حكايات منار

حكاية " نجاح "

بعد سنة ونص
فريد :دينا...ديناااااا...تعالى طلعيلى الشراب الابيض
دينا :ايوه يا فريد فى ايه
فريد :طلعيلى الشراب الابيض مش لاقيه
دينا :علشان هو فى الغسيل يا فريد
دور على الرمادى ولا الأسود هيليقو
فريد :دورى انتى
دينا بصوت واطى :مش عايزنى البسهولك بالمرة
فريد :مش هتبطلى تبرطمى بصوت واطى
مبسمعش بتقولى ايه
دينا :لو برطمت بصوت عالى كده مبقاش اسمها برطمة
خد الشراب الاسود اهو
فريد :شكرا يا مدام دينا
دينا :فريد انت عارف انى مبحبش كلمة مدام دى 
فريد :اومال اقولك ايه
دينا :قولى دينا او ديلا قول يا سيدى الجماعة ولا حتى الحكومة
بس بلاش كلمة مدام دى
بكرهها
فريد :بس انتى مدام فريد مهاب
دينا :وانا مأنكرتش
بس متقوليش كلمة مدام دى بتحرق دمى
فريد :بعد الشر على دمك يا ديلا
قوليلى صحيح هما بيقولولك ديلا ليه
ده مش دلع دينا
دينا :راندا بنت خالتى وهى صغيرة كانت لدغة فى حرف النون بتنطقه لام
كانت بتنطق اسمها رالدا بدل راندا وبتنطق اسمى ديلا بدل دينا
هى كبرت وبقيت بتنطق النون عادى مبتخليهاش لام
وانا اللى ديلا دى لزقتلى وبقى الدلع بتاعى ديلا وعيلة بابا وعيلة ماما واصحابى كمان بيندهونى بيه
فريد وهو بيضحك :يا سلام اما قصة عبرة بصحيح
دينا :من غير ما ترخم وتتريق انت اللى سألت
متندمنيش انى جاوبت
فريد :وانا اقدر برضه اتريق على مراتى حبيبتى اللى اسمها حلو ودلعها احلى
دينا وهى بتضحك :اه تقدر عادى
حبيبى انت متنمر بطبعك
فريد وهو بيضحك :ده حقيقى
انا هنزل بقى
دينا :متنساش تجيب لانشون بالزيتون وانت راجع وهات كمان جبنة براميلى بالفلفل
وهات بعشرة فينو من المخبز
فريد :ماشى
دينا :فريد متنساش وتجيب الانشون سادة والجبنة من غير فلفل
فريد :انا امتى عملت كده
دينا :انت كل مرة بتعمل كده
فريد :ما انتى اللى  طلباتك معقدة يا ديلا
ما اجيب اى حاجة تحطيها فى الفينو وخلاص
ولا هو الفينو بيتشرط عليكى تحطى فيه لانشون بالزيتون
دينا :لا انا اللى بحبه بالزيتون
والجبنة البراميلى انت اللى بتحبها بالفلفل علشان تبقى حراقة
ولو مجيبتهاش بالفلفل بتخلينى اقطعلك فيها فلفل حراق
فليه الفرهدة ما تجيبها بالفلفل وخلاص
فريد :هى فرهدة فعلا
انا بناقشك ليه ما اقولك ماشى وخلاص
دينا :وترجع تنسى
بص وانت راجع رن عليا افكرك بيهم
فريد :خلاص ماشى
دينا :انت...
فريد قاطعها :سيبينى انزل بقى انا كان المفروض ابقى عندهم من نص ساعة
دينا :خلاص ماشى خلى بالك من نفسك
فريد وهو بيضحك :ماشى هبص يمين وشمال وانا بعدى الطريق
فى ايه يا دينا وانا نازل احارب ده انا رايح لصحابى
دينا :الحق عليا خايفة عليك
ماشى يا سيدى انا غلطنالك
فريد :لا يا حبيبتى انتى مش غلطانة انا بهزر معاكى
متحرمش من خوفك عليا ابدا يا رب
يلا فى حفظ الله
دينا :مع السلامة يا حبيبى

بعد شهر
فريد :يعنى كان لازم اشترى حلويات ما كنتى عملتيهم انتى يا دينا وخلاص
دينا :انا اللى قدرت اعمله عملته
نضفت البيت
وعملت غدا مفيش احلى منه
وعملت قهوة وشاى لما زهقت
وعصير وفاكهة
مكنش فى طاقة لحلويات كمان
فريد :ما كل الستات بتعمل فوق طاقتها عادى
دينا :لا مش كلهم
واللى بيعملو كده غلطانين
وانا مش مقصرة يا فريد
انما الحلويات دى كانت هتبقى هدة لأنك مش هترضى بنوع واحد
لازم تلاتة اربعة
فهيبقى تعب وكمان هنلبس احنا فى صوانيهم
لان اصحابك بمراتاتهم مش هيخلصوهم وهنفضل انا وانت اسبوع ناكل فيهم
اننا نشترى احسن اهو الكميات اللى تتجاب تتاكل
ولو فضل اللى يفضل يبقى بسيط
غير انى طاقتى خلصت فى اللى عملتو
انا عارفة ان مامتك بتعمل حتى الحلويات فى عزوماتها
ماما كمان كده على فكرة
هتقولى وانتى مش زيهم ليه
هقولك لأن ماما انا واخواتى بنساعدها
ومامتك اخواتك بيساعدوها
تقدر تقولى انا مين بيساعدنى
انا فضلت يومين بحضر للعزومة دى
مخلتش واحدة من مراتات صحابك
تغسل طبق حتى ولا تعمل عصير ولا حتى شاى
وانت بدل ما تقولى تسلم ايدك يا حبيبتى على تعبى ده كله
لا بتلومنى ليه معملتش حلويات كمان
هو ريهام مرات عمرو صاحبك لما كانو عازمينا
مش كانت جايبة الاكل كله من بره
ونيفين مرات وائل مش كانت جايبة واحدة بالفلوس تعمل معاها
وسارة مش قالت إن احلى حاجة انها ساكنة قريب من اهلها علشان اخواتها ومامتها مبيسيبوهاش فى العزومات دى وبيعملو معاها كل حاجة
ونور مرات باسل مش بتخليه ياخدها من قصرها والعزومة بتكون فى مطعم بره البيت علشان يبقى لا تعب تنضيف ولا عمايل اكل
انا مش مقصرة يا فريد
ومش هعمل اكتر من طاقتى علشان انت ترضى
انا مبطلبش منك اكتر من طاقتك
ومقدرة تعبك علشانى وعلشان بيتنا
وكنت اتمنى انت كمان تقدر تعبى
فريد :خلاص متعيطيش
خلاص حقك عليا انا اسف
انا مفكرتش فى كل اللى قولتيه ده
خلاص والله انتى ست بيت مفيش منك
معاكى حق انتى مش مقصرة
دينا وهى بتعيط اكتر :انتى حسستنى انى معملتش حاجة اصلا يا فريد
فريد :ايه ده ازاى
وصينية المكرونة بالبشاميل الحلوة دى
ده انا كلت نصها لوحدى
والفراخ اللى فى الفرن عمرو كان بياكلها منها بمزاج لدرجة ان ريهام سألتك عن الوصفة بتاعتها
والرقاق اللى نيفين كلته مع انها مبتحبوش بس قالت انه من ايدك حاجة تانية
بلاش كل ده كوباية الشاى اللى محدش بيظبطهالى كده غيرك
ده انا نفسى مبظبطهاش لنفسك زى ما انتى بتظبطيها
بتبقى عالمية حقيقى مفيش احلى ولا اطعم من كده
دينا وهى بتضحك :يعنى كل اللى عملته ده وانت قاعد تكتب شعر فى كوباية الشاى
فريد :الشعر فى اللى بتعمل الشاى حلو اوى كده تسلم ايديها وعينيها ويسلم كل حاجة حلوة فيها
دينا وهى بتمسح دموعها وبتضحك :هنا سأسكت كثيرا...هنا سأسكت كثيييييرا
لو كل مرة هعيط هتقولى كلام حلو اوى كده فاعمل حسابك مش هبطل عياط
فريد وهو بيضحك :لا بالله عليكى انا مبكرهش فى حياتى قد النكد
هو انتى اه شكلك حلوة وانتى معيطة ومحمرة كده
بس شكلك وانتى بتضحكى احلى
دينا :بتثبتنى وانا بتثبت
ده انت مش بس مقطع السمكة وديلها لا انت واكل السمكة ورامى ديلها يا فريدو
فريد :لا والله مش كده بس اخواتى كلهم بنات بقى
فاتعلمت منهم ان البنت مبتجيش الا بالكلام الحلو
انما انا مكنتش مقطع الدنيا بنات  كنت بخاف يتردلى فى اخواتى
فكنت بتقى ربنا فى بنات الناس علشان ربنا يبعت لاخواتى اللى يبقى ربنا فيهم
دينا :حبيب قلبى اللى بيتقى ربنا
فريد :متزعليش منى
انا والله مببقاش قصدى اضايقك
بس لسانى ساعات بيخونى وبيقول كلام يزعلك
دينا :مش زعلانة منك
كفاية انك بتراضينى
انا مليش غيرك يا فريدو
فريد :اهو علشان الكلمتين الحلوين دول متعمليش بكرة غدا هنجيب اكل من بره
دينا :بكرة هناكل اللى فضل من عزومة النهاردة
فريد :خلاص بعد بكرة متعمليش غدا
دينا :مصر يعنى انا مبقتش زعلانة خلاص والله
فريد :ايوه مصر
دينا وهى بتضحك :طيب ما تدينى حقى ناشف
وانا اعمل غدا عادى
فريد وهو بيضحك :مادية حقيرة
وانا اللى بحاول اراضيكى
دينا :انا بتراضى بالفلوس عادى
مسى عليا بميتين جنيه هتلاقينى اتراضيت على طول
فريد وهو بيضحك :صدمة كبيرة
ايه ده مراتى طلعت مادية اه عوضنى عوض الصابرين يا رب
دينا :يا باشا عايزة اجيب فستان علشان فرح بلال ومروة
مش متخيلة انهم لسه هيتجوزو
واحنا اللى عرفنا بعض بسببهم اساسا اتجوزنا من سبع شهور
فريد :النصيب يا ديلا
دينا :اه صحيح انا عمرى ما سألتك انت ليه ساعتها سألتنى عن بلال
يعنى بيتهيألى فى المواقف اللى زى دى بيسألو رجالة
فريد :ما انا سألت رجالة بعد ما سألتك
بصى انا سألتك لسببين
اولهم انك بنت فمن اجابتك اشوف بلال ده بتاع بنات وخاربها ولا محترم مع بنات بلده
دينا :منطق يحترم
طيب وتانى سبب
فريد :كنت بطول الكلام معاكى شوية
دينا بصوت واطى :وانا اللى كنت فاكراك محترم
فريد وهو بيضحك :مش كفاية برطمة وتخليكى شجاعة وتتكلمى بصوت عالى بقى
دينا وهى بتضحك :لا يا فريدو من خاف سلم
وبعدين انا بحب البرطمة
بعتبرها جزء لا يتجزء من شخصيتى
فريد وهو بيضحك :يعنى انا هستحمل برطمتك دى العمر كله
دينا وهى بتضحك :عادى يا فريدو ما انا هستحمل انى ادورلك على شراباتك العمر كله
اقولك بطل تلبس شرابات وانا بطل برطمة
فريد :انا مقدرش ابطل البس شرابات
دينا :وانا مقدرش ابطل برطمة
فك كده وخليك فريش خلى الأربعين ولا الخمسين سنة اللى هنقضيهم مع بعض يعدو على خير يا فريدو
فريد وهو بيضحك :يعنى يبقى الوضع على ما هو عليه يا ديلا
دينا وهى بتضحك :بالظبط كده الله ينور عليك يبقى الوضع على ما هو عليه وعلى المتضرر اللجوء للقضاء 
واحنا مش هنجرجر بعض فى محاكم الأسرة ولا ايه
فريد وهو بيضحك :لا نستحمل وخلاص خلى الأربعين ولا الخمسين سنة اللى هنقضيهم مع بعض يعدو على خير
انتى عارفة انك عسل
دينا بابتسامة :عارفة طبعا
انت بقى عارف انك حبيبى
عارف ولا مش عارف
اوعى تقول مش عارف هزعل
فريد بابتسامة :عارف انى حبيبك
المهم افضل حبيبك العمر كله
دينا :ايوه طبعا
ان شاء الله نفضل سوا دنيا وجنة فى الاخرة كمان
فريد :ايه ده طيب والحور العين
دينا :انا هبقى احلى منهم لما ادخل الجنة بإذن الله
وبعدين هل تعتقد انى فى حد غيرى ممكن يرضى يدورلك على شراباتك
سواء ست تانية او حتى الحور العين
فريد وهو بيضحك :ربنا ميحرمنيش منك لا فى الدنيا ولا فى الجنة يا رب
دينا بابتسامة :ولا يحرمنى منك لا فى الدنيا ولا فى الجنة يا رب

احلى حاجة فى علاقتى بفريدو
مش اننا مبنتخانقش او اننا مبنغلطش فى حق بعض
ده مستحيل اى اتنين حتى لو بيموتو فى بعض وبينهم عشق الدنيا بحالها
او لو متفاهمين وعاقلين وبينهم تفاهم العالم كله
طبيعى يتخانقو ويحصل مشاكل ويغلطو فى حق بعض حتى لو من غير قصد
المهم بقى انهم يكونو بيعرفو يصالحو بعض وبيعرفو يحلو مشاكلهم سوا
النجاح مش انكم متتخانقوش
النجاح هو انكم تعرفو تصالحو بعض وتراضو بعض بعد ما تتخانقو
هى دى احلى حاجة فى علاقتى بفريدو
وهو ده النجاح اللى بجد💖
#حكايات_منار

فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر