كريمة :انتى شايفانى وارثة يا بنتى غسول ايه ده اللى اجيبه بخمسمية جنيه
لبنى :علشان تهتمى ببشرتك يا كريمة
كريمة :ماشى اهتم بيها واعمل فيها كيكة بس خمسمية جنيه كتيييييير
لبنى :عايزاه فى حدود كام يعنى
كريمة :شيلى صفر من الاتنين
لبنى :مش فاهمة اخرك كام برضه
كريمة :ده انتى اللى عداكى ونجحك فى كى جى تو ظلمك وظلمنا
يعنى اخرى خمسين جنيه يا لبنى شوفيلى حاجة بخمسين او اقل
لبنى بصدمة :او اقل عايزة غسول لتنضيف البشرة وتفتيح اماكن الاسمرار وازالة الرؤوس السودا وتفتيح لون الجلد بخمسين جنيه او اقل
كريمة :ويا ريت يكون بريحة الفراولة او الخوخ علشان بحبهم
لبنى :مش عايزاه يرد المطلقة ويجلب الحبيب بالمرة
كريمة :مفيش غسول كويس بالسعر ده
لبنى :لا طبعا
كريمة وهى بتضحك :يا شيخة تبا لاحلام البسطاء
خلاص بشرتى تعتمد على نفسها بقى
لبنى :يعنى مش هتجيبيه معايا
كريمة :اجيب ايه لا خلاص انا هشترى قهوة واشربها وبالبن بتاعها هعمل احلى سكين كير وهظبطنى بقى ماسكات بالعسل وبالزبادى والخيار انا عندى خيار كتير فى التلاجة هبقى اقطع واحدة واحطها على وشى
لبنى :وكده بشرتك هتبقى احسن
كريمة :ايوه طبعا ووشى هينور كمان
بالك انتى الواحدة مش مننا مش محتاجة غسول بخمسمية جنيه علشان وشها ينور
لبنى :اومال محتاجة ايه بقى خيار وزبادى وعسل
كريمة :محتاجة تسلك بالك انتى لو الواحدة تسلك من جوا وشها ينور على طول
لبنى وهى بتضحك :يعنى سلكان وخيار وزبادى وعسل
كريمة :وقهوة
لبنى :دى وصفتك السحرية للسكين كير يعنى
كريمة :اه
لبنى :كتك الاواه
راندا :كتكو الاواه انتو الاتنين يعنى انا مصدومة صدمة عمرى فى خطيبى اللى خانى وفسخت خطوبتى منه وانتو بدل ما تواسونى عايزبن تعملو اوردر اون لاين تطلبو كريمات سكين روتين ايه مفيش دم خالص كده
كريمة بحرج :انا اسفة خلاص متزعليش
لبنى :وانا كمان مكنش قصدى والله
كريمة :هو انا بس عندى ملحوظتين اولا ياسر ده تحمدى ربنا انه عمل كده وانتو لسه على البر ثانيا مصدومة فى مين صدمة عمرك انه عمل كده احنا كلنا كنا عارفين انه هيعمل كده ده الكنبة اللى انتى قاعدة عليها دى مش متفاجئة وكانت عارفة انه هيعمل كده
راندا :ليه قصرت فى حقه فى ايه
لبنى :انتى مقصرتيش فى حقه
كريمة :انتى قصرتى فى حق نفسك يا راندا لما قبلتى بيه وانتى عارفة انه بتاع بنات وواحد رمرام زيه مش هيقدر لما تبقى معاه حاجة غالية زيك
لبنى :بصى متزعليش منى بس كريمة معاها حق انتى اللى رخصتى الغالى
راندا :انا مرخصتش نفسى انا حبيته وصدقت انه بيحبنى صدقته لما قالى هتغير علشانك
كريمة :صدقتى واحد كداب واحد بيتلون بمية وش ومية لون علشان يوقع البنات فيه ما طبيعى يكدب عليكى ويقولك كده علشان ترضى بيه
مسمعتلناش وصدقتيه
راندا :انا سمعت صوت قلبى
كريمة :سمعتى صوت قلبك وصدقتى واحد بيكدب اكتر ما بيتنفس وفى الاخر حصل ايه خانك وخذلك واثبتلك ان كلامنا كان صح وان صوت قلبك كان غلط
لبنى :مكنش المفروض تمشى ورا قلبك مراية الحب عامية يا راندا
كان المفروض تبصى فى مرايتنا احنا وتشوفى هو قد ايه كداب وخاين ورمرام وميستاهلش ضفرك حتى
راندا :خلاص حقكو عليا انا طلعت حمارة ومبفهمش وادينى خدت على دماغى ارتاحتو كده انتو صح وانا غلط
كريمة :احنا مبنقولكيش كده علشان تقولى كده يا راندا احنا بنقولك كده علشان تفوقى لنفسك ومتكرريش غلطك وتتعلمى منه
لبنى :وعلشان متزعليش عليه ده ميستاهلش يتزعل عليه خسارة فيه تضيعى وقتك وانتى حزينة بسببه او بتعيطى عليه والله العظيم ما يستاهل دموعك
كريمة :ولا يستاهل حبك ولا يستاهلك كلك على بعضك واهو الحمد لله مبقتيش من نصيبه
لبنى :ربنا نجاكى يا حبيبتى اه والله ربنا نجاكى منه اللى زى ياسر دول بيبقو شر للى تقع فى طريقهم واهو الحمد لله ان ربنا خلاكى تشوفيه على حقيقته وتقتنعى ان دى حقيقته
راندا :هنساه صح تفتكرو هعرف انساه
لبنى :هتنسيه وهتحبى تانى
كريمة :انتى اصلا محبتيهوش كل الحكاية انه اول واحد يدق باب قلبك وقلبك استعجل وفتحله من غير ما يتأكد اذا كان يستاهل يدخل قلبك ولا لا
انتى حبيتى اهتمامه بيكى كلامه الحلو ليكى انما هو نفسه انتى محبتيهوش لانه ميتحبش ياسر واللى زيه دول ميتحبوش دول شر لازم ندعى ربنا انه يكفيهولنا
ياسر واللى زيه دول بيكسرو قلب اللى تحبهم وبيجرحو كرامتها
ربنا يكفيكى جرح القلب والكرامة
راندا بحزن :ما جرحهم واللى كان كان يا كريمة
لبنى :جرح عن جرح يفرق صدقينى انتو لسه فى الاول وزى ما كريمة قالت انتى محبتيهوش كل الحكاية انه اول واحد يهتم بيكى فطبيعى تتعلقى بيه بس الحب حاجة تانية وياسر لا بيعرف يحب ولا يستاهل يتحب
راندا :ربنا يعوضنى خير
كريمة :اللهم امين ربنا يراضيكى ويراضى قلبك باللى احسن منه مليون مرة
لبنى :ربنا يرزقك باللى يستاهلك
راندا :يا رب...كنت اوفر انا لما قولت اتصدمت صدمة عمرى صح
لبنى :الصراحة اه
ياسر تاريخه اسود غير مشرف بالمرة لا يليق خالص بالثقة اللى كنتى حطاها فيه دى
راندا :ما انا قولت حبى هيغيره
كريمة :هندى اوى الجو ده
بصى يا راندا التغيير ده حاجة صعبة جدا ومينفعش تدخلى مع حد فى علاقة وانتى ناوية تخليه واحد تانى
انتى بتتقبلى الشخص زى ما هو اتغير خير وبركة متغيرش اديكى قادرة تتحمليه راندا :وان كان فيه عيوب مقدرش اتحملها
كريمة :يبقى متقبليش بيه مش تقبلى وتقولى هغيره ولما تكتشفى انه مش هيتغير تتصدمى صدمة عمرك
راندا :معاكى حق
لبنى :المهم برضه مش هتجيبى معايا الغسول
كريمة :اجيب غسول بخمسمية جنيه ده غير الكريمات والبرفانات والمكياج
راندا باستغراب :مكياج وبرفان
كريمة :بحطهم لعلى فى البيت
اجيب كل ده ازاى انا لو قولت لعلى انى عايزة كل شهر غسول بخمسمية جنيه هيطلقنى والصراحة يبقى حقه
انا محتاجة حاجة اقدر اداوم عليها وتبقى سكين روتين ليا مش غسول اسرق علشان اجيبه
راندا :طيب فى بدايل حلوة انا بستخدمها
كريمة :بدايل ايه
راندا :صابونة الفحم وصابونة الكركم حلوين اوى وهاتى معاهم غسول بس مش بخمسمية فى غسول انا بجيبه حلو اوى وبريحة الخوخ
الموضوع مش هيكلفك مية جنيه
كريمة :ماشى انا موافقة
لبنى :موافقة
كريمة :طبعا موافقة انتى مش شايفة اللهم بارك بشرتها احلى من حياتى ازاى انا دايسة معاكى فى الحوار ده يا راندا
راندا :خلاص قشطا انا كده كده محتاجة اجيب هجبلى واجبلك معايا
ايه ده احمد جه اهو
احمد :ازيك يا راندا عاملة ايه
راندا :الحمد لله
كريمة :اخبارك ايه يا احمد
احمد :انا تمام الحمد لله منورة هنا يا كريمة
كريمة :ده نورك
احمد بابتسامة :مشوفتكيش من امبارح وحشتينى
لبنى :بجد وحشتك
احمد :ايوه طبعا لبنى انا عندى قلب انتى كل حياته مبيرتاحش غير وانتى قصاده
لبنى :وانا عندى روح بتحبك مبترتحاش غير وانت معايا
كريمة :وانا عندى مرارة واحدة فقعتوها بأفورتكم دى
راندا :وانا واحدة هارت بروكن ومش حمل لڤلڤتكم دى انا هروح اكل
كريمة :خدينى معاكى البت لبنى اختى اتغيرت مكنتش كده
راندا :واحمد اخويا برضه اتغير
من ساعة ما كتبو الكتاب وهما على الحال ده انتى اصلك مشوفتيش حاجة دى اقل حاجة عندهم دلوقتى
كريمة وهى بتضحك :حلاوة البدايات بقى يلا ربنا يسعدهم
راندا :انتى هتباتى معانا
كريمة :لا على هيجى ياخدنى بالليل
