حكايات منار

حكاية " الانسان بطبعه "

بعد نص ساعة
جنات :يعنى هى بعد ما فضلتو شهور رايحين جايين سوا وبتخرجو تقريبا كل يوم وبتتكلمو فى الموبايل طول الوقت وغيرة والبسى ومتلبسيش وهى تضايق لو اتكلمت مع واحدة غيرها وبتقولك وحشتنى وبتقولها وحشتينى وجايبين لبعض هدايا فى الفالنتين
لما قولتلها انك بتحبها وعايز تتقدملها قالتلك انكم صحاب مش اكتر
هيثم :اجل يا سيدتى هو ده بالظبط اللى حصل
جنات :صحيح الانسان بطبعه واطى
يعنى لما هى شايفة انكم صحاب بتتعامل معاك كأنكم مرتبطين ليه سايباك تتصرف معاها على اساس انكم مرتبطين ليه وفى الاخر تقولك احنا اصحاب وبس
هى الحركة المستفزة دى مش انتو اللى بتعملوها فينا هو الوضع اتغير امتى مين لعب فى الاعدادات يا جماعة
هيثم وهو بيضحك :الدنيا اتقل خيرها يا جنات يا بنتى
عارفة انا اللى هيجننى هى ليه عملت كده غير حرقة دمى على اللحظة اللى قالتلى فيها كده وشكلى اللى كان زى الزفت قدام نفسى قبل ما يكون قدامها
غير كل ده انا فعلا عايز اعرف هى عملت كل ده ليه استفادت ايه
جنات :هو انت مسألتهاش هى عملت كده ليه هو انت اصلا كان ايه رد فعلك لما قالتلك كده
هيثم :طلعت فلوسى حاسبت وقولتلها كتك القرف وسيتها ومشيت
وبعدها هى اتصلت بيا كتير مرديتش فضلت تبعت رسايل بقى تقولى هى ذنبها ايه فى انى فهمتها غلط وهى موعدتنيش بحاجة ومقالتليش انها بتحبنى انا علشان اريح دماغى عملتلها بلوك من كل حاجة
جنات وهى بتضحك :انا مش بسخر من آلامك والله بس مسخرة اوى بتخيلها وهى بتكتبلك انا موعدتكش بحاجة ومقولتلكش انى بحبك
هيثم وهو بيضحك :ما هو هم يبكى وهم يضحك
بس انا فعلا نفسى اعرف هى عملت كده ليه
جنات :يمكن مريضة نفسية عندها عقدة نص بتحاول تعوضها
ويمكن راجل عمل فيها كده فهى كانت بتنتقم لنفسها فيك
الاحتمالات كتير اللى انا متأكدة منه انها كانت قاصدة اللى حصل ومش مجرد سوء فهم عندك زى الهرتلة اللى هى بتقولها دى
هى عقدتك انت من بعدها مبقاش عندك ثقة فى اى بنت
هيثم :مش عقدتنى بس قفلتنى من الصنف كله قفلتنى من الحب نفسه سدت نفسى
جنات :ليك حق الصراحة
بس عارف خسارة فيها تعملها قيمة بالشكل ده هى اللى تستاهله انك تنساها وتكمل حياتك عادى خالص
واهو احتياطى متتصرفش مع واحدة على اساس انكم مرتبطين غير لما تبقو متفقين على ده ممكن كمان توثق ده بعقود
هيثم وهو بيضحك :يا سلام مروحش اسجل العقود فى الشهر العقارى بالمرة
جنات وهى بتضحك :اسمع كلامى تكسب
اقولك على الاقل تعترفلك بحبها وسجلها اعترافها ريكورد علشان تبقى فى الامان
هيثم وهو بيضحك :طيب ما اخليها تمضيلى شيكات على بياض اضمن
انتى فى حتة لوحدك يا جنات
جنات وهى بتضحك :طيب ما حلو ده انا مبحبش الزحمة

بعد يومين
جنات :اتفضل
هيثم :ايه دى
جنات :قنبلة ..هتكون ايه يعنى يا هيثم ساعة
هيثم :ما انا شايف انها ساعة بس انتى جايبهالى ليه
جنات :انت رفضت فى خروجاتنا انى اعزمك او انى حتى ادفع لنفسى
هيثم :فانتى قررتى تجبيلى بالفلوس اللى كنتى هتدفعيها ساعة
جنات :ايوه
هيثم :وبعد كل خروجة هنخرجها هتعملى كده
جنات :مش لازم كل خروجة ممكن كل خروجتين تلاتة
هيثم وهو بيضحك :وليه يا بنتى تكلفى نفسك بالشكل ده
جنات :انت بتوصلنى للشغل وبتجبنى منه وبنفطر سوا كل يوم وساعات بنتغدى سوا وكل ده على حسابك انت وده مش مريحنى
هيثم باستغراب :ليه مش مريحك
جنات :حاسة انى مسئولة منك وانا مش مسئولة منك انا مسئولة من بابا ومسئولة من نفسى بس مش مسئولة منك
هيثم :طيب على كده لما تجيبيلى هدايا هبقى انا اللى مسئول منك
جنات :لا هبقى بردلك اللى بتعمله وهنبقى خالصين
مش عاجبك بلاش بس يبقى مش هنفطر ولا نتغدى ولا نخرج سوا وخليها على قد انك بتوصلنى فى طريقك وخلاص
هيثم :لا طبعا موافق انا عايزك تغرقينى هدايا جيبيلى كل اللى نفسك فيه انا كده كده مستفيد انتى زوقك حلو
جنات بابتسامة :عجبتك الساعة
هيثم :جدا استنى هركن البسها واقلع الساعة اللى انا لابسها
جنات :مرتاح فى شقتكم الجديدة
هيثم :اه خدت عليها ودى كمان اقرب لشغلى واحسن علشان بابا انتى عارفة اننا سيبنا شقتنا القديمة علشان تعبه وانه مبقاش بيقدر يطلع السلم بسبب الغضروف اللى جاله فبيعناها واشترينا شقة دور ارضى وهو وماما اللى اختارو نشترى هنا علشان يبقو قريبين من باباكى ومامتك وانا وافقت لان هنا اقرب لشغلى ومادام ده اللى هيريحهم فهقول لا ليه يعنى
جنات :ومن ساعة ما نقلتو واحنا مقضينها زيارات واخرتها دبسوك فى انك توصلنى واذ فجأة بابا بقى بيخاف عليا من سواقين التاكسى والاوبر واهو انت احسن منهم لانه عارفك وهيبقى مطمن عليا اكتر وانا معاك
هيثم :احلى تدبيسة على فكرة يا ريت كل التدبيس كان يبقى كده