت لحد الميعاد فباجى بدرى
عمر :انا لازم امشى عندى شغل مهم بس مبسوط انى شوفتك
سلمى :شكرا وانا كمان
بعد اسبوع
سلمى :هاى يا عمر
عمر :هاى يا سلمى اتفضلى
سلمى :بس انا جاية اشوف صحابى
عمر :عارف بس هما لسه شوية على ما يجو صح
سلمى :صح
عمر :خلاص اقعدى معايا لحد ما يجو
سلمى :تمام
عمر :تشربى ايه
سلمى :عصير فراولة
عمر :لو سمحت واحد عصير فراولة وواحد قهوة سكر زيادة
سلمى :شكلك بتشرب قهوة كتير
عمر :اه كتير جدا انتى مبتشربيش القهوة
سلمى :لا بشربها بس بشربها فى اول اليوم وفى اخره مبحبش اشربها فى نص اليوم كده..بتبص فى الموبايل كتير شكلك بتكلم حد مهم
عمر :انا اسف بس صاحبى بيبعتلى ياخد رايى فى مشكلة عنده
سلمى :طيب انا ممكن اقوم علشان مشغلكش
عمر :لا خليكى هاخد رايك فى المشكلة بما انك بنت
سلمى :تمام
عمر :بصى هو كان مرتبط بواحدة زميلته فى الشغل وبعدين هو سابها ودلوقتى هو ندمان عايز يرجعلها بس خايف ترفض
سلمى :انت قولتله ايه
عمر :قولتله ينسى الموضوع علشان كرامته بس هو مش قادر يبطل تفكير فيها
سلمى :علشان كرامته طيب ما هو كسر قلبها لما سابها واكيد كسر كرامتها كمان المفروض يستنى لما هى اللى تحاول ترجعله يعنى وهتحاول ازاى واساسا هو اللى سايبها دى لو بتموت فى بعده مش هتحاول هى اللى تبدء وتقوله نرجع
كمان لو حتى رفضت ترجعله ده مش هيكون وحش
عمر :ازاى يعنى
سلمى :هو هيبقى حاول وعمل اللى عليه وهى يتردلها جزء من كرامتها اللى هو جرحها لما سابها لو مرجعتلوش على الاقل مش هتكرهه ولا هتكره نفسها انت عارف هى اكيد لما هو سابها فضلت تسأل نفسها هى غلطت فى ايه وليه مكنتش كفاية ليه
عمر :يعنى اقوله يكلمها
سلمى :ايوه
عمر :خلاص قولتله تعرفى بيبعتلى على الواتس علشان مش عايز يكلمنى وتسمعه مع انها من ساعة ما سابها مبتبصلوش حتى
سلمى :اكيد مش هتبقى طايقة تشوفه خصوصا لو هو سابها وهى مكنتش عايزة تسيبه
عمر :من كلامه عنها بيتهيألى انها مكنتش عايزة تسيبه لا
سلمى :هو سابها ليه
عمر :كان خايف يحبها بعد عنها قبل ما يحبها بس بعد ما سابها اكتشف انه خلاص حبها
سلمى :فى حد يبعد عن حبه بعد ما يلاقيه هو حد طايل
عمر :هو تقدرى تقولى متعقد شوية من الحب بسبب اهله
سلمى بابتسامة :بس واضح انه عقدته اتفكت على ايديها
عمر بابتسامة :باين كده...استنى ده بعتلى بيقول كلمها رفضت ترجعله وسابته ومشيت بس عيطت وهى بتكلمه
سلمى :اكيد من وجعها منه قالت كده ويمكن خايفة يسيبها تانى او علشان كرامتها قوله يحاول تانى
عمر :يحاول تانى
سلمى :ايوه هى لما يحاول تانى هتطمن انه مش هيسيبها تانى وهتتردلها كرامتها ووجعها منه هتنساه هو لازم يتعب علشان ترجعله بعد ما ضيعها من ايده وخليه كمان يقولها انه كان خايف يحبها يفهمها هو عمل كده ليه ولو صادق هى هتصدقه مش هو صادق
عمر :اه والله صادق
سلمى :خلاص قوله يعلن على قلبها الحرب يكلمها فى التليفون وفيس وواتس وانستا يحاصرها كده لحد ما تسلم وترجعله
عمر :وافرضى بعد كل ده مرجعتلوش
سلمى :انت ليه متشائم كده يا سيدى اهو يبقى عمل الله عليه وحارب علشان حبه كمان هترجعله انا حاسة انها هترجعله صحابى جم هقوم بقى
عمر :هو احنا ممكن نبقى اصحاب
سلمى :اه طبعا ممكن
عمر :طيب ينفع اخد رقم تليفونك
سلمى :هات موبايلك..ده رقمى ..رنيت على نفسى وكده رقمك بقى معايا هروح لاصحابى بقى بعد اذنك
عمر بابتسامة :اتفضلى
