حكايات منار

حكاية " نعمة كبيرة "

صلاح :تشربى ايه
روان :لا نشرب ايه نتغدا الاول انا جعانة
صلاح وهو بيضحك :اشرب ايه اطلبلى نص فرخة
روان :لا مش عايزة اكل فراخ
هطلب سمك
صلاح :وانا هطلب فراخ مشوية وكفتة ورز وسلطات بقى

بعد نص ساعة
روان :صلاح انت عايز ورك الفرخة ده
صلاح وهو بيضحك :البنات بتأكل خطيبها بإيديها من اكلها
خطيبتى انا
ادهم انت هتاكل سندويتش الكفتة ده
روان :ادهم مين وبعدين انا مش عايزة الكفتة
بس ورك الفرخة ده غارينى الصراحة وبعدين ما انت قدامك اتنين هات واحد
صلاح وهو بيحطه قدامها :اتفضلى
ولو انى مش فاهم ايه علاقته بالسمك اللى بتاكليه
روان :ملوش علاقة بس مزاجى اكله
صلاح وهو بيضحك :كيفى كده
انتى ملكيش فى قلشات الأفلام خالص مع انهم بيليقو عليكى جامد
روان :لا مبفهمهمش بس لما بيتشرحلى اتقالت فى فيلم ولا مسلسل ايه بفتكره
صلاح :اهو ده اللى ناقص اشرحلك الافيه
لا يا ستى دى حاجة رخمة
انا بحب قلشات الأفلام اوى
مع انى طالع عينى من افيه احنا اسفين يا صلاح
بس برضه بحبهم اوى
روان :مليش فيهم
يعنى انا بتفرج على الفيلم بس مبحفظش افيهاته ولا بعرف اقولها فى موقف شبه اللى اتقالت فيه فى الفيلم
هو انا كده دمى تقيل بالنسبالك
يعنى انت كنت عايز واحدة ترميلها ايفيه ترد عليك بإيفيه
صلاح :انا مكنتش عايز غيرك يا روان
وانتى دمك خفيف عادى ويمكن عدم هزارك بإيفيهات الأفلام دى حاجة بتميزك
انا بحب قلشات الأفلام جدا وتريندات الفيس كمان
بس ساعات كتير بحس انهم خلو كل الناس شبه بعض بيقولو نفس الكلام وبيضحكو على نفس الحاجات
بقو نسخة من بعض كده مفيش تميز
بس انتى مميزة
بإنك مش حافظاهم بعربية الايس كريم اللى كلتيها من شوية
بورك الفرخة اللى ضربتيه ورجعتى تاكلى بعده سمك عادى جدا ده
روان :انا قضيت سنين كتير من عمرى تعبانة
كنت طفلة مش من حقها تلعب وتبذل مجهود زى كل الأطفال وخطر عليا التراب والطين والميكروبات لأن مناعتى ضعيفة ولا كان ينفع اكل اى اكل برضه
حياتى كان فيها حاجات كتير متنفعش وممنوعة عليا
لحد ما ربنا كرم ومبقتش تعبانة خلاص بقيت زيى زى كل الناس ينفع اعمل اى حاجة انا عايزاها
فمن ساعتها وانا بعوض اللى فاتنى
ومش بس كده لما بتكون حياتك تفاصيلها كتير ده بيساعدك انك متكتئبش ومتتكسرش لو حد خرج من حياتك
تفاصيل حياتك هتلهيك هتاخدك وتمشى بيك قدام مش هتفضل واقف مكانك
مينفعش تسيب نفسك لنفسك
لان وقتها هيجيلك اكتئاب وهتكره حياتك
لازم دايما تشغل نفسك بحاجات كتير
تسحلها فى حوارات كتير
صلاح :حلوة نظريتك للحياة
روان :انت كمان نظريتك حلوة ومش غلط انت بتحب تدى كل حاجة وقتها وتدى كل واحد حقه
انا اكيد فى تفاصيل بتعدى عليا وحاجات بقصر فيها غصب عنى وسط الزحمة والكركبة اللى معيشة نفسى فيها دى
انت صح مش غلط
صلاح :انتى كمان صح مش غلط
ودى ميزة الحياة
ان ملهاش كتالوج لازم كلنا نمشى عليه
لا عادى جدا كل واحد يعيشها بالطريقة اللى تريحه
مادام الطريقة متغضبش ربنا ومتظلمش حد من عباده يبقى كل الطرق صح
روان :اهو انا بقى اكتر حاجة بحبها فيك هى البساطة اللى بتقول بيها كلام كتير المفروض انه مكلكع ومعقد
بس بطريقتك بلاقيه بقى سهل وبلاقينى فهمته
صلاح :ده علشان انتى دماغك كبيرة بس وعندك وعى
روان :لا انت فعلا اسلوبك بسيط وفى نفس الوقت مقنع
سهل ممتنع
الواحد يسمعك يفكر انه يقدر يتكلم زيك يجرب ميعرفش
صلاح :انتى عارفة انا بحبك ليه
روان وهى بتضحك :اكيد مش علشان باكل عشر بولات ايس كريم مع بعض
صلاح وهو بيضحك :لا علشان بعرف اتكلم معاكى
احنا متفاهمين رغم اننا مختلفين عن بعض
بس فى بينا تفاهم فى لغة حوار
انا بحب اتكلم معاكى
الكلام معاكى مش ممل
تيجى نروح الكورنيش ناكل حمص الشام
روان :مبحبش حمص الشام بس قشطا نروح انت كله وانا اشرب عصير ولا قهوة