فى الجلسة اللي بعدها
مالك :بعد ما سبت الشغل عصبيتى زادت وبقيت باخد مهدئات مبتفارقش جيبي
من سنة بدء تظهر عليا اعراض اكتئاب دايما حزين مفيش حاجة بتفرحنى ولا تريحنى ولا حتى العادة السرية لما بمارسها مبقتش احس براحة ولا متعة بس زى ما انت قلت بقت ادمان ولازم اعملها حتى لو مش مستمتع بيها حتى لو مش عايز اعملها بقت جرعة ولازم اخدها
طول الوقت بفكر في الانتحار وعلشان كده جتلك يا دكتور
ابراهيم :وعلشان كده جتلى ليه
مالك وهو بيعيط :علشان انا مش عايز اموت بالطريقة دى مش عايز انهى حياتى بايدى مش مستعد اقابل ربنا دلوقتى مينفعش اقابله هو غضبان عليا انا عصيته كتير كده هدخل النار وانا مش عايز ادخلها يا دكتور انا خايف من ربنا خايف من عقابه لازم ابطلها يا دكتور لازم اقرب لربنا تانى انا ممكن ابطلها صح انت هتساعدنى يا دكتور انت تقدر تساعدنى ابطلها مش كده انا مش هموت وانا كده يا دكتور في حل صح في علاج مش كده
ابراهيم :اكيد فى علاج يا مالك بس محتاج منك صبر وتعب
مالك :انا مستعد اصبر واتعب مستعد اعمل اي حاجة بس مفضلش كده يا دكتور انا مينفعش افضل كده
ابراهيم : اولا هتقلل المهدئات اللي بتاخدها دى واحدة واحدة لحد ما هتبطلها خالص
ثانيا مش هتتفرج علي افلام اباحية نهائي ولا هتمارس العادة السرية خالص يا مالك ولا مرة واحدة حتى
دى مفيهاش تدريج لو مبطلتهاش مرة واحدة يبقي عمرك مهتبطلها انت فاهمنى
مالك :فاهمك يا دكتور فاهمك وحاضر هعمل كل اللي قلتلي عليه
ابراهيم :وقت الجلسة خلص نكمل الجلسة الجاية
فى الجلسة اللي بعدها
مالك :انا تعبان اوى يا دكتور كمان مش بجوع خالص خالص مبحسش بالجوع نهائي ومش قادر اركز في اي حاجة حتى الصلاة بصلي الفرض كذا مرة لانى بنسا حاجات وانا بصلي
وعصبيتى زادت مقلتش خصوصا انى سمعت كلامك وقللت المهدئات كمان مبنامش غير ساعة او ساعتين بالكتير مش عارف انام حاسس ان دماغى هتنفجر
ابراهيم :ده طبيعى مش احنا اتفقنا انها ادمان
يبقي اكيد لما تيجى تبطلها هيبقي في اعراض انسحاب
استحمل يا مالك قلة الاكل والنوم مش هيموتوك بس صدقنى العادة دى هتموتك اخرتك هتكون علي ايديها لو مبطلتهاش
كمان انت لازم تشتغل لازم تكون بتعمل حاجة فى يومك الفراغ ده اكبر عدو ليك واكبر نقطة ضعف ليك وانت بتحاول تبطل العادة السرية او بتحاول تبطل اي حاجة غلط بتعملها فى حياتك انا عايزك تروح المكان ده
ده مكتب للدعاية والاعلان بتاع اخويا انا كلمته عنك وهو مستنيك تروحله وهيعمل معاك مقابلة ولو اقتنع بيك هيشغلك معاه
مالك بسعادة :بجد يا دكتور انا مش عارف اشكرك ازاى بس...بس انت قلتله حضرتك تعرفنى منين
ابراهيم :متقلقش ميعرفش انك مريض عندى دى اسرارك وانا مش من حقى اطلعها اهم حاجة جهز سي في حلو كده وروحله واتكلم معاه بثقة يا مالك انت شاطر في شغلك وتقدر تاخد الشغل ده وتقدر تبطل وتقدر ترجع تعيش حياتك بشكل طبيعى من تانى
وقت الجلسة خلص نكمل الجلسة الجاية وتقولي عملت ايه في مقابلة الشغل الاسبوع ده تروحله يا مالك متكسلش ولا تأجلها زى مقلتلك لازم تشغل وقتك مينفعش تبقى فاضى اتفقنا
مالك بابتسامة :اتفقنا يا دكتور ان شاء الله اجيلك الجلسة الجاية بأخبار حلوة
حكاية "حياة سرية "
Start from the beginning
