غوى بـ عصيانه قلبي ❤️‍🔥

٥٦ ج ٢

تلهف نفادي لطلب العفو منه :
-وانا خدامك يا بيـه .. كل اوامرك مُجابة ، المهم رضاك .

فتح عاصي خزنتـه وأخرج سلاحه وتعمد أن يشد أجزاءه أمام عيني نفادي ليرعبه :
-بس أنا يا نفادي ما ينفعش كلامي مايتسمعش ولا يتلعب عليا من ورا ضهري ؟!

-لا يا بيـه .. ماعاش ولا كان اللي يلعب من ورا ضهرك ، أنا رقبتي فداك ..

-هنشـوف .. هنشوف يا نفادي، ومتقلقش فلوسك موجودة أول ما تسلمني حماد هسلمك فلوسك ..

هتف نفادي بفرحة :
-ده كتير والله ياباشا ... يومين ويكون حماد واقف مكاني ..

اجرى عاصي مكالمة هاتفيـة بالرجل المختص بملازمة نفادي أن يأتي ثم ألقى عليـه جُملة أوامره قائلًا :
-تاخد نفادي ورجالته مزرعة الفيوم .. هيشتغلوا هناك ، وحقهم يوصل يوم بيوم .. فاهم !!

رحل الرجل بصحبة نفادي الذي لم يكف عن الهتاف والسلامات ..أمسك عاصي هاتفه واجرى مكالمة هاتفية وقال باختصار :
-بكرة الضهر تجيب أخوات رسيـل هنا على القصـر .. وخليهم يعيشـوا عادي ، يعني ينزلوا المرسى ويباشروا شغل أبوهم .. مش عايزهم يحسوا انهم محبوسين ..

ثم وثب عاصي خارجًا من مكتبـه على صـوت مراد المرتفع :

-في البيت ده محدش صوتي يعلي علي صوتي ..

دار مراد إليه :
-كـويس أنك هنا ، يعني أيـه ممنوع أشوف مراتي ..

تدخل تميـم :
-ممكن تهدأ يا مراد .. هنتفاهم ونوصل لحل ..

عاصي بحزم :
-هنا مفيش تفاهم .. اللي أقوله هو وبس اللي يمشي ..

خرج مراد عن صمته منفعلًا :
-انت بتعمل كده ليـه ؟! وبتدخل في حياتها ليه ؟! ما تشوفها هي عايزة ايه واعمله .. ليه تقرر بلسانها ..

-عشان هنا وبس أنا اللي بحدد كل واحد يعمل أيه وميعملش أيه .. وطالما سمحت لك تدخل البيت ده يبقى تحترم كلامي وتنفذه ..

وقف تميم بينهم كالسـد ليثبط من شحنات غضبهم المتفجرة :
-والله ما هينفع الجنان اللي أنتـوا فيه ده ؟!!

احتشد الجميـع على صوتهم الجمهوري وتفتحت أبواب الغرف الموصدة .. تكونت حولهم دائرة من اهل القصر ليشاهدوا شجارهم المتصاعد.. حسم عاصي الأمر قائلًا :

-وريني هتاخد مراتك أزاي من غير موافقتي يا مراد ..

-زي ما أخدتها أول مرة يا عاصي ..

رد عاصي ساخرًا :
-ااه عشان تتخطف تاني ، أنت مش مكسوف من نفسك ، مادام معرفتش تحميها خدتها ليـه .. ؟!

عارضه مراد :
-وأنت لما مراتك اتاخدت من قُدام بيتك عرفت تحميها ؟!!

تدخلت عالية بينهم صارخة :
-بس يا عاصي ، بس يا مراد ... بس بقا حرام عليكم .