غفران :هو فى حاجة
على :لا
غفران :طيب يا ريت تركز فى الطريق
على :هو انتى غفران دياب محمد
غفران :انت عارف اسمى منين
على :انا على محمود البرعى انتى مش فكرانى انا كنت...
غفران قاطعته :افتكرتك
غريبة انك عرفتنى احنا متقابلناش من اكتر من سبع سنين
على :شكلك مختلفش خالص علشان كده عرفتك على طول
غفران :انا مبفتكرش الناس بسهولة انت كمان شكلك اختلف كان عندك شعر زمان قصدى يعنى شكلك كان مختلف عن دلوقتى كتير
على وهو بيضحك :لا هو انا فعلا كنت بشعر زمان طار بقى وسايبنى اعيش على ذكراه
انتى اخبارك ايه بتعملى ايه فى حياتك
غفران :خلصت الكلية طبعا وحاليا بشتغل فى مكتب محاسبة
انت ليه شغال اوبر انت كنت فى كلية صيدلة صح ولا علاج طبيعى باين اعتقد كنت صيدلة
على :كنت صيدلة اه وفتحت صيدلية بس فتحتها قريب من بيتنا بروحلها مشى فلما بزهق كنت بنزل الف فى الشوارع بالعربية وبعدين فكرت بدل ما الف بلا هدف ما ابقى اوبر اهى تبقى بفائدة واروح اماكن اكتر وساعات بقابل ناس باخد وادى معاهم اهو ونس بدل ما الف لوحدى
غفران :فكرة حلوة فعلا وعملية
بس مكنتش اعرف انك فراك كده
على :فراك
غفران :اه فراك يعنى بتحب الحركة لدرجة انك تشتغل اوبر علشان زهقت من شغلك اللى جنب بيتك
فتبقى دكتور صيدلى وكمان اوبر
على :مش كل يوم بعمل حكاية الأوبر دى بس الصيدلية بروحها كل يوم طبعا
غفران :مبتاخدش اجازة خالص
على :لا الا لو كان فى حاجة مهمة يعنى
غفران :بس دى حاجة متعبة
وبعدين مش المفروض كده اسهل انك تتحكم وتاخد اجازة براحتك لأنك مش شغال عند حد
على :لا بالعكس لو شغالة عند حد اسهل فى حكاية انك تاخدى اجازة دى لما بتبقى شغالة عند حد بيكون ليكى مسئوليات محددة واى حاجة غيرها بره عنك
انما لما بتبقى صاحبة المكان بتبقى كل حاجة مسئوليتك انتى ولو حصل غلط حتى لو مش منك هيجى على دماغك انتى فى الأخر ما انتى صاحبة الليلة كلها
غفران :اه فهمت ربنا يقويك
بقى عندك ولاد قد ايه
على :لا انا معنديش ولاد
غفران :ربنا يرزقك بيهم قريب يا رب انت وكل مشتاق
على :امين بس ربنا يرزقنى بامهم الأول
غفران :انت اتجوزت وطلقت ولا هى ماتت الله يرحمها
على :متجوزتش اصلا ليه كل افتراضاتك انى اكيد اتجوزت كده
غفران :علشان اهلك كانو عايزين يجوزوك من زمان
ده انت اتقدمتلى وانت فى اخر سنة فى الكلية
معلش على افتراضاتى بس مجاش فى دماغى تكون متجوزتش دى توقعت تكون متجوز ومعاك ولاد
اسفة لو ضايقتك او حرجتك بكلامى
على :محصلش حاجة
اهلى فعلا هيموتو ويجوزنى من وانا فى الجامعة اصلا علشان انا ابنهم الوحيد بس لسه ربنا مارادش
غفران :ربنا يفرحهم بيك
اتفضل
على :ايه ده
غفران :دى فلوس
على :لا طبعا مش هاخدهم
غفران :لا طبعا هتاخدهم
مش انا طلبت اوبر ووصلت البيت اهو يبقى طبيعى ادفع فلوس
على :ايوه بس انا مينفعش اخد منك فلوس
غفران :زيى زى غيرى يا على
لو سمحت خدهم
على :ايوه بس...
غفران قاطعته وهى بتسيب الفلوس على الكنبة وبتنزل :مبسش ولا حاجة
مع السلامة
